Mark 8
8
Cum turba multa esset cum iesu
1Eft on þam dagen him wæs mide mycel manigeo ⁊næfden hwæt hyo æten. Ða cwæð he tosomne geclepeden his leorningcnihten. 2Ic gemiltsie þisse manigeo. for þan hy þri dages me ambidiað ⁊næbbed hwæt hyo æten. 3Gyf ich hyo fæstende to hyre huse læte be weige hyo geteorieð. sume hyo comen feorran. 4þa andswerede him hys leorningcnihtes. Hwanen maig anig man þas mid hlafen on þissen westen gefellen. 5Þa axode he hyo hu fele hlafe hæbbe ge. hyo cwæðen seofen. 6Þa het he sitten þa manige ofer þa eorðan ⁊nam þa seofe hlafes ⁊gode þancede ⁊hyo bræc ⁊sealde his leorningcnihten. þt hyo toforan heom asetten ⁊hyo swa dydon. 7⁊hyo næfden buten feawe fisxe ⁊he þa bletsede ⁊het beforen heom asetten ⁊hyo swa dyden. 8⁊hyo æten ⁊wurðen fylde ⁊hy namen þæt of þam brithmen (sic) belaf seofen wilien fulle. 9Soðlice þa þe þær æten. wæren feower þusendæ ⁊he hyo forlet. 10End sone he on scyp mid his leorningcnihten astah ⁊com on þa dæles dalmanuða. 11⁊þa ferden þa farisei ⁊ongunnen mid hym smeagen ⁊tacne of hefene sohten ⁊his fandeden. 12Þa cwæð he reowsiende on his gaste. hwi secd þeos cneorys taken. Soðlice ic eow segge ne beoð þisse cneorisse tacen geseald. 13⁊hyo þa forlætende eft on scyp astah ⁊ferde ofer þanne muðan. 14⁊hyo ofergeaten þt hyo hlafes ne namen ⁊hyo næfden on scype mid heom buten ænne hlaf. 15⁊he heom. bæd ⁊cwæð. Lokiað ⁊warniað fram farisea ⁊herodes hæfe. 16Þa þohten hyo betweoxe heom ⁊cwæðen. næbbe we nane hlafes. 17þa se hælend þt wiste. he cwæð. hwæt þence ge for þan ge hlæfes næbbeð. gyt ge ne oncnaweð ne ongyteð. gyet ge hæbbeð eowre heorte geblende. 18Eagen ge hæbbeð ⁊ne geseoð ⁊earen ⁊ge ne hereð. ne ge ne þenceð 19hwanne ic bræc fif hlafes ⁊twegen fixas ⁊hu fela wiligenne ge naman fulle. Hy cwæðon þa twelfe. 20Ænd hwanne seofan hlafas feower þusende ⁊hu fele wiligene britsena ge namen fulle. hy saiden seofen. 21Ða saigde he heom. hwi ne ongyte ge hyt. 22⁊hyo comen þa to bethsaida ⁊hyo brohten hym þa ænne blindne ⁊hine bæden þt he hine ætrine. 23⁊þa ætran he þas blinden hand end lædde hine buton þa wic ⁊spætte on his eagen ⁊his hand on asette ⁊hine axode. hwæder he aht geseage. 24Ða quoth. he. þa þæ he hine beseag. ic geseo men swilce treow gangende. 25Eft he asette his hand ofer his eagen ⁊he geseah þa ⁊warð geeodneowed. swa þt he brihtlice eall geseah. 26Ða sende he hine to his huse ⁊cwæd. ga to þinen huse ⁊þeah þu on tun ga nanen þu hit ne segge. 27Þa eode he ⁊his leorningcnihtes on þt castell ceastre philippi ⁊he on weige his leorningcnihtes axode. hwæt seggeð men þt ic syo. 28Ða andswereden hyo. sume Johannem þanne fulluhtere. sume heliam. sume sumne of þam witegen. 29Ða cwæð he. hwæt segge ge þt ic syo. Þa andswerede petrus hym ⁊quoth. Þu ert crist. 30⁊þa bead he hym þt hyo nanen be him ne saigden. 31Ða ongan he hyo læren þt mannes sune gebered feole þinge þolien ⁊beo aworpen fram ealdormannen ⁊heahsacerden ⁊bokeren ⁊beon ofslagen ⁊æfter þreom dagen arisan. 32⁊spæcen þa openlice ⁊þa nam petrus hine ⁊gan hine þreatigen. 33þa bewende he hine ⁊kydde petre ⁊quoth. Ga on bæcc sathanas for þan þu nast þa þing þe synde godes. Ac þa þing þe synde manne. 34Ða cwæð he togædere geclepede manega mid his leorningcnihten. Gyf hwa wile me felgien wiðsace hine sylfne ⁊nime his cwolmenge ⁊folgie me. 35Se þe wile his sawle hæle gedon. se hyo forspilð. Se þe forspild his sawle for me ⁊for þam godspelle se hyo gehælð. 36Hwæt fremed men þeah he ealne middeneard gestreonig ⁊do his sawle forwurðe. 37odðe hwilc gewrixl syld se man for his sawle. 38Soðlice se þe me forsihð ⁊mine word on þisre unrihthameðen ⁊synfullen cneorysse. þane mannes sune forsihð. þanne he cemð on his fader wulder mid his halgen ænglen.
Селектирано:
Mark 8: ASxG
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
The Four Gospels in AngloSaxon (Old English) were translated from Latin by Abbot Ælfric of Eynsham, probably some time within the period 990 – 1010.