CAKACAKA 14
14
Sa vakacacani ko Panapasa kei Paula mai Ikoniona, a rau sa lako kina ki Lisitira, a sa qai vakabula e dua sa lokiloki ko Paula, a ra sa kaya kina na kai Lisitira erau sa kalou, 1—18. Sa vakacacani ko Paula; erau sa qai lako kei Panapasa ki na veikoro, ka vakavuvuli kina, 19—28.
1A sa yaco mai Ikoniona, ni rau sa lako vata ki na nodra vale ni lotu na Jiu, ka rau sa vosa, ka sa vakabauta kina e lewe vuqa na Jiu kei ira sa matanitu tani. 2Ia ko ira na Jiu era vakatitiqa, era sa vakauqeta na lomadra era sa matanitu tani, me ra lomaca vei ira na veiwekani. 3A rau sa tiko vakadede kina ka vosa doudou e na vuku ni Turaga, ko koya sa vakatakila ni sa dina na vosa ni nona loloma, ka solia me caka rawa e na ligadrau eso nai vakatakilakila, kei na veika e veivakurabuitaki. 4A sa tawase rua ko ira na lewe vuqa e na koro; eso sa totaki ira na Jiu, ka so sa totaki rau nai apositolo. 5Ia ni ra sa lako vakaukauwa ko ira sa matanitu tani, kei ira talega na Jiu, kei ira na nodra turaga, me ra vakacacani rau ka vakaviriki rau e na vatu, 6erau sa kila mada eliu, ka rau dro tani ki Lisitira kei Tapi, erau sa koro vaka-Likeonia, ki na yasana talega sa vakavolivolita: 7ka rau sa vunautaka talega maikea nai tukutuku-vinaka.
8A sa tiko mai Lisitira e dua na tamata, sa malumalumu na yavana, ko koya sa lokiloki ni sa sucu mai, a sa sega ni lako rawa e na dua na siga: 9sa rogoci Paula ko koya ni sa vosa tiko; ia ni sa vakaraici koya matua ko koya, ka kunea ni sa tu vua na vakabauta me vakabulai kina, 10sa vosa e na domo levu, Tu vakadodonu cake. A sa rika ko koya, ka lako voli. 11Ia ni ra sa raica ko ira na tamata na ka sa kitaka ko Paula, era sa tabalaka cake na domodra, ka kaya e na vosa vaka-Likeonia, Oi rau na kalou erau sa lia tamata mai, ka sa lako sobu mai vei keda. 12A ra sa vakatokai Panapasa, mei Jupita; kei Paula, mei Makuri, ni sa dau ni vosa ko koya. 13O koya talega na bete i Jupita, ka tiko e mata ni koro na nona bure kalou sa kauta mai ki na matamata-ni-koro eso na pulumokau kei na salusalu, a sa vinakata kei ira na lewe vuqa me ra vakacaboi soro. 14Ia ni rau sa rogoca koi rau nai apositolo ko Panapasa kei Paula, erau sa dresulaka na nodraui sulu, ka cici sara vei ira na tamata, ka qoqolou, 15ka kaya, Oi kemuni na turaga, a cava ko ni sa kitaka kina na veika oqo? eda sa tamata vata kai tovo vata talega kei kemuni, ia keirau sa vunau vei kemuni mo ni saumaki tani mai na veika oqo sa sega ni yaga, kivei koya na Kalou bula, ko koya ka buli lomalagi, kei vuravura, kei na wasawasa, kei na ka kecega sa tu kina: 16ko koya ka vosota na lewe ni veivanua kecega e na gauna eliu me ra lako ga e na nodra sala. 17Ia ka sega ga ni laiva me sega na nonai vakatakilakila, ni sa caka vinaka tiko ko koya, a sa solia mai vei keda na uca mai lomalagi, kei na yabaki e levu kina na vuata, a sa vakamamautaka na lomada e na kakana kei na marau. 18A sa vo e lailai me rau sega ni tarovi ira na lewe vuqa e na vosa oqo, me ra kakua kina ni vakacaboi soro vei rau.
19A sa lako mai eso na Jiu mai Anitioki kei Ikoniona, a ra sa vakauqeti ira na tamata, ia ni ra sa vakaviriki Paula e na vatu, era sa yarataka ki nai bili ni koro, ni ra sa nanuma sa mate ko koya. 20Ia ni sa tu vakavolivoliti koya ko ira sa lotu, sa tu cake ko koya, a sa lako ki na koro. Ia e na sabogibogi erau sa lako kei Panapasa ki Tapi. 21Ia ni rau sa vunautaka oti nai tukutuku-vinaka e na koro ko ya, ka vakalotutaki ira kina e lewe vuqa, erau sa qai lesu ki Lisitira, kei Ikoniona, kei Anitioki, 22a rau sa vakataudeitaka na yalodra era sa lotu, ni rau sa vakarota vei ira me ra tu dei e na vakabauta, ka kaya ni sa kilikili me vuqa na ka rarawa eda sa curu kina ki na matanitu ni Kalou. 23Ia ni rau sa lesia eso me nodra qase nai soqosoqo lewe ni lotu kecega, ni rau sa masu talega ka lolo, erau sa tataunaki ira vua na Turaga, ko koya era a vakabauta. 24Ia ni rau sa lakovi Pisitia, erau sa yaco ki Pamifilia. 25Ia ni rau sa vunautaka na vosa mai Perika, erau sa lako ki Atalia: 26a rau sa soko tani maikeri ki Anitioki, erau a vatonaki kina me nodrau na loloma ni Kalou e na vuku ni cakacaka era sa qai vakaotia.
27Ia ni rau sa yaco kina, ka vakasoqoni ira vata nai soqosoqo lewe ni lotu, erau sa tukuna na ka kecega sa cakava na Kalou ni sa veivuke kei rau, ka sa dolava na katuba ni vakabauta vei ira na veimatanitu tani. 28A rau sa tiko vata vakadede kei ira sa lotu.
Селектирано:
CAKACAKA 14: FOV
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Vakavakadewa Makawa (Fijian Old Version) © Bible Society of the South Pacific