Markus 16
16
Yeso lwak ma ɓaal ɓawuun
1Ma Asabar ngaar, Maryamu Magadaliya, la Maryamu nggali Yakubu, la Salomi kur tulare lakunla ɓe sa bik, i yid Yeso. 2I tak duru, i tangal ma mwak la saati, sun ganɗa i takwad ban pur la tangal, ki ye ɓeer i ban kilǝk ma, 3la a ɗwa'ar biib ya na, “Ya laa ɗi'ir nggali taal ma kun kilǝk ma?”
4Ama ma a nga'at mus ya, a sun ban, she a sun ma a ɗi'ir ma nggala taal ma i zum. 5Ban ko la ya i ɓaal kilǝk ma, she a sun, munɓo ma mak puupna lu'ut, nǝkni, i kab ɓuk ma li gǝr, she gǝrma sheel ya.
6Munɓo ma shap na, “Ɓi gan sheel wun ɗa. Yeso ma Nazarat, ma a zǝɗi, la wun ngal ban la yi. I lwak ma ɓaal ɓawuun, yi gha bǝni ɓa. Sun, ban ma a mǝ'i gha laami. 7Ama ɓeer na, shap na ɓi ɓoɓa ki bili, la Bitrus na, ‘I liim dum ɓi wun, yi ɓeer i Galili. Wun sun ni bana, wama i shab ka ɓi wun. ”
8Yid maam ɓa ki ɓiin, a sun daal gǝrma ye pak ɓa, she a pur i ɓaal kilǝk ma la miir. A sun shap kun ɗi ɓomaan ɗa, lakunla wup ma wal ya.
9Ma Yeso lwak i ɓaal ɓawuun, i tak duru, i tangal ma mwak la saati, she i swabtak ban purri Maryamu Magadaliya. Maryamu Magadaliya ma i purun ɓi'in kwa'ar kyastaat ɓi i yid. 10Maryamu Magadaliya ɓeer, i shappi ɓoɓa ya ka la Yeso, ɓa raam ɓi ɓo zwal lu. 11Ma a wak na Yeso sun wu ɓa, i sun mi la mushi, she a ɓiin, a sun yak ti'i ɓa.
12Takwad wa, Yeso ta pur ti'i ɗang, ɓi ɓo rwap i ɓaal ɓoɓa ki bili, ki ye sa kwa'at i ɓaal nzaal ma. 13Rwap ɓa kad, a shap gǝrma pak ɓi dǝ'ǝɗi ɓa; ama dǝ'ǝɗi ɓa, sun yak kun ma ɓa kwad.
14A ji gan, she Yeso taa pur ɓi ɓoɓa ki bili, lum ko mwak ɓa, ki ye li gǝrliin. I ngang ya, lakunla tǝr yak kun mamiin laya, la ban ɓiin kun la ɓoɓa suni, i takwad lwak li, i ɓaal ɓawuun.
15She i li dum la ban shap na, “Ɓeer na ɓaal munnza pyang, ɓi wun shap, ɓwaɗan kun la Koǝl, ɓi koyab ɓǝsǝn ɓo ma Koǝl pǝ'i i munnza. 16Koyab ɓoma yakti'i, a pa'am baptisma ɓi, yi kumun yak mud, ama ɓoma sun yakti'i ɓa, ya kum yak mudta. 17Gǝrɓa ɓiɓi, na gus gǝrla ɓoma yakti'i: ya purun na ɓi'in kwa'ar, i ɓaal lwa'a; ya shaɓan kun na piip ging; 18ya bwalan ywaak la ɓuk ya; ya na nuum yam ɓuur, ma wal ɓo ɓi wu, kaa pak gǝrmaan ɗe ɓa; ya la ma'am ɓuk ya i mud ɓoɓa yidkwanan, ye kumun ɓǝs.”
19Takwad ma Yeso shap kun na ya, she a ɗiɓi, kaa ra yi i takkoǝl, la i nǝk, i ɓuk ma li gǝr la Koǝl. 20She ɓoɓa ki bili ɓa pur kaa, shap kun la Koǝl, i koyab ban. La Matadla Koǝl pak gaan na ya, she i mak ɓi ɓo daal na, kun li la a ki shap, lakunla ɓyal gǝr sheel ɓa a ki pak.
Селектирано:
Markus 16: JGK
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
©2023 Seed Company in collaboration with Language Developers and Bible Translators Association