Дуулал 109
109
Өмгөөлөл эрсэн залбирал
Удирдаачид: Давидын дуулал.
1Миний магтаалын Бурхан,
Бүү нам гүм байгаач.
2Учир нь буруутууд ба мэхлэгчид
Миний эсрэг амаа нээж,
Миний эсрэг тэд
Худалч хэлээр ярьж байна.
3Бас үзэн ядалтын үгсээр намайг тойруулж,
Миний эсрэг тэд
шалтгаангүйгээр довтлов.
4Хайрын минь хариуд тэд
намайг буруутгаж байна.
Харин би залбирна.#109:4 Магадлалт хувилбар: Тэдний төлөө залбирсан.
5Надад сайныг муугаар,
Хайрыг минь үзэн ядалтаар тэд хариуллаа.
6Буруутыг түүний дээр томилж,
Сөргөлдөгчийг баруун гар талд нь зогсоогтун.
7Шүүгдэх үед нь буруутай гээд
түүнийг урагш гаргаж,
Залбирлыг нь ч хүртэл нүгэл болгооч.
8Хоног өдрүүд нь цөөхөн байг,
Харгалзах үүргийг нь өөр нэгэн аваг.#Үйл 1:20
9Хүүхдүүдийг нь өнчин,
Эхнэрийг нь бэлэвсэн болгооч!
10Хүүхдүүдийг нь хэсүүлэн тэнүүчлүүлж, гуйлгачлуулаач!
Сүйрсэн гэрүүдээс нь
тэднийг холдуулан гаргаач!
11Өөрт нь байгаа бүхнийг зээлдүүлэгч хүнд олзлуулж,
Хүч хөдөлмөрийг нь хөндлөнгийнхөнд тонуулаач!
12Түүнд өршөөл хүртээх хэнийг ч,
Өнчин хүүхдүүдийг нь ч өрөвдөх хэнийг ч үгүй болгооч!
13Хойчийг нь таслаач.
Ирэх үед нэрсийг нь арчуулаач!
14Эцэг өвгөдийнх нь хилэнцийг
ЭЗЭНий өмнө сануулж,
Эхийнх нь нүгэл арчигдахыг
Бүү зөвшөөрөөч!
15Тэдний тухай дурсамжийг
дэлхийгээс арилгуулахаар
ЭЗЭНий өмнө тэднийг байнга байлгаач!
16Учир нь тэрээр хайр энэрлийг үйлдэхээ эс санав.
Харин зүдрэгчийг болон гачигдагчийг,
Мөн зүрхэндээ шаналсан хүнийг үхтэл хавчив.
17Бас хараах дуртай байсан бөгөөд тэр нь буцаж бууг.
Ерөөлд баярлаагүй бөгөөд
Тэр нь ч түүнээс хол байг.
18Хараалыг тэр өөртөө
Хувцас шиг өмсөж байсан.
Дотор нь тэр ус шиг,
Ясанд нь тэр тос шиг шингэг.
19Тэр нь өмсдөг хувцас нь мэт,
Үргэлж бүсэлдэг бүс нь мэт болох болтугай.
20Энэ нь намайг буруутгагчдад хийгээд
Миний сэтгэлийн эсрэг муучлан яригчдад
ЭЗЭНээс өгөх шан болог.
21Харин БУРХАН Эзэн,
Нэрийнхээ төлөө надад Та үйлдээч,
Хайр энэрэл тань сайн учраас
намайг авраач.
22Учир нь би зүдрэгч ба гачигдагч бөгөөд
Зүрх минь миний дотор шархадсан байна.
23Би уртсаж буй сүүдэр мэт алга болж,
Царцаа мэт хийсэн туугдаж байна.
24Мацгаас болж өвдөг минь сулран
Мах бие минь ч өөх тосоор дутагдлаа.
25Би бас тэдэнд шившиг болсонд
Тэд намайг хараад,
толгойгоо сэгсэрч байна.#Мт 27:39; Мк 15:29
26Бурхан ЭЗЭН минь, надад туслаач.
Хайр энэрлийнхээ ёсоор авраач, намайг.
27Энэ Таны мутар гэдгийг
Тэдэнд мэдүүлээч.
ЭЗЭН Та үүнийг үйлдсэн билээ.
28Тэд харааг, харин Та ерөөгөөч!
Босохдоо тэднийг ичгүүрт оруулж,
Боолыгоо харин баярлуулаач!
29Өөрийг минь буруутгагчдыг
ичгүүрээр хувцаслаж,
Өөрсдийнх нь шившгээр тэднийг
нөмрөг мэт ороогооч!
30ЭЗЭНд би үлэмж талархлыг өргөнө.
Олны дунд би Түүнийг магтана.
31Учир нь тэдний сэтгэлийг
Буруушаагчаас аврахын тулд
Тэрээр гачигдагчийн баруун гар талд зогсдог.
Одоогоор Сонгогдсон:
Дуулал 109: АБ2013
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Ariun Bible © Mongolian Union Bible Society 2013.