Luk 1
1
Nwɛr nyi Luk yɛlɛ jige Tiofilɔs
1Nshɔ Tiofilɔs; anɛ gbalɛgbalɛ garɛ rɛ bɔ yɛlɛ awɛr lagɛ nshɔl nyi milim gɔ ɛbgarɛ ɛblɔng. 2Bɔ yɛlɛ ji anɛ ba jɔlɔ nɔ gɔ ɛtɔmɔnab nyenɛ nɔ tɔng bɔ. 3Ɔwɔ mɛ fufɔ mitɔb fɛdɛ nɔbɔnɔbɔ gɔ ɛjom ajingajingɛ ji bɔmɔ gɔ ɛtɔmɔnab. Rɛ mɛ tɔb yɛlɛ ajingajingɛ gɔ nji aji ka nshɔ Tiofilɔs. 4Nɔngɔ ji alegbɛrɛ ɛlɔgɔlɔgɔ lagɛ ajingajingɛ ji bɔ ma teb.
Nlɔgɔ ɛbtom Ɛshɔwɔ tinge na bɔ jɛlɛ Jɔn nwongɔ anɛ alab
5Gɔ ngarɛ Ntol a Ɛrɔd Judiya bɛlɛ njɔmanjɔm Ɛshɔwɔ nɔ bɔ jɔ lɔngɛ rɛ Sakariya, nɔ wɔbɔ ɛbshik gɛ bajɔmanjɔm Ɛshɔwɔ ba bɔ lɔngɔ bɔ lagɛ Abija, nkalɛwɛ bɔ jɔ lɔngɛ rɛ Ɛlisabɛt nɔ tɔb lɔngɔ ɛbange nab ji Ɛrɔn njɔmanjɔm Ɛshɔwɔ. 6Bɔ anɛ abalabal bɛlɛ ɛtinge ɛbjini gɔ ɛshimar Ɛshɔwɔ, bɔ jɔ bomo njang anyinganyingɛ nyi Nshɔ fɛrɛ jɔ lim ji fomo nɔ. 7Wɔ bɔ anɛ abalabal jɛlim teb Ɛlisabɛt jɔlɔ ngom, tɛtɛ bɔ kol.
8Ɛfong abɔng Sakariya jɔ lime ɛbtomo ɛnɛ na njɔmanjɔm Ɛshɔwɔ teb ɛfongɔ bɔ bi jɔlɔ rɛ ɛblɔngɔ bɔ lim ɛbtom gɔ ji njɔm Ɛshɔwɔ, 9Na ɛbjini ni bajɔmanjɔm tebe nɔ, bɔ jagɛ yɛ rɛ ajɔ yɛl gɔ atang ɛji njɔm Ɛshɔwɔ shɔng fii nshɔl nyi kpewɔgɔ nfam ka Ɛshɔwɔ.
10Gɔ ngarɛ nyi ajɔ fii nshɔl nyi kpewɔgɔ nfam ka Ɛshɔwɔ, ɛblɔng anɛ yimi gɔ ɛlitak jɔ kag ɛrɔ.
11Ɔwɔ nlɔgɔ ɛbtom Ɛshɔwɔ a Nshɔ lɔngɔ biyimɛ, gɔ ɛjangɛ ɛbɔbnlom gɔ ɛji njɔm Ɛshɔwɔ ji bɔ kpejɔ fii nshɔl nyi kpewɔgɔ nfam. 12Ɔji Sakariya nyenɛ nɔ, ɛfalfal bɔbɛ anyar lamɛ. 13Ɔwɔ nlɔgɔ ɛbtom Ɛshɔwɔ tɔngɛ rɛ: “Sakariya, Kǝfal, Ɛshɔwɔ ɛbwog ɛrɔ ɛba. Nkalɛwa Ɛlisabɛt kpejɛlɛ mɔnɔ nlom ka, ale kayɛ mbing rɛ Jɔn. 14Akpe lime wan mbɛl ɛyɛbɛbtem gbalɛgbalɛ, anɛ gbalɛgbalɛ lebɛl yɛbɛbtem ɔji bɔ mɛjɛl, 15teb akpe bɛlɛ ɛblobo gɔ ɛshimar Nshɔ. Anim tir wɔɔ amam anyinganyingɛ jɔlɔ akongho amam, ɛkɔ Ɛtinge ɛtɔgɔ kpejɔlɔ na nɛ bɔ kimawɛ jɛl. 16Akpe kpede ntem anɛ ba Isɛrɛl gbalɛgbalɛ tu Nshɔ nɔ le Ɛshɔwɔ bɔ. 17Yɛ kpe gbɔgɔmbang ka Nshɔ, gɔ ɛkɔ ji ɛtɔgɔ Ɛlayija, akpe kpede nteme ba ndɛ tu abɔn, fɛrɛ kpede nteme ba atɛntom tu anɛ ba ngbɛrɛ ba kpe ɛtinge ɛbjini, fɛrɛ tongo anɛ ba Ɛshɔwɔ bomɛ.”
18Sakariya kim babɛ nlɔgɔ ɛbtom Ɛshɔwɔ rɛ, “Jɛn ji nle kɔ gbɛrɛ rɛ ɛlɔgɔlɔgɔ ji? Teb mɛ na nkalewamɛ ɛbkol.”
19Nlɔgɔ ɛbtom Ɛshɔwɔ kim fangɛ rɛ, “Mɛ wɔ le Gɛbɛrɛl. Nyim gɔ mbing Ɛshɔwɔ, yɛ wɔ tomom tua rɛ mbobung na na, fɛrɛ tɔnga anɔba alom nyaa. 20Bɔmɔ anu shɔngɔ gɔ ɛshishɔng akpe gbɔgɔ ɛmum anim kpe mal bung ntɔng tɛtɛ ɛfong bi kpɛk kpɛ nshɔl nyaa lelem, teb atamim tu alom ɛnyiamɛ, nya lijini gɔ gɛya ngarɛ.”
21Gɔ mɔngarɛ nɔ ɛblɔng anɛ ba yimi gɔ ɛlitak jɔ shek Sakariya, kime kagɛ bɔ ɛfigayɔ ji wangɛ amisha gɔ atang ɛji njɔm. 22Ɔji alongo gɔ ɛlitak, ajɔm kpemal bung ntɔng na bɔ. Ɔwɔ linge bɔ rɛ anyɛn ɛjom ji lamɛ anyar gɔ atang ɛji njɔm Ɛshɔwɔ, teb ajɔ fɛr bungɔ na bɔ gɔ abɔ ajɔm kpɛmal bung ntɔng.
23Ɔji amalɛ na ɛbtom ɛnɛ gɔ ɛji njɔm Ɛshɔwɔ afɛrɛ nyi ɛtak. 24Na nshɔl nyiɔ shingɛ nɔ, Ɛlisabɛt ji nkal kim shagɛ ɛla sha gɔ njo gɔ nyang ɛlon. Arɛ, 25“Nshɔ ɛlim jiya kam. Amim teb ɛbkɔrɔ fɛrɛ yegim ndɔn gɔ ɛblɔng anɛ.”
Gɛbɛrɛl tinge ɛteb rɛ bɔ kpe jɛlɛ Jisɔs
26Gɔ nyang ɛragɛra ji Ɛlisabɛt jɔlɔ gɔ ɛla, Ɛshɔwɔ tomo nlɔgɔ ɛbtom a Gɛbɛrɛl tu gɔ Nasarɛt, ɛjabɛ ji le gɔ Galili, 27tu mgbamɛ nɔ bɔ jɔ lɔngɛ rɛ Mɛri nɔ Josɛf nɔ lɔngɔ ɛbange nab Defid migbɔ ɛkang nanɛ rɛ akpe kɔgɔ. 28Nlɔgɔ ɛbtom Ɛshɔwɔ shɔng kperɛ tɔngɛ rɛ, “Ma kag nyɔ, Ɛbfolo Ɛshɔwɔ jɔl nana! Nshɔ le nana.”
29Mɛri bɛlɛ ɛfigayɔ gbalɛgbalɛ gɔ alom nya nlɔgɔ ɛbtom Ɛshɔwɔ bungɔ nanɛ, fɛrɛ jɔ kɛrɛ lagɛ ɛkine nyɔ mi akagɛ nɔ. 30Ɔwɔ nlɔgɔ ɛbtom Ɛshɔwɔ tɔngɛ rɛ, “Mɛri, kǝfal, ɛbfolo Ɛshɔwɔ le nana. 31Ale sha ɛla jɛl mɔn nɔ nlom, ale kayɛ mbing rɛ Jisɔs. 32Ale bɛl ɛblobo, bɔ le jɔ lɔngɛ rɛ Mɔn Ɛshɔwɔ Nɔ Gbalɛ Shing. Nshɔ Ɛshɔwɔ kpɛ kagɛ ɛtol bi ndɛ ji Defid, 33Ale jɔl Ntol a ɛtitɔngɔ Jɛkɔb gɔ nkalkal; Ɛtol Ɛbɛ nim tir bɛl nkalshi.”
34Ɔwɔ Mɛri kim babɛ nlɔgɔ ɛbtom Ɛshɔwɔ rɛ, anu lijɔl rɛnan, “ɔji nkena shab nɛ?”
35Nlɔgɔ ɛbtom Ɛshɔwɔ kimawɛ fangɛ rɛ, “Ɛtinge ɛtɔgɔ kpa yɛlɛ, gɔ ɛkɔ ji Ɛshɔwɔ Nɔ Gbalɛ Shing. Ɔwɔ alijɛl ɛtinge Mɔn nɔ ale lɔngɛ rɛ Mɔn Ɛshɔwɔ. 36Ɛlisabɛt ji ɛkonoja kpetɔb jɛl mɔn tu ɔji amikol, nɔ anɛ mitɔng rɛ anim kpɛgɛ jɛl, a le gɔ ɛla nyang ɛragɛra. 37Teb ɛjom lim ji Ɛshɔwɔ lekemal lim.”
38Mɛri kimawɛ fangɛ rɛ, “Mɛ nlɔgɔ ɛbtom a Nshɔ wɔ. Nɔngɔ ɛjomajingajingɛ ji amobung lagim jɔl nɔ.” Ɔwɔ Nlɔgɔ ɛbtom Ɛshɔwɔ tamɛ sha.
Mɛri bɔngɔ Ɛlisabɛt
39Ɔji abɔn afong shingɛ nɔ Mɛri jɔ fɔmɔ shɔngɔ nyi ɛjabɛ Judiya ji le gɔ ɛwɔng. 40Ayɛlɛ gɔ ɛtakgɛ Sakariya shɔng kag Ɛlisabɛt nyɔ. 41Ɔji Ɛlisabɛt wogo nyɔ Mɛri, mɔn gɔ nla yib, Ɛtinge ɛtɔgɔ bolɛ 42Abung gbogbo rɛ, “Mɛri gɔ ɛblɔng abǝkal kpɛk kpɛ wɔ wɔ Ɛshɔwɔ ma ga folo, ɛbfolo jɔl ka mɔn nɔ akpe jɛlɛ. 43Jɛn ji wangɛ mbɛlɛ ɛnɔbɔ ɛshi na jiya, rɛ nyen Ɛshɔwɔ ɛbamɛ ba bǝ bɔngim? 44Na nwogo nyɔ ɛma, mɔn gɔ ala ɛyibɛ na ɛyɛbɛbtem. 45Ɛbfolo kpejɔlɔ ka yɛ nɔ tamɛ nɔ rɛ Nshɔ kpe lime ji atɔngɔ nɔ!”
Ɛshɛ ɛjijige Mɛri
46Mɛri rɛ:
“Ɛbtem ɛnamɛ kpe jige Nshɔ;
47Ɛtɔgɔ ɛjamɛ kpe gɛrɛ teb Ɛshɔwɔ Ntitarɛ ɛwamɛ,
48Teb rɛ amim bomo na nlɔgɔ ɛbtom ɛwɛ.
Bɔmɔ anu shɔngɔ anɛ kpɛk kpɛ lijɔ lɔngim rɛ ɛbfolo,
49Teb ajijɔgɔ nshɔl nya Ntol Ɛshɔwɔ milim kam.
Mbing ɛnye le ɛtinge;
50Gɔ njini na njini
Akpe bɛlɛ ndɔn ka anɛ ba kponɛ nɔ.
51Atanɛ njijɔg ɛbɔ ɛbɛ
Radɛ anɛ ba kpejɔ wɔr anyɔ na akɛkɛrɛ bɔ kpɛk kpɛ.
52Arɛdɛ ajijɔg atol gɔ njia abɔ,
Tab akibine warɛ.
53A ka anɛ ba njal atinge nshɔl,
Kam afang anɛ tu gɔ na abɔ ɛnimɛnimɛ.
54Abom ɛlene ji akɔ na akuku ɛnyarɛ,
Aba rɛ bitɔb abɔnɔnjo ɛbɛ Isɛrɛl.
55A bomo bɛl ndɔn ka Ɛbraham
Na ɛtitɔngɔ ɛjɛ gɔ nkalkal!”
56Mɛri jɔlɔ gɔ ji Ɛlisabɛt gɔ jomo nyang ɛra kim fɛrɛ krɛ nyi ɛtak.
Na bɔ jɛlɛ Jɔn nwongɔ anɛ alab
57Ɔji ngarɛ ɛjɛl Ɛlisabɛt ringe nɔ, A jɛlɛ mɔn nɔ nlom. 58Na anɛ ba nkɔntak ɛnye na akono ɛnye wogo rɛ Nshɔ ɛmɛteb ɛbkɔrɔ gbalɛgbalɛ, bɔ anɛ kpɛk kpɛ bɛlɛ ɛyɛbɛbtem jɔ gɛrɛ na nɛ. 59Ɔji mɔn ringe nfong ɛnigeni nyi bɔ jɛlɛ nɔ, bɔ ba rɛ bɔ bǝkeme kimɛ ɛri, fɛrɛ jɔ shɛb rɛ bɔ kayɛ mbing a ndɛ nyi Sakariya, 60wɔ nyen ji Ɛlisabɛt kim bungɔ rɛ, “Ee! Mbing ɛnye nlelongɛ rɛ Jɔn.” 61Bɔ kimawɛ tɔng rɛ, “Nɛ awɔngawɔngɔ gɔ nab ɛnya lim nɔ milene mbing nyiɔ.” 62Bɔ jɔ garɛ gɔ abɔ teb ndɛ, babɛ mbing nyi likɔrɛ rɛ aka mɔn. 63Akim tɔngɔ rɛ bɔ kayɛ ɛjom yɛ yɛlɛ. Bɔ kimawɛ ka ɛkpagɛte akim yɛlɛ rɛ, “Mbing ɛnye Jɔn.” Lamɛ nɛ awɔngawɔngɔ anyar. 64Tutu ɔ, abɔm ntɔng abungɔ, jɔ jige Ɛshɔwɔ. 65Anɛ ba nkɔntak kpɛk kpɛ ɛfalfal bɔb bɔ, teb ɛka lagɛ nshɔl nyaa kpɛk kpɛ yalɛ gɔ ɛbjabɛ ɛwɔng Judiya. 66Nɛ awɔngawɔngɔ nɔ wogo nshɔl nyaa kime ɛkɛrɛ lagɛ, jɔ bab rɛ, “Ɛkine nɛ awɔ mɔn nɔa kpebagɛ jɔlɔ?” Teb kpe tebe rɛ ɛkɔ Ɛshɔwɔ le nanɛ.
Sakariya jige Ɛshɔwɔ
67Na ɛtinge ɛtɔgɔ yɛlɛ Sakariya ji ndɛ abɔmɔ ɛbungɔ alom Ɛshɔwɔ rɛ,
68“Ɛjijige jɔl ka Nshɔ, Ɛshɔwɔ Isɛrɛl,
Teb aba rɛ abǝladɛ anɛ ɛbɛ fɛrɛ tarɛ bɔ yagɛ.
69Ɛshɔwɔ ɛbarɛ ɛka war njijɔg a ntitarɛ
Nɔ lɔng ɛbange nab Defid nlɔgɔ ɛbtom ɛwɛ
70Na abungɔ nɔ gɔ nyɔ atinge ateb ɛnye nya manɛmanɛ,
71Rɛ atarɛ war gɔ ji anɛbɛ ɛjang ɛbarɛ
Na gɔ ɛbɔ anɛ ba ɛkpe ragɛ bɔ.
72Ɛshɔwɔ rɛ akpe tebe ɛbnɔbɔ na akuku ɛnyarɛ,
Afɛrɛ bomo ɛtinge ɛlene ɛjɛ ji akɔnɔ,
73Ɛlene ji akɔnɔ na nshɔjarɛ Ɛbraham:
74Rɛ atarɛ war gɔ abɔ anɛ ba ɛjang ɛbarɛ, nɔngɔ war mal kagɛ ɛkǝbɛl ɛfalfal
75Gɔ tingetinge na ɛbtem ating
Na ɛbkpen ɛnarɛ kpɛk kpɛ.
76“Wɔ, mɔn ɛwamɛ, bɔ le lɔngɛ rɛ ntinge ateb ka Ɛshɔwɔ Nɔ Gbalɛ Shing;
Akpe gbɔgɔ mbang ka Nshɔ
Shɔng tongo
Mbang bomɛ,
77Shɔng tɔng anɛ ɛbɛ rɛ bɔ
Kpe bɛlɛ ɛbladɛ teb Ɛshɔwɔ kpe tamɛ ka bɔ gɔ abi afɛm,
78Teb Ɛshɔwɔ ɛbarɛ kpe nɔbɔ ɛbtem,
Akpe lime njol afonfo nyi lɔng gɔ rɔ warɛ
79Nɔngɔ ya bolo war na anɛ ba le gɔ ɛjangɛ na ba kpe falɛ ɛbku, ababɛ war tu gɔ mbang ɛbkɔnɔ.”
80Jɔn gbalɛ, kongo gɔ ɛtɔgɔ. A jɔlɔ gɔ ɛwungwung tɛtɛ alɔng bitebe ɛnɛ ka anɛ ba Isɛrɛl.
Селектирано:
Luk 1: NBP
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
©️2024 Luke Initiative for Scripture Translation