Marko 9
9
1Yesuí rá, “Ngàí jø̀ngjǿng vla:tnìni, yayv́ng rip rì tiqmaqí Gvray móngdàn nø jórnònggùn nv̀ng lashì daq we mvyà:ngò dv́ngte àngmaq mvshì long,” a:lòe.
Mv̀rshv̀m shø̀ngshang vmvtná:mì we
Mat. 17:1-13; Luk. 9:28-36
2Vchuq ni vleá:mì ke Yesu nø Piter, Yaku nv̀ng Yohan àngmaq wa shø:lò nø̀, vháng we shìgùng tiqyv́ng sv̀ng ngangá:mì. Wekvt àngmaq mv́rdv̀ngø Àng nø mv̀rshv̀m shø̀ngshang vmvtná:mì. 3Àng bèlaq nø vtvngshaq shorshor wa kvlàng lú:ngì. Rvgaq mvdv̀m laqtun zá:lò we kagǿí gø wedv́ngte mùng dø zv́l mvsháò. 4Coqcv́npèla mv́rdv̀ng Eliya nv̀ng Moshi gø dvtánshì daqì nø̀ Yesu nv̀ng kà dvmv̀ne.
5Wekvt Piterí Yesu sv̀ng, “Rabiá,#9:5 “Rabi” nø “Svrapè” wa kà íe. yayv́ng nø nøngmaq dvpvt v́l shvlá dá:rì. Shìyat vshø̀m lòng, Nà dvpvt tiqlòng, Moshi dvpvt tiqlòng, Eliya dvpvt tiqlòng nøngmaq sv̀ng wá dèzv́rshà,” a:lòe. 6Àngmaq vtvng kèní svreá:mì nø̀, kapà shø̀nlv́m gø mvshá bǿà rvt Piter wedø vjoshì we íe.
7Wekvt rvmøt tiqpù bung daqì nø̀ àngmaq sv̀ng dvkøq daqà. Rvmøt vdòng kèní kàshaq tiqlòng shø̀n daqì nø̀, “Yapè nø Ngà shóngshø̀ng we Ngàcèpè íe. Àng kà ètánø̀ng,” wae. #Mak. 1:11; 2Pt. 1:17; Drd. 18:15; Dzr. 3:22 8Wela:ngí gùrhøm sv̀ng àngmaqí dvjaqò nìnø, Yesu wa mø̀ínì, dvgá tiqgǿ gø mvyv̀ng bǿà.
Yesu zunlv́m dang vrá dvtáò we
9Shìgùng kèní àngmaq shúngshì daqì dvgvp, Yesuí àngmaq sv̀ng, “Vsv̀ng Àngcèpè nø shì yv́ngkèní mvzun long dv́ngte nàmaqí èyv̀ng bǿshà rì kagǿ sv̀ng gø mèdètánø̀ng ni,” wa dvká:mòe. #Mak. 8:30 10Kà yalòng sv̀ng àngmaq nøt vdòngø ríò nø̀, “shì yv́ngkèní vrá zun longe” wa kà nø pa sv̀ng wae má, wa nø̀ tasv̀ng tàle vrøtkee.
11Wekvt àngmaqí Àng sv̀ng, “Eliya vzv̀ng di daqe wa nø dvrá svrarìí pàwálv́m shø̀nòe má?” wa rø:tnòe.#Esa. 53:3; Mal. 4:5-6 #9:11 Wenila taq Yuda vsv̀ngrì nø Meshia mvdi daq vzv̀ng, Eliya tuq daqe wa kv́m yà:ngì.
12À:ngí, “Íe, pv̀n vrv̀m shvngbe vrá dvcøp mvdónglv́m Eliya vzv̀ng dí ràe. Íwe Vsv̀ng Àngcèpè nø dvshàlv́m mvme pv̀n tønshì nø̀, vsa:ngí ngál we vhǿmlv́m dang kàru taq vru yà:ngà we mø̀í má? 13Ngàí vla:tnìni, Eliya nø jø̀ngjǿng vdíshaq íe. Kàru taq àng dang vru yà:ngà dø tiqdvchá, àngmaqí àng sv̀ng kadø wá mvyǿ nìnø wedøni wà bǿà,” wa vtá:nòe.#Mat. 11:14; 1Kk. 19:2,10
Màá nàmvtá cáng lù:ngò we
Mat. 17:14-21; Luk. 9:37-42
14Dvgá coqcv́nrì vl yv́ng àngmaq tuq daqì dvgvp, àngmaq gùrhøm vsv̀ng loksok kø̀m nø̀, dvrá svrarì tiqmaq gø coqcv́nrì nv̀ng vzø̀ng da we àngmaqí yv̀ng bǿà. 15Vsv̀ng loksok shvngbeí Yesu sv̀ng yv̀ng bǿà kvt, gvzà dà sórí Àng yv́ngsv̀ng kvlv̀ng ráì nø̀ pàmvrà a:lòe.
16Wekvt À:ngí werì sv̀ng, “Àngmaq nv̀ng kapà rvt nàzø̀ngnø̀nge má?” wa rø:tnòe.
17Wekvt vsv̀ng loksok kèní tiqgǿí Àng sv̀ng, “Svrapèá, ngàcèpè taq màá cáng dvchøp rvtnø̀ Nà yv́ngsv̀ng shølvtnà. 18Àng taq kayv́ngø cáng zv́ngshì ra nìnø, weyv́ng ce vtungvme. Wekvt nonggøp kèní dvpup wa vshù sórí shà vjitshì nø̀ góng gø daq vtu longe. Cáng lúngalv́m rvt nà coqcv́nrì sv̀ng rø:tnò we, àngmaqí lúng mvdá:ngò,” a:lòe.
19Yesuí àngmaq sv̀ng, “Kv́mnøt mèv̀lnø̀ng we mvril cèrìé, Ngà nø kadvgvp høq nàmaq nv̀ng v̀llv́m í má? Kadvgvp høq nàmaq sv̀ng tønaì ni má? Àng sv̀ng Ngà yv́ng èshølvtnø̀ng,” a:lòe.
20Àngmaqí cv̀mrépè sv̀ng Yesu yv́ng shøla:tnà kvt, Yesu sv̀ng cá:ngí yv̀ng bǿà nìnø cv̀mrépè sv̀ng chàng tímkéò nø̀ vba tø̀m sv̀ng vtúng daqì. Àng nònggøp kèní gø dvpup wa vshù sórí vrulshìe.
21Wekvt Yesuí àngpè sv̀ng, “Àng yadø í we nø kadv́ngte vlé ráì?” wa rø:tnòe.
Àngpèí, “Cv̀mré dvgvp kèní íe. 22Àng sv̀ng dvshílv́m cá:ngí nø svmi taq gø, tì taq gø mvme kvt dvgupshì dvzá:ròe. Nàí wá èngu:tnò nìnø, ngànípè sv̀ng dvshá èzashà nø̀ dèbvngshà,” a:lòe.
23Wekvt Yesuí àng sv̀ng, “Pàwálv́m, ‘Wá èngu:tnò nìnø,’ èwae? Kv́mnøt vl gǿ dvpvt nø pàgø bǿn daqe,” a:lòe. #Mak. 11:23
24Wela:ngí ni cv̀mrépè àngpè nø vkiq sórí, “Ngà kv́me. Ngà kv́mnøt mvluq yv́ng mv̀ng dèbvngà,” a:lòe. #Luk. 17:5
25Vsv̀ng loksokrì dvkǿmshì ráì we sv̀ng Yesuí yv̀ng bǿà kvt, À:ngí mvmv́ng cáng kaq, “Màá, nàmvtá cáng nà, Ngàí dvkv́mvtnøng, àng yv́ngkèní èlúshì. Akvt kèní kukaq àng vdòng sv̀ng rá zv́ngshì mvdaq,” wa nga:nòe.
26Cáng nø serwa vkiq nø̀ àng sv̀ng svre lvshap tímkéò dá:ngí lúshiá:mì. Cv̀mrépè nø vshí dø vhúlá:mì rvt vsv̀ng mvmeí, “Àng nø shìá:mì,” wae. #Mak. 1:26 27Íwe Yesuí àng wur zø̀:mò nø̀ ku:ngò nìnø, àng búng lú:ngì.
28Chø̀m vdòng Yesu gòngá:mì ke Àng coqcv́nrìí Àng sv̀ng, “Nøngmaqí kadø í rvt cáng welòng lúng mvdá:ngì má?” wa mvyø̀:ní rø:tnòe.
29Yesuí àngmaq sv̀ng, “Yadø í pv̀n cáng nø vjúrø:tnò kvt#9:29 Àngké kàru tiqmaq taq “v́mpà màv́m vnatshì” wa kà vbáe. wa lúshìvme,” a:lòe.
Yesu shí rà we dang dvtáò we
Mat. 17:22-23; Luk. 9:43-45
30Àngmaq nø we yv́ngkèní búngá:mì nø̀, Galili rvgaqgaq léshì ráì. Yesuí nø àngmaq vl yv́ng kagǿí gø laq mvsháò wa dvda:mòe. #Yoh. 7:1 31Pawalv́m wani Àng coqcv́nrì sv̀ng À:ngí shvngøt mvyǿ rvt íe. À:ngí àngmaq sv̀ng, “Vsv̀ng Àngcèpè nø vsv̀ng wur taq tvle bǿòe. Werìí Àng sv̀ng shvt bǿòe. Shvt bǿò mèpvng vshø̀m ni wani taq vrá zun longe,” a:lòe. #Mak. 8:31; 10:32-34 32Ínìgø yakà sv̀ng àngmaqí mvcí:ngò. Àng sv̀ng røt gø mvka:mò.#Luk. 18:34
Kagǿ nø té ring we
Mat. 18:1-9; Luk. 9:46-50
33Àngmaq nø Kapernum mvrìng sv̀ng tuq ráì. Chø̀m vdòng gòngá:mì dvgvp Yesuí àngmaq sv̀ng, “To tvrà ram nàmaq kapà rvt nàzø̀ngnø̀nge?” wa rø:tnòe. 34Íwe àngmaq dø màwá vle. Pàwá wani tvrà ramø àngmaq dvhø̀ taq kagǿ nø té ring we dang vzø̀ng dá:rì.
35Wekvt Àng rung nø̀, coqcv́n Tiqcé Vnípè sv̀ng goò dá:ngí, “Kagǿ vgo wáshì mvyǿ nìnø, wegǿ nø shvngbe lv̀ngpvng cipshì nø̀, shvngbe sv̀ng dvzømshú wáshì ràe,” a:lòe.
#
Mak. 10:44
36À:ngí cv̀mrécè tiqgǿ shøla:tnà nø àngmaq dvhø̀ø shvri:pmòe. Àng wu:rí gø àng sv̀ng mvguqò sórí àngmaq sv̀ng, #Mak. 10:16 37“Kagǿ ínìgø Ngà bø̀ng taqkèní yadø í we cv̀mrécè tiqgǿ sv̀ng vtoò nìnø, Ngà sv̀ng nàtòng we íe. Vrá Ngà sv̀ng nàtòng we wa mvtaq, Ngà sv̀ng dèzv́r dakngà pè sv̀ng vtoò we íe,” a:lòe.#Mat. 10:40; Yoh. 13:20
38Yohaní Yesu sv̀ng, “Kàngpèá, vsv̀ng tiqgǿí Nà bø̀ng kèní cángrì lù:ngò we nøngmaqí yv̀ng bǿshà. Íwe àng nø nøngmaq mèpvng mvcv̀n rvt, àng sv̀ng vgám bǿshà,” a:lòe.
#
Dcr. 11:27,28 39Yesuí, “Àng sv̀ng mènàgámnø̀ngni. Pàwá wani Ngà bø̀ng kèní dàlv́m bv̀nlì wàò gǿ nø Ngà dang kà mvgv́m yùlyùlcè mvshø̀n long. #1Kr. 12:3 40Pàwá wani nøngmaq sv̀ng màtù gǿ nø nøngmaq lap wáshì vsv̀ng íe. #Mat. 12:30 41Ngàí jø̀ngjǿng vla:tnìni, nàmaq nø Kristuò èínø̀ng rvt Ngà bø̀ng taqkèní nàmaq sv̀ng tì tiqgwìn shèaqvtnø̀ng gǿ nø kadø ínìgø àng zìbè màmv́ngaò,” a:lòe.#Mat. 10:42
Zùpvng mvdìlv́m dvtúò we
Mat. 5:29-30
42Vrá À:ngí, “Ngà sv̀ng kv́m we cv̀mrécè yarì taqkèní tiqgǿ sv̀ng vléshì dvzá:rò gǿ sv̀ng nø àng lóngjvng taq loklvngmè tiqchv̀ng dvchungdv̀ng tìnúngmè vdòng sv̀ng gur bǿò lòng nø àng dvpvt té shvlae. 43Wur tiqtá:ngí nà sv̀ng vléshì dèzv́rvt nìnø, bvt ètu:tnò. Gø̀nshaq cúnshilv́m yv́ngsv̀ng wurdong ègòngvm lòng nø wur vnítáng kø̀m dø màmaq we zùpvng svmi móng sv̀ng ègòng bø lòng mvdv̀m té shvlae. 44(Wemóng nø bvløng gø mvshì, svmi gø màmaq móng íe). #9:44 Vlǿmv́m daq we àngké kàru tiqmaq taq 44 nv̀ng 46 ciqní màbá. 45Nà hí tiqtá:ngí nà sv̀ng vléshì dèzv́rvt nìgø, ètu:tnò. Zùpvng svmi móng sv̀ng nà hí vnítáng kø̀m dø ègur bø lòng mvdv̀m nø gø̀nshaq cúnshìlv́m yv́ngsv̀ng hídong ègòngvm lòng té shvlae. 46(Wemóng nø bvløng gø mvshì, svmi gø màmaq móng íe). 47Vne tiqpaí nà sv̀ng vléshì dèzv́rvt nìnø, èkù:nò. Ne tiqpaí wa Gvray móngdàn sv̀ng ègòngvm lòng nø ne vnípa kø̀m dø, zùpvng svmi móng sv̀ng ègur bø lòng mvdv̀m té shvlae. 48Wemóng nø bvløng gø mvshì, svmi gø màmaq móng íe. #Esa. 66:24
Shvlaq nv̀ng svmi kàshvbóng
49Shòrcaq núngpà sv̀ng shvlaqí dvshè:rò dø, kagǿ gø dvshà mvhøt we svmi taq Gvrayí dvchø̀ng we vhǿm ràe. #Lew. 2:13
50Shvlaq nø shvlae. Íwe àng kílòng la bvlvm nìnø, vrá lvkí long dø kadø wá lúnshì má? Nàmaq vdòng taq shvlaq vl nø̀ tiqgǿ nø tiqgǿ mòngzø̀l dø èv̀lnø̀ng,” a:lòe.#Mat. 5:13; Luk. 14:34; Kol. 4:6
Селектирано:
Marko 9: GSM
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2024, Rvcv́ngcè Kàru Gomidi Kristu Shvngø̀mré. All Rights Reserved.