Псалми 75:1-10
Псалми 75:1-10 Свето Писмо: Стандардна Библија 2006 (66 книги) (MK2006)
Те фалиме Тебе, Боже, Те фалиме, името Твое е близу. Луѓето ги разгласуваат твоите чудесни дела! Кога ќе дојде време, ќе судам според правда. Кога се заниша Земјата и сите, што живеат на неа, Јас ги зацврстив столбовите нејзини. Им велам на дрските: не бидете дрски! И на грешниците: не дигајте рог, не кревајте го високо вашиот рог, не говорете дрско, зашто издигањето не доаѓа ни од исток, ни од запад, ниту, пак, од пустината; но Бог е судија: едни унижува, а други возвисува. Зашто чашата е во раката на Господ, со вино пенливо, промешано, Тој налева од неа и до талог ќе го испијат сите грешници на земјата! Јас, пак, вечно ќе се радувам, ќе Му пеам на Јакововиот Бог, ќе им ги скршам роговите на сите грешници, а рогот на праведните ќе се возвиси.
Псалми 75:1-10 Библија: Стариот и Новиот Завет, Константинов (MKB)
Те славиме Боже, Те славиме, и го повикуваме Твоето име, ги проповедаме Твоите чудеса. „Кога ќе го одредам времето, ќе судам право. Па нека се стресе земјата со сите свои жители, Јас ги зацврстив нејзините столбови. Ги опоменувам дрските: ‘Не бидете дрски!‘ Безбожниците: ‘Не бидете толку рогливи! Не кревајте го својот рог против небото, не зборувајте дрско и тврдоврато!‘“ Зашто издигањето не доаѓа ниту од исток ниту од запад, ниту пак од пустината. Бог е Кој суди: овој го понижува, оној го возвишува! Зашто во Господовата рака е чашата полна со пенушливо вино, добро измешано; Тој напојува од неа, до капка ќе ја испијат и ќе ја исцедат сите злосторници на земјата. А јас ќе извикнувам радосно довека, ќе Му пеам на Јакововиот Бог. Ќе им ги скршам роговите на безбожниците, а роговите праведнички ќе бидат возвишени.