Kod Kunnafoni
Kunnafoni
Koow daminɛ kitabu be fɛɛn bɛɛ daminɛko fɔ: k'a ta diɲɛ danko ma, ni adamaden ta, ani Ala ye jama min woloma. A fana be kojugu ni tɔɔrɔ doncogo yira diɲɛ kɔnɔ. Kojugukɛla laban ye jalaki le ye, nga, Ala be cogo ɲini tuma bɛɛ ka adamaden gwɛrɛ a yɛrɛ la.
Kitabu nin tilannin lo yɔrɔ fila: Yɔrɔ fɔlɔ kɔnɔ (1—11), Ala ye diɲɛ ni sogow ani adamadenw dan. Ala tun ye fɛɛn minw bɛɛ dan, o bɛɛ tun ka ɲi. Nga, Adama ni Awa, adamaden fɔlɔw, minw kɔnna ka dan, olu ma Ala ka fɔta bato. K'a ta o waati ma, adamadenw tora ka juguya ka taga. O le y'a to, Ala y'a latigɛ ka diɲɛ halaki ni jiba ye. O cɛnniba nin seen fɛ, dugukolo kan mɔgɔw bɛɛ sara k'a tɔɔ to Nuhun n'a ka denbaya dama ye. O kɔ, adamadenw nana buguya tugu ka dugukolo fa, nga u caaman tun te Ala bato.
Yɔrɔ filanan kɔnɔ (12—50), Isirayɛlidenw bɛmaw le koo fɔra yen. U bɛma fɔlɔ ye Ibrayima ye. A lara Ala la kosɔbɛ, k'a ka fɔta bato. Ala y'ale woloma ka layidu ta a ye k'a kɛ a ka jama faa ye. Ala y'a daa di ko dugukolo kan mɔgɔw bɛɛ bena duba sɔrɔ Ibrayima kɔmɔgɔ barika la. Ibrayima ka koo fɔnin kɔ, a deen Isiyaka koo be fɔ, o kɔ, ale mamaden tan ni fila koo be fɔ olu minw facɛ tɔgɔ ko Yakuba n'o yɛlɛmana ka kɛ Isirayɛli ye.
Yakuba deenw, minw be wele fana ko Isirayɛlidenw, u tagara to Ezipiti jamana na kɔngɔ kama. K'u t'o yɔrɔ la, Yusufu nana kɛ o jamana nin mɔgɔbaba dɔ ye. U ye lafiya sɔrɔ o seen fɛ. Yakuba nana kɔrɔ ka sa. Yusufu fana kɔrɔla, a y'a fɔ a ka somɔgɔw ye ko:
«Ne satuma surunyana. Nga siga t'a la, Ala bena na aw dɛmɛ. A ye layidugwɛlɛn ta Ibrayima ni Isiyaka ani Yakuba ye, ko a bena jamana min di u ma, a bena taga n'aw ye o yɔrɔ la.» (50.24)
Kitabu nin tilancogo
Ala ye diɲɛ ni adamadenw dan 1.1—2.25
Kojugu ni tɔɔrɔ donna diɲɛ kɔnɔ 3.1-24
Adama ka koo, fɔɔ ka n'a bila Nuhun ka koo la 4.1—5.32
Nuhun ni jiba jigiko 6.1—9.28
Adamadenw cayara, u ye sangaso lɔ Babɛli 10.1—11.32
Isirayɛlidenw bɛmaw: Ibrayima, Isiyaka, Yakuba 12.1—35.29
Ezawu kɔmɔgɔw 36.1-43
Yusufu n'a balimaw 37.1—50.26
Одоогоор Сонгогдсон:
Kod Kunnafoni: AKKDC08
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
La Bible en Jula © Alliance Biblique du Burkina Faso, 2007.