LIPOH 1
1
Athricho Yukheh
1Adikehla Tsingrangba-nü ninglih thricho. 2Alimih tsü müthriziepü adeng licho ko amarürah tsü hiba müthrizieba asoh-u michah licho; ko Tsingrangba Anbü kih michah mongchi licho. 3#2 Kor 4.6Ko Tsingrangba-nü yocho, “Atsingse lieng” ko atsingse chürocho. 4Ko Tsingrangba-nü atsingse tsü tsa ngucho; ko Abinü atsingse tsü amarürah tenü changsahjücho. 5Abinü atsingse te “Anyümong” ko amarürah te “Aromang” pü dsicho. Macho ko tsingsecho, hütsü akhudiba nyümong licho.
6Hütsüpü Tsingrangba-nü yocho, “Kih la tsü ningkong khüdu chürosohng ko hütsü khu kih lanü kih tsü changsahsohng.” 7#2 Pet 3.5Ko Tsingrangba-nü ningkong tsü külüpcho ko hütsü khu amilang liba kih lanü apohki liba kih tsü changsahcho. 8Abinü ningkong te “Ning” pü dsicho. Macho ko tsingsecho, hütsü anyüuba nyümong licho.
9Hütsüpü Tsingrangba-nü yocho, “Ning pohki kih tsü müdüm khüdula tingbülung ko alih akung chürung ko hütsüta kangcho.” 10Abinü akung te tsü “Alih” pü dsicho ko tingbülungba kih te “Kihdi” pü dsicho. 11Ko Tsingrangba-nü yocho, “Alihnü singdonglidong lüpcho chürosohng, atse zehba ko asih sihba, ko hütsüta chürocho.” 12Hütsüta alihnü singdonglidong chürosohcho ko Tsingrangba-nü hütsü tsa ngucho. 13Macho ko tsingsecho, hütsü asangu nyümong licho.
14Hütsüpü Tsingrangba-nü yocho, “Ama tenü anyümong changsahnung nengdang ningkong chah atsingse chürosohng ko hütsü khu akyang, kang ko nyümong müdhesohng; 15ko limih khyang atsingse jünung nengdang arühnü ningchah visohng ko hütsüta kangcho.” 16Ko Tsingrangba-nü atsingse amülülah anyüh külüpcho, anyümong nengdang nyü ko aromang nengdang chonu; ko Abinü chenghitisü külüpcho. 17Abinü limih la visohnung ningchah atsingse yohpücho, 18anyümong ko aromang michah xükümnung, ko amarürah lanü atsingse changsahsohcho. Ko Tsingrangba-nü hütsü tsa ngucho. 19Macho ko tsingsecho, hütsü müyüu nyümong licho.
20Hütsüpü Tsingrangba-nü yocho, “Kih tsü kangzahnü jeng kang ko ningwüm tsü uzatinü jengsohng.” 21Hütsüta Tsingrangba-nü kihkangdi, kih la liba kanglungrü langkhüru ko uza lüpcho külüpcho. Ko Tsingrangba-nü hütsü tsa ngucho. 22Abinü arüh apüm müwajücho ko kih la kanglungrü te kih jeng aza thsanung ko uzati te suchehnung mülacho. 23Macho ko tsingsecho, hütsü müngau nyümong licho.
24Hütsüpü Tsingrangba-nü yocho, “Alimihnü kanglungrü lüpcho chürosohng: Kuh la kangba ko rangmü kanglungrü, azikyah ko amülah.” Ko hütsüta chürocho. 25Hütsüta Tsingrangba-nü arüh apüm külüpcho ko Abinü hütsü tsa ngucho.
26 #
1 Kor 11.7
Hütsüpü Tsingrangba-nü yocho, “Ihsanü nyitsarü Ihsa tsah, Ihsa kyochola thrinung; ko arüh tsü nguh, uza ko kanglungrü apüm, kuh la kangba ko rangmü kanglungrü, azikyah ko amülah apüm michah abüdongrü kangsohnung.” 27#Mat 19.4; Mrk 10.6; Lip 5.1-2Hütsüta Tsingrangba-nü Apu kyochola nyitsarü thricho. Abinü arüh khingkurü ko adhrerü thricho. 28Ko Tsingrangba-nü arüh müwajü yocho, “Suchehng ko limih sohjeng ko hütsü rahsehng. Nguh, uza ko rangmü kanglungrü apüm michah Ihnü nührü abüdongrü kangsohre. 29Ihnü nührü khyang singtse ko singsih adhangpi atsunung jüre; 30ta rangmü kanglungrü ko uza apüm shulüm atsunung zanu ko singvarova jüre” ko hütsüta kangcho. 31Ko Tsingrangba-nü Abinü thricho apüm dhingcho ko Abinü hütsü tsa ngucho. Macho ko tsingsecho, hütsü dhüroh-u nyümong licho.
Одоогоор Сонгогдсон:
LIPOH 1: SANGBSI
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.
