प्रेरित 12
12
विश्वासीतय्त झन जक सास्ती याःगु
1अबलय् हेरोद जुजुं गुम्हं गुम्हं विश्वासीतय्त सास्ती बीगु यात। 2वं यूहन्नाया दाजु याकूबयात तरवारं स्याकल। 3थुकिं यानाः यहूदीतय् नायःत लय्ताःगुलिं झन पत्रुसयातनापं ज्वनेत न्ह्यचिल। वयात ज्वंगु सोडा मतःगु मरि नयेगु नखःबलय् खः। 4पत्रुसयात ज्वनाः झ्यालखानाय् तल। छुत्काराया नखः धुंकाः जक मनूतय्गु न्ह्यःने यंकेगु मतिइ तयाः प्यम्ह प्यम्ह यानाः प्यथ्वः सिपाइँतय्त पाः तया तल।#प्रस १२:१-२७ 5पत्रुसयात झ्यालखानाय् कुनातःबलय् मण्डलीइ च्वंपिन्सं वयात त्वःताब्यु धकाः परमेश्वरयाके प्रार्थना यानाच्वन।
पत्रुस झ्यालखानां पिहां वःगु
6हेरोदं मनूतय् न्ह्यःने यंकेगु न्ह्यर्खुन्हु चान्हय् पत्रुस निम्ह सिपाइँतय्गु दथुइ निपु सिखलं चिकाः द्यनाच्वन। लुखाय् नं सिपाइँ पाः च्वनाच्वंगु दु। 7अबलय् हे प्रभुयाम्ह छम्ह स्वर्गदूत अन खनेदय्कः वल। अले अन झल्ल च्वन। स्वर्गदूतं पत्रुसयात म्हय् गिलिगिलि यानाः “याकनं दँ” धकाः थन। पत्रुसया ल्हातय् चिनातःगु सिखः ब्यनाः कुतुंवन। 8स्वर्गदूतं वयात धाल – “लं फ्यु अले लाकां न्ह्या।” वं धाःथें यात। स्वर्गदूतं वयात हानं धाल – “गां न्ययाः जि ल्यूल्यू वा।”
9पत्रुस वया ल्यूल्यू वन। थ्व फुक्कं जुयाच्वंगु धात्थें खः धकाः वं मस्यू। वयात ला थ्व फुक्कं म्हगसय् म्हना च्वंथें च्वन। 10थथे इपिं पाः च्वनाच्वंपिं निथ्वः सिपाइँतय्त पुलाः शहरय् वनेगु नँयागु ध्वाखाय् थ्यन। ध्वाखा नं अथें चालावन, लँय् थ्यनेवं स्वर्गदूतं वयात त्वःतावन।
11अले तिनि पत्रुसं वाः चायाः थथे धाल – “आः तिनि जिं सिल का, प्रभुं जितः थःम्ह स्वर्गदूत छ्वयाहयाः यहूदीतय्त आशां थ्यानाः हेरोदया ल्हातं त्वःतकादीगु खनी।”
12थथे मतिइ ततं पत्रुस मर्कूस धाःम्ह यूहन्नाया मां मरियमयागु छेँय् थ्यन। अन यक्व मनूत प्रार्थना यानाच्वंगु दु। 13वं लुखाय् सः बिल। अले रोदा धाःम्ह भ्वातिंनं खापा खं वल। 14पत्रुसयागु सः म्हसीकाः वं तसकं लय्तायाः खापा हे मचाय्कुसे दुने च्वंपिन्त निं “पत्रुस वल” धकाः धाः वन।
15इमिसं वयात धाल – “छ वीँ जुल जुइ का।” अय्नं रोदां पत्रुस हे खः धकाः जिद्दी यानाच्वन। अले इमिसं धाल – “अय्सा व पत्रुसया स्वर्गदूत जुइ।”
16पत्रुसं धाःसा खापाय् सः बिया हे च्वन। खापा चाय्कूबलय् वयात खनाः इपिं छक्क जुल। 17अले वं इमित हाले मते धकाः ल्हाःभाय् यानाः प्रभुं वयात गुकथं झ्यालखानां पित ब्वना हयादिल धयागु खँ फुक्क कन। वं इमित – “थ्व खँ याकूब व मेपिं विश्वासीतय्त नं धयाब्यु” धकाः धयाः अनं मेथाय् वन।
18सुथय् सिपाइँत “पत्रुसयात छु जुल” धकाः तसकं आछु-आछु कनाच्वन। 19हेरोदं पत्रुसयात मालां नं लुइके मफुगुलिं झ्यालखानाय् पाः च्वंपिन्त जाँचय् यानाः फुक्कसित स्यानाछ्व धकाः उजं बिल। अनं लिपा हेरोद यहूदियां कैसरियाय् वनाः अन हे च्वन।
हेरोद सीगु
20हेरोद टुरोस व सिडोनय् च्वंपिं मनूतलिसे तसकं तंचाया च्वंगुलिं इमिसं मिलय् जुयाः हेरोदयात लय्ताय्केत स्वयाच्वन। उकिं इमि सुं मनूत वयाः हेरोदया बलस्तस धाःम्ह मनूयात ल्हातय् कयाः मिलय् जुयाच्वनेगु धकाः बिन्ति यात, छाय्धाःसा हेरोदयागु हे देशं इमिसं नसा कयाच्वंगु खः। 21क्वःछिना तःखुन्हु हेरोद लाय्कू वसः पुनाः सिंहासनय् च्वंवल। अले वं इमित न्वचु बिल। 22अले मनूत थथे धकाः हाला हल – “थ्व ला द्यःयागु सः खः, मनूयागु मखु।” 23जुजुं परमेश्वरयात तःमधंकुसे थः हे तःधं जूगुलिं उघ्रिमय् छम्ह प्रभुयाम्ह स्वर्गदूतं वयात मफय्काबिल। अले व की दायाः सित।
24अय्सां परमेश्वरयागु भिंगु खँ यक्व थासय् न्यनावन, अले विश्वासीत नं यक्व दयावन। 25बारनाबास व शाऊल भेटी बीगु ज्या सिधय्काः मर्कूस धाःम्ह यूहन्नायात नं ब्वनाः यरूशलेमं एन्टिओखियाय् लिहां वन।
Одоогоор Сонгогдсон:
प्रेरित 12: NEW
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 2024 Nepal Bible Society, Newa Christian
Literature Center and Wycliffe Bible Translators, Inc.
