Marko 6
6
Nazaret sv̀ng Yesu vtv́ng ráì we
Mat. 13:53-58; Luk. 4:15-30
1Yesu nø weyv́ng kèní búng nø̀, Àng v̀l yà:ngì mvrìng sv̀ng vtv́ng ráì. Àng coqcv́nrìí gø Àng mèpvng cà:nòe. 2Narni vhøm ráì ke, júrøt chø̀m yv́ngø À:ngí shvngø:tnòe. Táò vsv̀ng mvme nø, dàá:mì nø̀ yadø wae. “Yapèí yadv́ng pv̀n nø kayv́ng kèní lú:nò má? À:ngí sháò we zitnøt rálnøt nø kadø lú:nò má? Dàlv́m bv̀nlì yarì sv̀ng kadø wàò má? #Yoh. 7:15 3Yapè nø shǿngkø̀m rvmúshú wa mø̀í má? Mari àngcèpè mø̀í má? Yaku, Yose, Yuda nv̀ng Simon àngnvm vlatpè mø̀í má? Àngnvm mèla gø yayv́ng nøngmaq nv̀ng tiqdø à:lì we mø̀í má?” wa nø̀ Àng sv̀ng nøt vtøpmá:mì.
4Íwe Yesuí àngmaq sv̀ng, “Kàdvtutshú nø kayv́ng gø dvgùng lú:nò we, vdè mvrìng, vdè rvprì nv̀ng vdè chø̀m vsv̀ngrìí nø màpǿò,” a:lòe. 5-6Àng sv̀ng àngmaq mvkv́m rvt Yesu dàe. Wervtnø̀ za we tiqmaq sv̀ng Àng wur hapshì nø̀ dvba:nò we wa mø̀í nìnø, dvgá dø dàlv́m bv̀nlì kapà gø we yv́ng À:ngí wá mvlú:nò. Weyv́ng kèní gùrhøm vl we tiqrvwá nø tiqrvwá sv̀ng Àng di nø̀ shvngø:tnòe.
Coqcv́n Tiqcé Vnípè dvzv́r bǿà we
Mat. 10:1,9-15; Luk. 9:1-6
7Yesuí Tiqcé Vnípè sv̀ng Àng yv́ng goa:tnà dá:ngí, vnígǿ vnígǿ dvzá:ròe. Mvmv́ng cáng kaq lúng dv́nglv́m vmíng vkv́ng gø À:ngí àngmaq sv̀ng zíòe. #Luk. 10:1
8Tvrà dvpvt dvrv̀ng wa mø̀í nìnø, mvzv́ng gø, tòngzv̀n gø, juqnv́m taq gv̀msùng gø, dvgá kapà gø mvlv́nglv́m, À:ngí dvká:mòe. 9Híshvnam nø dønshìlv́m, ínìgø bèlaq vnídùng mvgwashìlv́m dvká:mòe. 10Vrá àngmaq sv̀ng, “Kayv́ng ínìgø, kachø̀m sv̀ng ègòngv́mnø̀ng nìnø, wemvrìng kèní mèbúngnø̀ng dv́ngte nàmaq nø wechø̀m taq èv̀lnø̀ng. 11Nàmaq sv̀ng mènàtonø̀ng nø̀, nàmaq kàrì sv̀ng gø mètáanø̀ng we kayv́ng vl nìnø, weyv́ng kèní èbúng daqnø̀ng kvt, àngmaq sv̀ng vchaqlv́m shvkse ílv́m dvpvt, nàmaq hípvng vyin we dvtø̀l nàchaqshì ránø̀ng,#6:11 Yuda vtóng taq “akvt kèní nà nv̀ng mvsingá:mì” wa kà íe.” a:lòe.
12Wekvt wepèla búngá:mì nø̀, nøt língshì rà we mvshǿl dvsha:ngòe. 13Àngmaqí cáng gø mvme lùng bǿà nø̀, za we mvme gǿ sv̀ng zanlún yøtìí ma:tnò nø̀ dvbanaòe.#Yak. 5:14,15
Tiløp Yohan vgo tu:tnò we
Mat. 14:1-12; Luk. 9:7-9
14Yesu bø̀ng nø kayv́ng màyv́ng shv̀ngá:mì nø̀, Herod koqká:mí#6:14 Yesu gà:lò nila koqkv́m Herod àngcèpè íe. gø tá bǿà. Tiqmaqí nø, “Tiløp Yohan shì yv́ngkèní zun lú:ngì rvt dàlv́m bv̀nlìrì wàòe,” wae. #Luk. 3:19,20
15Tiqmaqí, “Àng nø Eliya íe,” wae.
Vrá tiqmaqí, “Àng nø darì kàdvtutshúrì dø í we tiqpè íe,” wae.
16Íwe Herodní tá bǿà kvt, “Ngàí vgo tut dvzv́rvpmà we Yohan wepè ni shì yv́ngkèní zun lú:ngì,” wae.
17-18Kadø íe wani Herod nø àngnvmpè Pilip chø̀mmè Herodia nv̀ng vl rvt, Yohaní àng sv̀ng, “Nvnvmpè chø̀mmè èlushì we nø dvrá nv̀ng màbóng,” wa mvme kvt vl yà:ngà. Herodia rvt, Herod àng vdèí Yohan sv̀ng tvplv́m vmíng zíò nø̀ tung róng yà:ngà we íe. #Lew. 18:16 19Herodia nø Yohan sv̀ng mvwv́mshì rvt shvt mvyǿ nìgø shvt mvlú:nò. 20Kadø íe wani Yohan nø døngman nø̀ shànshér vsv̀ng í we Herodní sháò rvt vpǿ svreò nø̀, àng sv̀ng ga:ròe. Yohaní shø̀:nò rì sv̀ng à:ngí tá lú:nò ke gvzà gónggi we í nìgø, àng kàrì sv̀ng gvzà tá neshìe.
21Wemèpvng, Herodia dvpvt yuqyà we àngni tuq ráì. Herod nø àng gv̀l yà:ngà we àngni vhøm ráì kvt, gàmzø̀rì, cìldù vgorì nv̀ng Galili shaqrérì dvpvt v́mbóy dvgǿaòe. 22Herodia àngcèmè gòng ráì nø̀ lv̀m weí, Herod nv̀ng v́mbóy zaqlèrì sv̀ng dvbú dvzá:ròe.
Wervt koqkv́mpèí chø̀myorémè sv̀ng, “Nà èshòng we pà í nìgø, èrøtshì. Ngàí zílv́m íe,” a:lòe. 23Wedø wa mvtaq, “Nà kapà èrøtshì nìnø, ngà móngdàn tiqka høq í nìgø, ngàí zílv́m íe,” wa dvgv́mshìe. #Est. 5:3-6
24Chø̀myorémè búngá:mì nø̀ àngmè sv̀ng, “Ngà pà røtshø̀ng má?” a:lò ke àngmèí, “Tiløp Yohan vgo chvng èrøtná:mò,” a:lòe.
25Wekvt chàng koqkv́mpè yv́ngsv̀ng tiqdvshaqí àng gòngá:mì nø̀, “Akvt ni Tiløp Yohan vgo chv̀ng bàn taq èzá:ngò nø̀ èzǿngà we sv̀ng ngà shònge,” a:lòe.
26Wekvt koqkv́mpè nø gvzà nøt dvshàá:mì nìgø, àng dvgv́mshì bǿì kà nv̀ng àng v́mbóy zaqlèrì rvt, wemè røtkà sv̀ng màwáa mvdaqá:mì. 27Wervt koqkv́mpèí wela:ngí ni cìlcè tiqpè dvzá:rò nø̀, Yohan vgo chvng lvlv́nga:tnò dø dvká:mòe. Wepè búngá:mì nø̀, tung vdòngø Yohan vgo tu:tnòe. 28Ban tiqgø̀m taq Yohan vgo chv̀ng lv́nga:tnà nø̀ chø̀myorémè sv̀ng tvle bǿà nìnø, wemèí rá àngmè sv̀ng zí bǿà. 29Yohan coqcv́nrìí tá bǿà kvt, àngmaq dì ráì weí, àng vnàng lùò nø̀ dvgv̀m yv́ng kǿm bǿà.
Vsv̀ng 5,000 shvá:mò we
30Dvzv́rrì nø Yesu yv́ng kø̀m ráì nø̀, àngmaqí wàa:pmà rì nv̀ng shvngøtna:pmà rì shvngbe Àng sv̀ng dvtáòe. #Luk. 9:10; 10:17 31Vsvngrì vtíshì we luq rvtnø̀, àngmaqí v́mpà v́m gø mvlú:nò høq íe. Wervt Yesuí coqcv́nrì sv̀ng, “Vsv̀ng màvl we tiqyv́ng nøngmaq wa dìì nø̀ narshìá:mì,” a:lòe.
32Wervt àngmaq wa kùngshí zúnshì nø̀ vsv̀ng màvl we tiqyv́ng sv̀ng dìá:mì.#Mat. 14:13-21; Luk. 9:11-17; Yoh. 6:1-13 33Ínìgø, vsv̀ng mvmeí àngmaq búngá:mì we yv̀ng bǿà kvt, Yesu nv̀ng coqcv́nrì í we shá bǿà. Wekvt mvrìngrì kèní vsv̀ngrì nø vdàmdàm weyv́ng sv̀ng kvlv̀ng nø̀ àngmaq vzv̀ng dvtuqshì dá:rì. 34Yesu nø kùngshí kèní léshì daqì ke, vsv̀ng loksok sv̀ng yv̀ng bǿà. Àngmaq nø roqshú màdá we vyv̀ngré dø í rvt, mvré lú:ngà nø̀ À:ngí àngmaq sv̀ng mvshǿl mvme pv̀n shvngøt pà:ngòe. #Dcr. 27:17; Ezk. 34:5; Mat. 9:36
35Nv̀m dø daqì ke, Àng coqcv́nrì Àng yv́ng dì ráì nø̀, “Yayv́ng nø rvgaq mvgung íe, nv̀m gø dø daqì. #Mak. 8:1-9 36Wervt vsv̀ngrì nø shvnvng rvwárì sv̀ng di nø̀ v́mlv́m lvwvnvm dø, àngmaq sv̀ng dèka:ngò lè,” a:lòe.
37À:ngí àngmaq kaq, “Nàmaqí mv̀ng àngmaq sv̀ng shèv́mnø̀ng lè,” wa vtá:noe.
Àngmaqí Àng sv̀ng, “Dinari#6:37 Tiq dinari nø tiqni zìbè íe. vníyáí zidòng wa:nì nø̀, àngmaq sv̀ng túnaì ni má?” a:lòe.
38À:ngí àngmaq sv̀ng, “Nàmaq yv́ng zidòng kadv́ng chv̀ng vle? Èyv̀ngv́mnø̀ng,” a:lòe.
Àngmaqí yv̀ngá:mà dá:ngí, “Zidòng pungwà chv̀ng nv̀ng ngà vní go vle,” wa Àng sv̀ng dvtáòe.
39Wekvt Yesuí vsv̀ng shvngbe nø shøn mvshǿng mvdv̀m àngmvdò àngmvdò rúng dvzv́rlv́m coqcv́nrì sv̀ng dvká:mòe. 40Wekvt àngmaqí tiqmvdòdò nø tiqyágǿ, tiqmvdòdò nø pùngwàcégǿ rúng dvzá:ròe. 41Yesuí zidòng we pungwà chv̀ng nv̀ng ngà goní lá:ngò nø̀, muqlàng kaq dvjaqò sórí Gvray kaq oqà wa dá:ngí, zidòngrì vmø:tnò nø̀ vsv̀ng shvngbe kaq túnalv́m coqcv́nrì sv̀ng tvleòe. Nga goní gø shvngbe sv̀ng vwálaòe. #Mak. 7:34 42Wekvt àngmaq shvngbe vm nø̀ vgàá:mì. 43Zidòng nv̀ng ngasha vché bǿà rì sv̀ng coqcv́nrìí rvku:lò nìnø tiqcé vníjvng dv̀n rvkul lún bǿà. #Drd. 28:5 44Zidòng v́m bǿì rì nø, lvngàré tétǿng rì wa pùngwà kíng gǿ íe.
Tì mvdv̀mdv̀m Yesu di we
Mat. 14:22-36; Yoh. 6:15-21
45Wedá:ngí chàng Yesuí vsv̀ng loksokrì sv̀ng shvloò sórí, Àng coqcv́nrì sv̀ng gø kùngshí vdòng zv́ngshì dvzá:rò nø̀, kupa Betseda rvwá sv̀ng Àng vzv̀ngzv̀ng léshì dvzá:ròe. 46Àngmaq nv̀ng vkang weó Àng nø vjú røtlv́m rvt mvrùl sv̀ng ngangá:mì.
47Døá:mì dvgvp, kùngshí gø̀m nø tìnúngmè rvwè høq bǿà. Yesu nø vdàm rvgaqø Àng wa vle. 48Nv̀mbø̀ng gvzà wa rvt, shø̀ rvp dvshà we sv̀ng Yesuí yv̀ng bǿà. Vsháng gárí dvgvp tìnúngmè mvdv̀mdv̀m àngmaq vl yv́ngsv̀ng Yesu dì ráì nø̀ àngmaq shvnvngnvng vlelv́m dv́nshìe. 49Tìnúngmè mvdv̀m Àng di we àngmaqí yv̀ng bǿà kvt, vshì íe lá:nò nø̀, chvnvnv́n vkiq lú:ngì. 50Àngmaq shvngbeí Àng sv̀ng yv̀ng bǿà nø̀ shérvkaq svreá:mì.
Àngmaq sv̀ng tiqdvshaqí Àng kà tv́ngshì nø̀, “Shaqshaqwa èv̀lnø̀ng. Mèsèrenø̀ngni, Ngà ǿngàe,” a:lòe. 51Kùngshí vdòng sv̀ng Yesu zv́ngshìá:mì kvt, nv̀mbø̀ng gø zø̀lá:mì. Wekvt àngmaq nø vtvngshaq rìràá:mì nø̀ dádv̀ng wae. #Mak. 4:39 52Pàwá wani àngmaq nøt zaq rvtnø̀ pungwà kíng gǿ sv̀ng zidòng shvá:mò lòng sv̀ng gø àngmaqí mvcíng mvrà:lò.
Za vsv̀ng dvba:nò we
53Àngmaq kupa sv̀ng léshì ráì nìnø, Genesaret rvgaq tuq ráì nø̀, tìrìn yv́ng kùngshí vdǿ:nòe. 54Àngmaq kùngshí kèní léshì daqì dvgvp, wervgaq rìí Yesu sv̀ng chàng mvshv́l bǿà. 55Àngmaq nø wervgaq gùrgùr sv̀ng kvlv̀ngá:mì nø̀, Àng kayv́ng vl we tá bǿò nìnø weyv́ng sv̀ng za vsv̀ngrì pvlu taq baqa:tnà. 56Wamàrì nv̀ng mvrìngrì yv́ng gø, rvmá hv́ngrì yv́ng gø Àng kayv́ng tuqvm nìnø weyv́ng àngmaqí zarì nø gvttø̀m yv́ng vyà:lò nø̀, Àng bèlaq mvtú sv̀ng wa shup lúnlv́m dvpvt Àng sv̀ng røtshìe. Àng sv̀ng shup lú:nò dv́ngte nø baná:mì. #Mak. 5:27,28; Dzr. 5:15; 19:11,12
Селектирано:
Marko 6: GSM
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2024, Rvcv́ngcè Kàru Gomidi Kristu Shvngø̀mré. All Rights Reserved.