Lk 24
24
VII. CHIRIX LI XWAKLIJIK CHI YO'YO LI JESUS (24,1-53)
Li xwaklijik chi yo'yo li Jesus
(Mt 28,1-10; Mk 16,1-8; Jn 20,1-10)
1Sa' li xb'een kutan re li xamaan,#24,1 Li xb'een kutan re li xamaan a'an li domiing (cf. Mt 28,1). toj eq'la chi us, koheb' li ixq sa' li muqleb'aal ut ke'xk'am li sununkil b'an li k'uub'anb'il xb'aaneb'. 2Ab'anan koxe'xtaw chi ak tolk'osinb'il chik li pek chire li muqleb'aal, 3ut, naq ke'ok chisa', ink'a' ke'xtaw li xtz'ejwal li Qaawa' Jesus.
4Yookeb' chi xk'oxlankil a'in chi sachsookeb' xch'ool naq xaqaamileb' chiruheb' wiib' li winq, nalemtz'unk ru li raq'eb'. 5K'ajo' naq ki'ok xxiweb' li ixq! Ke'xxulub' li rilob'aal sa' ch'och' ut ke'yehe'k re:
—K'a'ut naq nekesik' sa' xyanqeb' li kamenaq li Yo'yo? 6Maa'ani chik arin: xwakliik chi yo'yo. Jultikaq eere chanru naq xexraatina naq toj wan chaq Galilea, naq kixye: 7«Li K'ajolb'ej tento taaq'axtesiiq sa' ruq'eb' laj maak, taak'ehe'q chiru krus, ut sa' rox li kutan taawakliiq chi yo'yo».#24,7 Lk 9,22.44; 18,31-33; 24,46-47.
8Toja' naq ke'naqk sa' xch'ool li raatin 9ut, naq ke'sutq'iik chaq sa' li muqleb'aal, ke'xye resil chixjunil a'in reheb' li Junlaju ut reheb' li junch'ol chik. 10Eb' li ke'yehok a'in reheb' li apóstol, a'aneb' lix María aj Magdala, lix Jwana, lix María xna' laj Santiago, ut li junch'ol chik chi ixq li wankeb' sa' xyanqeb'.
11Ab'anan eb' li apóstol ke'xk'oxla naq moko yaal ta chixjunil li neke'xye eb' li ixq, ut ink'a' ke'xpaab'.
12Toja' naq kixaqliik laj Pedro ut koho sa' aanil wan wi' li muqleb'aal; kixk'utzub' rib' chi rilb'al, ut ka'ajwi' li b'atleb' t'ikr kiril. Ut kisutq'iik sa' rochoch chi sachso xch'ool xb'aan li kik'ulmank.
Li Jesus kixk'ut rib' sa' xb'ehel Emaús
(Mt 16,12-13)
13Sa' ajwi' li kutan a'an wiib'eb' li xtzolom li Jesus yookeb' chi xik sa' jun k'aleb'aal, Emaús xk'ab'a', wan rox leew xnajtil rik'in Jerusalén, 14ut yookeb' chi seeraq'ik chirib'ileb' rib' chirix chixjunil li kik'ulmank.
15Naq yookeb' chi xtz'ilinkil rix ut chi xseeraq'inkil a'an, a' ajwi' li Jesus kinach'ok rik'ineb' ut ki'ok chi b'eek rochb'eeneb'; 16ab'anan kimoyon xsa' li ruheb' ut ink'a' ke'ru chi xnawb'al ru. 17Li Jesus kixpatz' reheb':
—K'aru chi aj ix yookex chi seeraq'ik sa' leeb'eenik?
Ke'xaqliik chi raheb' sa' xch'ool, 18ut jun reheb' a'an, aj Kleofás xk'ab'a', kixye re:
—Ma ka'jat wi' laa'at yal aj numelat Jerusalén li ink'a' nakanaw li xk'ulmank aran sa'eb' li kutan a'in?
19Ut a'an kixye reheb':
—K'a' anchal ru a'an?
Ke'xye re:
—Chirix li Jesus aj Nazaret: a'an propeet naq xwank, nim xwankil rik'in raatin ut xb'aanuhom chiru li Yos ut chiru chixjunil li tenamit. 20Eb' li xb'eenil aj tij li wankeb' sa' qayanq ut eb' laj k'amol qab'e xe'xteneb' kamk sa' xb'een ut xe'xk'e chiru krus. 21Sa' qach'ool laa'o naq a'an raj taakoloq re li tenamit Israel. Ut chirix chixjunil a'in, anaqwan ak oxib' kutan chik xk'ulb'al a'an. 22Wankeb' ajwi' qixqilal xe'sachb'esink qe: xe'wulak toj hik'ho sa' li muqleb'aal 23ut, naq ink'a' xe'xtaw chaq li xtz'ejwal, xole'xye naq wankeb' ánjel xe'xk'ut chaq rib' chiruheb' ut xe'xye naq a'an yo'yo chik. 24Wankeb' ajwi' qakomon xe'wulak sa' li muqleb'aal ut xo'e'xtaw jo' chanru xe'xye eb' li ixq; ab'an ink'a' xe'ril ru a'an.
25Toja' naq li Jesus kixye reheb':
—Laa'ex tik maak'a' eena'leb' ut aal leech'ool chi xpaab'ankil chixjunil li ke'xye eb' li propeet! 26Ma ink'a' tab'i' tento naq li Kriist xk'ul li rahilal a'an ut chi jo'kan taa'ok sa' li xnimajwal loq'al?
27Ut kixtikib' rik'in laj Moisés ut chixjunileb' li propeet, kixch'olob' chiruheb' li yeeb'il chirix sa' chixjunil li Santil Hu.
28Naq ke'nach'ok rik'in li tenamit li yookeb' wi' chi xik, yal paynum taanume'q naq kixb'aanu rib'. 29Ab'an eb' a'an ke'xmin ru chi kanaak ut ke'xye re:
—Kanaaqat qik'in, xb'aan naq yo chi ewuuk ut ak xxulq'i li saq'e.
Ut ki'ok re kanaak rik'ineb'. 30Naq yo chi hilank sa' meex rochb'eeneb', kixchap li wa, kiyoxink sa' xb'een, kixjachi ut kixtikib' xk'eeb'al reheb'.
31Toja' naq kitehonk xsa' li ruheb' ut ke'xnaw ru; ab'an li Jesus sachaamil chiruheb'. 32Ut ke'xye chirib'ileb' rib':
—Ma ink'a' tab'i' naxamnak li qach'ool naq yo chaq chi qaatinankil sa' b'e ut yo xch'olob'ankil chiqu li Santil Hu?
33Ut sa' ajwi' li honal a'an ke'xaqliik ut ke'sutq'iik Jerusalén b'arwi' ke'xtaw chi ch'utch'uukeb' li Junlaju ut eb' li te'ochb'eeninq reheb', 34yookeb' chi xyeeb'al:
—Relik chi yaal naq xwakliik chi yo'yo li Qaawa' ut xk'ut rib' chiru laj Simón!
35Toja' naq eb' a'an ke'xseeraq'i li kik'ulmank sa' b'e ut chanru naq ke'xnaw ru sa' xjachb'al li wa.#24,35 Cf. Lk 24,30; 22,19; Hch 2,42.46; 20,7; 27,35.
Naq kixk'ut rib' chiruheb' li apóstol
36Yookeb' chi aatinak chirix chixjunil a'in naq xaqaamil li Jesus sa' xyiheb':
—Chiwanq taxaq eerik'in li tuqtuukil usilal, chan reheb'.
37K'ajo' naq ke'sachk xch'ool ut ke'ok xxiw; sa' xch'ooleb' naq yookeb' chi rilb'al junaq musiq'ej.
38Ut li Jesus kixye reheb':
—K'a'ut naq sachso leech'ool? K'a'ut naq na'ok eek'a'uxl? 39Ilomaqeb' li wuq' ut eb' li woq: laa'inin ajwi'! Ch'e'omaqin ut k'ehomaq reetal naq junaq musiq'ej maak'a' xtib'el ut xb'aqel jo' nekeril we laa'in.
40Ut naq kixye a'in, kixk'uteb' li ruq' ut li roq chiruheb'. 41Toj maji' ajwi' neke'xpaab' xb'aan xsahil xch'ooleb' ut toj sachsookeb' xna'leb'; jo'kan naq li Jesus kixpatz' reheb':
—Ma wank b'ayaq eetzekemq?
42Ke'xk'e re jun jachal li pomb'il kar. 43Kixchap ut kixtzeka chiruheb'.
Xchaq'rab'inkileb' li apóstol
(Mt 28,16-20; Mk 16,14-18; Jn 20,19-23; Hch 1,4, 8)
44Chirix chik a'an kixye reheb':
—A'aneb' a'in li waatin xinye eere naq toj wankin chaq eerik'in: Tento naq taatz'aqloq ru chixjunil li tz'iib'anb'il chiwix sa' li xChaq'rab' laj Moisés, sa' xHuheb' li Propeet ut sa'eb' li Saalm.
45Toja' naq kixte xk'a'uxeb' re naq te'xtaw xyaalal li Santil Hu. 46Ut kixye reheb':
—Jo'ka'in tz'iib'anb'il: «Tento naq li Kriist taarahob'tesiiq ut taawakliiq chi yo'yo sa' xyanqeb' li kamenaq sa' rox li kutan; 47ut taapuktesimanq resil A'an re naq chixjunileb' li tenamit te'sutq'iiq rik'in li Yos ut te'kuymanq te'sachmanq li xmaakeb', taatiklaaq a'an arin Jerusalén».#24,47 Li Santil Musiq'ej toxnujob'resi chixjunil li ruuchich'och', taatiklaaq a'an sa' li tenamit Jerusalén. Chi jo'kan San Lukas naxye resil chi junxilaj li wank sa' Hch 1,4-8. 48Laa'ex ak xeril li xtz'aqlojik ru chixjunil a'in. 49Chek'e reetal, laa'in tintaqla chaq sa' eeb'een li xyeechi'om linYuwa'.#24,49 Li xyeechi'om linYuwa' a'an li Santil Musiq'ej (cf. Hch 1,4-5.8; 2,33; Jn 14,16.26; 15,26; 20,22). Kanaaqex wan sa' li tenamit Jerusalén toj tolextiqib'aaq rik'in li wankilal taachalq chaq taqe'q.
Li xtaqik li Jesus
(Mk 16,19-20; Hch 1,9, 12)
50Ut kixk'ameb' toj chi xk'atq Betania; kixtaqsiheb' li ruq' ut kirosob'tesiheb'. 51Ut naq yo chi rosob'tesinkileb', kixkanab'eb' ut kitaqsiik sa' choxa.
52Eb' a'an ke'xwiq'ib' rib' chi xloq'oninkil ru ut ke'sutq'iik Jerusalén chi k'ajo' xsahilaleb' xch'ool. 53Ut junelik wankeb' sa' rochoch li Qaawa', yookeb' chi xnimankil xloq'al li Yos.#24,53 Li Evangelio tz'iib'anb'il xb'aan San Lukas naraqe'k sa' rochoch li Yos rik'in li sahil ch'oolej ut xnimankil ru li Yos. Aran ajwi' kitiklaak chaq (cf. Lk 1,9).
Селектирано:
Lk 24: QQC
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Q'eqchi DC Bible © Bible Society in Guatemala, 2005.