Luka 1
1
Nau ngơi gleh
1Hơi kôranh Y-Thêôphil bu yơk, geh âk bunuyh hŏ srôih pah kan nchih du nau rblang nkoch bri ma lĕ nau hŏ ƀư jêh ta nklang he, 2di tĭng nâm phung bunuyh hŏ tă saơ jêh ri pah kan nau Brah Ndu#1:2 Mlr: sâm ăn nau Kôranh Brah ngơi. bơh ntơm saơm nkoch tay ma he. 3Yor nây, jêh sek uănh nanê̆ bơh ntơm, gâp mĭn ŭch geh tĭng gưl gay nchih ăn ma kôranh 4gay kôranh gĭt lĕ nau may nơm hŏ tă nti jêng nanê̆.
Nau jŭr deh jêh ri nôk ndăm rah Brah Yêsu
(1:5 – 2:52)
Nau mbơh lor ma nau deh Y-Yôhan-Ƀaptist
5Tâm nôk Hêrôt, hađăch phung Yuđa,#1:5 Yuđa: Ta aơ, Rplay ngơi aơ knŏng ma lĕ n'gor Palestine. geh du huê kôranh ƀư brah tâm mpôl Abija, amoh Y-Sakari; ur păng jêng H'Êlisabet, jêng noi deh Y-Arôn.#I Rêh Jêng 24:10. 6Lĕ bar hê jêng bunuyh sŏng srăng tanăp Brah Ndu, tông djôt prăp lĕ nau vay jêh ri tĭng nau ntĭm Kôranh Brah ntăm nŭm rĭng ngăn. 7Khân păng mâu geh kon, yor H'Êlisabet mâu bă kon jêh ri lĕ bar hê ranh jêh da dê.
8Nkoch bri tât geh nôk Y-Sakari tĭng lor nglĕ tâm mpôl păng nơm ƀư nau kan ndơ ƀư brah tanăp Brah Ndu. 9Nôk nchroh n'hôr tĭng nâm nau vay phung kôranh ƀư brah, păng hŏ tâm nchroh di dơi lăp tâm ngih brah#1:9 Klăp lah jêng ntŭk kloh ueh, prăp êng ma phung kôranh ƀư brah. Kôranh Brah gay nhhơr ndơ ƀâu kah. 10Tâm mông nhhơr ndơ ƀâu kah, lĕ phung bunuyh âk gŭ padih mbơh sơm. 11Nôk nây geh du huê tông mpăr Kôranh Brah tâm mpơl ma Y-Sakari, dâk pa ma nơng ƀư brah nhhơr ndơ ƀâu kah. 12Saơ tông mpăr, Y-Sakari rŭng răng, klach krit. 13Ƀiălah tông mpăr đă ma păng: “Aơ, hơi Y-Sakari, lơi klach ôh! Yorlah Brah Ndu hŏ tăng jêh nau may mbơh sơm. H'Êlisabet, ur may, mra deh du huê kon bu klâu; may mra tâm amoh păng Y-Yôhan. 14Kon bu klâu nây mra ƀư ma may răm maak hâu ngăn, jêh ri âk bunuyh mra hâk răm ngăn nôk deh kon se jê̆ nây. 15Yorlah kon se jê̆ nây mra dơi yơk tanăp Kôranh Brah, mâu nhêt ndrănh krăk ƀâu mâu lah dak ndơ nhêt geh ndrui, jêh ri mra dơi bêng ma Brah Huêng Ueh ntơm bơh hôm tâm ndŭl mê̆.#Kơp 6:3. 16Kon se jê̆ nây mra njŭn leo âk bunuyh Israel plơ̆ tay ma Kôranh Brah jêng Brah Ndu khân păng; 17Kon nây mra sŏk nuih n'hâm jêh ri nau brah Y-Êli gay hăn lor ăn ma Kôranh Brah, gay djôt leo nuih n'hâm mbơ̆ plơ̆ sĭt đah kon păng, djôt leo nơm mâu tông bâr tât nau blau mĭn bunuyh sŏng srăng, jêh ri gay ma ndrăp du phung mpôl băl rơm ndrăp jêh ma Kôranh Brah.”#Mal 4:5-6. 18Y-Sakari ngơi ma tông mpăr: “Mâm ƀư gâp gĭt nau nây mra tât geh? Yorlah gâp lĕ ranh, ur gâp lĕ ranh jêh.” 19Tông mpăr plơ̆ lah: “Gâp jêng Gabriel, ƀaƀơ gŭ tanăp Brah Ndu. Gâp dơi njuăl văch gay lah đah may jêh ri mbơh Nau Mhe Mhan Ueh ma may.#Dan 8:16; 9:21. 20Nĕ aơ, may mra mlo, mâu dơi ngơi ôh, tât nar lĕ nau nây tât geh, yorlah may mâu chroh ma nau gâp ngơi, jêng nau mra dơi ƀư nanê̆ di mông.”
21Dôl nôk nây, phung ƀon lan gŭ kâp Y-Sakari; khân păng hih rhâl yorlah păng gŭ jŏ tâm ngih brah. 22Tơlah păng du luh, Y-Sakari mâu dơi ngơi đah phung ƀon lan ôh, ri mơ khân păng mhe gĭt păng hŏ geh nau tâm saơ tâm ngih brah. Păng nchŏng ma ti ma khân păng yor păng hôm mlo. 23Tơlah lĕ nar păng pah kan hŏ lôch jêh, păng plơ̆ sĭt ta ngih păng.
24Pakơi lĕ nar nây, ur păng jêng H'Êlisabet bă ntreo jêh ri pôn săk tâm prăm khay. Păng lah pô aơ: 25“Kôranh Brah hŏ ăn nau yô̆ ma gâp. Tâm lĕ nar nây, Păng yô̆ nđach gâp jêh ri sŏk lơi nau prêng gâp ta nklang lĕ rngôch bunuyh.”
Tông mpăr mbơh nau jŭr deh Brah Yêsu
26Lăp khay rơh prao, Brah Ndu njuăl tông mpăr Gabriel hăn ta ƀon Nasaret, tâm n'gor Galilê, 27tâm mâp du huê bu ur druh tâm ndrôi jêh đah du huê amoh Y-Yôsep, jêng noi deh Y-Đavit. Bu ur druh nây amoh H'Mari.#Mat 1:18. 28Tông mpăr hăn tât gay tâm mâp păng jêh ri lah: “Hơi bunuyh geh nau yô̆, ueh lăng ay! Kôranh Brah gŭ ndrel ma ay!” 29Ƀiălah H'Mari rŭng răng ngăn ma lĕ nau ngơi nây jêh ri ôp êng nau mbah nây moh nau bu ntĭt. 30Tông mpăr lah tay: “Hơi H'Mari, lơi klach ôh yorlah ay geh jêh nau yô̆ tanăp Brah Ndu. 31Nĕ aơ, ay mra bă ntreo, deh ma du huê kon bu klâu jêh ri mra ntơ amoh YÊSU.#Mat 1:21. 32Kon bu klâu nây mra dơi yơk, dơi kuăl jêng Kon Nơm Dŭt Prêh, Kôranh Brah jêng Brah Ndu mra ăn ma Păng sưng hađăch Y-Đavit, chô yau Păng.#II Sa 7:12-13,16; Êsai 9:6. 33Păng mra jêng chiă uănh n'ho ro ngih Y-Yakôp; ƀon bri hađăch Păng mra hôm mro mrăng n'ho ro.” 34H'Mari ngơi đah tông mpăr: “Gâp ê hŏ geh sai, mâm ƀư nau nây dơi tât?” 35Tông mpăr plơ̆ lah: “Brah Huêng Ueh mra gŭ ta klơ ay, jêh ri nau brah tă bơh Nơm Dŭt Prêh mra nkŭm nkâm ay; yor nây nau jŭr deh kon kloh ueh bu mra kuăl jêng Kon Brah Ndu. 36Ri, H'Êlisabet, bunuyh ndŭl mpôl ay, đŏng bă ntreo du huê kon bu klâu tâm dôl păng lĕ ranh. Păng ơm dơi gĭt jêng mâu bă kon ƀiălah aƀaơ hŏ bă treo dơi prao khay jêh. 37Yorlah mâu geh moh nau kan Brah Ndu mâu dơi ƀư.”#Ntơm 18:14. 38H'Mari plơ̆ lah: “Gâp jêng oh mon bu ur ma Kôranh Brah. Dăn nau nây tât ma gâp nâm nau may ntrŭnh!” Jêh nây tông mpăr du tă bơh H'Mari.
H'Mari hăn khâl H'Êlisabet. – Nau mprơ H'Mari
39Tâm lĕ nar nây, H'Mari dâk, ndal hăn sĭt nkual yôk, tât ta ƀon n'gor Yuđa, 40lăp tâm ngih Y-Sakari jêh ri mbah ma H'Êlisabet. 41H'Êlisabet mhe tăng nau H'Mari mbah, kon tâm ndŭl mpât ro. H'Êlisabet dơi bêng ma Brah Huêng Ueh; 42păng ngơi huy pô aơ: “Ay yơh geh nau ueh lăng ngăn tâm phung bu ur, kon jê̆ tâm trôm ndŭl ay đŏng dơi geh nau ueh lăng ngăn. 43Mâm ƀư gâp dơi nau khlay nây, kŏ mê̆ Kôranh Brah văch khâl gâp? 44Yorlah ri, tơlah gâp mhe tăng nau ay mbah, kon tâm trôm ndŭl gâp mpât rhơn. 45Ueh maak yơh ma ay hŏ chroh, yorlah nau Kôranh Brah mbơh jêh ma ay mra dơi tât di ngăn!”
46H'Mari lah:#I Sa 2:1-10.
“Huêng gâp tâm rnê ma Kôranh Brah,
47Huêng nuih n'hâm gâp răm rhơn tâm Brah Ndu jêng Nơm Tâm Rklaih gâp,
48Yorlah Păng hŏ uănh yô̆ jêh kon bunuyh jê̆ lê̆ oh mon bu ur Păng.#I Sa 1:11.
Aơ, ntơm aƀaơ tât kăndơ̆, lĕ rngôch rnôk mra rnê ma gâp jêng bunuyh geh ueh lăng ngăn;
49Yorlah Nơm Geh Lĕ Nau Brah ƀư jêh lĕ nau kan toyh ma gâp.
Amoh Păng jêng kloh ueh,
50Jêh ri Păng yô̆ nđach ma phung bunuyh klach yơk mbah ma Păng,
Ntơm bơh rnôk aơ tât rnôk ri.
51Păng hŏ dŏng ti Păng ƀư lĕ nau kan nau brah;
Ƀư nchah rai pru pra phung geh nau mĭn sưr rlau tâm nuih n'hâm.
52Păng n'glưh nsot sưng hađăch lĕ phung chiă uănh,#Yôp 5:11; 12:19.
Jêh ri hŏ n'hao phung bunuyh dêh rhêt hao.
53Păng hŏ ƀư jêh bunuyh ji ngot geh bêng ndơ sa kah,
Jêh ri mprơh phung ndrŏng plơ̆ sĭt ti dơm.
54Păng hŏ kơl jêh Israel, oh mon Păng,
Jêh ri kah gĭt tay nau Păng yô̆ nđach.
55Tâm ban ma Păng hŏ ntăm jêh ma chô yau he,#Ntơm 17:7.
Ma Y-Abraham jêh ri ma noi deh păng tât lĕ rngôch rnôk n'ho ro.”
56H'Mari gŭ ndrel ma H'Êlisabet tâm pe khay, jêh nây plơ̆ sĭt ta ngih păng nơm.
Nau deh Y-Yôhan-Ƀaptist
57Nôk nây, tât nar H'Êlisabet deh kon, păng deh ma du huê kon bu klâu. 58Tăng lư Kôranh Brah tâm mpơl jêh nuih n'hâm yô̆ nđach toyh ma păng, phung chiau meng jêh ri phung ndŭl mpôl păng hăn tât răm maak ndrel ma păng. 59Tâm nar rơh pham, khân păng văch koh ntâu ma kon se jê̆ jêh ri tâm amoh Y-Sakari tĭng amoh mbơ̆ păng.#Lêvi 12:3. 60Ƀiălah mê̆ păng lah: “Mâu! Tâm amoh păng Y-Yôhan.” 61Khân păng lah: “Tâm ndŭl mpôl dăch păng, mâu geh bu amoh tâm ban pônây.” 62Khân păng ôp ma mbơ̆ păng mâm ŭch tâm amoh kon se jê̆ nây. 63Y-Sakari đă hăn sŏk kađar jê̆ jêh ri nchih: “Amoh păng Y-Yôhan.” Lĕ rngôch khân păng hih rhâl. 64Ƀât lât, păng hă mbung, mpiăt mpât mbrơi, jêh ri păng ngơi tâm rnê ma Brah Ndu. 65Lĕ Bunuyh chiau meng klach da dê, jêh ri bu tâm ôp ndrăng khăn păng ma lĕ rngôch nau nây lam jŭm n'gor yôk Yuđa. 66Lĕ rngôch bunuyh tăng nau aơ kah gĭt tâm nuih n'hâm, jêh ri lah: “Mâm kon se jê̆ nây pakơi taơ mra jêng?” Yor nanê̆ ngăn ti Kôranh Brah gŭ ndrel ma kon se jê̆ nây.
Nau mprơ Y-Sakari
67Y-Sakari, mbơ̆ kon se jê̆ nây, dơi bêng ma Brah Huêng Ueh, mbơh lor pô aơ:
68“Tâm rnê ma Kôranh Brah, jêng Brah Ndu Israel,
Yorlah Păng hŏ khâl jêh ri tâm chuai jêh phung ƀon lan Păng,
69Păng hŏ n'hao ma phung he, tâm ngih Y-Đavit, oh mon Păng,
Du huê Nơm Tâm Rklaih bêng nau brah!#1:69 Nrn: nke tâm rklaih.
70Tâm ban ma Păng hŏ dŏng bâr mbung phung nơm mbơh lor kloh ueh
Hŏ ton ntơm bơh rnôk kăl e,
71Nau rklaih he bơh phung rlăng,
Jêh ri bơh ti lĕ rngôch bunuyh tâm rmot đah he.
72Păng tâm mpơl nuih n'hâm yô̆ nđach ma chô yau he,
Jêh ri kah gĭt tay nau tâm rnglăp kloh ueh Păng,
73Nâm nau Păng hŏ sơm ton đah Y-Abraham,
Jêng chô yau he,
74Pô aơ nôk he dơi kơl rklaih tă bơh ti phung rlăng,
Păng mra ăn ma he dơi pah kan ma Păng mâu geh nau klach ôh,
75Tâm nau kloh ueh jêh ri nau sŏng srăng
Tanăp Păng lôch du njăr rêh he.
76Hơi kon se jê̆, bu mra kuăl ma may jêng nơm mbơh lor ma Nơm Dŭt Prêh;#Mal 3:1.
May mra hăn tanăp Kôranh Brah, nkra trong ma Păng,
77Gay ma phung ƀon lan Păng bơh nau yô̆ an nau tih
Gĭt ma nau tâm rklaih.
78Yor nuih n'hâm yô̆ nđach bơh Brah Ndu he,
Ang ơm ôi bơh klơ prêh chop khâl he,
79Gay ma sol ang phung bunuyh gŭ tâm ntŭk ngo klĕng jêh ri tâm dâng gui nau khĭt,#Êsai 9:1.
Jêh ri njŭn leo he chuat lăp trong đăp mpăn.”
80Kon se jê̆ nây văch ma toyh, huêng nuih n'hâm jêng ktang, gŭ rêh tâm bri rdah tât nar păng tâm mpơl tanăp phung Israel.
Селектирано:
Luka 1: CMO2023
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2023 United Bible Societies. All rights reserved.