MATHIU 9
9
Jisu ma Kôasôte Mihnyan Sênsiet
(Mak 2.1-12; Luk 5.17-26)
1Jisu khôankhoko chhang lahma, josi ranka wah thin hahnâng ngakwâng wah,#9.1: ate sôngthin hahko: Kaparnam (4.13 tasûe). 2Chuthe diko mihnyan khuthema Atenâng kôasôte mihnyan wathe jupthin ko jupthuk lahma pêhok kohwah. Jisu ma thinnâng dâlem pa ajah chohkhe lahma, kôasôte mihnyan ko ngatwah, “Hung dongsiet o, ngachha! nangpap heh map lâkohtih.”
3Erediko niemarang jette heh thindede tungko thômîn wah, “Are mihnyan pumma Joban thãse eka!”
4Jisu ma thinhung khennâng chenni thonghun eka arepa jetlo lahma, thinnâng ngatwah, “Nema arerãngrãng achhih heh chenrãngma thonghun eken a? 5Chenroh ngat pa ala a, ‘nangpap heh map lâkohtih’ ngama ngatpa ala ale, ‘toanchep lohma khoam o’ ngama ngatpa ala a? 6Nenâng ngama are hahtokkhoh ko, Mihnyan Chha nâng pap mapkoh rãng chaanwin, ngama ekhesok a.” Ephumma atema kôasôte mihnyanko ngatwah, “toanchep o, ngale nang jupthin pa toanpe lohma humnâng wãngo!”
7Mihnyan pa toanchep lahma humnâng wãngwah. 8Mihnyan hehma erepa khelahma chei rewah, ngale mihnyan nâng atô chaan kohdi Joban nâng dangkoh a, ngatwak wah.
Jisu ma Mathiu Roo
(Mak 2.13-17; Luk 5.27-32)
9Jisu erethe kowah loatkhoam chhoan thuko, thãkho thâte mînpa Mathiu ate Ofic ko tonglahma khewah. Phumma, Jisu ma Atenâng ngatwah, “ngadijun hang.”
Mathiu toanchep lahma ate dijun wah.
10Mathiu humko Jisu phhekchhah chhahthuko,#9.10: Mathiu humnâng; ba ate humnâng (arepa Jisu) hum. thãkho thâte ngale papi mihnyan heh jahmõang hûlahma Jisu le ate dijunte heh demnâng johphhek chhahhok wah. 11Erepa Farasi hehma khelahma Jisu dijunte hehnâng chhienwah, “Ne hethôte pa arerãngrãng mihnyan chinheh demnâng chenrãngma roam phhekchhah eka?”
12Jisu ma erepa leptat lahma dânthâng wah, “Khoanchet hote mihnyan hehma doktor lemmah, khoanchette mihnyan hehma loloba doktor lemeka. 13Choan en, ngale jet en, Joban nyapraangma arepa chenni ngaeka: ‘ngama mînchen ba hun ekang, ngem angah ma soamroak hunmek.’ Ngama mihnyansen heh roorãng katdangmek, papi mihnyan heh roorangba kaerâng.”
Lephhek Lechhah thangma Rangsoam junko Chhien
(Mak 2.18-22; Luk 5.33-39)
14Erediko Jon baptis dijunte heh Jisu tâko hûlahma chhienwah, “Chenrãngma ni ngale Farasi hehma roantang lephhek lechhah thangma rangsoam ekia, nang dijunte hehma lephhek lechhah thangma soamwak mah?”
15Jisu ma dânthâng wah, “Nemnyan wapa thin demnâng dângpoatko nemnyansiet thinnâng hokte heh hungchhih rekmah etonga ngama thonghun eken a? eroh tongmah! rohkomin nemnyan wapa thintâwah sietchhoan rangwo ehûra, ere diphumma ba thinma lephhek lechhah thangma etonga.
16“Henmejô khetpã khohko khetnyan chhuppa petphin mah, chenrãngma ngako khetnyan pumma khasiet lahma khetpã pa lodong elojâa. 17Ngale henmejô angurti anyan pa angurti pã khohko petkien mah, chenrãngma ngako angurti thòpa apoak erea, ephumma angurti pa jenchhoan ngale thòpa chhihjâ erea. Ere noma angurti anyan pa thònyan nâng kienmin, erohkoba thòniinii asen edanga”
Sahhabwa Chha Dihiaknya Hînsiet ngale Dihiaknyu Jisu Khetko Sahloatte
(Mak 5.21-43; Luk 8.40-56)
18Jisu ma arepa thôthuko, Jews sahhabwa wathe kalahma ate mako dakuh thoka lahma ngatwah, “ngachha dihiaknya pa arohroh riieka; Wãnglohma nangdekma Atenâng sahlo wãngmêngro, eko ate engakhin a.”
19Ephumma Jisu toanchep lahma sahhabwa demnâng johwângwah, ngale ate dijunte hehmin thin demnâng johwâng wah.
20Dihiaknyu wathe echhi pânii heichhoan khoanchetma chêmte Jisu tokdiko hûlahma Jisu khetsako sahloatwah. 21Dihiaknyu pumma atedede ngatritwah, “ngama Jisu khetko mesahlo tekkojô, khoanchetpa esen ang.”
22Jisu litphong lahma dihiaknyu pa chohkhe wah, eko Atenâng ngatwah, “Ngachha, hungdongsiet o! nang dâlem pumma nang khoanchet pa lâmetho.” Ere sanpoat poatko dihiaknyu khoanchet pa mewah.
23Ephumma, Jisu sahhabwa humko wângwah. Chenthu atema jãmtêmte ngale asebte heh kheko, 24Atema ngatwah, “Anga nga chhoan en! are dihiakchha pa rit dangmah - atea jup reka!” Ephumma Jisu nâng anga ngama angit rewah. 25Mihnyan heh tâjunloat rienrien, dihiakchha tâko Jisu wãng lahma ate dekko sietwah, eko dihiakchha pa tôansat wah. 26Are nginpa erediak phangtang nâng khêmtatwah.
Jisu ma Mitdoak Wanii Sênsiet
27Jisu erethe kowah khôamchhoan thuko, mitdoak wanii atediko junkhôam wah. Thinma raksep wah, “Devit Chha! ninâng mammîn chenhi”.
28Jisu humkhen nâng lupwâng phumma, mitdoak wanii pa ate tânâng hokwah, eko Jisu ma atenii nâng ngatwah, “Ngama nechhe tasensiet a, ngama putedâlem eken a?”
Thinma dânthâng wah, “Teso putedâlem eki.”
29Ephumma Jisu ma thinnâng mitko sahlo lahma ngatwah, “nema chenroh putedâlem eken a, eroh chendanga!”- 30Ephumma thinmit pa kanlahma jienkhe wah. Ngale Jisu ma thinnâng ngatwah, “Arepa hennâng min nekthôkoh en!”
31Rohkomin thinma chhoanwak lahma Jisu nginpa diaktang nâng phoangthô kohwah.
Jisu ma Aba Jabmuh Sênsiet
32Mihnyan heh loatchhoan poatko, mihhan khuthema Jisu tânâng juchhih luplahma aba jabmuh wathe siethok wah. 33Juchhih pa junloatkoh rienrien mihnyan pumma jienjab wah, eko anga nga bârit rewah. Thinma ngatwah, “nima arerãngrãng Isrial diakko chenthujô mathatkhe eki!”
34Phumma Farasi hehma ngatwah, “Arepa juchhih lowang ma Atenâng juchhih junloat rãng chaankoh eka.”
Jisu ma Mihnyan hehnâng Mînchen
35Jisu chentô diak ajaa ngale hahdaang rupnâng phoangkhôam wah, atema Joban Hahsông nginkongsen pa chentô Sanagog hehnâng phôangthôkoh wah, ngale jatrup khoanchet, khun atamte hehmin sênsietwah. 36Jisu ma mihnyan heh khelahma thinnâng mînchenma ate hung nyahrãng chhihwah. Chenrãngma ngako, abemte aho saak rãngrãng sekmah patrit ngale mînchenli khewah. 37Ephumma Jisu ma ate dijunte hehnâng ngatwah, “Chhah munchoan pa jahmõang, rohkomin ere chhahmun eka heh khôankhente pa amãnchha. 38Erohwah munchoan chhah tângte wako, ate chhahthong munchoan heh khôankhente chienkatrãng rangsoam en.”
Одоогоор Сонгогдсон:
MATHIU 9: NOKTBSI
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Nokte Naga NT - NIEMNYAN
© The Bible Society of India, 2014.
Used by permission. All rights reserved worldwide.