मर्कुस 4
4
बिया वारो ल्हाकराय
(मति १३:१-९; लुका ८:४-८)
1येसुइ फेरि गालिल समुन्द्रको किनारहाङ स्यानराय बइसा सुरु जाह्ङ्सास्यावा। नाःतो मान्तालमको हुल येसुको वरिपरि हुमाकाय, ओउतझ्यान्ते येसु यातज्यो दोङगाहाङ लह्नाक्तिको च्युःङ्सास्यावा। अनि मान्तालमको हुलखे समुन्द्रको किनार छेउ पाखाहाङले मुआकाय। 2येसुइ ओउमयकाय नाःतो कुरालम ल्हाकरायहाङ तोसास्यावा, र येसुइ ओउमयकाय लयको स्यानरायहाङ एतदाह्य्तिमा तोसास्यावा—
3 “द्याह साइनु, यातचाक किसानि बिया वार्लाङ राङताङ आला। 4ओउइ राङहाङ बिया वार्तोकहाङ, कोय बियाखे ल्यामहाङ दिह्लाङ आला, र ओउ बियाकाय बन वाःलम वाङ्ति जेःआकानि। 5कोय बियाखे बाङराङहाङ दिह्लाङ आला, र ओहाङ ज्युह्म्तो साः नाःमालोझ्यान्ते रेह्न्तोले बिरुवा दुङा। 6तर जब जोक्तो न्याम राःवा, ओउ बिरुवाको रुत ज्युह्म्तो नाःमालोझ्यान्ते ओउ झ्योमा र र्युम्ति वाया। 7गच्युक बियाखे चुःको झ्युरको माझहाङ दिह्लाङ आला, र ओउ चुःको झ्युरको कारनइ दुङो बिरुवाइ ताह्ङ्साले खायुलु। ओउतझ्यान्ते ओउ बिरुवासय दोह उब्जनिमा स्याउलेल। 8तर गच्युक बियाखे पेओ आह्य्साःहाङ दिह्लाङ आला, ओउ पेतो दुङा र ब्रावा। अनि कुनय बोतइ तिस गुना, कुनयइ साथि गुना, र कुनयइखे यात सय गुनाच्युक साय साइताकाकान।”
9अनि येसुइ इ ल्हाकराय द्युम्ताक्धय एत तोसास्यावा, “सुको साइसा नो मुना, ओउइ साइपनउ।”#मति ११:१५; १३:९,४३; मर्क ४:२३; ७:१६; लुक ८:८; १४:३५
येसुइ ल्हाकरायको माने तोसास्यावो
(मति १३:१०-२३; लुका ८:९-१५)
10येसु एकानले मुसास्याउतोक बेलाहाङ, केहि मान्तालम बाह्र जना मुख्य चेलालमकुस वाङाक्तिको ल्हाकरायको माने दोह खेना त दाह्य्ति येसुकाय ह्वताकानि। 11अनि येसुइ ओउमयकाय तोसास्यावा, “परमेस्वरइ निङकाय परमेस्वरको राज्यको गोप्पे कुरा चिःओ ग्यान बइसास्यावो मुना। तर अरुकायखे ङाइ ल्हाकरायहाङले तोनाङ, 12ओउतझ्यान्ते धर्मसास्त्रहाङ लेखओ कुरा पुत्साले परतो—
‘ओउमयइ योसापाय योनानि,
तर च्यउनिलि।
र साइसापाय साइनानि
तर चिःनिलि।
यदि ओउमयइ चिःनितो त खेयापाय,
ओउमयइ पस्ताप जाह्ङ्चानि खेतो र ओउमयको पाप छेमा स्याउचा खेतो।’” #
यस ६:९-१०
13अनि येसुइ ओउमयकाय ह्वत्सास्यावा, “यदि निङइ इ ल्हाकरायको माने चिःसा खाइतेनिलि त खेया, निङइ गतहाइति अरु ल्हाकरायको बारेहाङ चिःसा खाइतेनानि र? 14ओउ बियाखे परमेस्वरको आखर लेखा खेना, र ओउ किसानिखे मान्तालमकाय आखर तोओ मान्ता लेखा खेना। 15कुनय मान्तालमखे ल्यामहाङ दिह्लाङ आलो बियालम लेखा खेनय। ओउमयइ आखरपाय साइनानि, तर सय्तान वाङ्ति रेह्न्तोले ओउमयइ सायो आखर लात्ति आःल्नउ। 16अनि अरु गच्युक मान्तालमखे बाङराङहाङ दिह्लाङ आलो बिया लेखा खेनय। ओउमयइ आखर साइनानि अनि आसतिले आखरकाय सुइकार जाह्ङ्नानि। 17तर ओउमयकुस ज्युह्म्तो रुत नाःमालोझ्यान्ते आखरकाय लयको ल्हुङतुकहाङ पेतोकुसि गम्सा खाइनिलि, र ओउमयको बिस्वास यातछिनकाय मात्र स्याउना। ओउतझ्यान्ते जब ओउ आखरको कारनइ दुख-कस्त र सतावतलम वाङ्ना, अनि ओउमयको पतन स्याउलेना। 18अनि ओउ चुःराङहाङ दिह्लाङ आलो बियाइखे इ चिःताक्नउ, कि ओउमयइ परमेस्वरको आखरपाय साइनानि, 19तर ल्हाउदयबाङको लिह्सिओ थोकलम, धन-सम्पतिको लोभ र मोजमज्जालमइ जाह्ङ्धार्ना बिस्वासकाय ब्याउसाले बयुलु र ओउमयकसय दोह सायमा साइलेल। 20तर अरु मान्तालमखे आह्य्साःहाङ दिह्लाङ आलो बिया लेखा खेनय। ओउमयइ परमेस्वरको आखर साइनानि र आग्याकारि स्याउति सायो आखरकाय सुइकार जाह्ङ्नानि, अनि कुनयइ तिस गुना, कुनयइ साथि गुना, र कुनयइखे यात सय गुनाच्युक साय साइताक्नानि।”
बत्तिको ल्हाकराय
(लुका ८:१६-१८)
21येसुइ एतमा तोसास्यावा, “दोह कुनय मान्ताइ बत्तिकाय थोङ्ताकाक्तिको भान्दाइ बोःम्ति अथबा खात ताल्गे गम्नानि र? पक्कामा गम्निलि! बरु थोङतो स्याउपा त दाह्य्ति बत्तिकाय तेउकाहाङ गम्नानि। 22ओउतहाइतिले नुस्तिगमो कुरालम थालाङ वाङ्लेना, र जुदा गोप्पे कुरालममा चिःतो स्याउलेना।
23 सुको साइसा नो मुना, ओउइ साइपनउ।” #
मति ११:१५; १३:९,४३; मर्क ४:९; ७:१६; लुक ८:८; १४:३५
24येसुइ ओउमयकाय फेरि तोसास्यावा, “निङइ लय सायो कुराकाय पेतोकुसि ध्यान बइनु। धइतिदाह्य्सा यदि निङइ ध्यान बइति साइतेनानि त खेया, निङइ पेतोकुसि चिःसा खाइतेनानि, अनि परमेस्वरइ निङकाय नाःतो ग्यान बइसास्याउलेना। 25ओउतझ्यान्ते सुइ ङाको स्यानरायकाय पेतोकुसि ध्यान बइति साइनानि ओउमयकाय नाःतो ग्यान बइलेना, तर सुइ ध्यान बइति साइनिलि ओउमयइ मइतो चिःओमा ओउमयकसय लाति आःल्लेना।”
बिया दुङोको बारेहाङ ल्हाकराय
26येसुइ फेरि तोसास्यावा, “परमेस्वरको राज्यखे एत खेना— यातचाक किसानिइ लयको राङहाङ बिया वार्नउ, 27ओहाङसयको ओउ किसानि याह्दिङहाङ एःन्ना र दिनहाङ लेति मुना त खेयाकायमा बियाखे लयले दुङ्ना र ब्राउति वाङ्लेना, तर ओउत गतहाइति स्याउना त दाह्यो कुराखे ओउइ चिःउलु। 28भुयार लयइले बोत-बिरुवालम दुङ्ताक्ति अन्न साइताक्नउ। ङ्हा बिरुवा दुङ्ना, अनि बाला लागना, ओहाङसयको लोन्हे बालाहाङ अन्न साइना। 29जब अन्न मन्हो समय दाह्ना, किसानि वाङ्ति कच्याइ अन्न राःसा फाःङ्नउ, धइतिदाह्य्सा अन्न हुमो समय दाह्तिखायो मुना।”
रायोको बियाको ल्हाकराय
(मति १३:३१-३२,३४; लुका १३:१८-१९)
30येसुइ तोसास्यावा, “परमेस्वरको राज्यकाय ङाइ दोहकुस दान्जचाङ? अथबा इ कुराकाय चिःताक्साको लागि ङाइ गाउ ल्हाकराय तोचाङ? 31इखे भुयारहाङ वारो रायोको बिया लेखा खेना, रायोको बियाखे ल्हाउदयबाङको जुदा बियालमसय मइतो स्याउना। 32जब ओउकाय सागराङहाङ वार्ना, ओउ दुङ्ति अरु बोतलमसय यास्तो स्याउना। अनि ओउको ताह्ङो दालालमहाङ बन वाःलम वाङ्ति छ्युत जाह्ङ्ति याक्नय।”#४:३०-३२ इस्राएल देसहाङ रायोको बोतखे लगभग ६-७ क्रुच्युककाय यास्तो स्याउना। ओउतझ्यान्ते बन वाःलम वाङ्ति ओउको दालालमहाङ छ्युत जाह्ङ्नितो।
33ओउमयइ खाइच्युकसम्मले परमेस्वरको स्यानरायकाय पेतोकुसि चिःपानानि त दाह्य्ति येसुइ एतताह्ङो अरु ल्हाकरायमा तोसास्यावा। 34येसुइ मान्तालमकाय स्यान्सास्याउतोक बेलाहाङ सधयले ल्हाकराय तोधय स्यान्सास्यावा। तर येसु लयको चेलालमकुस मात्र स्याउतोक बेलाहाङखे, येसुइ जुदा ल्हाकरायको माने ओउमयकाय तोति बइसास्यावा।
येसुइ ताह्ङो गाइधकाय दिःताक्सास्यावो
(मति ८:२३-२७; लुका ८:२२-२५)
35ओउ दिनको राह्मसय येसुइ लयको चेलालमकाय तोसास्यावा, “लउ, द्याह नि दोङगाहाङ लह्न्ति गालिल समुन्द्रको पारिताङ आलि।” 36ओहाङसयको ओउमय मान्तालमको हुलकाय ओहाङले फेआक्तिको येसु च्युःङ्तिमुओ दोङगाहाङ लह्न्ति आलाकाय। अनि अरु केहि दोङगालममा ओउमयकाय गुह्ल्ति आलाकाय। 37अचानक दुह्मान तिःहाङ ताह्ङो गाइध वाङा, र तिःको छल्काइ दोङगाकाय आप्सा फाःङोझ्यान्ते दोङगाहाङ तिः ब्लिङ्सा लागआ। 38तर येसुखे दोङगाको लोन्हेको भाकहाङ यातज्यो सिरानि कुःमाक्तिको एःन्तिमुसास्यावो खेतो। अनि चेलालमइ येसुकाय म्हाङ्धय तोआकानि, “अ गुरु, निपाय तिःहाङ ज्युप्साले लागआतहि, दोह नाङइ वास्ता जाह्ङ्सास्याउल?”
39अनि येसु च्योक्सास्यावा र गाइधकाय आग्या जाह्ङ्सास्यावा, “दिःअ र एवेङ त स्याव।” अचानकले गाइध दिःआ र ओहाङ एवेङ त स्यावा। 40ओहाङसयको येसुइ चेलालमकाय ह्वत्सास्यावा, “निङ धइति एत जोक्तो रइतेनय? दोह निङकहाङ बिस्वास नाःल?”
41तर ओउमय माहा जोक्तोले रयोझ्यान्ते लयमय तोकायाकाय, “इ मान्ता सु खेना र? गाइध र तिःको छल्कालमइमा इको आग्या ग्यानय।”
Селектирано:
मर्कुस 4: CHEP
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2024 (Active), Mother Tongue Translators Society and Wycliffe Bible Translators, Inc. All rights reserved.