Fagsigadan 8
8
Diyus nu Gfalanggang at Lino
1Nu malino wa dawdaw sas fagdaul daga, bandi nu glugo wa sirut, Diyus namatangan te, “Katsi long, nantarabang kyangay Nuwe fag fulan, ay anggan fagayu tagsanya sad balutu.” Nu katanya, Diyus nafe tagmara sa sangaba tungud lino, laman igfaarimanan igfaalay at lino. 2Ay at sadi at fagbulun, nafatuwas wan at mamam nu gbulbuganan siginan sad daga. Ay anggan at moyan nu kabusbus siginans banwa, intuwas wan. 3-4Nu katanya, at lino gtunglusanan wan nu kaalay. Ay nu nlangfe wan sik kadugayun, at lino inkalay wan. Ay at balutu intungkud wan, sa sik lungud talun, at ngayan Ararat. Sanya fag lungud, ngabat ayu daw at ngay bugsul. Siginan Diyus gfasigad igfalino anggan at balutu intungkud, inlangfe wan 150k menit. Kasakan fiya fiya limak magdanun.
5Ay siginan at balutu intungkud, nu nlangfe wa duwak magdanun ay 13k menit, kalag wan at ngay fungfung muyud, teway at lino kaalay wa gugat gugat. 6Ay siginan ginanya, Nuwe nafalangfe yay 40k menit. Ay nu nlangfe wan kadugenya, Nuwe naluwang at naawat fag fagbantayan sirut. 7Ay at fagbulun, nafalfas sik uwak. Ay kanya fag uwak glayug way sanya sangaba tungud lino anggan wa nafanya at lino nu kaalay.
8Ay Nuwe nu nalag te, ka fag uwak wa nfoli, nafalfas yay fiya sadik manuk, sik linatad. Nangasaful te, go insure wan at daga. 9Ay roro mangaro nafalfas yama, galino yay sa sangaba daga. Ay at linatad ye nalag at fakasubukan. Nu katanya, infoli yadi sas balutu. Ay Nuwe nu nalag te, at linatad infoli yay, nafalugde at take sanya sad sulat at naawat. Ay linatad insubuk yay sat take. Ay Nuwe nafasakbo yay fiya sasad balutu.
10Ay nu nlangfe wan fituk menit, Nuwe nafalfas yay fiya ka fag linatad. 11Ay nus fafun wan, linatad infoli yangay sanya. E tangagan sik don melo, siginans fun ulibu. Nu katanya, Nuwe nasaful te, “Katsi long, e daga wan.” 12Ay dewa katanya, Nuwe nafalangfe yay fiya fituk menit. Ay nafalfas yangay ka fag linatad. Ay linatad long wa nfoli.
13Ay Nuwe kaduge gugat sad balutu, Nuwe at banwa, infamut wa sadi. Nu katanya, at banwa, anwa 601. Ay gina fiya fiya bagu infamut at banwa, ginanya yangay fiya fiya fag menit Nuwe nu gbul at fantabun balutu siginans tungud ugun. Ay Nuwe nu nalingaman sat ngaba day balutu, manlag di, at daga matat wan. 14Ay dewa katanya, Nuwe nafalangfe yay sik magdanun sit dayu 14k menit. Nu ginanya wan, at mamam inlanggang wa fiya fiya. Ay at daga, inkatat wa fiya fiya.
15Ay Diyus iglong wa sas Nuwe te, 16“Katsi long, alfasi wan siginan sad balutu. Falakloi wan am mangena, am ngay baguwama, anggan am ngay baguwama mangena. 17Anggan ay ufud fag ngay mangimut, fag ngay manuk, falakloi yangay. Ay kanya fagayu aayui wa ayuwayu, ay arapyagi wa sa sangaba daga.”
18Ay Nuwe kalfas wa fiya siginan sad balutu. Nafalaklo at mangena anggan at baguwama ay at ngay nugang. 19Anggan fagayu at ufud fag ngay mangimut ay fag ngay manuk, nafalaklo wan. Ay fagayu mangimut nu glaklo, gaygaluwanan tuwa takata mandi at sadi. Anggan at ngay manuk takata mandi at sadi, gasfuwan tuwa nu kalfas.
20Ay Nuwe nu nalfas wan, kawat at fagbatasan at famanyun sas Yawi. Kanya nabul sik ngay batu ayuwayu. Ay nu gfatungkud, nafataladan ay nafatudtungudan. Ay Nuwe nabul sik ngay mangimut ay sik ngay manuk, laman ro at famanyun sas Yawi. Nu gbul, nafafafud fagayu mangimut at masine fanfon sas Yawi ay fagayu manuk at masine fanfon sas Yawi. Ay Nuwe nafate wan. Ay nafaigang sit tungud fagbatasan. Ay nafasad afuy at nafate fag ngay mangimut ay fag ngay manuk, anggan wa nbatas.
21Ay Yawi nu naayuk nu balane, kabebanglu. Ay gamatangan te, “Katsi ban baliwa, kwa gdog fagbulun kata ku nafagbulun ebi daw. Kwa gdog famin tagengasan sas fagdaul daga. Dewa aw nasaful te, at ngay taw siginan ngay alay mauri way at amatanganan, dewa katanya kwa nandog nanfamin fagayu takalag sa sangaba daga. 22Nu katanya, katsi ban baliwa gtunglusanan tuwa nu ginbalian at ngay lungud banwa, kata tenday fantanumun ay fanganiun, anggan fanmoyanun ay fansudyangun. Nu kamenit ay nu kayabi, gtunglusanan tuwa, anggan nu e mariyos ay nu e masugba. Kaduge yap ngay e daga, kanya fagayu gtunglusanan tuwa nu gungbusanan.” Katanya wan Yawi at amatanganan.
Селектирано:
Fagsigadan 8: TAWEAST
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Copyright © 2023 by OMF International, Philippines