Mateo 6
6
So' Jesús dapaxaguenataxanec da' lasoxoc da' qoỹí'et ga' 'ónaxaic
1Sa 'te qomle da' 'analoxóñiita da' 'uootaxa 'av'íchii da' 'ad'amaqténataxanaxaquii, qaidi 'ami ỹauaachiilo jen' siỹaxadipi. Qá'a da' na'chi 'oñíit'ec dójo', qana'chi ñi' 'adet'ai 'me net'ague da' piỹem, jiñi'me sa 'te da' ỹa'uo ga' 'anseeténaguiquii. 2Chan'eesa da' ỹivíta da' 'alcochíiỹa jega'me 'uo da' louénaxanaxa, qaa'le sa 'te da' ỹaỹaten'a't 'aviñii ỹima na' siỹaxadipi, da' 'oñí'ỹam da' 'éeta jen'me saqaỹataxalégue da' lasoxoc da' naloxóota da' huétaaue jaga' lemáxaqui na' judiopi 'uootaxa ga' naq'aic. Qá'a 'éet'ec dójo' jen'me siỹaxadipi, qá'a 'chi sétaaque da' 'ónaxaic da' n'aqtaguec. Qaláxasa jaỹim senaac jeda'me dójo' ỹí'et, jeda'me náỹi da' sóxote 'uo da' neseeténaguec. 3Qaláxasa 'am da' ỹivíta da' 'uo ga' 'auanem jega'me 'uo da' louénaxanaxa, qaa'le qaỹa 'te ga' 'anchoxota, cha ỹivíd'a ga' 'adaqáỹa 'me 'anauotaxaua. 4Na'chidáta da' 'auoxochiñi jeda'me 'au'étetac. Qana'chi jiñi'me 'adet'a Dios 'me ỹaỹáten jega'me sa di'ỹoq 'aué'et, jiñi'me ỹa'uo ga' 'anseeténaguec.
So' Jesús dapaxaguenataxanec da' tamnaxac
(Lucas 11.2-4)
5Qataxa da' ỹivíta da' 'antamiñii, qaa'le sa 'te qomle da' 'aviñí'ỹam jen'me 'chi naloxónaxaicpi da' netamen 'me noqopita da' nichaatétañi da' huáaue jan'me lemáxaqui na' judiopi 'uootaxa jaga'me loqote ga' naq'aic da' ỹima na' siỹaxadipi ỹátaqta ỹilóchiỹi. Jaỹim 'ami senapegalo da' jen'me sóxote 'uo da' neseeténaguec. 6Qaláxasa 'am da' ỹivíd'a da' 'antamen, qaa'le 'aunoxonóoue ga' 'ad'emec. Qana'chi 'auapadínỹi ga' som. Ỹim, qana'chi 'antamenot jiñi'me 'adet'a 'me sa di'ỹoq 'me 'am huet'asop. Qana'chi jiñi'me 'me ỹaỹáten jega'me sa di'ỹoq 'me 'au'étetac, ỹañoxot da' ỹa'uo ga' 'anseeténaguec.
7Da' 'antamen, qana'chi sa 'te da' 'av'iỹílaqtalégue ga' 'ad'aqtac 'me qaỹa ga' náỹi, da' 'auená'am jen'me sa ỹaateton ñi' qan'étoqo't, 'me 'éetapega da' qodemachíỹa ỹasouaxat da' ỹátaqta jalcote da' letaxaỹaxac. 8Sa 'te qomle da' 'auadénaxachii jen'me. Qá'a ñi' qadet'a Dios, jiñi'me ỹaỹáten ga' 'avíñiitaaque da' 'uootaxa maliaxa da' 'aviỹáxañiỹot. 9Chan'eesa da' 'antamiñii, qaa'le 'oñiit'oi:
'Am qadet'a qan'étoqo't 'me 'onet'ague di' piỹem,
ỹima da' qoỹi'ỹoxoden da' 'adenaxat.
10Ỹa 'anamaxaño' qomle da' 'ad'onataxanaxac,
tetoqo' ỹí'et ga' 'onétapeec ỹima jen'me huetalquéna, 'ená'am jena'me huet'ot na' piỹem.
11Ỹa qo'mi 'auanema jénjo' nolo' ga' qonoq 'me seuénaqtaaque.
12'Auapalaxa't qomle naua' qadoico, 'ená'am qo'mi da' sóxote sapalaxataq ga' qo'mi qoỹ'eteque 'me sa nó'in.
13Sa 'te qomle da' qo'mi 'auasengueta ga' qan'iinaguec, na'chidáta da' qo'mi 'antelaqtena'agueta ga' sa nó'in.
Qá'a da' 'ad'onataxanaxac, qataxa da' 'ad'añaxac, qataxa da' 'adi'ỹoxodic na'chi 'eeta't qaỹa 'te loiquiaqa'. Já'a, na'chi 'éeta dójo'.
14Qá'a da' 'ami 'auchoxodíñii jega'me sa nó'in 'me 'ami ỹ'eteque jega'me 'adaqaỹai, qana'chi ỹañoxot da' 'ami ỹichoxode'n nataq'en jiñi'me 'adet'ai 'me net'ague da' piỹem. 15Qaláxasa 'ami da' 'uootaxa sa 'auchoxodíñii ga' 'adaqaỹai, qana'chi jiñi'me 'adet'ai Dios nataq'en sa 'te da' 'ami ỹichoxode'n da' ỹapalaxa't naua' 'adoicódii'.
So' Jesús dapaxaguenataxanec da' lasoxoc ga' siỹaxaua da' noqouaqtela't da' netamen
16Da' ỹivíta da' 'ami 'anqouaqchichiila't da' 'antamiñiỹot ñi' qan'étoqo't, qaa'le sa 'te qomle da' di'ỹoqóta da' daquico na' 'adatáxasoxoc, da' 'aviñí'ỹam jen'me siỹaxadipi 'me 'chi naloxóota. Qá'a jen'me 'éet'ec dójo', qá'a sétaaque da' qoỹaỹáten da' noqouaqtela't. Jaỹim 'ami senapegalo da' jen'me sóxote 'uo da' neseeténaguec. 17Qaláxasa 'am, da' ỹivíta da' 'anqouaqtela't da' 'antamen, qaa'le 'am ỹátaqta 'anapilódeta, qataxa 'antaquíchiiñi na' 'adaỹoxot, 18qaidi jen' siỹaxadipi sa 'te da' ỹaỹáten da' 'am 'anqouaqtela't. Na'chiñíta ñi' 'adet'a Dios 'me 'am huet'asop, jiñi'me 'am ỹaỹáten. Qana'chi jiñi'me ỹa'uo ga' 'anseeténaguec.
Da' nesaliaxa 'me huet'ague da' piỹem
(Lucas 12.33-34)
19Sa 'te qomle da' ỹágueegue da' jalcote 'aviñii da' 'adesaliaqai jen' 'aléua, 'me huá'ña da' ỹañoxot da' ỹichic ga' lapaxat, 'uootaxa da' 'chi doláchiiñi gamachaqaiga noxoset, qataxa ỹañoxot da' decachíỹa ga' cacháxaic. 20Na'chidato' da' 'auauóỹaaque ga' 'adesaliaqai ga' hua'ague da' piỹem 'me sa 'te da' ỹinoxoneuó'o ga' lapaxat da' ỹichic, 'uootaxa da' 'chi doláchiiñi gamachaqaiga noxoset, qataxa sa 'te da' ỹinoxoneuó'o ga' cacháxaic da' decachíỹa. 21Qá'a 'ami jega'me huet'ague ga' 'adesaliaqai, nataq'en huet'ague jañi' 'adiquidiaqchii.
Jaga' coỹadáxanaqte 'me ỹicoỹadetalégue ga' siỹaxaua
(Lucas 11.34-36)
22Naua' 'ad'ai'te, jenaa'me 'ená'am jaga' coỹadáxanaqte 'me ỹicoỹadetalégue da' 'adó'oquiaxac. Jenaa'me da' 'uootaxa ỹiỹamadíchidiñi, nataq'en ỹima da' 'adó'oquiaxac huétaaue na' ỹ'oqóchiiñi. 23Qaláxasa naua' 'ad'ai'te, da' 'uootaxa sa ỹiỹamadídiñi, qana'chi ỹima da' 'adó'oquiaxac huétaaue na' l'álaxa. Chan'eesa jen' ỹ'oqóchiiñi 'me 'am huet'ot, da' 'uootaxa n'álaxa, qana'chi ¡ỹátaqta ỹágueegue na' l'álaxa 'me 'ouétaaue!
Ñi' qan'étoqo't 'uootaxa jaga' laicaua
(Lucas 16.13)
24Qaỹa ga' ỹañoxot da' dos gaua' n'acódi. Qá'a ỹañoxot da' niquiỹá'a ga' n'aco' laqáỹa qataxa ga' laqáỹa ỹauotec, 'uootaxa da' ỹátaqta ỹalaxaguet ga' 'oonolec n'aco', qaa'le ga' laqáỹa ỹátaqta ỹ'otan. Qana'chi naq'áita da' sa 'te da' qod'onataxanot ñi' qan'étoqo't qataxa jaga'me ỹ'oqóchiỹi laicaua.
Ñi' Dios netela jen' lec'oqtepi
(Lucas 12.22-31)
25Chan'eesa naỹi 'ami senapegalo da' sa 'te qomle da' 'ami ỹaquicoqtet'ape jega'me 'aualíquii qataxa jega'me 'anỹómiiỹi 'me 'avíñiitaaque, qataxa jega'me 'adoxóchii. Qá'a da' n'óiỹaxac sa 'ená'am ga'me nalic, qataxa da' nó'oquiaxac sa 'ená'am ga' noxot. 26Ỹa 'auc'achiñii na' máỹo' 'me huaỹotapeelégue na' p'áseguem, da' jen'me sa danaxan, qataxa sa daqataxan, qataxa sa 'te da' 'chi ỹiỹamaxat jen' jala ga' lañiisec. Qaláxasa jiñi'me 'adet'ai Dios 'me net'ague da' piỹem, jiñi'me ỹanem da' liqui'ỹáxac jena'me maỹo'pi. ¿'Ami sa 'anapaquiỹalco' jen'me maỹo'pi? 27Qataxa ¿'te hua'ago' ga' 'oonolec da' 'oñíita da' 'uootaxa ỹágueegue da' loouoxo, qana'chi ỹañoxot da' nichíỹaxadiseguem da' jaloc?
28Qataxa ¿tóoqo'chi da' 'ami ỹaquicoqte't jega'me 'adoxóchii? Ỹa 'auc'achiñii jen' lolelaxa 'me 'uo na' la'uo 'me huetalégue na' n'ónaxa, jena'me sa 'te da' d'onataxan qataxa da' daqaliténaxan. 29Qaláxasa 'ami senapegalo da' jeso' net'a Salomón joca'li qaỹa ga' 'ená'am da' lodiac na' n'étaxatpi, qaláxasa sa 'te da' 'ená'am da' n'étaxac jen'me la'uopi. 30Qana'chi ñi' Dios da' 'éet'ec dójo' da' n'étaxanaxan jen' lolelaxa 'me huétai'ỹa naỹi na' n'ónaxa, qamaale ga' laqáỹa nolo' qana'chi qoỹasaxánỹi ga' dóle', ¿sa na'chi 'eeto' dójo' da' 'oñíita, 'ami 'me sa 'amaqtaq da' 'adip'iỹáxaquii? 31Tadeeto' sa 'te qomle da' 'ami ỹaquicoqte't da' 'oñíitojo': “¿Jái'chogamaxa salíinaq, 'uootaxa jega'me ñiỹómaxaỹi? qataxa ¿jái'chogamaxa ñapoguénaxai'ña?” 32Qá'a jen' siỹaxadipi na'chi leenataxat ỹima jen'me. Qaláxasa 'ami 'uo jiñi'me 'adet'ai Dios 'me net'ague da' piỹem, jiñi'me ỹaỹáten da' 'ami 'avíñiitaaque ỹima jen'me. 33Chan'eesa 'ami ỹátaqta ỹágueegue qomle da' 'adoqochoqoi jeda'me l'onataxanaxac ñi' Dios da' ỹimata'a'téna, qataxa da' 'av'íchii jega'me 'éetapeec jiñi'me, qana'chi ỹañoxot da' 'auacoñiiỹet nataq'en ỹima jen'me. 34Chan'eesa sa 'te qomle da' 'ami ỹaquicoqte't jega'me huáaue ga' nolo' laqáỹa. Qá'a jega'me nolo' laqáỹa ỹataqteguet jega'me huáaue laqalaic. Ñi' 'oonolec nolo' sóxote qai'so'loi ga'me huáaue laqalaic.
Селектирано:
Mateo 6: PLGNT93
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Nuevo Testamento Pilagá © Sociedades Bíblicas Unidas, 1993.