2 Царевите 8:16-24
2 Царевите 8:16-24 Свето Писмо: Стандардна Библија 2006 (66 книги) (MK2006)
По јудејскиот цар Јосафат, стана цар Јорам, синот на Јосафат, во петтата година од царувањето на Ахавовиот син Јорам, царот израелски. Тој беше на триесет и две години, кога стана цар, и царуваше осум години во Ерусалим; и одеше по патот на израелските цареви, онака како што постапуваше Ахавовиот дом, бидејќи Ахавовата ќерка му беше жена. Таа правеше зло пред очите на Господ. Но, Господ не сакаше да го погуби Јуда, заради својот слуга Давид, зашто Тој беше ветил дека ќе му даде светило – нему и на неговите синови за сите времиња. Во неговите дни Едом се измолкна од раката на Јуда и си постави цар. И Јорам отиде во Цаир, со сите негови бојни коли. Тој се крена во една ноќ и ги нападна Едомците што го опколуваа, и заповедниците на колите, но народот избега во шаторите свои. Сепак, се спаси Едом од раката на Јуда до ден денес. Во исто време дигна бунт и Ливна. Другото за Јорам и сѐ што извршил, е опишано во летописите на јудејските цареви. И почина Јорам кај своите предци, и беше погребан кај своите предци во Давидовиот град. А место него стана цар неговиот син Охозија.
2 Царевите 8:16-24 Библија: Стариот и Новиот Завет, Константинов (MKB)
Во петтата година на царувањето на Јорама, синот Ахавов, во Израел, јудејски цар стана Јорам, синот Јосафатов. Му беа триесет и две години кога се зацари, а царуваше осум години во Ерусалим. Живееше како израелските цареви, како и Ахавовиот дом, зашто Ахавовата ќерка му беше жена; правеше што е зло во Господовите очи. Сепак Господ не сакаше да го погуби Јуда заради Својот слуга Давид, затоа што му вети дека ќе им даде светилник нему и на неговите синови засекогаш. Во негово време Едомците се одметнаа од под јудејската власт и си поставија цар. Јорам отиде во Саир, и со него сите бојни коли. Се крена ноќе и ги погуби Едомците, кои ги опколија него и заповедниците на бојните коли. Народот избега во своите шатори. Сепак Едомците се ослободија од под јудината власт сѐ до денес. Во исто време се одметна и Ливна. Другите Јорамови дела, сѐ што направи, зар тоа не е запишано во книжниот свиток Летописи на јудејските цареви? Јорам почина покрај своите татковци, и беше закопан кај своите татковци во Давидовиот Град. Неговиот син Охозиј се зацари место него.