CAKACAKA 21
21
Sa gadreva sara ko Paula me lako ki Jerusalemi, a ratou sa lako mada ki Sisaria, 1—6. Sa yaco ki Jerusalemi ko Paula, a ra sa vakacacani koya vakalevu ko ira na kai Jerusalemi, a sa vakabulai koya e dua na turaga ni valu, 17—40.
1Ia ni keitou sa biuti ira, keitou sa vakarewa ka vue yani ki Kosa, ka e na mataka ki Roti: ka maikea ki Patara: 2ia ni keitou sa kunea e dua na waqa sa soko yani ki Finaisi, keitou sa vodoka, ka soko yani. 3Ia ni keitou sa kunei Kipiro, keitou sa sokobaleta e na neitou i mawi, ka keitou sa soko ki Siria, ka uru ki Taia; ni sa sobu kina nai usana ni waqa. 4Ia ni keitou sa kunei ira sa lotu, keitou sa tiko kina ka bogi vitu: ia ni sa vakavuna na Yalo Tabu, era sa kaya vei Paula, me kakua ni lako cake ko koya ki Jerusalemi. 5Ia ni keitou sa vakaotia na veisiga ko ya, keitou a qai cavu tu ka lako yani: a sa talatala vei keitou ko ira kecega kei ira na watidra, kei ira na luvedra, keitou sa yaco mada ki nai bili ni koro, keitou sa qai tekiduru e matasawa, ka masu. 6Ia ni keitou sa veitatau, keitou sa vodo ki waqa; a ra sa suka tale ki nodratou.
7Ia ni keitou sa soko mai Taia, keitou sa yaco ki Toleme, ka veikidavaki kei ira na veiwekani, ka tiko vata kei ira ka bogi dua. 8E na mataka cake keitou sa lako yani koi keitou sa lako vata kei Paula, ka yaco ko Sisaria: ia keitou sa curu ki na vale i Filipi nai vakavuvuli, ko koya sa dua vei ira na lewe vitu, ka keitou sa tiko vata kaya. 9A sa lewe va na luvena, eratou sa goneyalewa, a ratou sa dauparofisai. 10Ia ni keitou sa bogi vuqa maikea, sa lako sobu mai Jutia e dua na parofita, ko Akapo na yacana. 11Ia ni sa curu mai vei keitou ko koya, sa taura nai vau-ni-sulu nei Paula, a sa vesuka na ligana kei na yavana, ka kaya, Sa vakaoqo na vosa ni Yalo Tabu, Era na vesuka vakaoqo nai taukei ni vau-ni-sulu oqo ko ira na kai Jutia era sa tiko mai Jerusalemi, a ra na solia ki na ligadra era sa sega ni lotu. 12Ia ni keitou a rogoca na veika oqo, koi keitou kei ira talega nai taukei, keitou a vakamasuti koya me kakua ni lako cake ki Jerusalemi. 13Sa qai kaya ko Paula, A cava dou sa kitaka ni dou sa tagi ka vakadatuvutaka na lomaqu? ni’u sa sega ni vakarau me’u vesu walega, me’u mate talega mai Jerusalemi e na vuku ni yaca ni Turaga ko Jisu. 14Ia ni sa bese ni vakarogoca ko koya, keitou sa kua soti, ka kaya, Me yaco ga na nona lewa na Turaga.
15Ia ni sa oti na veisiga oqo, keitou sa vakasosolo na neitou veika, ka lako cake ki Jerusalemi. 16Eso talega era sa lotu mai Sisaria, era sa lako vata kei keitou, a ra sa kauta e dua sa lotu makawa, ko Nasoni, na kai Kipiro, me keitou moce e nona vale.
17Ia ni keitou sa yaco ki Jerusalemi, era sa vakacegui keitou e na reki ko ira na veiwekani. 18Ia ni mataka cake sa lako vata kei keitou ko Paula kei Jemesa; a ra sa tiko kina ko ira kecega na qase. 19Ia ni sa veikidavaki kei ira ko koya sa qai tukuna yadua na ka kece ka cakava na Kalou e na kedra maliwa na veimatanitu e na nona vunau tiko. 20Ia ni ra sa rogoca, era sa vakavinavinaka vua na Kalou, a ra sa kaya vua, O iko na wekai keitou, ko sa raica, era sa le vica na udolu na Jiu era sa vakabauta; a ra sa gumatua kecega me ra muria na vunau: 21ia ka so sa tukuni iko vei ira, ni ko sa vakavulici ira kecega na Jiu, era sa tiko e na kedra maliwa na veimatanitu tani, me ra biuti Mosese, ni ko sa kaya me ra kakua ni cilivi ira na gone, se muria nai valavala eliu. 22Ena vakabeka evei oqo? ni ra na rogoca dina ko sa tadu mai. 23O koya mo qai kitaka na ka oqo keitou sa kaya vei iko: E le va na tamata sa tiko vata kei keitou, eratou a bubului; 24mo kauti iratou, ka vakasavasavataki iko vata kei iratou, ka volia na nodratoui madrali, me ratou tasia na uludratou; me ra kila kecega kina ni sa sega ni dina na ka kecega ko sa tukuni kina vei ira, ka ni ko sa muria talega na vunau e na nomui valavala. 25Ia e na vukudra na veimatanitu tani era sa vakabauta, eda sa vola oti kina ka lewa, me ra maroroi ira ga mai na ka sa cabo ki na veimatakau, mai na dra talega, kei na ka sa kuna, kei na daudara.
26Sa qai kauti iratou na tamata ko Paula, ia ni sa vakasavasavataki koya vata kei iratou e na mataka, sa curu ki na vale ni soro, me tukuna na siga ena oti kina na vakasavasavataki, ka me cabori nai madrali e na vukudratou yadua.
27Ia ni sa vakarau oti na bogi vitu, ni ra sa raici koya e na vale ni soro ko ira na Jiu mai Esia, era sa vakauqeti ira na tamata kecega, ka tauri koya, 28a ra sa qoqolou, Oi kemudou na Isireli, dou veivuke mai: ko koya oqo na tamata sa dauvakavulici ira na tamata kece, e na veiyasana kecega, me ra cati ira na kai noda, kei na vunau, kei na tikina oqo: a sa kauta talega eso era sa matanitu tani ki na vale ni soro, a sa vakadukadukalitaka na tikina tabu oqo. 29Ni ra a raica eliu sa tiko vata kaya e na koro ko Tirofimo na kai Efeso, a ra sa nanuma sa kauta ko Paula ki na vale ni soro. 30A ra sa ue kecega na lewe ni koro, a ra sa cici vata ko ira na tamata: a ra sa tauri Paula, ka yarataka mai na vale ni soro ki tautuba: a sa sogo sara na katuba.
31Ia ni ra sa segata me ra vakamatei koya, sa yaco vua na turaga levu ni mata sotia nai tukutuku, ni sa ue ko Jerusalemi taucoko. 32A sa kauta sara ko koya eso na sotia, ka so na turaga lalai, ka cici sobu vei ira: ia ni ra sa raica na turaga levu kei ira na sotia, era sa mudu ni vaculaki Paula.
33Sa qai lako voleka na turaga levu, ka tauri koya, a sa kaya me vesuki e na sinucodo e rua; a sa taroga se ko cei ko koya, ka cava talega ka kitaka. 34A ra sa dui kacivaka na ka tani ko ira na lewe vuqa; ia ni sa sega ni kila ko koya na kena dina e na vuku ni ue, sa qai kaya me kau ko koya ki na bure ni valu. 35Ia ni sa yaco ko koya ki nai kabakaba, sa yaco ni ra sa veibiliyaki koya yani ko ira na sotia e na vuku ni nodrai valavala vakaukauwa na lewe vuqa: 36ni sa lewe vuqa na tamata era sa muria, ka qoqolou, Kauta tani yani.
37Ia ni sa tuberi tiko ko Paula ki na bure ni valu, sa kaya ko koya vua na turaga levu ni valu, E tara me’u vosa mada vei kemuni? Sa qai kaya ko koya, Ko sa kila li na vosa va-Kirisi? 38Ko sa sega li ni koya na kai Ijipita, ko koya ka vere e na gauna sa oti, ka kauti ira ki na veikau e le va na udolu na Daulaba? 39Sa qai kaya ko Paula, Oi au na Jiu, na kai Tarisu mai Silisia, sa sega ni koro kaisi na noqu koro; ia ka’u sa masuti kemuni mo ni laivi au mada me’u vosa vei ira na tamata. 40Ia ni sa vakatara ko koya, sa tu cake ko Paula e nai kabakaba, ka vakatabataba vei ira na tamata. Ia ni ra sa tiko lo sara, sa vosa vei ira ko koya e na vosa vaka-Iperiu, ka kaya,
Селектирано:
CAKACAKA 21: FOV
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Vakavakadewa Makawa (Fijian Old Version) © Bible Society of the South Pacific