CAKACAKA 17
17
Sa laki vunau mai Cesalonaika ko Paula, a sa vakabauta ko ira eso, ka cudru eso, 1—9. Era sa vakatalai koya kei Sailasa ki Peria, a ra sa vakabauta kina na kai Peria e lewe vuqa, 10—15. Sa lako ki Aceni ko Paula ka vunau, a sa vakabauta ko ira eso, 16—34.
1Ia ni ratou a lakovi Amifipoli kei Apolonia, eratou sa yaco ki Cesalonaika, a sa tu kina e dua na nodra vale ni lotu na kai Jutia: 2a sa curu kina vei ira ko Paula, me vaka na nonai valavala, ka sa tolu na siga ni vakacecegu sa vakavulici ira kina mai nai Vola Tabu, 3ni sa vakatakila ka vakadinadina, ni sa kilikili kei na Karisito me vosota na mate, ka tu cake tale mai na mate; ka vaka, Ni sai koya na Karisito, ko Jisu oqo, ko koya ka’u sa vunautaka vei kemudou. 4A sa vakabauta ko ira eso, ka laki veitokani kei Paula kei Sailasa; kei ira e lewe vuqa na kai Kirisi era a lotu vaka-Jiu, kei ira na marama era sa sega ni lewe lailai.
5Sa qai vuvu ko ira na Jiu, a ra sa kauta eso vei ira na kaisi botoboto, a ra sa vakasoqoni ira vata na lewe vuqa, ka vakatubu ue e na koro; a ra sa cici vakaukauwa ki na vale i Jesoni, a ra sa segata me ra kauti iratou vei ira na lewe ni koro. 6Ia ni ra sa sega ni kunei iratou, era sa yarataki Jesoni kei ira na veiwekani eso vei ira na turaga ni koro, ka kaci, O iratou oqo eratou sa vukici vuravura me ca, eratou sa tadu talega mai kike; 7ka sa kauti iratou ko Jesoni ki nona vale; ka ra sa talaidredre ko ira kecega oqo ki na vunau i Sisa, a ra sa kaya sa dua tale na tui, ko Jisu. 8A ra sa vakidroataki ira na lewe ni koro kei ira na kena turaga, ni ra sa rogoca na veika oqori. 9Ia ni ra sa vakabauta na yalayala i Jesoni kei ira na tani, era sa sereki ira me ra lako.
10Ia ko ira na veiwekani era sa kusarawa me ra talai Paula kei Sailasa ki Peria e na bogi; ia ni rau sa yaco kina, erau sa lako ki na nodra vale ni lotu na kai Jutia. 11A ra sa uasivi vei ira na kai Cesalonaika ko ira oqo e na yalo vakaturaga, ni ra sa vakarogoca na vosa e na loma e vinakata sara, a ra sa dauvakasaqaqara e nai Vola Tabu e na veisiga, se sa vakakina na ka oqori, se segai. 12O koya ga oqo era sa lewe vuqa kina era sa vakabauta; kei ira talega na marama ni Kirisi, kei ira na tagane, era sa sega ni lewe lailai. 13Ia ni ra sa kila ko ira na Jiu mai Cesalonaika ni sa vunautaka na vosa ni Kalou ko Paula mai Peria, era sa lako talega kina, ka vakayavalati ira na lewe vuqa. 14A ra sa kusarawa kina na veiwekani me ra talai Paula yani me lako vaka ki na wasawasa: a rau sa tiko laivi ga maikea ko Sailasa kei Timoci. 15Ia ko ira sa vakaraici Paula era sa kauta ki Aceni: ia ni sa tau vei ira nai vakaro vei Sailasa kei Timoci me rau lako kusarawa mai vua, era sa qai lako.
16Ia ni sa waraki rau tiko mai Aceni ko Paula, sa katakata vakalevu na lomana, ni sa raica sa oso na koro e na veimatakau. 17O koya sa veileti kina ko koya kei ira na kai Jutia e na nodra vale ni lotu, kei ira talega na tani era sa lotu, kei ira talega era sa sota kaya e na rara ni veivoli e na veisiga. 18Sa qai veileti kaya, eso na nodra vuku nai tokani i Epikuro, kei ira na Sitoike. Ka sa kaya eso, A cava mada sa via kaya o la na dauvosa oqo? eso tani, Ko koya oqo sa vaka e dua sa vakatakila mai eso na kalou vou: ni sa vunautaki Jisu vei ira ko koya, kei na tu cake tale mai na mate. 19A ra sa qai taura, ka tubera ki na vanua-cecere nei Arisi, ka kaya, Ena rawa beka me keimami kila se cava nai vakavuvuli vou oqo ko sa mai tukuna? 20ni ko sa kauta mai eso na veika e veivakurabuitaki ki na daligaimami: keimami sa via kila kina, se cava nai balebale ni veika oqo. (21Ni sa sega na ka tani era sa daukitaka ko ira kecega na kai Aceni, kei ira na vulagi era sa tiko kina, me ra veitukutukunitaka ga se rogoca, e dua na ka vou.)
22Sa qai wavu tu ko Paula e na loma ni vanua-cecere nei Arisi, ka kaya, Oi kemuni na kai Aceni, au sa kunea e na ka kecega ni kemuni sa dausoro vakalevu. 23Io, ni’u sa lako voli, ka raica na veika kemuni sa soro kina, au sa kunea talega e dua nai cabocabo-ni-soro sa volai kina VUA NA KALOU E TAWA KILAI. Ia ko koya ko ni sa soro kina ni kemuni sa sega ni kila, au sa qai tukuna vei kemuni. 24A Kalou ka buli vuravura kei na ka kecega sa tu kina, sa Turaga ga ko koya mai lomalagi kei vuravura, a sa sega ni tiko e na veivale ni soro sa caka e na liga; 25a sa sega talega ni qaravi e na liga ni tamata, me vaka e bau yaga vua e dua na ka, ni sa solia ga ko koya vei keda kecega na bula, kei na cegu, kei na ka kecega; 26a sa buli ira, era sa dra vata, na lewe ni veivanua kecega, me ra tiko e na dela i vuravura taucoko, a sa lesia na veigauna ka digitaki eliu, kei nai yalayala ni nodra veiyasana; 27me ra vakasaqara na Kalou, de ra vakayayamo beka vua, ka kunea, ia sa sega ga ni yawa ko koya vei keda yadua; 28ni da sa bula vei koya, ka yavala, ka rawata mai vua na noda bula; me vaka talega sa kaya ko ira na nomuni dau-ni-vucu eso, Sa nona kawa talega koi keda. 29Oqo, ni da sa kawa ni Kalou, e sega ni dodonu me da nanuma sa tautauvata na Kalou kei na koula, se na siliva, se na vatu, sa ceuta na matai se na tamata vuku. 30Ia na gauna ni lialia sa vosota oti na Kalou; a sa vakarota e na gauna edaidai vei ira na tamata kecega e na veivanua kecega me ra veivutuni; 31ni sa lokuca ko koya na siga, ena lewai vuravura kina e na lewa dodonu, vei koya na tamata sa lesia ko koya; a sa vakadinadina kina vei ira na tamata kecega, e na nona vakaturi koya cake tale mai na mate.
32Ia ni ra sa rogoca na tu cake tale mai na mate, sa vakalialia ko ira eso; ka so sa kaya, Keitou na rogoci iko tale e na ka oqo. 33Sa qai lako tani yani e na kedra maliwa ko Paula. 34A sa kabiti koya eso na tamata, a ra sa vakabauta; e dua vei ira ko Taionisio mai na mataveilewai mai na vanua-cecere nei Arisi, kei na yalewa sa vakatokai ko Tamarisi, koi rau kei ira tale eso.
Селектирано:
CAKACAKA 17: FOV
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Vakavakadewa Makawa (Fijian Old Version) © Bible Society of the South Pacific