CAKACAKA 20
20
Sa lako ki Masitonia ko Paula, a sa kitaka na cakacaka ni Kalou. Sa moce ko Utiko ni sa rogoci Paula tiko, a sa lutu maicake, ka sa ciba, a sa vakabulai koya tale ko Paula, 1—12. Sa veitatau ko Paula kei ira na qase ni lotu mai Efeso, 13—38.
1Ia ni sa oti na ue, sa kacivi ira era sa lotu ko Paula, a sa tatau, ka lako tani yani me lako ki Masitonia. 2Ia ni sa lakova oti na yasana ko ya ko koya, ka vakavulici ira vakalevu, sa qai lako ki Kirisi. 3A sa tiko mada kina ka vula tolu. Ia ni ra sa buki kena vere ko ira na Jiu, ni sa vakarau soko ki Siria, sa qai nakita ko koya me lakovi Masitonia e na nona lesu tale. 4A ratou sa lako vata kaya ki Esia ko Sopatero na kai Peria; kei Arisitako kei Sekudu, koi rau na kai Cesalonaika; kei Keio na kai Tapi, kei Timoci; kei Tikiko kei Tirofimo, koi rau na kai Esia. 5O iratou oqo eratou sa lako eliu ka waraki keitou mai Tiroa. 6Ia ni sa oti mada na gauna ni kana madrai tawa leveni, keitou sa qai soko tani e Filipai, ka bogi lima keitou sa qai vauci ira mai Tiroa; keitou sa tiko mada kina ka bogi vitu.
7Ia e nai matai ni siga ni wiki, ni sa soqoni vata ko ira sa lotu me ra dovi madrai, sa vunau vei ira ko Paula, ni sa vakarau lako e na mataka; a sa vunau tiko ka lomaloma-ni-bogi na vanua. 8A sa vuqa na cina e nai taba loma ni vale ecake, keimami sa soqoni vata kina. 9A sa dua na cauravou na yacana ko Utiko, sa tiko voleka ki na katuba ecake, a sa moce lutu sara; ia ni sa vunau vakadede ko Paula, sa biti koya na moce, a sa lutu sobu mai nai katolu ni taba loma ni vale, ia ni sa laveti cake sa mate tu. 10A sa lako sobu ko Paula a sa davo ki delana, ka mokota, ka kaya, Dou kakua ni kidroa; ni sa tiko vua na yalona. 11Ia ni sa lako cake ko koya, ka dovi madrai, ka kana, a ra sa veivosaki vakadede, ka kida na mataka, sa qai lako tani ko koya. 12A ra sa kauta mai na cauravou ni sa bula, a ra sa vakacegui vakalevu.
13Ia keitou sa liu yani ka vodoka na waqa, ka soko ki Aso, ni keitou sa nanuma me vakavodoki Paula kina, sa vakaoqo na nona lewa, ni sa via taubale ko koya. 14Ia ni keitou sa sota kaya mai Aso, keitou sa vakavodoka, ka yaco ki Mitilini. 15Ia keitou sa soko tani yani eke, ka yaco me donui Kio e na siga sa tarava; ka bogi dua, keitou sa yaco ki Samo; ka bogi dua tale, keitou sa yaco ki Milito. 16Ni sa lewa oti ko Paula me sokobaleti Efeso, me kua ni tiko vakadede mai Esia; ni sa vakariri, kevaka e rawa vua, me tiko mada mai Jerusalemi ka qai yaco na siga ni Penitiko.
17A sa talaki mai Milito ki Efeso, me lakovi ira na nodra qase nai soqosoqo lewe ni lotu. 18Ia ni ra sa yaco vua, sa kaya vei ira ko koya, Dou sa kila na noqui valavala e na veisiga kecega ka’u a tiko kina kei kemudou, sa vakatekivu e nai matai ni siga ka’u a lako mai kina ki Esia; 19ni’u a qarava na Turaga e na yalo e malumalumu sara, ka levu na wai ni mataqu, kei na dauvere sa yaco vei au ni ra sa buki qau vere ko ira na Jiu: 20ni ka’u a sega ni rere me’u kua kina ni tukuna e dua na ka sa yaga vei kemudou, ka’u vakavulici kemudou, ni dou sa soqoni vata, e na veivale talega, 21ni’u a vakarota tiko kivei ira na Jiu, vei ira talega na veimatanitu tani, na veivutuni vua na Kalou, kei na vakabauta na noda Turaga ko Jisu Karisito. 22Ka raica au sa qai lako ki Jerusalemi ka ni sa uqeti au na yaloqu, ka’u sa sega ni kila se cava ena yaco kina vei au; 23oqo ga ni sa vakatakila vei au na Yalo Tabu e na veikoro kecega, ka kaya sa waraki au nai vesu kei na rarawa. 24Ia ka’u sa sega sara ni nanuma na noqu bula me ka talei vei au ka me’u vakaotia ga na noqu cakacaka kei nai tavi ka solia mai vei au na Turaga ko Jisu, me’u vakatakila nai tukutuku-vinaka ni loloma ni Kalou. 25Ka raica, au sa kila dou na sega ni raica tale na mataqu, koi kemudou kecega au a lako voli e na kemudou maliwa, ka vunautaka na matanitu. 26O koya ga ka’u sa vakadinadina kina vei kemudou e na siga oqo, ni’u sa sega ni cala e na vukuna e dua sa na cudruvi: 27ni’u sa sega ni rere ni tukuna vei kemudou na loma ni Kalou taucoko. 28O koya ga mo dou vakaraici kemudou, kei ira kecega na qele-ni-sipi, sa lesi kemudou kina na Yalo Tabu mo dou nodrai vakatawa, mo dou vakania nai soqosoqo lewe ni lotu ni Kalou; ko ira sa volia ko koya, e na nona dra ga. 29Ni’u sa kila oqo, ni’u sa lako tani eke ena qai curu mai vei kemudou eso na wolifa ca sara; era na sega ni lomani ira na qele-ni-sipi. 30Ena tubu cake talega eso na tamata vei kemudou, era na vosataka na ka e veivakacalai, me mari ira kina era sa lotu me ra muri ira. 31O koya mo dou qai vakatawa, ka nanuma ni sa tolu na yabaki ka’u a sega ni mudu kina ni vunauci kemudou kecega e na siga kei na bogi, ka vakawai tiko na mataqu. 32Oi kemudou na veiwekani, au sa qai tataunaki kemudou vua na Kalou, kei na vosa ni nona loloma o koya sa rawata me vakatataki kemudou ka solia vei kemudou mo doui votavota vata kei ira kecega sa vakasavasavataki. 33Au sa sega ni kocova na siliva, se na koula, se nai sulu ni tamata e dua. 34Dou sa kila talega, ni sa daucakacaka na ligaqu oqo me so na ka e yaga vei au, vei iratou talega eratou sa tiko vei au. 35E na ka kecega au sa vakatakila vei kemudou, ni sa kilikili mo dou daucakacaka vakaoqo mo dou vukei ira sa malumalumu, mo dou nanuma talega na vosa ni Turaga ko Jisu, ni sa kaya ko koya, A ka ni veivakalougatataki vakalevu me soli ka, ka vakalailai ga me taura na ka.
36Ia ni sa vosa oti vakaoqo ko koya sa tekiduru, ka masu vata kei ira vakaaduaga. 37A ra sa tagi sara kecega, ka mokoti Paula, ka reguci koya; 38a sa rarawa vakalevu na lomadra e na vuku ni vosa ka kaya ko koya, ni ra na sega ni raici koya tale. A ra sa talatala vua ki waqa.
Селектирано:
CAKACAKA 20: FOV
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Vakavakadewa Makawa (Fijian Old Version) © Bible Society of the South Pacific