Luk 12
12
Jisɔs bungɔ na atɔtɔnɔ ɛbɛ
(Matiyu 10.26,27)
1Na nroranɛ gba ɛkan, ɔwɔ bɔ jɔ kadɛ atɛm gɔ ata, Jisɔs kim gbɔgɔ mbang kimɛ bungɔ tɔng batɔtɔnɔ ɛbɛ rɛ: Kono wan ɛkpo lagɛ ɛyis#12.1 Ɛjom ji alikɔ shimɛ gɔ nshɔl nyi bɔ kpejɔ lime ɛbrɛd kpejɔ kpɛlɛ ɛbtongho. ji Afarasi, teb anɛ ba ɛshimar njam bal ba. 2Ɛjom ajingajingɛ lim ji bɔ bolo nɔ ji bɔ lekelingɛ, lim ji le gɔ mbǝr ji leke lɔng gɔ ɛlitak. 3Ajingajingɛ ji abungɔ gɔ ɛjangɛ bɔ kpewogo njol, wɔ ji abungɔ gɔ awuwa gɔ atangɛ njo anɛ kpe bungɔ gbɔgbɔ gɔ nbolotak.
Kǝbɛl ɛfalfal
(Matiyu 10.28-31)
4Nɔngɔ mɛ tɔng wan, atobamɛ, kǝfal wan anɛ ba kpo wolo ngɔbjing nyinyi, bɔ nim kpe mal lim ji shingɛ jiɔ. 5Nkpa tebe nɛ nɔ alifal: Fal yɛ nɔ bɔ rɛ wola, akpe ɛkɔ ji akpa rɔgɔ kag gɔ ɛlolagon. Ee, Ntɔng wan, falɛ wan. 6Anɛ nim jɔ gongɔ abɔn arawu alon gɔ mpɛnɛ ɛbal a? Wɔ ajingajingɛ lim ji Ɛshɔwɔ kpejɔ yini. 7Gɔ ɛlɔgɔlɔgɔ ɛbungɔ, Ɛshɔwɔ nyinyi nfala nlu nyi le gɔga ɛshi. Kǝ kpɛ fal; teb wɔ kpe agbalɛ shinge abɔn arawu gbalɛgbalɛ.
Ɛfabɛ nyɔ na ɛtɛnɛ Krayis
(Matiyu 10.32-33; 12.32; 10.19,20)
8Ntɔng wan rɛya, nɛ awɔngawɔngɔ nɔ rɛ gamim ɛnɔ gɔ ɛshimar anɛ rɛ mɛ nɛ ɛwɛ wɔ, Mɔna Nlolom nkpe tɔb gam ɛnɔ fufɔ gɔ ɛshimar balɔgɔ ɛbtom Ɛshɔwɔ. 9Wɔ nɛ awɔngawɔngɔ nɔ rɛtɛnim rɛ mɛ nɛ ɛwɛ shang gɔ ɛshimar anɛ Mɔn a Nlolom kpɛ tɔb tɛn gɔ ɛshimar balɔgɔ ɛbtom Ɛshɔwɔ.
10Nɛ awɔngawɔngɔ nɔ rɛbung ɛbe lagɛ Mɔna Nlolom Ɛshɔwɔ kpe tamɛ kayɛ, wɔ nɛ awɔngawɔngɔ nɔ rɛbung ɛbe lagɛ ɛtinge ɛtɔgɔ Ɛshɔwɔ nim tamɛ kayɛ.
11“Ɔji bɔ ma kɔ ba gɔ ɛtak ji Aju kpejɔ wanɛ, gɔ ji atol na atoboɛshi, kǝ fige na ayɔ na akpe shingɛ ladɛ ɛna jɔlɔ ji akpe bungɔ, 12teb Ɛtinge Ɛtɔgɔ kpa tebe ji ale bung ngarɛ rɛring.”
Ɛbganɛ ni le lagɛ ɛgbɔlɔ ɛfangɛ nɛ
13Nɛ awɔng gɔ ɛblɔng nyiɔ kim tɔngɔ Jisɔs rɛ, “Ntetebe, tɔng minɛya abangɛ nshɔl nyi nshɔjarɛ kpɔ sha kam mbagɛ nyanyamɛ.”
14Jisɔs kimawɛ fangɛ rɛ, “Mbe, nyenɛ wɔ jagim rɛ mɛ njɔl nkpege ɛblam fɛrɛ jɔl mbaga nshɔl ɛwanɛ?” 15Ɔwɔ atɔngɔ bɔ rɛ, “Babɛ wan! Kono wan ɛkpo lagɛ ɛkrɛbjing; teb ɛbkpene nɛ shɛgim gɔ nshɔl gbalɛgbalɛ nyi akpe nɔ.”
16Ɔwɔ atobo bɔ ɛbganɛ niya rɛ: “Ɛfangɛ nɛ ajing bɛlɛ ɛgbɛ ji lagɛ na lak ga. 17Ajɔ fɛr tir gɔ ɛbtem ntang tang rɛ, ‘Nlelim rɛnan? Nkpim ɛji ji nle koro nshɔl ɛnyiamɛ.’ 18Ɔwɔ a rɛ, ‘Jiya ji nlelim. Nkpe radɛ ɛbongɔ ɛjamɛ tɔngɔ shi ji nlen, kpo nshɔl ɛnyiamɛ kpɛk kpɛ kag. 19Nle tɔng ɛnamɛ rɛ, Abɛl atinge nshɔl gbalɛgbalɛ nya a kpe koro gɔ nnya nyi shishɔng. Kɔ ɛbkpen bɛmbɛm; li, wɔɔ wɔ gɛrɛ.’ 20Ɛshɔwɔ kimawɛ tɔng rɛ, ‘Wɔ ɛgbɔlɔ nɛ! Atu nyaa nya lɛl nkpe kɔgɔ ɛbkpen ɛna. Nyenɛ wɔ lebɛl nshɔl nyi ami tongo bom ɛna?’ ”
21“Nawɔ lijɔl ka nɛ awɔngawɔngɔ nɔ koro nshɔl bom ɛnɛ, a gbɔɛkpak gɔ ɛjang Ɛshɔwɔ.”
Kǝ fige wan ɛnanɛ ayɔ
22Ɔwɔ Jisɔs bungɔ tɔng batɔtɔnɔ ɛbɛ rɛ: “Ntɔng wan, kǝ fige wan ɛnanɛ ayɔ lagɛ ɛbkpen, na ji akpelɛgɛ; jɔlɔ ngɔbjing ɛnya, na ji akpe kagɛ. 23Teb ɛbkpen gbalɛ shingɛ nshɔl alɛgɛ, ngɔbjing gbal shingɛ abɔmɔ. 24Bɔngɔ nrok rɛ: Ɛgbɛ bɔ nim jɔ bam, bɔnim jɔ fu. Bɔ kpem ɛji ji bɔ kpejɔ koro nshɔl jɔlɔ ɛbongɔ; wɔ Ɛshɔwɔ kpejɔ ka bɔ ɛjom alɛgɛ. Wɔ gbalɛ shingɛ nrok! 25Nyenɛ wɔ gɔ ganɛ ɛblɔng nɔ ɛfige ayɔ ɛjɛ lekpɛlɛ mɔn ngarɛ gɔ ɛbkpen ɛnɛ? 26Ɔji alekimal lim mɔnshishigɔ ɛjom jiya, jɛn ji wangɛ akpe ɛfige ɛna ayɔ lagɛ nshɔl nyindige? 27Bɔngɔ afɛmɛ njɛlɛ gɔ ɛkologbɛ na kpejɔ gbal. Bɔ nim jɔ lim ɛbtom, bɔ nim jɔ jamɛ abɔmɔ. Wɔ ntɔng wan rɛ, jɔl Ntola Solomɔn gɔ ɛblobo ɛnɛ tirim lebe mbɔmɔ mi nɔbɔ na ɛfɛm njɛlɛ ajing. 28Rɛjɔl a rɛya nɔwɔ Ɛshɔwɔ kpe lebe njɛlɛ, nyi le gɔ ɛkologbɛ abɔmɔ. Njɛlɛ nyi akpe nyenɛ lɛl, bana bɔ rɔ kag gɔ ngon. Ɛlɔng rɛ yɛ manim mal lebe shingɛ njɛlɛ a? Wan anɛ ba kikpe ɛbtamɛ!
29“Kǝ jɔ tir lagɛ ji akpelɛgɛ fɛrɛ wɔɔ; kǝ fige ɛna ayɔ lagɛ nshɔl nyiɔ kpɛk kpɛ. 30Anɛ ba ki le Aju kpejɔ bɛ tɔnɔ abɛmɛ nshɔl ɛying nyaa. Wɔ Nshɔja nyinyi rɛ akpe shɛbɛ rɛ abɛl nshɔl nyaa kpɛk kpɛ. 31Gbɔmbang shɛb Ɛtol Ɛshɔwɔ, yɛ akimawa kpɛlɛ nshɔl nyigɔ kpɛk kpɛ.
32“Kǝfal, wan akrɛkrɛ ɛfɔng, teb Nshɔjanɛ ɛbtem ɛmɛyɛbɛ rɛ aka wan ɛtol Ɛshɔwɔ. 33Gongɔ ajingajingɛ ji akpe nɔ wɔ ka akpak akpɔgɔ. Wɔ lim ɛna ɛbam ji kijɔlɔ jɔ kol. Koro afang ɛnya gɔ rɔ gɔ ji ji ɛjomjom le kɪtir lim rɛdɛ. Ɛjiji awaju leke mal ba kabɛ, ɛkang leke mal li. 34Teb ɛjiji afang ɛnya le nɔ, ɔwɔ ɛbtem ɛna litɔb jɔl fufɔ.
Babɛ wan
35“Kan ɛkpodo mbɔmɔ wɔ tongo ɛbjing babɛ ajingajingɛ ji kpe bagɛ, kǝ nɔngɔ ɛtrikang ɛja lamɛ. 36Na mɔn a njo kpe babɛ ndɛnjo rɛ arɛkrɛ gɔ ɛbaal, bǝgbak gɔ mbo bɔ linge tutu kayɛ. 37Ɛyɛbɛbtem lijɔl ka abɔnɔnjo ba ndɛyabɔ krɛ bǝkpere bɔ mber. Ntɔng wan ɛlɔgɔlɔgɔ rɛ, ndɛnjo kpe tɔngɔ bɔ jina gɔ ɛkpokoro yɛ tongo ɛbjing jɔ lɔgɔ bɔ na bɔ kpe lɛgɛ nshɔl. 38Ɛyɛbɛbtem lijɔl ka abɔnɔnjo ba ndɛyabɔ krɛ bǝkpere bɔ mber, jɔlɔ gɔ nlomatu jɔlɔ gɔ nkpeshɛ afonfo. 39Konokpo rɛ, nfontak rɛgbɛrɛ ngarɛ nyi awaju kpe bagɛ, anim nɔngɔ bɔ wa ɛji ajingajingɛ yɛl gɔ njo. 40Wɔ fufɔ ale tongo ɛbjing, teb Mɔna Nlolom kpe bagɛ gɔ ngarɛ nyi aki konokpo.”
41Pita kim babɛ Jisɔs rɛ, “Nshɔ, akpe tobo ɛbganɛ niya tɔng war ba ba, afi le ka nɛ awɔngawɔngɔ?”
42Jisɔs kimawɛ fangɛ rɛ, “Nyenɛ wɔ ɔ nɔ le ɛtinge nɛ nɔ kpɛ ngbɛrɛ nɔ ndɛnjo le jagɛ rɛ ajɔl nɛ, nɔ lejɔ ka alɔgɔ ɛbtom ɛbɛ nshɔl alɛgɛ gɔ ɛtinge ngarɛ? 43Le nɔb shing na mɔnanjo nɔ ndɛnjo krɛ bǝkperɛ kpe lime ji fomo nɔ. 44Ntɔng a ɛlɔgɔlɔgɔ rɛ, ndɛnjo kpe fagɛ nshɔl ɛnye kpɛk kpɛ kagɛ gɔ ɛbɔ rɛ a jɔ kpor. 45Wɔ rɛjɔl rɛya nlɔgɔ ɛbtom awɔng kɛrɛ rɛ, ‘Nshɔjamɛ njo nim gol krɛ,’ Akimɛ ɛbdɔgɔ abɔnɔnjo bagɔ, ali, wɔɔ, bomo. 46Ndɛnjo kpe bagɛ gɔ ngarɛ nyi aliki konokpo. Ndɛnjo kpɛ kagɛ ɛrɛm falɛ kag gɔ nti anɛ bagɔ ba kpejɔ ntennɛ ɛbtom.
47“Mɔnanjo nɔ nyi ji kpejɔ kɔr ndɛnjo wɔ atɛnɛ ɛlime, akpe kpɔgɔ gɔ ɛdu. 48Wɔ nɔ ki nyi ji ndɛnjo kpe shɛbɛ wɔ aleme ajingajingɛ ji fomo gɔ ɛdu nim ga kpɔ ɛdu. Teb nɛ awɔngawɔngɔ nɔ bɔ kayɛ gbalɛgbalɛ, bɔ letɔb shɛb gbalɛgbalɛ gɔ gɛ ɛbɔ; wɔ nɛ awɔngawɔngɔ nɔ anyɛ ga gbalɛ bɔ letɔb shɛb gbalɛ gbalɛ gɔ gɛ ɛbɔ.
Ɛbkɔnɔ shang afanɔkɔng nya
(Matiyu 10.34-36)
49“Mba rɛ mbǝkag agon gɔ ɛying, ntabɛ rɛ ɛshi bɔbɔm ɛblolo! 50Nkpe ɛwɔngɔ alab ɛrɛm, ɛragɛ ɛku gɔ ɛbtɛm nkpem tɛtɛ shing! 51Ntirre rɛ mba na ɛbkɔnɔ gɔ ɛying a? Ee, ntɔng wan, mba rɛ mbelim anɛ bɛl ajam. 52Bɔmɔ anu shɔngɔ abɔn alon ba lɔng nyen awɔng kpe yabɛ na atɛm. Anɛ ara kpe jangɛ anɛ bal anɛ abal kpe jangɛ anɛ ara. 53Ndɛ kpe jangɛ mɔn nɔ nlom, mɔn nɔ nlom jang ndɛ; nyen kpe jangɛ mɔn nɔ nkal mɔn nɔ nkal jang nyen; nyen nlom kpe jangɛ nkala mɔn, nkala mɔn kpe jangɛ nyen nlom.”
Ngara agbɛrɛ
(Matiyu 16.2,3)
54Jisɔs bungɔ tɔng ɛblɔng anɛ kpɛk kpɛ rɛ, “Nrɛ nyen na ɛbung mǝkɔngo gɔ ɛjangɛ njol ɛbgong, ‘Nkpe rɛ ɛlab kpenagɛ,’ Lɔgɔ naa. 55Wɔ nfɛb rɛlɔng gɔ njam, nkpe rɛ, ‘ɛji afobo kpe bagɛ,’ Lɔgɔ fob. 56Wan anɛ ba ɛshimar njam bal! Wan kpejɔ gbɛrɛ na nkpe tɔrɔ lagɛ na nshɔl kpe yangɛ gɔ ɛbung na ndi. Jɛn ji wan leke mal tɔrɔ ji kpe lime gɔ ngarɛ nyaa?
Kɔnɔ na nɛ ɛjang
(Matiyu 5.25,26)
57“Jɛn ji wan leke gbɛrɛ ji kpe nɔbɔ ka ɛnanɛ? 58Na nɛ fe na na gɔ ɛshob, nɔg wɔ bɛl ntɔbɔ na nɛ gɔ mbang, a tɔgɔ lim nɔ bɔ kpa fagɛ ka nkpege ɛblam, nkpege ɛblam, faga ka mbreshi, mbreshi kaga gɔ ngbakɔbɔ. 59Ntɔng wan, anim tir lɔng tɛtɛ akpe akpɔgɔ ɛnya mal nya bɔ kima nɔ.”
Селектирано:
Luk 12: NBP
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
©️2024 Luke Initiative for Scripture Translation