HAOKAPHOK 7
7
Ra̱phong
(Lk 17.26-27)
1Chiwui thili Prohona Noahli hānga, “Na kala nashi shimkhur katonga marikhong alungli zanghaolu, kaja mithot hili na iwui mangāli khamashungana da ina theihaira. 2Kathara sāyurwui eina avā eina ava̱ ngawor shinini khuiphunglu, kala makathara sāyurwui avā eina ava̱ ngaworkharip khuilu; 3kala kazingli yongkazat vānaola avā eina ava̱ ngawor shinini khuilu, hi okathuili athumwui athei mashimān khavaina. 4Kaja shinithangwui thili ina okathuili ngashun ngayā hangmatithang kazing rongasakra; kala ina sākahai kharing yur kachiva̱ okathuiwui eina shimān ngasakra.” 5Kala Prohona Noahli kakaso saikora chi tākam eina ana sai.
6Okathuili tara̱ kaphong tharān Noahwui zingkum shātharuk kāhairasai. 7#Mat 24.38; Lk 17.27. Kala tara̱ kaphongwui eina yāmshok khavai Noah, apreiva̱, anaomayara ngarā kala athumwui preiva̱ ngarāla marikhongli zangserhaowa. 8Kathara sāyur, makathara sāyur, vānaoyur kala ngaleitungli ngarik kazat yur saikora, 9avā eina ava̱, ngawowor eina Noahli ngasoda, Varewui kakaso athishurda marikhongli zangserhaowa. 10Kala kashinethangwui thili okathuili tara̱ phonghaowa.
11 #
2 Pet 3.6. Noahwui zingkum shākatharuka kum, kachāng kakhanewui tharāda kashinethang kathukawui eina ura̱ kachungkha ngawokkhaishoka kala kazingramwui charfa shoserhaowa. 12Ngashun hangmati ngayā hangmati okathuili kazing rothai. 13Chithang Noah kala awui naomayara ngarā Shem, Ham, Japheth kala apreiva̱ eina naongarāwui preiva̱ kathum, athumli ngasoda, 14athum kala sāyur kachiva̱, sha̱keiyur kachiva̱, ngarikazata yur, vānaoyurla peida marikhongli zangsera. 15Noahli ngasoda kharing khaksui suida khalei saikora ngawowor eina marikhongli zangserhaowa. 16Varena kakaso athishurda phasā khavai yur saikorawui avā eina ava̱ kātong kahai eina Prohona khāmong shungmihaowa.
17Zimiksho hangmatithang zingchā machatlakmada tara̱ chungkhangai chungkāda marikhong chi ngaphongkāhaowa, kala kajuiva̱ ngaphongkāhaowa. 18Okathuili tara̱ kaphong chi markhangai marda marikhong chi tara̱tungli ngaphongkāhaowa. 19Tara̱ chi hakmahānāhaida kazingramwui azingli khalei kajujuiya kaphung saikora ngaphumserhaowa; 20tara̱na phungreitungli pemkāda khuining tharāda phangā tumhaowa. 21Okathuili phasā khavai yur vānao, sha̱kei, ramsā, okathuili asum asum eina paikazata kala mi saikora thihaowa; 22ngalei kathengtungli khalei nātāngkhurli khaksui kasuia kachiva̱ thiserhaowa. 23Ngaleitungli khalei kharingyur kachiva̱, mi, sāyur, kala ngarikazata yur, kazingramli yongkazata saikora okathuiwui eina shimānhaowa. Noah eina ali ngasokasābingmāng taishoka. 24Kala okathuili zimiksho shākha hangphangāthang tara̱ phonga.
Одоогоор Сонгогдсон:
HAOKAPHOK 7: TANGBSI
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.
