Lucas 24
24
So Jesús qaltaq nca'alec
(Mateo 28.1-10; Marcos 16.1-8; Juan 20.1-10)
1Qaq co'ollaq ña nte'etom so la'auaxanec na'a'q soua na'axa'te, nache soua 'alo nqo'oneugalo aso huachiqui, ỹachetrac som coraxat maye iqataxaatrapigui'. Qataq huo'o so laỹepi 'alpi nnaictague'. 2Qaq co'ollaq ivireugalo asomaye, nache ila'alo so lta'araic coma' maye lapoxot aso huachiqui da saishet da ỹapotagui som ñegueuo. 3Nache inoxooroigui aso huachiqui, qalaxaye saishet da ỹanata so lo'ocỹaxac So Qarataxala' Jesús. 4Qataq sa ỹaỹate'n ca 'eeteque co'ollaq ila'alo soua dos ỹale't, nachattrañi huaqta'ato soomaye. Soua alogo somaye ỹataqta qashelectrapiguiñi. 5Qaq soua 'alol ỹataqta nlaqchiguilo da lcolanaqa', nache ỹa'alyiñi naua l-llectel, nache ỹataqta iviraxata'agueta naqa'en na 'alhua naua lata'api. Nache se'esoua ỹale't 'ena'apo':
–¿Ta'ainco' ye qanmichiitapigui na leuaxaicpi da qanmichiitaique som nca'altauec? 6Saishet da hueta'a ne'ena Somaye, cha'aye mashe qaltaq nca'alec qanqa'en. Qauennache dam la'aqtac co'ollaq hueta'a ye 'alhua Galilea, 'eeta': 7«Aỹem Shiỹaxaua Llalec Aỹem qoỹanoigui qome na 'etaxaloxoicpi, da yaqto' Aỹem qaiuaxaneuo, qalaxaye qom mashe ivi' caua tres na'axa'te, nache qaltaq ñeca'alec.»
8Nache asomayepi tachigui lauel da la'aqtac co'ollaxa So Jesús. 9Qaq co'ollaq quera'ai aso huachiqui da ỹe'eguelaxareuo, nache co'ollaq ivildeuo, nache da'aqtaxanem 'enauac de'era, soua once lamaxa'she So Jesús, nataqa'en 'enauac so laỹepi. 10Qaq so 'alpi maye irouo da la'axaỹaxa'c soua once namaxa'she, nache ỹalectaigui aso María maye Magdala lashe, qataq aso Juana, qataq aso María maye late'e so Santiago, qataq so laỹepi 'alpi. 11Qalaxaye soua namaxa'she 'eeta'am naqa'en da choche naỹaquiaxac da ỹa'axattac asomayepi, nache saishet da ỹa'amaqte'n.
12Qalaxaye so Pedro, nache nqalgoq da demeenaxaneuga aso huachiqui. Qaq co'ollaq ivireuga nache ỹalloigui na pa'auo asomaye, nache ndotec so hualoxolaỹi lapagaxaic maye qalpataxangui co'ollaxa so lo'ocỹaxac So Jesús da huetaua'a na laỹe asomaye. Ime, nache ỹe'eguelaxaua'a ca lma' ỹataqta huo'o da la'aalaxa dam qanayeuaigui.
Da nachaxanaxac So Jesús co'ollaq huangui so nqa'aic maye taỹa'a ye Emaús
(Marcos 16.12-13)
13Qaq nacheso se'eso na'a'q da huo'oi soua dos som lapaxaguenatacpi So Jesús taira'a ye nỹecpi le'enaxat Emaús, maye huo'o ca once kilómetros ye lshecta da qaỹachegoqchiguiña ye Jerusalén. 14Qaq co'ollaq quete' soomaye, nache na'aqtaxaatrapigui 'enauac de'era qanayeuaigui. 15Qaq co'ollaq ñaq na'aqtaxaatega't, nache So Jesús ca'atalo soomaye, nache nnaictagueto. 16Qaq na'aictaxa da ilotro'ot Somaye, qalaxaye huo'o som 'eeta'am da npaxatta'agueta, da huo'omshe saishet da ỹauatto'n Somaye. 17Nache So Jesús inatta'ape soomaye, 'eeta':
–¿Negue't cam qana'aqtaxañeetapigui nam nqa'aic? Qataq ¿ta'ainco' ye qauaquicoita?
18Nache so 'oonolec soomaye, le'enaxat Cleofas, ỹasat, 'eeta':
–'Enauac nam shiỹaxauapi maye hueta'a na Jerusalén qaica ca sa ỹaỹaten da qanayeuaigui se'esoua na'axa'te. Qaq ¿chaq 'amto' da qonetaña yemaye da sa 'auaỹaten de'era?
19Nache Somaye 'enapeco':
–¿Negue'to' camaxa?
Nache soomaye 'ena'apo':
–Qomye dam huaigui So Jesús maye Nazaret le'ec, som la'aqtaxanaxanec Ñim Lo'onatac 'Enauacna. Se'eso ỹale qaica ca ỹaqalanapec da huo'o ye la'aqtac, qataq da huo'o ye ỹo'ot, qaq ỹataqta ỹaỹamaxareeta Somaye Ñim Lo'onatac 'Enauacna qataq 'enauac na shiỹaxauapi. 20Qalaxaye nam lataxala'pi na ntaxaỹaxanaxanecpi da qaitaxaỹapegue' Ñim Lo'onatac 'Enauacna qataq nam maiche qarataxala'pi, ỹaneguet Somaye da nalaataguec qataq iuaxaneguet so npe'enaxaqui. 21Qaq qomi' huo'o da qanaquitaxac da nacheso Somaye, som nca'alaxatec taxa na Israel le'ecpi. Qaq nagui mashe ivi' naua tres na'axa'te da qanayeuaigui de'era. 22Qaq 'eesa da huo'oi soua 'alo maye qomi' ỹalectaiguilo da qomi' icolanaqche't, cha'aye so ña qaỹata'aguet so na'a'q, nache nqo'ooreuga aso huachiqui. 23Qaq co'ollaq saishet da ỹanata ca lo'ocỹaxac Somaye, nache ñe'eguelaxareuo da ỹa'axattrac da lauanaqche'c co'ollaq ilora'a soua namaxa'she piguem lashe' ỹa'axatta'ape da ca Jesús mashe nca'alec. 24Ime, nache je'c soua maiche qarỹa't da demeenaxareuga aso huachiqui. Qaq co'ollaq ivildeuga, nache ilaleguete da qui'itchigui. Qaq ipacchigui dam 'enapec soua 'alo, qalaxaye soua qarqaỹa't saishet da ila'alo ca Jesús.
25Nache So Jesús 'enapeco':
–¡Ỹataqta qaico' ca qauaỹaañiỹapec qami', qataq qaỹaloqta da qaua'amaqchiñi 'enauac nam la'aqtaxanaxacpi co'ollaxa som la'aqtaxanaxanecpi Ñim Lo'onatac 'Enauacna! 26¿Sa qauaỹaañiỹo' peta'a, da que'eca Lca'aguishec Ñim Lo'onatac 'Enauacna hua'auñi qome da nque'etaxan da saxanaxa da inoxoneua'a ca lo'onataxanaxac da ilo'ogue 'enauacna?
27Ime, nache So Jesús da'aqtaxanema soomaye 'enauac nam na'aqtaguec Somaye, nam nanettalec ana nere maye huetalec na la'aqtacpi Ñim Lo'onatac 'Enauacna, ỹachegoxottot aso hua'auchiguiñi lereguishe so Moisés, iviraxatta'a asom pa'atec lereguishe som la'aqtaxanaxanecpi Ñim Lo'onatac 'Enauacna.
28Qaq co'ollaq mashe yaqta'a da ivilda ye nỹecpiolec le'enaxat Emaús, nache So Jesús ỹe'enaxat da ỹapactauec. 29Qalaxaye ỹataqta ipactrega soomaye da no'onañi naqa'e'n. Nache 'eetrega, 'eeta':
–Ña qomi' 'ano'onaisopactaxa. Ten, ye mashe avit, qataq yaqta'a da pe.
Nache So Jesús ca'ateuo'oguelo soomaye da no'onaisopa. 30Nache co'ollaq mashe nso'ootrañi soomaye da datatralec so nquia'axala', nache So Jesús ỹacona aso nauole 'ayiiña da nqouagaxaueelec. Ime, nache ỹanoiguilo soomaye. 31Huaña, nache soomaye 'eco' da qaỹauatoiguilo naua la'ai'te, nache ỹauatto'n Somaye, qalaxaye So Jesús nache pal. 32Nache soomaye detaqtega'to', 'eeta':
–¡Qache ỹoqta 'eesa de'era ntonaxa'c naua qarquiyaqtel, quiye so ñanaguenaqtague' na nqa'aic, can qomi' da'aqtaxaatapeguema naua naiguilo naua ñiyigui'she maye nanettaleguete ana nere!
33Huaña, nache saishet da huo'o ca iuattra'a soomaye, nache je'c da ỹe'eguelaxaregue da Jerusalén. Huaña, nache nauaneto soua once lamaxa'she So Jesús qataq 'enauac so laỹepi. 34Nache som hueta'a yi'iye da'aqtaxanema soomaye, 'eeta':
–Ỹoqta 'eesa da qaltaq nca'alec So Qarataxala', cha'aye so Simón mashe nauane'.
35Nache soua dos ỹale't nataqa'en da'aqtaxaata'ape, ỹa'axattrac da 'eetec da hueraigui co'ollaq quetrague' so nqa'aic maye taỹa'a ye nỹecpi le'enaxat Emaús, qataq co'ollaq ỹauatto'n So Jesús chegoqchigui co'ollaq ncolaxattapiguiñi aso nauole 'ayiiña.
So Jesús nachaxanalo soua lapaxaguenataqa
(Mateo 28.16-20; Marcos 16.14-18; Juan 20.19-23)
36Qaq ña qana'aqtaxaatapigui de'era, co'ollaq So Jesús nachaxan nachatchiguingui na laiñi se'esoua lapaxaguenataqa. Nache iqui'n soomaye, 'eeta':
–La', qauacoñiiguet da l-lagaxayec Ñim Lo'onatac 'Enauacna.
37Nache soomaye ỹataqta ỹe'elaqche't de'era, qataq qalota da lcolanaxa, ipi'itaxaatrega da choche nqui'i so ilotro'ot. 38Qalaxaye So Jesús 'enapeco':
–¿Ta'ainco' ye qami' ỹe'elaqche't de'era? Qataq ¿ta'ainco' ye huo'o da lqolectaxanaxa'c naua qarquiyaqchilli'? 39Ña qaumichiñi' naua ihua'q qataq naua ichel. Qataq ñaq Aỹem qaupocheeua'a qataq Aỹem qauloitot, nache qauauattoñi da Nachaỹem ¡'Eesa da Aỹem! ¡Nachaỹem! Cam nqui'i qaica cam lapat qataq ca lpi'inec, qaq saishet da 'eetec nagui da Aỹem qauloito'ot.
40Qaq co'ollaq 'enapec de'era, nache ỹachaxa'n naua lhua'q qataq naua lapia'ate. 41Qalaxaye soomaye saxanaxa da ỹa'amaqte'n de'era, souaxat da ntonaxa'c qataq dam la'aalaqa'. Nache So Jesús 'enapeco':
–¿Huo'o peta'a ca qo'oqoi ne'ena?
42Nache soua lapaxaguenataqa ỹanem so laỹe so lauoc nỹaq. 43Nache So Jesús ỹaconeguet. Ime, nache chec, ỹauaachigui naqa'en soomaye. 44Qaq co'ollaq ime, nache 'enapegalo soomaye, 'eeta':
–De'era souaigui, nachera dam sa'axattac co'ollaq ña qami' soota'agueta: da iuen da ipacchigui qome 'enauac na ña'aqtaguec maye ỹa'axat nam namaxasoxonaxacpi maye ỹiyiñi co'olloxocheye so Moisés qataq naua leregui'she som la'aqtaxanaxanecpi Ñim Lo'onatac 'Enauacna qataq nam no'onecpi le'enaxat Salmos.
45Huaña, nache itaua'n soomaye da ỹaỹate'n naua naiguilo naua ñiyigui'she maye nanettralec ana nere maye huetalec na la'aqtacpi Ñim Lo'onatac 'Enauacna. 46Nache 'enapeco':
–Dam nanettañi ỹa'axat da ca Lca'aguishec Ñim Lo'onatac 'Enauacna, iuen da hua'auñi da qaỹalauat. Qaq qom mashe inoxoore'c caua tres na'axa'te, nache qaltaq nca'alec. 47Nataqa'en iuen da qaỹa'aqtaxanem na ỹotta'a't shiỹaxauapi Aỹem, yaqto' 'enauac namayepi ỹe'egueloqot Ñim Lo'onatac 'Enauacna, qaq Ñimaye ỹapalaxat na lasouaxashetpi. Qaq chegoqchiguiña na Jerusalén, 48da qami' qaua'axacheeuec 'enauac de'era qarauanaqchiqui. 49Qaq Aỹem qome qami' ñamaxalo cam ỹachaxanapec co'olloxocheye Ñim Ita'a. Qalaxaye qami', nache qoviita'a qome na Jerusalén, nato' qom mashe qauacoñiiguet cam na'añaxac maye chegaqasheguem.
So Jesús taigue da piguem
(Marcos 16.19-20)
50Nache So Jesús nqateeguesop soomaye ye Jerusalén da ỹauega ye Betania. Huaña yemaye, nache ỹachaxaayishegue'm naua lhua'q da ỹaalec da no'on la'aqtac soomaye. 51Qaq nache saqaỹaloq da So Jesús qaỹaueegue da piguem 52co'ollaq soua lapaxaguenataqa ñaq ỹo'oxoreetrac Somaye.
Qaq co'ollaq ime de'era, nache soua lapaxaguenataqa ỹe'eguelaxaregue da Jerusalén, ỹataqta machiyiñi. 53Nache ima'ape naua na'axa'te da ỹe'eguelaqtraua'a aso no'onaxanaxaqui late'erai da do'onaxaata'ape qataq ỹo'oxoreetrac Ñim Lo'onatac 'Enauacna. Aja', nache 'eetec de'era.
Селектирано:
Lucas 24: LÑLE13
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.