Genesis 9
9
Agayutem Akqut'liara Noah Pillgutekluku
1Agayutem-llu atawaqaasqai Noah qetunrai-llu, qanrulluki, “Irnikici amlleriinarluci nunam qainga yirluku. 2Unguvalriit angelriit mikellriit-llu neqet-llu alikarkaurtaiceci; elpeci ataniumaarkaungavciki. 3Unguvalriit tamarmeng neqkaurtut elpecen̄un; cikillrucimtun naunrarnek, canek tamalkuitnek cikiramci. 4Tau͡gaam kemget ner'arkaunritaci augtuumaita, unguva augmelan. 5Yuk yuullgutminek tuqucikan anucimirqecetaarciqaqa. Ungungssiq-llu yugmek tuqucilria tuquvkarciqaqa. 6Agayutem ayuqucimitun yuk piliaqellrua, taumek kina tuqucilria yugmek allam yuum tuquciiqaa.
7“Elpeci irnilaqici amlleriluci nunam qainga yirluku.”
8Tua-llu Agayutem qanrutai Noah qetunrai-llu, 9“Watua akqutmek taqutua elpecen̄un kinguverpecen̄un-llu, 10ilakluki unguvangqellriit yaqulget ungungssit-llu tamaita angyarpagmek anellgutkelten. 11Makutgun qaneryaratgun akqut'lillgutkamken: wak'nirnek unguvangqellria tamarmi piunriumanqiggngaituq ulerpagkun; ulerpiim piunrinqiggngaitaa nuna. 12Uumek nallunailkutangqerciquq una akqun nangyuilnguq elpenun tamalkuitnun-llu unguvangqellrianun, yugnun-llu ukani yuurtarkanun: 13Amirlunun agluryaqa elliaqa. Nallunailkutauvkarluku akqutemnun ellarpagmun. 14Amirlungevkaraqamku ella agluryaq-llu alaitaqan, 15umyuaqutkelarciqaqa akqutkellemnun elpenun, ungungssinun-llu tamaitnun, ulerpagkun piunrinqiggngaunaki. 16Agluryaq alaitaqan amirluni umyuaqelarciqaqa iquilnguq akqutka tamaitnun unguvalrianun ellarpagmi. 17Tauna nallunailkutaqaa akqutma piurtellma unguvalrianun tamalkuitnun nunami.”
Noah Qetunrani-llu
18Noah-m-llu qetunrai angyarpagmek anellret ukuugut: Shem-aq, Ham-aq, Japheth-aaq-llu. Ham-aq atakaa Canaan-aam. 19Ukut pingayun Noah-m qetunrai ciuliaqait ellarpiim yuin tamarmeng.
20Noah nauceciiyurten͞guami nauceciillruuq wine-arkanek. 21Wine-aliaminek-llu mer'aluni taangiquq. Matarmi pelatekamini inangqaluni. 22Ham-am-llu, Canaan-aam atiin, tangrramiu tuaten atani matangqaluku an'uq qanrullukek-llu anelgutegni. 23Tua-i Shem-ankuk Japheth-aaq-llu tegutuk 'lumarrarmek, tusmegnun-llu iqukek pilukek kingupiarlutek pelatekamun itertuk. Uluumiimek atasek matangqaluku tangenrritaak, patuluku-llu tamatumek 'lumarrarmek. 24Noah-llu taangiqenriami, nallunriamiu-llu qetunrami kinguqliatnun tuatnallruciminek, 25qanertuq,
“Aniqlaan tull'i Canaan-aamun!
Pisten͞gurciiquq amaqliigminun.
26Atawaqertelliu Atanrem Agayutma Shem-aq!
Canaan-aaq-llu pisteksaguskiliu.
27Agayutem Japheth-aaq#9.27: Japheth: Una ateq nepengqertuq ayuqluku Hebrew-tun aperyaraq “amlleriluni.” yugyangevkaqiliu!
Kinguvri-llu yuukilit Shem-am yui ilagarluki!
Canaan-aaq-llu pisteksaguskiliu.”
28Ulerpiim-llu kinguakun Noah unguvauq allrakuni yuinaat akimiaq malruk qulnek cipluku (350) 29tuquluni-llu allrakungluni tiissitsaam avga, yuinaat yuinaat malrugnek cipluku qula-wa (950).
Одоогоор Сонгогдсон:
Genesis 9: YPK
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Yupik Bible © 2012 American Bible Society. All rights reserved.
