CAKACAKA 26
26
Sa tukuna na vu ni nona lotu ko Paula, sa qai tukuna tale ni sa digitaki mei talatala, 1—23. Sa vakarogoci koya ko Fesito, ka kaya e sa lialia. Sa qai voleka ni vakabauta ko Akaripa, 24—29. Era sa qai kaya kecega ni sa sega ni cala ko Paula, 30—32.
1Sa qai kaya vei Paula ko Akaripa, Sa qai tara mo vakatusai iko mai. Sa qai dodoka na ligana ko Paula, ka tukuni koya:
2Au sa nanuma ka’u sa kalougata, kemuni Akaripa na tui, ni’u na tukuni au edaidai e matamuni e na vuku ni ka kecega era sa beitaki au kina na Jiu: 3io, ni kemuni sa kila kecega na nodrai valavala na Jiu kei na veika era sa dauveiletitaka: o koya oqo ka’u sa masuti kemuni kina mo ni vosota mada ga mo ni rogoci au. 4A noqui valavala ni’u a gone ka yacova na siga oqo, ni’u a tiko kei ira na kai noqu mai Jerusalemi, era sa kila kecega na Jiu; 5ko ira era sa kilai au eliu, kevaka era sa via tukuna mai, ni’u sai valavala vaka-Farisi me vakataki ira era sa daumuria vakamatailalai sara na noda lotu. 6Au sa qai tu talega me’u lewai e na vuku ni ka’u sa vakanuinuitaka na vosa ni yalayala ka solia na Kalou kivei ira na neimami qase: 7ia sai koya na ka oqo era sa vakasama me ra rawata ko ira na neimami yavusa e tinikarua, era dausoro vagumatua e na siga kei na bogi. Ia e na vuku ni nuinui oqo, i Akaripa na tui, era sa beitaki au kina ko ira na Jiu. 8E vakaevei, dou sa nanuma beka ni sa ka e dauveivakatitiqataki, me vakaturi ira cake tale na mate na Kalou? 9Oi au talega, ka’u a nanuma e lomaqu ni sa dodonu me’u veimecaki e na ka e vuqa kei na yaca i Jisu na kai Nasareci. 10Ia na ka talega oqo ka’u a kitaka mai Jerusalemi; a ra lewe vuqa era sa lotu ka’u a sogolati ira e na veivale ni veivesu, ni ra sa lesi au kina na bete levu; ia ni ra sa vakamatei ka’u sa kaya me vakakina. 11Ia ka’u a cudruvi ira vakavuqa e na veivale ni lotu kecega, ka vakasaurarataki ira me ra biuta na lotu, ia ni’u sa cudru vakalevu sara vei ira, au a vakacacana talega ki na veikoro tani.
12Ia ni ka’u a lako tiko kina ki Tamasiko ni ra a lesi au ka talai au na bete levu, 13ni sa siga levu toka ga, na tui, au a raica e na sala e dua na rarama mai lomalagi, sa uasivia na kena remoremo na mata-ni-siga, a sa cila vakavolivoliti au kei ira talega era lako vata kei au. 14Ia ni keitou sa bale kecega ki na qele, au sa rogoca e dua na domo sa vosa vei au e na vosa vaka-Iperiu, ka kaya, I Saula, i Saula, o sa vakacacani au e na vuku ni cava? e ca vei iko mo caqeta na mata ni moto. 15Au sa qai kaya, O cei koi kemuni, na Turaga? A sa kaya na Turaga, Oi au ko Jisu, o koya ko sa vakacacana: 16ia mo tu cake ga, ka tu e yavamu: ni’u sa rairai vei iko e na vuku ni ka oqo, me’u lesi iko mei talatala kei na dautukutuku talega e na veika ko sa raici au kina, kei na veika ka’u na rairai kina vei iko: 17ni’u na vakabulai iko maivei ira na tamata na Isireli, kei ira na veimatanitu tani, o ira ka’u sa qai talai iko kina, 18mo laki basuka na matadra, me ra saumaki mai na butobuto ki na rarama, mai na kaukauwa talega nei Setani ki vua na Kalou me ra kakua ni cudruvi e nai valavala ca, me rai taukei vata talega emuri kei ira era yalosavasava, ni ra sa vakabauti au.
19Ia ni sa oti oqo, i Akaripa na tui, au sa sega ni talaidredre ki na raivotu vakalomalagi: 20ia ka’u sa tukuna mada eliu vei ira mai Tamasiko, kei Jerusalemi, kei na yasayasa kece vaka-Jutia, vei ira talega na veimatanitu tani, me ra veivutuni ka saumaki mai kivua na Kalou, ka kitaka nai valavala e kilikili kei na veivutuni. 21O koya oqo era sa tauri au kina na Jiu e na vale ni soro, ka segata me ra vakamatei au. 22Ia ni sa vukei au na Kalou, au sa bula kina ka yacova na siga oqo, ia ka’u sa tukuna tiko vei ira era lalai kei ira talega era lelevu, ka sa sega na ka tani ka’u sa kaya ko ya ga era a tukuna na parofita kei Mosese ena yaco mai: 23ni na mate na Karisito, ni na kedrai matai era na tu cake tale mai na mate, ka na vakatakila na rarama vei ira na tamata na Isireli, vei ira talega na veimatanitu tani.
24Ia ni sa tukuni koya tiko vakaoqo ko koya, sa vosa e na domo levu ko Fesito, I Paula, o sa lialia; sa vakalialiai iko na vuku levu. 25A sa kaya ko koya, I Fesito vakaturaga sara, au sa sega ni lialia; au sa cavuta ga na vosa sa dina ka vuku: 26ni sa kila na veika oqo na tui, ia ka’u sa vosa doudou kina vua; ni’u sa kila e sega ni vuni vei koya e dua na ka oqo, ni sa sega ni caka na ka e na dua na yasana vuni. 27I Akaripa na tui, o ni sa vakadinati ira na parofita, se segai? Au sa kila kemuni sa vakadinata ga. 28Sa qai kaya vei Paula ko Akaripa, Sa vo e lailai mo rawai au me’u lotu va-Karisito. 29Sa qai kaya ko Paula, Au sa masu vua na Kalou, e segai e na vukumu duaduaga, e na vukudra kece talega era sa rogoci au edaidai, se me vo e lailai, se me kakua ga ni vo, mo dou vakataki au; ia me kakua ga e na sinucodo oqo.
30Sa qai tu cake na tui, kei na kovana, kei Perinaise, kei ira era sa tiko vata kei iratou: 31ia ni ra sa lako vakatikitiki tani, era sa veivosaki vakai ira, ka kaya, A tamata oqo sa sega ni kitaka e dua na ka sa dodonu me mate kina se me vesu. 32Sa qai kaya vei Fesito ko Akaripa, Na tamata oqo kevaka sa sega ni cavuti Sisa me lewai koya, e dodonu ga me sereki.
Селектирано:
CAKACAKA 26: FOV
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Vakavakadewa Makawa (Fijian Old Version) © Bible Society of the South Pacific