Genesis 4
4
Si Cain asin si Abel
1Dinorogan ni Adan si Eva na saiyang agom asin nagbados ini dangan nangaki nin lalaki. Nagsabi an babae, “Huli sa tabang nin Kagurangnan, nakakua ako nin aking lalaki.” Kaya nginaranan niya ini nin Cain.#4:1 CAIN: Sa pandangog, an ngaran na ini nakakaarog sa Hebreyong tataramon na nakamtan. 2Dai nahaloy nangaki pa siya nin saro pang lalaki, si Abel. Siya nagin sarong pastor nin mga karnero alagad si Cain sarong paraoma. 3Uminabot an panahon na nagdara si Cain kan kabtang kan saiyang ani tanganing idolot sa Kagurangnan. 4Nagdara man si Abel kan enot na ogbon kan saiyang mga karnero, binuno ini, dangan idinolot an mga pinakamarahay na kabtang. Nawilihan nin Kagurangnan si Abel asin an saiyang dolot 5alagad dai niya inako si Cain saka an dolot kaini. Kaya naanggot nin marahay si Cain asin nagmorosdot siya. 6Hinapot nin Kagurangnan si Cain, “Tano ta anggot ka asin nagmomorosdot? 7Kun tama an ginibo mo, inako ko kuta an dolot mo alagad nin huli ta maraot an ginibo mo, an kasalan naghihipa sa saimong pintoan. Gusto kang paghadean kaiyan, alagad kaipuhan daogon mo.”
8Dangan sinabihan ni Cain si Abel, “Magduman kita sa kaomahan.” Kan yaon na sinda duman, ginadan ni Cain an saiyang tugang na si Abel.
9Hinapot nin Kagurangnan si Cain, “Haen si Abel na saimong tugang?”
Nagsimbag siya, “Dai ko aram. Ano ako, paraataman kan sakong tugang?”
10Dangan nagtaram an Kagurangnan, “Tano ta ginibo mo an makangirhat na bagay na ini? An tingog kan dugo kan tugang mo nag-aagrangay sako hale sa irarom kan daga, naghahagad nin pagbalos. 11Ngunyan mapapasaimo an sumpa kan daga na nag-ako kan dugo kan saimong tugang na ginadan mo. 12Kun magtanom ka, mayo kang aanihon; ika magigin sarong paradulag asin sarong lagalag sa kinaban.”
13Nagsimbag si Cain sa Kagurangnan, “Magabat nin marahay an padusang ini para sako. 14Pinapahale mo na ako sa dagang ini asin sa atubang mo. Magigin paradulag pa ako asin lagalag sa kinaban; gagadanon ako kan siisay man na makanumpong sako.”
15Alagad nagsimbag an Kagurangnan, “Dai. Pitong buhay an magigin kabayadan kan siisay man na gumadan saimo.” Kaya binugtakan nin Kagurangnan si Cain nin sarong tanda bilang patanid sa kiisay man na makasabat saiya tanganing dai siya paggadanon. 16Dangan naghale si Cain sa atubang nin Kagurangnan asin nag-erok sa daga kan Nod,#4:16 NOD: Sa pandangog, an ngaran na ini nakakaarog sa Hebreyong tataramon na Naglalagalag o Lagalag. sa sirangan nin Eden.
An mga Kapagarakian ni Cain
17Si Cain asin an saiyang agom nangaki dangan nginaranan ninda siyang Enoc. Nagpatindog si Cain nin sarong syudad asin inapod man na Enoc sosog sa ngaran kan saiyang aki. 18Si Enoc an ama ni Irad na ama ni Mehujael. Si Mehujael an ama ni Metusael na nagin ama ni Lamec. 19Duwa an nagin agom ni Lamec—si Ada asin si Zilla. 20Inaki ni Ada si Jabal na ginikanan kan mga paraataman nin mga hayop asin kan mga nag-eerok sa tolda. 21An tugang niyang si Jubal iyo an ginikanan kan mga paratugtog nin arpa asin nin plawta. 22Inaki ni Zilla si Tubal-cain, na paragibo kan manlaen-laen na kasangkapan na bronse asin lansang. An tugang na babae ni Tubal-cain iyo si Naama.
23Sinabihan ni Lamec an saiyang mga agom
“Pagdangog kamo, Ada asin Zilla:
Guminadan ako nin sarong hoben huli ta kinulogan niya ako.
24Kun pitong buhay an kabayadan kan buhay ni Cain,
Setenta y syeteng buhay an katimbang kan buhay ko.”
Si Set asin si Enos
25Nagkaigwa pa nin aki si Adan asin an saiyang agom. Nagsabi si Eva, “Tinawan ako nin Dios nin aki na kasalihid ni Abel na ginadan ni Cain.” Kaya an aki nginaranan niyang Set.#4:25 SET: Sa pandangog, an ngaran na ini nakakaarog sa Hebreyong tataramon na ibinugtak o itinao bilang kasalihid. 26Nagkaigwa nin aking lalaki si Set na nginaranan niyang Enos. Sa panahon na iyan, an mga tawo nagpoon nang mag-apod sa ngaran nin Kagurangnan.
Селектирано:
Genesis 4: MBBBIK92
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Marahay na Bareta Biblia © Philippine Bible Society, 1992.