Metiu 3
3
Jon Tom tel Bapitaiso i Fafas
Mak 1:1-8; Luk 3:1-18; Jon 1:19-28
1Na foron biing ae, Jon Tom tel Bapitaiso ka tapiek ma ka fafas na falifu foes na Iudaia. 2#Metiu 4:17; Mak 1:15Ma ka tarah, “Gamen sokiliis liu kimi, wara le matanfuntih na kukulii ka fatat.” 3#Aisaia 40:3Jon i e kaltu ae profet Aisaia i use ta u, aunbiing i tarah,
“Kinen tikas i tautau na sunbiil aragii,
‘Fageges sal sala Kumguui, fatortores sal sala.’”
4 #
2King 1:8
Kilkiliis ke Jon ri tel u ini olon kamel ma i fis lifa ini pus ae ri tel u ini punun bulmakau. Inen aia e sukuuw turan mindu aka. 5Fanu tinbae na Ierusalem, fan Iudaia tikii ke fanu tikii tina foron maleh fatat dan na Ioridan ri ka la usuf i. 6Ri ka fapos foron sinang laulau kiri, ke Jon ka baptais ri na dan na Ioridan.
7 #
Metiu 12:34; 23:33 Isau le aunbiing i par ifuun e Farasi turan foron Sadusi ri la una falifu ae i tel bapitaiso lo, ka tara sing ri aragii, “Gam foron natun sii fafangaet! Se i tara le gamen alfe ngaliaf ke God ae in tapiek? 8In mel e rokap na fua gam, una finngas u le gam ka sokiliis liu tah. 9#Jon 8:33Na wolwol kimi, gong gam tara sing gam tom le, ‘Abaram i e tama kemem.’ Ia fas gam, God ifasi in sokiliis foron fat igii isi rik tapiek berberat ke Abaram. 10#Metiu 7:19Palnget ae mang ta na baulin foron au, ma foron au tikii ae biil ri fua rokap la, rin pok faluut ri ma rik lin ri una yiif.
11“Ia baptais gam ini dan una finngas u le gam ka sokiliis liu tah, isau le ier ae in mi pes iau, rakrakai kia i liu kulkulef na rakrakai kiak. Pesu, biil ia tortores isi ifasi iak kep su kia. In baptais gam ini Tanwa Kalkaluu ke ini yiif. 12I pose na nenge saol una simke ufu foron piin tina wit. Aunbiing ka simke tikii ta u, ik luun turim wit rokap na felu, ke foron piin ik fasok u na tara yiif ae biil i to met la.”
Jon i Baptais Iesu
Mak 1:9-11; Luk 3:21-22
13Ke Iesu ka la tina Galili una dan na Ioridan isi Jon ik baptais u. 14Isau le Jon ka totof isi in tikale u, ke ka tara sing i aragii, “Isi sani o ka la usuf iau? I rokap le on baptais iau.”
15Isau le Iesu ka tara sing i aragii, “Taftawa ik tapiek tom arae, igii. I rokap le karan tel u arae una fasuut foron tier tikii ae i tortores na mata God.” Ke Jon ka somangat mang isi baptais u.
16Aunbiing Jon ka baptais ta u, Iesu ka masah tina dan, ma fanpil kukulii ka sapeng, ke ka par Tanwa God i puh arae nenge bun ma ka top lo. 17#Stat 22:2; BukSong 2:7; Aisaia 42:1; Metiu 12:18; 17:5; Luk 9:35Ke kinen tikas tinbae na kukulii ka tarah, “Igii e keng Kalalik, ae ia ier kanaka isi, ma ia laes kanaka ini.”
Одоогоор Сонгогдсон:
Metiu 3: BJP
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 2015, 2021 Wycliffe Bible Translators, Inc. All rights reserved