मर्कुस 15
15
येसु पिलातसकर अगाडि
(मति २७:११-१४; लुका २३:२-३,१८-२५; युहन्ना १८:२८-४०;१९:१-१६)
1ब्यान उज्यालो हक्लेसात मुख्य पुजारिलत, अगुवालत, धर्म-गुरुलत र महासभाकराइ सेब्बाइ सदस्यलत मिलिके निर्नय गर्ला। अनि होल्किन येसुलाइ बादिके रोमि बडा-हाकिम पिलातसलाइ जिम्मा लाइला। 2पिलातसिन येसुलाइ सोदल्ते, “केति तुइ यहुदिल्को राजा हो?”
येसुन होलाइ बलल्ते,“तुइ ने होइ बाज्छस।”
3मुख्य पुजारिल्किन येसुलाइ धेरइ कुरोकर दोस लाइला। 4होइहुदान पिलातसिन येसुलाइ फेरि सोदल्ते, “केति तुइसिन केइ जबाफ बइने? हेर, तोर बिरुद्दनाइ होल्किन कत्रा दोस लाइधर्लाछत।”
5तर येसुन केइ जबाफ बइदिल्ते। ह्य देखिके पिलातस छक्क पर्ले।
येसुलाइ मिर्त्युदन्ड दिल
(मति २७:१५-२६; लुका २३:१३-२५; युहन्ना १८:३९—१९:१६)
6निस्तार चाडकर बेलानाइ मान्छेल्किन माग गर्ल अन्सार पिलातसिन एउटो कइदिलाइ होल्को लागि छाड्नार गर्तेल। 7आन्दोलन हक्ल बेलानाइ मान्छे मारिकइ झ्यालखन्डनाइ पर्लाइ मान्छेलत धेराइ रइला। होलत मद्दे बारब्बा नाउँकर एउटो उछि रइल। 8अनि मान्छेल्को भिड पिलातस हक्लनाइ आइके पइलाकर चलन अन्सार ह्य बर्स पुनि एउटो कइदिलाइ छाड्देउ बाजिके बिन्ति गरइ लाग्ला। 9पिलातसिन होल्काइ सोद्ल्याक, “केति मुइ तोराल्को लागि यहुदिल्को राजालाइ छाड्दिउ?” 10किनारइभने मुख्य पुजारिल्किन येसुलाइ डार गरिके आफि हक्लनाइ आन्लाइ हो बाजिके पिलातसलाइ था रल्ति। 11तर मुख्य पुजारिल्किन भिडकाइ सुर्याइकइ “येसुलाइ बया, बारब्बालाइ छाड्देउ” बलइ लाइल्याक। 12पिलातसिन होल्काइ फेरि सोद्ल्याक, “उन्खा हक्लासिन जुनलाइ तोराल्किन यहुदिल्को राजा बाज्छो, होलाइ चाइ मुइ केति गरुँ ते?”
13होलत साराइतिन बाज्ला, “होलाइ कुरुसनाइ झुन्डाइ पर्छइ।”
14पिलातसिन होल्काइ बल्-ल्याक, “किनारे? हेइनिन केति अपराध गर्लाछ र?”
तर होलत झन बड्खो सोरिन चिच्याइतिन बाज्ला, “होलाइ कुरुसनाइ झुन्डाइ पर्छइ।”
15पिलातसिन भिडकाइ खुसि पारइकर लागि बारब्बालाइ छाड्दिल्ते, र येसुलाइ चाइ कोर्रा लाइके कुरुसनाइ झुन्डाइ जिम्मा लाइले।
येसुलाइ गिल्ला गर्लाइ
(मति २७:२७-३१; युहन्ना १९:२-३)
16सिपाइकिन येसुलाइ बडा-हाकिमकर पेरेटोरियन, अर्थात दरबारनाइ लाकाइला अनि सेब्बाइ पल्टनकाइ जम्मा गराइला। 17होल्किन येसुलाइ राजाकर जिन्खाए बइजनि रङकर लुगा लाइदिला र काँटोकर मुकुट बानाइके कापालनाइ लाइदिला। 18अनि गिल्ला गर्तिन, “यहुदिल्को राजाकर जय हक्दिक” बाजिके सलाम ठोक्ला। 19होल्किन येसुकर कापालनाइ निगालेकर लउरिन हिर्काइतिन थुक्ला, र घोडा टेकिके येसुलाइ ढोग्ल स्वाङ् पार्ला। 20इनिखे गिल्ला गरिसक्लपछि होल्किन बइजनि रङकर लुगा फुकालिकइ येसुकर आफ्ने लुगा लाइदिला। ह्व पछि होल्किन येसुलाइ कुरुसनाइ झुन्डाइ लाकाइला।
येसु कुरुसनाइ
(मति २७:३२-४४; लुका २३:२६-४३; युहन्ना १९:१७-२७)
21बाटनाइ जाइतिन गर्तिन सिपाइकिन कुरेनिका बस्नार सिमोनलाइ बाटनाइ आइधर्ल भेट्टाइला। ह्व अलेक्जेन्डर र रुफसकर ब्वाक रइल। सिपाइकिन होलाइ जबरजस्ति येसुकर कुरुस बोकइ लाइला।#रो १६:१३ 22र होल्किन येसुलाइ गलगथा बल्ल ठउँनाइ आन्ला। गलगथाकर अर्थ चाइ खप्परे ठउँ हो। 23अनि होल्किन येसुलाइ लट्याइलाइ मुर्र मिसाइल अङ्गुरकर मद्य दिला, तर येसुन बइपिले। 24होल्किन येसुलाइ कुरुसनाइ झुन्डाइला। अनि येसुकर लुगा कुनिन कुन्टो भाग पाइनार हो बाजिके चिठ्ठा हालिके आपसनाइ बाड्ला।#भजन २२:१८ 25येसुलाइ कुरुसनाइ झुन्डाइतिन ब्यानकर नउ बज्ल रल्ति। 26येसुकर कापाल उप्रान “यहुदिल्को राजा” बाजिके लेख्ल दोस-पत्र टास्ल रल्ति। 27होल्किन येसुलाइ कुरुसनाइ झुन्डाइतिन दुइटाइ डाकाल्काइ पुनि एउटोलाइ येसुकर दाइनेपटि र अर्कोलाइ देब्रेपटि फरक-फरक कुरुसनाइ झुन्डाइला। 28[धर्मसास्तरनाइ लेख्ल बचन इनिखे पुरा हकल्ते, “ह्व अपराधिल्कोसिन गनिले।”]#यस ५३:१२#१५:२८ धेरइजसो भर्पर्दो सोरोतनाइ ह्य पद लेख्ल बइपाय
29उछ्यान हिन्नाराइ मान्छेल्किन आफ्ने कापाल हल्लाइतिन इन्खा बाज्तिन येसुलाइ गिल्ला गर्ला, “देख्लइ, मन्दिर भत्काइकइ तिन दिननाइ बानाइनार,#भजन २२:७;१०९:२५; मर्क १४:५८; युह २:१९ 30कुरुसबान झरिके आफिलाइ बाचाउ।”
31उनिखे ने मुख्य पुजारि र धर्म-गुरुकिन पुनि आपसनाइ इन्खा बाज्तिन गिल्ला गर्ला, “हेइनिन आनेल्काइ ता बाचाइले, तर आफिलाइ चाइ बाचाइ बइसक। 32ह्य इज्राएलिल्को राजा खिरिस्ट, अब कुरुसबान झरिके आइदिक, र हाइनिन ह्व देख्नारआछे अनि बिस्वास गर्नारआछे।”
येसुसिन कुरुसनाइ झुन्डाइलाल्किन पुनि येसुकर गिल्ला गर्ला।
येसुकर मिर्त्यु
(मति २७:४५-५६; लुका २३:४४-४९; युहन्ना १९:२८-३०)
33दिउँसो बार बजेसिन तिन बजेसम्म सारा देसलाइ आँधारिन छोपल्ते। 34तिन बजेदिस येसुन बड्खो सोरिन इनिखे बाज्ले,“इलोइ, इलोइ, लामा सबखथनि?” हेक्र अर्थ हो,“हे मोर परमेसोर, हे मोर परमेसोर तुइनिन मुइलाइ किनारे त्याग्ल?”#भजन २२:१
35ह्य सुनिके उछि ठडाइनाराइ मद्दे कोइ-कोइकिन बाज्ला, “सुनो, हेइनिन ता एलिया अगमबक्तालाइ पो बालाइतिन आछ।” 36होलत मद्दे एउटो कुत्तिन जाइके अङ्गुरकर आम्तो मद्य लिके आइले, अनि लउरिकर टुप्पानाइ रुवा बटार्ले र मद्यनाइ चोपिकइ येसुकर मुखनाइ धर्दितिन बाज्ले, “हेरुँ, ह्यलाइ कुरुसबान झारइ कतइ एलिया पो आइछइ कि।”#भजन ६९:२१
37अनि येसुन बड्खो सोरिन साराइतिन परान त्याग्ले।
38होइ बेला मन्दिरनाइ टाङ्ल पर्दा उप्रसिन हेठ्ठसम्म दुइ भाग हकिके च्यात्तिल्ते।#पर २६:३१-३३ 39इनिखे येसुन परान त्याग्ल देखिके कुरुसकर अगाडि ठडाइल रोमि कप्तानिन बाज्ले, “साँच्चि ने ह्य मानुस ता परमेसोरकर बेटाक रइलसइ।”
40उछि केइ बेटिलत पुनि बद्दुरेबान हेरिधर्लाइ रइला। होलत मद्दे मरियम मग्दलिनि, स्यान्खो याकुब र योसेफकरि आमेक मरियम र सलोमि रइला। 41येसु गालिलनाइ हक्तिन होल्किन येसुलाइ पछ्याइतेला, र होक्र सेवा गर्तेला। येसुसिन यरुसलेमसम्म आइलाइ आने धेराइ बेटिलत पुनि उछि रइला।#लुक ८:२-३
येसुकर लास चिहाननाइ
(मति २७:५७-६१; लुका २३:५०-५६; युहन्ना १९:३८-४२)
42ह्व दिन तयारिकर दिन रल्ति, जुन बिस्राम-दिनकर अगिलो दिन हो र साँझ परइ लाग्ल रल्ति। 43अरिमाथिया सहरकर योसेफिन नडाराइकइ पिलातस हक्लनाइ जाइके येसुकर लास माङ्ले। ह्व महासभाकर मान पाइल सदस्य रइल र होइनिन परमेसोरकर राज्यकर बाट हेरिधर्ल रइल। 44येसु मरिसक्ल कुरो सुनिके पिलातस छक्क पर्ले। अनि कप्तानलाइ बालाइके येसु साँच्चि मर्ल हो कि बया बाजिके सोदल्ते। 45येसु मरिसक्ल कुरो कप्तानबान सुन्लपछि पिलातसिन योसेफलाइ येसुकर लास लाकाइनार अनुमति दिल्ते। 46योसेफिन सुतिकर लुगा किनिकइ आन्ले, र लासलाइ कुरुसबान झारिकइ लुगान बेर्ले अनि चट्टाननाइ खोपिकइ बानाइल एउटो चिहाननाइ धरल्ते। ह्व पछि एउटो बड्खो पाथर गुडाइकइ चिहानकर मुखनाइ धर्दिल्ते। 47मरियम मग्दलिनि र योसेफकरि आमेक मरियमिन येसुकर लास धर्ल ठउँ हेरिधर्लाइ रइला।
Селектирано:
मर्कुस 15: MAJH
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2024 (Active), Mother Tongue Translators Society and Wycliffe Bible Translators, Inc. All rights reserved.