Juan 10
10
Taq ri b'exex keta'am uwach ri chajinel ke
1Ri Jesús xub'i'ij:
«Paqatzij wi kamb'i'ij che alaq: China ri na kok tub'i che ruchi' ri coral ke ri b'exex yey xa tob' k'u pa kok wub'i, ri' eleq'om y e kereleq'aj b'i ri b'exex. 2No'j k'u ri kok b'i che ruchi' ri coral, ri' e chajinel ke ri b'exex. 3Ek'u rire echiri' kopon chwach ruchi' ri coral, ri chajinel k'o che ruchi' coral, kujaqala' lo che. Yey taq ri b'exex keta'am ruch'awib'al ri chajinel ke, ma rire keb'usik'ij ruk' ri kib'i' chikijujunal y keb'eresaj b'i pa ri coral. 4Echiri' eresam chub'i konoje rub'exex pa ri coral, kanab'ej b'i chikiwach y konoje rub'exex keterej b'i chirij ma keta'am ruch'awib'al. 5No'j taq ri b'exex na keterej tub'i chirij junoq we na keta'am ta uwach; ri kaki'ano e keb'animaj chwach ma na keta'am ta ruch'awib'al» xcha'.
6Ri Jesús xub'i'ij wa jun k'amb'al na'oj chike, pero rike na xkimaj ta usuk' sa' ri karaj kub'i'ij chike.
Ri Jesús e utzilaj chajinel ke b'exex
7Ek'uchiri', xub'i'ij ri Jesús:
«Paqatzij wi kamb'i'ij che alaq: In ri in uchi' ri coral pa keb'ok wi ri b'exex. 8Konoje ri xek'un nab'e chinuwach#10:8 “Konoje ri xek'un nab'e chinuwach”: Wa' e ri kakib'i'ij e q'alajisanel re ri Dios tob' na e taj. Pa wa k'amb'al na'oj ri b'exex e rutinamit ri Dios. ri'in e eleq'omab' y xa e kekeleq'aj b'i ri b'exex; pero ri b'exex na xekikajmaj ta rike.
9»In ri in uchi' ri coral ke ri b'exex. China ri kok b'i wuma ri'in, ri' kakolob'etajik y kachajix chi utz pacha' ri b'exex keb'okisax chaq'ab' pa ri coral y keb'esax b'i paq'ij re keb'e'wo'q pa chomilaj k'im. 10Juna eleq'om xew kak'unik re ku'an eleq', ku'an kamik y kusach uwach ronoje. No'j ri'in in k'uninaq re kanya k'aslemal che alaq yey wa' e jun chomilaj k'aslemal na jinta chi uk'isik.
11»In ri in utzilaj chajinel ke b'exex. Juna utzilaj chajinel ke b'exex kuya ranima' kakam kuma rub'exex. 12No'j juna mokom kachakun xa ruma katojik. Echiri' karilo kak'un lo rutiw, kanimajik y keb'uya kan ri b'exex; ma na e ta chajinel ke y na e tane kajaw. E uwari'che kuya luwar che rutiw keb'uchap ri b'exex y keb'ukicherisaj b'i. 13Wa mokom kanimajik ma na kok ta il chike ri b'exex, xew e kok il che ri kuch'ako.
14»In ri in utzilaj chajinel ke b'exex, ma ri'in weta'am kiwach ri nub'exex y rike keta'am nuwach ri'in. 15Jela' pacha' ri Nuqaw reta'am nuwach ri'in, jek'ula' ri'in weta'am uwach Rire; yey kanya wanima' kinkam kuma ri nub'exex.
16»E k'o jujun chik nub'exex na e ta kuk'il wa e k'o pa wa coral. Lik chirajawaxik wi keb'e'nuk'ama' loq. We xeb'enusik'ij, kakikoj nutzij y jela' keb'u'ana xa jun pa ri coral y xa jun ri chajinel ke.
17»Ruma k'u la', ri Nuqaw k'ax kinuna'o, ma ri'in kanya ri nuk'aslem pa kamik yey kank'am tanchi wa' echiri' kink'astaj lo chikixo'l ri ekaminaq. 18Na ya'tal ta puq'ab' junoq karesaj ri nuk'aslem we na in ta kinya'w re che. Panuq'ab' ri'in k'o wi kanya wib' pa kamik y panuq'ab' k'o wi kink'astaj lo chikixo'l ri ekaminaq. Yey wa' e ri Nuqaw ya'yom panuq'ab'» xcha'.
19Echiri' raj judi'ab' xkita wa ch'a'tem, xkijach tanchi kipa chikiwach, ma e k'o ri xekojow re y e k'o ri na xekojow taj. 20E k'i chike jewa' kakib'i'ij: «La' k'o puq'ab' juna itzel uxlab'ixel y ch'u'jerinaq. ¿Su'chak kata alaq re?» kecha'.
21No'j k'o jujun chik jewa' kakib'i'ij: «Na jinta junoq jela' kach'a'tik we k'o puq'ab' juna itzel uxlab'ixel. ¿K'o neb'a juna itzel uxlab'ixel keb'utzu'nisaj ri e potz'?» kecha'.
Raj wach ke raj judi'ab' na kakikoj taj we ri Jesús e Ucha'o'n lo ri Dios
22Chupa k'u ruq'ijol echiri' k'ax tew y k'o jab',#10:22 “Ruq'ijol echiri' k'ax tew y k'o jab'”: Kil “invierno” pa vocabulario. e ri' katajin ri nimaq'ij re ri Rocho Dios chila' Jerusalem. 23Y ri Jesús kab'in che ri Rocho Dios pa ri luwar kab'i'x che “Ruchi' Ja re Salomón”#10:23 “Ruchi' Ja re Salomón”: Jun corredor uq'ab' ri tapia re ri Rocho Dios.
24Ek'u raj judi'ab' xkisut rij ri Jesús y jewa' xkib'i'ij che:
—¿Jampa xaqi e wa' na kaq'alajisaj ta la chiqawach sa' ri wach la? We lal k'u Rucha'o'n lo ri Dios, asu b'i'ij la chiqe —xecha'.
25Ri Jesús xuk'ul uwach:
—Nub'i'im chi che alaq, yey na kakoj ta alaq. Ronoje taq ri chak kan'ano, e ri Nuqaw intaqayom che kan'ano. Ruk' taq k'u wa kan'ano, kaq'alajinik in china ri'in. 26No'j ralaq na kakoj ta alaq, ma na alaq ta kuk'il ri nub'exex, jela' pacha' ri nub'i'im chi lo che alaq.
27Taq ri nub'exex keta'am chi ri nuch'awib'al; yey ri'in weta'am kiwach y rike eteran chwij. 28Ri'in kanya kik'aslemal na jinta utaqexik cha' jela' na kasach ta k'ana kiwach y na jinta ne junoq keb'eresaj panuq'ab'. 29Yey e ri Nuqaw ri xeya'w ke panuq'ab', y Rire más k'o uwach chikiwa konoje. Ruma k'u ri', na jinta junoq keb'eresaj puq'ab' Rire. 30Ma ri Nuqaw y ri'in xa oj jun —xcha'.
Raj wach ke raj judi'ab' kakaj kaki'an ri Jesús pa'b'aj
31Julaj chik raj judi'ab' xkik'am ab'aj pakiq'ab' re kaki'an ri Jesús pa'b'aj.
32Pero Rire xub'i'ij chike:
—Lik k'i ri utzilaj chak nu'anom chiwach alaq ruk' ruchuq'ab' ri Nuqaw. ¿Ruma pachike che taq wa nu'anom kin'an alaq pa'b'aj? —xcha'.
33Raj judi'ab' xkik'ul uwach:
—Na kaqa'an ta la pa'b'aj ruma ri utz 'anom la; e ruma makuninaq la chirij ri Dios ruk' ri ch'a'tem la. Ma rilal xa lal jun achi y ka'an Dios che ib' la —xecha'.
34Ek'uchiri', ri Jesús xub'i'ij chike:
—Jewa' tz'ib'ital kan chupa ri Tzij Pixab' k'o uk' alaq: “Ximb'i'ij: Ri'ix ix dios.”#10:34 Ojertan kab'i'x “dios” chike ri e aj wach re ri tinamit. Salmos 82:6 e jun pixab'anik xuya ri Dios chike ri e aj wach y kub'i'ij rike e “dios” y e ralk'o'al ri Dios. 35Ri Dios xub'i'ij k'u “dios” chike ri xkik'ul Ruch'a'tem, yey Ruch'a'tem na kajalk'atitaj taj. 36¿Su'anik k'u ri' kab'i'ij alaq chwe in makuninaq xa ruma ri ximb'i'ij in Uk'ajol ri Dios? ma ri Dios xinucha' lo ri'in yey xinutaq lo che ruwachulew.
37»We na e ta kan'an ruchak ri Nuqaw, utz k'u ri' we na kakoj ta alaq ri kamb'i'ij. 38No'j we e kan'an ruchak ri Nuqaw, kojo k'u alaq ri' in china ri'in ruma taq ri kan'ano, na xa ta ruma ri kamb'i'ij. Y jela' keta'maj alaq y kakoj alaq ri': Ri Nuqaw wuk' ri'in y ri'in ruk' Rire, xa oj jun —xcha'.
39Ek'u raj judi'ab' xkaj tanchik kakichapo, pero na xkichap taj ma ri Jesús xel b'i chikixo'l.
40Y xuq'axuj k'u ri nimaya' Jordán pa xuya wi bautismo ri Juan y xkanaj kan chila'. 41Uk'iyal winaq xeb'opon ruk'; xe'kila' y jewa' kakib'i'ij: «Ri Juan na xu'an ta juna k'utub'al re ruchuq'ab' ri Dios chiqawach; na ruk' ta k'u ri', ronoje ri xub'i'ij kan chwi wa' wa'chi, lik qatzij» kecha'.
42Y lik e k'i ri xkub'i' kik'u'x ruk' ri Jesús chila'.
Селектирано:
Juan 10: acrN
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2009, Wycliffe Bible Translators, Inc. All rights reserved.