Kelewenu 1
1
Kazambale léé, é dan Léli Sauun nɔ lɛ
(Lk 1:1–4)
1-2Téofil, maa léma: we faa lé Jézu a kɛlɛ, é valé we faa lé é a paa munu gi, é sia Jézu lé nyanama pale pélisia bléyi va fɔɔ yé é bɔ a goyi ma la gi, ’té é nyaa nwunvɔzannu lé é wo si a va é kyɛn, wo béli dɔle nya Léli Sauun nya bɛ, maa wo zuo fe anlé sɛbɛ vininzan gi.
3Alé nyané blele zuo, é bɔra wo va yé ébo gɔɔn wo lɛ bɛ faa ma léé, ’é a é yuɛma. Yi yɔ fié wuo, ’té éé bɔraan wo va, ’té éé Kazambale plale mi nwiin lé we fé wo lɛ.
4Jézu ke aan wo é zuomunu va, é lé wo lɛ léé, té wo si Jérusalɛm lo, naa, Tɔrɔpaazan lé a Ti a fe léé, é dan a nɔ lɛ wo lɛ, ’wa lɛbɛn, yé é lé wo lɛ léé: Yee lé maa a fe ka lɛ é kyɛn. 5Jan munu batizéwo ’yi nya, naa, é vo sɛ yé wo ka batizéwo Léli Sauun nya.
Jézu gole la gi
(Mt 28:18–20)
6A vamunu lé wo ke é zénle ékeva bɛ, wo we laa a lee léé: Mizan, bléyi ’ko va lé i dan Izraɛl lé fuatɛrɛ kɛlɛ lɛ é dɔbɛ gii? 7É a zi pa wo lɛ léé: Yinu valé bléyinu lé an Ti wo dɔ é boan, kalé we ’ka ’bɛ nya lo. 8Naa, dé Léli Sauun vɔ ka ta tɔɔn ’té ka plɛplɛ ye, yé ka kɛlɛ anlé wenayezannu nya, Jérusalɛm koo, Judé tɛrɛ faa koo, Samari tɛrɛ koo, wona, fɔɔ tɛrɛ glɛ sina.
9Jézu lé we ’ko fele zuo é gole sia la gi, ’té a zuomunu yuɛ a a zuo, yé é san lati wuo wo yuɛ va. 10É a gona bléyian va la gi, ’té wo yuɛ a a zuo téiin bɛ, tɔɔn, mi fié lé sɔ fu ke wo ta, wo bɔra wo ma, 11yé wo léé: ’Kaa Galilé munu, mɛwemalé ka dɔ la gi gininaa? Jézu bozen lé, wa si ka worona yé wo goan la gi, fɛan zo lé ka a ye gona la gi, a zo lé é dan da lɛ é ziin.
Wo Judas paizan dɔ
(WGV 16:33; Jn 12:4–6)
12Gɔ lé wa laama Ɔlivi gɔ, ’té é ke é sile Jérusalɛm ma kilo do, flinyi do lé tawole yɛrama bɛ, wo si a nwiin yé wo go Jérusalɛm. 13Wo bɔ aan wo ’bɛna wo go kɔn nwiin kɔn do gi; Piɛri koo, Jan koo, Jak koo, André koo, Filip valé Tɔmas koo, Baatélémi valé Matio koo, Alifé be Jak koo, Zélɔt mi Simɔn koo, Jak be Jud koo, wo nyanana lé. 14Wo faa ’wo yara pa bazorole ta bli do nya, ’té lomu koo, Jézu bu Mari koo, Jézu zuanénu koo, ’té wa wo va.
15’Bɛ bléyi va, bwenu lé wo ke é zénle ékeva, dé wa mi yɔ suiɛdo? yé Piɛri nwa wo méléna yé é léé:
16An bwenu, we lé wa gyɛ Kazambale lé sɛbɛ gi, ’té Léli Sauun a fe é kyɛn David lɔlu nya Judas lé we ma, ’té é ke zi gɔɔnzan nya Jézu kunmunu lɛ bɛ, é a lé a lɛ é sɔɔ. 17É a é pale ko va, ’té éé nyanama duo paan. 18Mi ’ko féi do lɔ weple ma gɔɔli nya, yé é dia yé é faa é bɔn la yé a bun‐an faa nwɛɛn. 19Jérusalɛm munu faa we ’ko dɔɔ é zima, amalé wo féi ’ko tɔ pa wobo dére gi Akɛldama; ’bɛ gi léé, nyɛzanalaféi. 20Wa gyɛ Lɛrɛvɔ sɛbɛ gi léé:
Alé kɔn ’é vo é pla ma,
Té mi do é nyana a gi lo ma.
É a é gyɛle é ziin léé:
Mi bɛ a pagi nyanama pa ma.
21Amalé, munu lé wo ke ko va yifaama, ’té Mizan Jézu a ko méléna, 22é sia bléyian va lé Jan Jézu batizéwo fɔɔ yé é bɔ Jézu nwayi ma ko méléna, é a lé ko wo va mi do si yé é kɛlɛ ko va Jézu nwanayezan nya.
23Yé wo mi fié bɔra a gi, Jozɛfu lé wa laama Baasabas, a gɔnɔ la tɔ lé Jutus, yee valé Matias lé. 24Yé wo bazoro léé: Mizambale, mi faa gi bli dɔɔzan, mi fié lé ko wo si ’ko, dé yeean sɔ i lɛ, bé gɔɔn ko lɛ, 25yé ’é kɛlɛ nyanama ’ko pazan nya, yé ’é kɛlɛ nwunvɔzan nya ko va; naa, Judas sɔn vɔ a ma yé é go fɛ lé ana a nyɛɛ, ana. 26Yé wo ’munnu zun Matias tɔ nya yé é a gyɛ, yé wa pa nwunvɔzannu vu ta do va.
Селектирано:
Kelewenu 1: GOURU
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Alliance Biblique de Cote d'Ivoire 1979