Иеремиа 2
2
Израилийн гэмшлийг Бурхан хүсэмжлэв
1ЭЗЭНий үг надад ирж
— 2Явж, Иерусалимын чихэнд тунхаглахдаа “ЭЗЭН ингэж айлдаж байна.
«Залуу үеийн чинь зориулалт,
Сүйт бүсгүйнх мэт хайрыг чинь,
Тариалаагүй газар нутаг болох цөлд хүртэл
Намайг дагаж байсныг чинь
Би санаж байна.
3Израиль нь ЭЗЭНд ариун агаад
Ургацынх нь анхны жимс байлаа.
Түүнээс идсэн бүгд буруутай болж,
Тэдэнд хор хөнөөл учирдаг байсан»
гэж ЭЗЭН тунхаглаж байна” гээрэй хэмээв.
4Сонсоцгоо! Иаковын гэр ээ, Израилийн гэрийн бүх ургаас, ЭЗЭНий үгийг сонсоцгоо. 5ЭЗЭН ингэж айлдаж байна.
“Надаас ямар шударга бус зүйл олсон болоод
Надаас та нарын эцэг өвгөд холдож
Хоосны араас явж, өөрсдийгөө хоосон болгов?
6Тэд «Биднийг Египет нутгаас гаргаж,
Цөлөөр, хагссан болон ан цав бүхий газраар,
Хэний ч хөндлөн гарч үзээгүй,
Хэний ч оршин амьдарч байгаагүй
Ган гачиг бүхий мөн үхлийн харанхуйн газраар
Биднийг хөтлөн удирдсан
ЭЗЭН хаана байна вэ?» гэж асуусангүй.
7Би та нарыг арвин жимстэй газарт авчирсан нь
Үр жимснээс нь бас сайн зүйлсээс нь хооллоосой гэснийх билээ.
Гэвч та нар ирж, газар нутгийг минь бузарлав.
Өвийг минь та нар жигшүүрт зүйл болгов.
8Тахилч нар «ЭЗЭН хаана байна вэ?» гэж хэлсэнгүй.
Хууль гүйцэтгэгчид Намайг мэдсэнгүй.
Удирдагчид бас Надаас тэрсэлж,
Эш үзүүлэгчид Баалаар эш үзүүлж,
Ашиг тусгүй зүйлсийн араас явсан.
9Тиймээс Би та нарыг буруутгасаар байх болно” гэж
ЭЗЭН тунхаглаж байна.
“Мөн та нарын хүүхдүүдийн хүүхдүүдийг
Би буруутгах болно.
10Киттимийн эрэгт гатлан оч,
Кедар уруу илгээн анхааралтай ажиглаж,
Үүнтэй адил зүйл болж байсан эсэхийг хар.
11Үндэстний бурхад нь бурхад биш ч гэсэн
Тэд сольдог гэж үү?
Гэтэл Миний хүмүүс яруу алдраа
Ашиг тусгүй зүйлээр сольжээ.
12Тэнгэрс ээ, үүнд хиртхийгтүн!
Мөн чичирч, цөхрөгтүн” гэж
ЭЗЭН тунхаглаж байна.
13“Учир нь Миний хүмүүс хоёр мууг үйлдсэн билээ.
Тэд өөрсдөдөө ус тогтоон барьдаггүй эвдэрхий усан санг чулуу ухан хийхийн тулд
Амийн усны ундарга Намайг умартсан.
14Израиль боол юм уу?
Эсвэл тэр нь төрөлхийн зарц юм уу?
Яагаад тэр бусдын олз болов?
15Залуу арслангууд түүн уруу архирч, чангаар архирчээ.
Тэд газар нутгийг нь зэлүүд хоосон болгожээ.
Хотууд нь оршин суугчидгүй болж галаар устгагдав.
16Мөн Мемфис болон Тахпанхесийн эрчүүд
Чиний толгойн титмийг хусав.
17Тэр чамайг замаар удирдан явж байхад нь
Чи ЭЗЭН Бурханаа орхисноороо
Өөр дээрээ үүнийг авчирсан бус уу?
18Харин одоо чи Нил мөрний уснаас уух гээд
Египет орох зам дээр юу хийж байгаа юм бэ?
Эсвэл Евфрат мөрний уснаас уух гээд
Ассири орох зам дээр юу хийж байгаа юм бэ?
19Хилэнцэт явдал чинь чамайг шийтгэнэ,
Урвалт чинь чамайг яллана.
Мэдэгтүн, харагтун,
ЭЗЭН Бурханаа чи умартсан
Иймд ёр муу ба гашуун нь чиний хувьд байна.
Надаас эмээхүй гэж дотор чинь үгүй юм” гэж
Түг түмдийн БУРХАН Эзэн тунхаглаж байна.
20“Би Танд үйлчлэхгүй” гээд
Чи аль хэдийнээ буулгаа хугалан эвдэж,
Дөнгөө авч хаяжээ.
Өндөр толгод бүрийн доор
Ногоон мод бүрийн доор
Чи янхан мэт хэвтэв.
21Гэсэн ч Би чамд шилмэл усан үзэм, цэвэр үрийг тарьсан.
Тийн атал юунд чи өөрийгөө
Миний өмнө харийн усан үзмийн муудсан мухар мөчир болгов?
22Чи биеэ хужраар угааж, үлэмж ихээр хужир хэрэглэсэн ч
Чиний хилэнцийн толбо Миний өмнө байсаар байна гэж
БУРХАН Эзэн тунхаглаж байна.
23“Би бузарлагдаагүй, би Баал бүрийн хойноос яваагүй” гэж
Чи яаж хэлж чадна вэ?
Хөндий дэх замаа хараач!
Юу хийснээ мэдэж ав, чи!
Чи бол замаа олохгүй хурдлах ингэ,
24Эзгүй цөлд дасаж, орооны үедээ салхи үнэрлэн давхих зэрлэг эм илжиг мэт юм.
Хэн түүний хүслийг тогтоон барих вэ?
Өөрсдийгөө цуцаан түүнийг хайгч үгүй агаад
Сард#2:24 Сард нь: Орооны үед нь гэсэн утгатай. нь түүнийг тэд хялбар олох бус уу.
25Хөлдөө тах хад, хоолойгоо цангахаас хамгаал.
Гэвч чи “Найдвар алга!
Учир нь би харийнхныг хайрласан,
Тэдний хойноос би явах болно” гэжээ.
26Хулгайч илчлэгдэхээрээ шившиг болдгийн адил
Израилийн гэр буюу тэд болон тэдний хаад,
Тэдний амбан захирагчид,
Тэдний тахилч нар
Тэдний эш үзүүлэгчид мөн шившиг болов.
27Тэд модонд “Та миний эцэг”,
Чулуунд “Та намайг төрүүлсэн билээ” гэдэг.
Учир нь тэд нүүрээ бус, нуруугаа Надад харуулав.
Харин зовлонгийнхоо цагт тэд
“Босож, биднийг авраач” гэх болно.
28Өөрсдөдөө бүтээсэн бурхад чинь хаана байна вэ?
Зовлонгийн чинь цагт тэд
Чамайг аварч чадах юм бол тэд босоцгоог.
Иуда, хотуудын чинь тоогоор чамд бурхад байдаг билээ.
29Чи Надтай юунд маргана вэ?
Та нар бүгд Миний эсрэг нүгэл үйлдсэн гэж
ЭЗЭН тунхаглаж байна.
30Үр хүүхдүүдийг чинь Би дэмий цохижээ.
Тэд ямар ч гэсгээлийг зөвшөөрөн авсангүй.
Илд чинь сүйтгэгч арслан мэт эш үзүүлэгчдийг чинь залгив.
31Энэ үеийнхэн, ЭЗЭНий үгэнд анхаар.
Би Израилийн хувьд цөл эсвэл гүн харанхуйн орон байв уу?
Яагаад миний хүмүүс “Бид хэрэн тэнүүчилнэ. Бид Тан уруу дахин ирэхгүй” гэж хэлнэ вэ?
32Онгон охин гоёл чимэглэлээ, сүйт бүсгүй гоёлын хувцсаа мартаж чадах уу?
Гэтэл Миний хүмүүс Намайг тоймгүй олон өдөр мартсан билээ.
33Хайрыг эрэлхийлэхээр чи замаа ямар сайн бэлдэнэ вэ?
Тиймээс булай эмэгтэйчүүдэд хүртэл чи замаа заажээ.
34Бас хормой дээрээс чинь гэмгүй ядуусын амин цус олдсон.
Тэдний эвдлэн орж ирэхийг нь хараагүй атлаа энэ бүхнийг хийгээд, дээрээс нь
35“Би гэмгүй. Уур хилэн нь надаас үнэхээр зайлжээ” гэж чи хэлсэн.
Үзэгтүн, “Би нүгэл үйлдээгүй” гэсний чинь төлөө
Би чамайг шүүх болно.
36Чи юунд замаа өөрчлөн ийм их хэрэн тэнүүчилнэ вэ?
Ассири чамайг шившиг болгосны адил
Египет ч бас чамайг шившиг болгоно.
37Эндээс ч бас чи гараа толгой дээрээ тавиад гарах болно.
Учир нь ЭЗЭН чиний найддаг хүмүүсээс татгалзсан бөгөөд
Чи тэдний хамт өсөн дэвжихгүй гэв.
Одоогоор Сонгогдсон:
Иеремиа 2: АБ2013
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Ariun Bible © Mongolian Union Bible Society 2013.