Jan 19
19
1Yé Pilat léé, ’wo Jézu bla wɛsɛné nya.
2Sunyanu léli vuru ékema yé wa wo a ’wuo ma alé tɔkoro nya yé wo galunaa sɔ zén a ta. 3Yé wo bié a sɔnɔ yé wo léé: Juifinu nwiinzan blɛn, i nyɔn‐o. Yé wo vo a blin gyɛna.
4Pilat bɔra é ziin yé é lé Juifinu lɛ léé: Ka yé loo? Maa da a nya béera, kalé a gi dɔɔle we ma lé maa ’ka wenyané do kpen ye lɛ a ma lo. 5Yé Jézu bɔra, ’té lélikoro a a ’wuo ma, ’té galunaa sɔ a é zénle a ta. Yé Pilat lé wo lɛ léé: Yee kalé mio, yee lo.
6Balebanmunu segelenu valé sunyanu a ye aan wo, wo siaa léé: ’Ka a gyɛ yiliblan ta! ’Ka a gyɛ yiliblan ta! Pilat lé wo lɛ léé: ’Ka a sia kaboan yé ’ka a gyɛ yiliblan ta, naa, maa ’ka wenyané ye lɛ a ma lo. 7Juifinu lé a lɛ léé: Kolé bélidɔwe do a, yé kolé bélidɔwe ’ko yɛrama é a lé mi ’ko ’é ga. É ’ébo kɛlɛ Kazambale Be nya, azama.
8Pilat dére ’ko ’ma aan wo, kana taa zén a gi é ziin. 9É wɔra é ziin weblekɔn gi, yé é lé Jézu lɛ léé: Fɛ kyɛnna lé i sii? Naa, Jézu ’ka a zi do kpen vɔ lɛ a lɛ lo. 10Pilat lé a lɛ léé: An zi lé i tadɔɔ? I ’ka a gi dɔɔa léé, a se a an lɛ léé, maa i gyɛ yili la loo? Yé a se a an lɛ léé, an daan i ma loo? 11Jézu lé a lɛ léé: Dé wo ’ka a se kɛlɛ lɛ i lɛ lagi loru lo, i ’ka bɔa we do kpen kɛlɛle lɛ an lɛ lo. Bɛwemalé, mi lé é an nɔ i lɛ, alé wenyané blɛn mini izé ta.
12É sia ’bɛ bléyi va, Pilat a kwa kulina léé, ’é daan Jézu ma. Naa, Juifinu siaa léé: Dé i daan a ma ’té i péli ’ka Sézaa va lo. Dé miomian ébo kɛlɛ minwiinzan blɛn nya, ’té é a Sézaa ’léé wɛɛna. 13Pilat dére ’konu ’ma aan wo, é go Jézu nya béera yé é nyana fɛana lé woo we blé, ana. Wo fɛkona laama Pavé, yé wa laama Ébru dére gi, Gabata. 14É a Taboyi lé fɛnu ma’lɛrɛ yi nya, dé yiéyi bléyi léé? a zo. Yé Pilat lé Juifinu lɛ léé: Ka nwiinzan blɛn lé ke ’ko. 15Naa, wo siaa léé: ’Bé gyɛ, ’bé gyɛ! ’Bé gyɛ yiliblan ta! Pilat lé wo lɛ léé: Maa ka nwiinzan blɛn gyɛ yiliblan taa? Balebanmunu segelenu léé: Sézaa ɛ ke ko nwiinzan blɛn nya é do kpen. 16Yé Pilat a nɔ wo lɛ, a gyɛle yiliblan ta we ma. Yé wo Jézu sia yé wo go a nya.
Wo Jézu gyɛ yiliblan ta
(Mt 27:32–44; Mk 15:21–31; Lk 23:26–43)
17Jézu élé yiliblan sia yé é goan, yé é bɔ miwuowɔlɛ lé fɛna, wa laama Ébru dére gi Gɔlgɔta. 18Ana lé wa gyɛ yiliblan ta, mi fié nya é va, a do a a bɛyilazia yé a do a a bɛbolazia, yé Jézu a wo worona.
19Pilat sɛbɛ do gyɛ yé é a pa yiliblan ta loru. É a gyɛ a ta léé: Nazarɛtzan Jézu, Juifinu nwiinzan blɛn lé. 20Fɛana lé wo Jézu gyɛ yiliblan ta é a fla sɔnɔ, bɛwemalé Juifinu kiɛre sɛbɛ ’ko ta fe. É a é gyɛle Ébru dére koo, Latɛn dére koo, Grɛki dére koo, wo gi. 21Juifinu lé Balebanmunu segelenu lé Pilat lɛ léé: Té i sɛbɛ gyɛ léé, Juifinu nwiinzan blɛn, lo; naa, bé gyɛ léé, é a fe léé, ’é a Juifinu nwiinzan blɛn nya. 22Pilat lé wo lɛ léé: We lé maa a gyɛ, yee lé ke bɛ.
23Jézu gyɛle yiliblan ta zuo, sunyanu alé sɔnu sia yé wa lɛ pla ziɛn yé sunyanu a sia do do. Alé varɔ grɔgrɔ lé a bééna ’ka lo, ’té wa tan sɔ do kpen nya, é sia loru yé é zun tɛrɛ, sunyanu a si. Yé wo lé ’wo ke lɛ léé: 24Té kaa a fia lo, naa, kaa ’munnu zun a ma, dé de ɛ dan a gyɛ lɛɛ? We ’ko bɔ dére lé ke é gyɛle Kazambale lé sɛbɛ gi, a lɛsɔɔle we ma, léé:
Wo anlé sɔnu guli ’wo ke ma,
Yé wo ’munnu zun anlé varɔ grɔgrɔ ma.
We lé sunyanu a kɛlɛ, yee lé ke bɛ.
25Jézu bu koo, a bu zuané koo, Klopas na Mari koo, Magadala le Mari koo, wa é dɔle Jézu gyɛ ta yiliblan sɔnɔ. 26Jézu é bu ye aan wo, ’té a zuozan lé é sɔ a lɛ, ’té ’bɛ a é dɔle a bu sɔnɔ, yé é lé é bu lɛ léé: Lezan, i be lé ke bɛ. 27’Bɛ zuo yé é lé é zuozan lɛ léé: I bu lé ke bɛ. É sia ’bɛ bléyi ’ko va, a zuozan go lezan nya élé kɔn ’léé.
Jézu gale
(Mt 27:45–56; Mk 15:33; Lk 23:44–49)
28’Bɛ zuo, Jézu a ye léé, we faa kɛlɛle lɛ sɔɔ, yé é léé: ’Yiminilɔrɔ a an gyɛna. É ’bɛ fe Kazambale lé sɛbɛ giwe lɛsɔɔle we ma. 29’Bɛna mi, bɔ do ana é fanle dɔrɔ tɔndɔle nya. Yé wo nézurufɛ si yé wa vɔ a va, yé wa pa izopéyilibɛ ’léé, yé wa dɔ Jézu lɔ ma. 30Jézu a gi dɔrɔ tɔndɔle mini aan wo, é léé: We faa lɛ sɔɔ. Yé é ’wuo tua, yé a lɛ bo.
Wo Jézu sɛe fɔn
(1 Kor 15:3)
31É a Taboyi lé fɛnu ma’lɛrɛ yi nya; flinyi ’ko a yi blɛn nya, bɛwemalé Juifinu a fe Pilat lɛ léé, munu lé wo wo dun yiliblan ta bɛ, ’i wo ganenu yéli yé ’i wo si yiliblan ta, dé wo kɔlɛnu é da vo yiliblan ta flinyi nya. 32Sunyanu go yé wo a vininzan gane yéli yé ’bɛ bɔluzan lé wo ’bɛ gyɛ a va yiliblan ta, wo ’bɛzé yéli. 33Wo da Jézu va yé wa ye é gale, amalé wo ’ka a gane yéli lɛ lo. 34Naa, sunya do a sɛe fɔn din nya. Tɔɔn nyɛ valé ’yi bɔra a gi. 35Maa lé maa ana ye, maa ɛ fe, yé we lé maa a fe, é a webozen nya. Yé maabozen a gi dɔɔ léé, maa a fe webozen nya, ka dɔle a ta we ma é ziin. 36We ’konu bɔ, we lé wa gyɛ Kazambale lé sɛbɛ gi, a lɛsɔɔle we ma; wo léé:
Wo ’ka dan a wɔlɛ do kpen yéli lɛ lo.
37Yé é a é gyɛle Kazambale lé sɛbɛ gi fɛ bɛna é ziin léé:
Mi lé wa fɔn, wo dan a ye lɛ.
Jézu pale
(Mt 27:57–61; Mk 15:42–47; Lk 23:50–56)
38’Bɛ zuo, Arimatézan Jozɛfu lé é ke Jézu zuozan nya kyeen gi kanale Juifinu lee we ma, é zi laa Pilat lee léé, ’é Jézu gale si. Yé Pilat a nyi si. Bɛwemalé é go, yé é Jézu gale si. 39Nikodɛm lé, ’bɛ da é vinin Jézu va é béli bɛ, ’bɛ da é ziin lianu lé wa vɔɔ, wo nya. Yee lianu tɔ lé miré valé aloɛ; wo kilo sia yɔ fié wɔlɛ ziɛn. 40Yé wo Jézu gale sia yé wo sɔbɛnu vuru a ma yé wo lia ginzannu zén a ma. Wa kɛlɛ Juifinu va mipabɛ gi. 41’Té zian féi a fɛana lé wo Jézu gyɛ yiliblan ta, ana. Zian féi ’ko gi, mi pa gɔlɛkoro dɛrɛ do ana. Wo ’ka tan mi vinin pa lɛ a gi lo. 42Mi pa gɔlɛkoro ’ko ’ka baa lo, amalé wo Jézu pa a gi, Juifinu lé fɛnu ma’lɛrɛ yi lé we ma.
Селектирано:
Jan 19: GOURU
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Alliance Biblique de Cote d'Ivoire 1979