MATHIU 5
5
Hahhokho nâng Joban Nginthô
(5.1-7.29)
1Jisu ma mihnyan heh jahmõang khelahma atea hahhokho nâng wângwah, ngale ereko tôngwângwah. Eko ate dijunte heh ate tumlit khôanhok wah, 2Ngale atema thinnâng hethô wah:
Alinlin Khuhah
(Luk 6.20-23)
3“Ju rãngma numrii lahma sekmah patritte mihnyan heh rangkepte dângmin;
Rangkhethung Hahsông pa thinthiak!
4Athângheh seblahma tôngte mihnyan heh rangkepte dângmin;
Joban ma thinhung esenthuk a!
5Numnene dângte mihnyan heh rangkepte dângmin;
Joban ma toamsem tahpa thinma echoh a!
6Joban ma chenni huneka ere moatlem pa henma ajahthôan moatrãng huneka ere mihnyan pa rangkepte dângmin;
Joban ma thinhung nyahrãng esenthuk a!
7Mihnâng mînchente heh rangkepte dângmin;
Joban ma thinnâng emînchen a!
8Hungsâ rinsâte mihnyan heh rangkepte dângmin;
Thinma Joban echohkhea!
9Mêmo dângrãngma moatlem moatte heh rangkepte dângmin;
Thinnâng Joban Chha ngatmin!
10Joban ma chenni huneka ere moatlem moatjunko mihnyan hehma chêmthuk eka heh rangkepte dângmin;
Rangkhethung Hahsông pa thinrãng!
11“Chenthu mihnyan ma jôjêm, chêmthuk, ngale ne khohnâng khoanglep methôako, nea rangkepte dângmin, chenrãngma ngako nea ngadijunte. 12Khuhah nâhah dangen, chenrãngma ngako rangkhethung nâng nerãngma nyahrãng hînhô dong thienko lahma tonga. Erohjôba nemawah Mõng dangtah hehmin chêmthuk wah.
Sum ngale Wenphiak
(Mak 9.50; Luk 14.34,35)
13“Nea mihnyan nyuchha rãngma sum rãngrãng. Phumma sumko wah sumtupa mesejâ tahko, erepa ngaktû sietrãng lihân lemkhô ahotu. Erepa mahto lâdangtah, petphe lahma mihnyan dakhen nângba ewoatnek tûa.
14“Nea hahtokkhoh rãngma wenphiak rãngrãng. Hahho kowah hahsôngpa chenthumin leta bintãngmin. 15Henmejô wentitpa toaklahma khokkhenko sekmah; humkhen kowah sôngte chentô nâng khêmphiakrãng, wentit toakthinko etoak a. 16Ererãngrãng newen pumma mihnyan heh mathahko phiak en, erohkoba nema moatlemsen moeken pa khelahma rangkhethung wah newa Joban nâng erôwak a.
Niemarang junma Hethô
17“Ngama Mosa Niemarang ngale Mõng hehma hethôthen heh chhihsiet rãng kaera ngama nekthonghun en. Ngama ereheh chhihsiet rãng kat dangmek, thinma hethôthen heh toangtang dângthukrãng kaerâng. 18Thonghun en rangle hah chentô lektong eka, eretôko Niemarang nyapraang kowah phathemin ngale phatû chhamin lemahmin - chentôpa toangtang madang dangkako lemahmin.#5.18 chentôpa thoanko; ba are chentô hethôehi heh phangtang toangtang dângmin. 19Erohwah, henhenma Niemarang kowah moatrãng chieneka arinthôan moatlem pa lemo thangma mihnângmin eroh lemorãng hethôeka, erepa rangkhethung nângmin arinthôanrãng hôanmin. Ngale henhenma Niemarang kowah chieneka moatlem pa phangtang molahma mihnângmin eroh moatrãng hethôeka, erepa rangkhethung nângmin adong thôanrãng hôanmin. 20Erohwah, ngama thôkoh eka, Niemarang hethôte le Farasi heh noma toangtang dangletma Joban ma huneka moatlem pa memo enkoba nemin rangkhethung nâng tâwâng min.
Rinkhah junma Hethô
21“Khemako mihnyan hehnâng aroh thôkohpa nema tattet, ‘mih leritphe min; henhenma mihritphe eka erepa metloat thinnâng athe ngama loatmin.’ 22Phumma athângheh ngama nenâng thôkoh eka: Henma komin ate pho anaa demnâng rin mekhah ako#5.22: hen komin rin mekhah ako; wanwanthe ma ledang linâng rin mekhah ako ngama raangeka. ate nângmin athe loatmin, ngale henhenma ate pho anaa nâng, ‘nanga chenrãngjô senmoh!’ ngaeka atemin ngoang awang heh tânâng metloatrãng siethokmin, ngale henhenma ate pho anaa nâng nanga aba mahto ngaeka, atemin papwen nâng khâmrit katmin. 23Erohwah nang hînhô pa rangsoamhum wah joapsoapthin chaamko thienko lohma Joban nâng rangsoam rãng ngatko nangpho anaa demwah nang kietnoat pa mechhem hun oko, 24Nang hînhô pa joapsoapthin chaamko phethien o, ngale lemlienma ngakka lohma nangpho anaa demnâng ngaksen mînka mêngo, erediko ngakwãng lohma nang ngewah hînhô pa Joban nâng kohwãngo.
25“Henma komin nangnâng athe lolahma metloat thinnâng mesiethû hoko, metloat thinthe hokmako lemko nginpa phenthômîn o. Metloatthin theko mehûsiet thoko, metloatte heh deknâng ekohho, ngale atema sipâhi deknâng kohlahma phâtek nâng esekho. 26Ngama thôkoh eka, nema chêngpa phangtang mata tathum eretheko etongen.
Mihdihiak Dela Kaamchhih Moat junma Thôkoh
27“Nema aroh ngatah pa chohtattet, ‘Mihdihiak dela kaamchhih nekmo en.’ 28Rohkomin athângheh ngama thôkoh eka: Henma komin dihiaknyu nâng phetwan jebjeb sûeka, ate hungnâng ere dihiaknyu demko kaamchhih lâmotah. 29Erohwah ne dekchahnge mitma pap medangthuk hènko, ne mitpa loatletma petphe en! chenrãngma ngako nephoang phangtang pap wendônâng khâmritkat noma, nephoang wah chupthe chhihjâ peba ajahthem asen edanga. 30Nedek dekchah pumma pap medangthuk hènko, thahdoak letma petphe en! chenrãngma ngako, nephoang phangtang papwendô nâng khâmritkat noma, dekka aho peba ajahthem asen edanga.
Dihiak Chiakphe junma Thôkoh
(Mt 19.9; Mak 10.11,12; Luk 16.18)
31“Khema nâng arohmin ngatwah, ‘henhenma ate tangnyu chiakphe eka, atema chiakphe nyapraang pa chenraangkoh a’. 32Rohkomin athângheh ngama thôkoh eka: Delama ate tangnyu pa mihdela demnâng kaamchhih moatjun wah ledang chiakphe lahma dihiak pa dela hânnâng mengakwãng ako, atema dihiakpa mihdemnâng kaamchhih lâmo thuktah, ngale ere dihiak kepte pummemin kaamchhih lâmotah.
Toamsem junko Hethô
33“Khema nâng mihnyan hehma aroh thôkoh pa nememin chohtattet, ‘Nema toamsem eken pa nekse en, Teso demnâng chenni moatrãng toamhoantet a erepa mo en.’ 34Rohkomin athângheh ngama thôkoh eka: chenthumin toamsem letma kah nekkhetmîn en. Rangkhethung mîn chhehlet memin neksem en, chenrãngma ngako erepa Joban tôngthin; 35Hahtokkhoh mîn chhehlet memin neksem en; chenrãngma ngako erepa Joban danekthin; Jeroselem mîn chhehlet memin neksem en, chenrãngma nga erepemin Lowangdong heh sôngthin hah. 36Nedede khophang mîn chhehlet memin neksem en, chenrãngma ngako, nema nedede khochoo lathemin taposietmet ngale tanyeksietmet. 37Erohwah, ‘danga’ ba ‘dangmah’ ngama lolo nga en, nema erenoma jabkhab bâm mejab enko erepa juchhih ngewah jabeken.
Phuhlit junko Hethô
(Luk 6.29,30)
38“Nema aroh ngat pemin chohtattet, ‘Mit phuhpa mitma litmin, ngale pâ phuhpa pâma litmin.’ 39Rohkomin athângheh ngama thôkoh eka: henma komin nerãngma kaamchhih memokoh hènko, thinrãng nekngak chhihmokoh en. Henma komin ne thhenchah ko mewat hènko, thhenhit komin watthuk en. 40Ngale henma komin ne chhemchong nyenkep hunma metloat thinnâng mesietchhoan hènko, ne kut pemin koh en. 41Erediko henma komin nenâng meethe laang hênhên choanrãng mekhetlo hènko, meenii laang hènchhoankoh en. 42Henma komin newah sêmmak metha hènko, ate nângkoh en; ngale henma komin newah sêmmak menêm hènko nêmthuk en.
Neran hehnâng Hun en
(Luk 6.27,28,32-36)
43“Nema aroh ngat pemin chohtattet, ‘Ne lemruchha ko hun en, ngale neranko mitchek en.’ 44Rohkomin athângheh ngama thôkoh eka; neranko hun en, ngale nechêmsiette rãngma rangsoam koh en, 45Eroh koba rangkhethung wah tôngte ne Wa Joban Chharãng eta dangen. Chenrãngma ngako, Atema sanpa mihnyan chhih mihnyansen chentô nâng khoakthe sahthukrãng hôaneka, ngale rangpat pa kaamchhih moatte le kaamsen moatte waniinii rãng hôaneka. 46Joban ma chenni rãngma rang ekohhèn a, nenâng hunte mihnyan kololo nema mengak hun enko? eroh pete thãkho thâte mihnyan hehmemin moeka! 47Ngale ne lemruchha nânglolo merânjab enko, mihhan noma chenpa bâmsen moeken a? Ererãngrãng pete Joban lejette mihnyan hehmemin moeka. 48Rangkhethung wah ne Wa Joban pa asen dangeka rãngrãng nemin asen dangen!
Одоогоор Сонгогдсон:
MATHIU 5: NOKTBSI
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Nokte Naga NT - NIEMNYAN
© The Bible Society of India, 2014.
Used by permission. All rights reserved worldwide.