प्रेरित 6
6
न्हय्म्ह ग्वाहालि याइपिं ल्यःगु
1उगु इलय् चेलात अप्वः ददं वन। न्हियान्हिथं नसा इनाबीबलय् ग्रीक भाय् ल्हाइपिं यहूदीतय्सं इमि भाःत मदुपिं मिसातय्त वास्ता मयाः धकाः हिब्रू भाय् ल्हाइपिं यहूदीत नाप कचकच याना हल।
2थथे जूगुलिं झिंनिम्हय्सिनं दक्व चेलातय्त सःताः धाल – “परमेश्वरयागु वचन न्यंकेगु त्वःताः नयेत्वनेगु ज्याय् सनाच्वनेगु बांमलाः। 3अय्जूगुलिं दाजुकिजापिन्सं, छिपिं मध्ये नांजाःपिं, आत्मां जाःपिं व बुद्धिं जाःपिं न्हय्म्ह मनूयात ल्ययादिसँ। अले इमित नयेत्वनेगु ज्याय् तयाबी। 4जिपिं जक प्रार्थनाय् व परमेश्वरयागु वचन न्यंकेगु ज्याय् जुयाच्वने।”
5थ्व खँ दक्वसितं यल। अले इमिसं पवित्र आत्मां व विश्वासं जाःपिं स्तिफनस, फिलिप, प्रखरस, निकनोर, तीमोन, पर्मिनास व एन्टिओखियां वःम्ह यहूदी जूम्ह निकोलाउसपिन्त ल्यल। 6इमित प्रेरिततय्थाय् न्ह्यःने हल। अले इमिसं प्रार्थना यानाः इमिगु छेनय् ल्हाः तल।
7परमेश्वरयागु वचन फुक्क थासय् बय्बय् जुयाः वन। थुकथं यरूशलेमय् चेलात यक्व हे दयावल। हानं पुजाहारीत नं यक्वसिनं हे विश्वास यात।
स्तिफनसयात ज्वना यंकूगु
8परमेश्वरपाखें यक्व आशिष व शक्ति कयातःम्ह स्तिफनसं मनूतय्गु न्ह्यःने अजू चायापुगु ज्या व चिं यानाक्यन। 9उकिं दासं मुक्त जूपिनिगु धर्मशास्त्र स्यनीगु छेँयापिं, कुरेनीयापिं, अलेक्जेन्ड्रियायापिं, किलिकिया व एशियां वःपिन्सं दनाः स्तिफनस नाप जवाःसवाः याः वल। 10पवित्र आत्मां स्तिफनसयात बुद्धि बियादीगुलिं वयागु खँय् सुनानं जवाःसवाः याये मफुत।
11अथे जूगुलिं इमिसं मनूतय्त ग्वाकाः थथे धाय्कल – “थ्व मनुखं मोशा व परमेश्वरयात क्वह्यंकाः नवाःगु जिमिसं ताया।” 12थुकथं इमिसं मनूतय्त, थकालिपिन्त व शास्त्रीतय्त नं ग्वाकल। अले इमिसं वनाः स्तिफनसयात ज्वनाः महासभाय् हल।
13इमिसं अन नं मनूतय्त ग्वाकाः थथे धकाः मखुगु खँ धाय्कल – “थ्व मनुखं न्ह्याबलें झीगु देगः व व्यवस्थायात निन्दा यानाः जक नवाइगु। 14नासरतयाम्ह येशूं थ्व देगःयात स्यंकी, अले मोशां झीत ब्यूगु रितिथिति नं हिली हं।”
15महासभायापिन्सं स्तिफनसयात तुंक स्वःबलय् वयागु ख्वाः स्वर्गदूतयागु ख्वाः थें थियाच्वंगु खन।
Одоогоор Сонгогдсон:
प्रेरित 6: NEW
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 2024 Nepal Bible Society, Newa Christian
Literature Center and Wycliffe Bible Translators, Inc.
