Gênesis 10
10
Noé enabu hatu tanakubainibukiaki, na hãtxarã
1Hanua hiri henẽ hatu atxitã netsunikẽ Noé bakeburã, Sem inũ, Cam inũ, Jafé haburi hiwekaĩkĩ hatũ bakebu inũ hatũ bababu bawai hiwei pai eskanibukiaki. 2Jafé huni bakebu kenakinã: “Gómer inũ, Magogue inũ, Madai inũ, Javã inũ, Tubal inũ, Meseque inũ, Tiraski”, inibukiaki. 3Gómerĩ huni bakebu kenakĩ: “Asquenaz inũ, Rifate inũ, Togarmaki”, anibukiaki. 4Javãnẽ huni bakebu kenakĩ: “Elisá inũ, Társis inũ, Quitim inũ, Dodanimki”, anibukiaki. 5Jafé hawẽ bakebu ianẽwã kesha betsa anu bushũ dasibibũ ibu wai shuku tibi hatũ hãtxa betsa wakĩ hatu pashka akeakenibukiaki.
6Camnẽ huni bakebu kenakinã: “Cuxe inũ, Mizraim inũ, Pute inũ, Canaãki”, anibukiaki. 7Cuxẽ huni bakebu kenakĩ: “Sebá inũ, Havilá inũ, Sabtá inũ, Raamá inũ, Sabtecáki”, anibukiaki. Raamã huni bakebu kenakinã: “Sabá inũ Dedãki”, anibukiaki. 8-9Hanushũ ana Cuxe huni bake bawaima kaiã kenakĩ: “Ninrodeki”, ani Ninrode ewatã ha dukũ shanẽ ibui taei kushipai Senhor Deusũ merabewaya Ninrode dekuyahairakĩ yuinaka itxapa tsakapaunikiaki. Habiatiãri Ninrodekiri shinãkĩ huni betsã hawenabu kẽwãkatsis ikĩ yuikĩ: “Senhor Deusũ mia merabewaya mĩ dekuyahairariakũkaĩshanaii, Ninrode keskairã”, akĩ hatu yuipaunibukiaki. 10Sinar mai pakea anu Ninrode shanẽ ibui taekĩ hawẽ maewã tibi Babel inũ, Ereque inũ, Acade inũ, Calné ibu wanikiaki. 11-12Sinar anua maewã betsa Assíria anu kashũ mae bena wakĩ kenakĩ: “Nínive inũ, Reobote-Ir inũ, Calá inũ, Resémki”, aka Resém mae ewapahaira Nínive inũ Calá namakis ketashameakiaki.
13-14Camnẽ bake Mizraimnẽ huni bake itxapa hatu bawakubainima habu pai hawẽ bababu shukukubainaibu kenakĩ: “Ludim nawabu inũ, Anamim nawabu inũ, Leabim nawabu inũ, Naftuim nawabu inũ, Patrusim nawabu inũ, Casluim nawabu inũ, Caftorim nawabuki”, anibukiaki. Casluim nawabu pakubaini hatu anua shuku betsa maei Filisteu nawabu pashkai keyuni pakubaini habianuri hiwekubaĩkanikiki.
15-18Hanua Camnẽ bake betsa Canaãnẽ huni bake dabe bawani ha dukũ Sidom inũ ha katxu Hete inibukiaki. Hawẽ bababu betsa betsapa hiwea akeakeshũ bake bawai shukui pahairanibukiaki, Jebuseu nawabu inũ, Amorreu nawabu inũ, Girgaseu nawabu inũ, Heveu nawabu inũ, Arqueu nawabu inũ, Sineu nawabu inũ, Arvadeu nawabu inũ, Zemareu nawabu inũ, Hamateu nawabu wakinã. 19Hanua Canaãnẽ baba betsa betsapabu hatũ maewã kesha kesuakea Sidom mae ianẽwã kesha betsa dapi anua kai Gerar binui Gaza anu yusmauri txĩtũkauã Sodoma inũ Gomorra anu ana yusmauri txĩtũkauã Admá inũ Zeboim binui Lasa anu ana yusmauri txĩtũkauana anu maewã Sidom anu hikia hanu hiwepaunibukiaki. 20Haskai Camnẽ baba ikubaini hatũ hãtxa betsa betsapawẽ taea mae shukua betsa betsapai pashkabaini bui mai pakea tibi ibu wakeaketã hanua pai habias yurabu hiwekubaĩmisbuki.
21Ha dikabi Jafé hutxi Semnẽ bakebu bawanirã, Éber bakeburã, hatũ shenipabu Sem inikiaki. 22Semnẽ huni bakeburã: “Elão inũ, Assur inũ, Arfaxade inũ, Lude inũ, Arãki”, akĩ hatu kenanibukiaki. 23Semnẽ bake Arãnẽ huni bakeburã: “Uz inũ, Hul inũ, Geter inũ, Máski”, hati hatu kenakĩ tananibukiaki. 24Semnẽ bake betsa Arfaxade huni bake bawaima kaiã kenakĩ: “Saláki”, anikiaki. Ha ewatã Salá huni bake bawaima kaiã kenakĩ: “Éberki”, anikiaki. 25Ha ewatã Éber huni bake dabe bawa ha dukũ kaiã mai hirabi anu yurabu pashka akeakenibuwẽ taeshũ hawẽ bake kenakĩ: “Pelegueki”, ashũ ana huni bake bawaima ha katxu betsa kaiã kenakĩ: “Joctãki”, anikiaki. 26-29Joctã ewatã 13 huni bakebu bawakubaini hatũ kenarã: “Almodá inũ, Selefe inũ, Hazar-Mavé inũ, Jerá inũ, Hadorão inũ, Uzal inũ, Diclá inũ, Obal inũ, Abimael inũ, Sabá inũ, Ofir inũ, Havilá inũ, Jobabeki”, inibukiaki. 30Joctãnẽ huni bakebu dasibi Messa mai pakea anua bari huaikiria Sefarkiri mati matipanua pai hiwepaunibukiaki. 31Hanua Semnẽ enabu haskai hatũ hãtxa betsa betsapawẽ taea mae betsa betsapa anu hiwenũ ika pashka akeakenibukiaki.
32Hiri henẽ hatu atxini ma netsunikẽ haskai Noẽ bababu pai shuku betsa betsapai mai hirabi anu hiwenũ ika pashka akeakenibukiaki, hãtxa betsa betsapawẽ hãtxa akeakeirã.
Одоогоор Сонгогдсон:
Gênesis 10: cbsBR
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
NT © 1980-2006, Wycliffe Bible Translators, Inc.
OT portions © 2006, Wycliffe Bible Translators, Inc.
