Aba Vatowo 9
9
Yaubada Nowa ikanasiuko tetelina
1E Yaubada Nowa ma natunao idigo kana,
‘Komi kosusāila gagaina bei tubumiyao taiyao poyapoya kovakayaodei.#Abv 1:28. 2Kaga liliuna maa yawoidi poyapoya ame goi, mánuwo liliudi, kaga liliuna sidaladala poyapoya goi be iyaíyana liliudi négwasa goi bei simatoitemi gagaina go, nimami goi ayatoidi komi imi kaba lovina. 3Kaga liliuna maa yawoidi avinimi avami. Nakae boi pai avinimi avami, e nakae ame tuta kaga liliuna avinimi avami. 4Go íwaya ma ikaikaidi taabu kookanīdi! Ikaikayana moe yáwana ana kaba kaiyaka.#Vin 7:26-27; 17:10-14; 19:26; Atu 12:16,23; 15:23; Gui 15:20,29. 5Avatau neta tomota tayamo yawoina ikupo, yau moitamo bei akatumapu. Yoguyogu nakae, neta tomota yawoina ikupo, bei akatumapu. Tokaumata tamo tamo bei akatumapudi.
6Tomota aodugudi yau guna tapata,#Tat 20:13.
tauna avatau neta tomota yawoina ikupo,
e itoboine bei tokaumatayana nakae yawoina sikupo.#Abv 1:26.
7E komi sem kosusāila gagaina bei tubumiyao taiyao poyapoya ana madabokina kovakayaodei.’#Abv 1:28.
8Tuwaina Yaubada kana,
9‘Konōve. Yau komi be tubumiyao be nakae kaga liliuna maa yawoidi akanasiukoimi. 10Moe mánuwo liliudi, yoguyogu liliudi poyapoya goi sikaaiyaka be nakae dedeoga goi komi taiyao kosou. 11Akanasiukoimi ame nakae: Mluwa goi kaga liliuna maa yawoidi geya asamatemneidita. Nakae mluwa goi poyapoya geya abugoyaimneiyeta.’
12Tuwaina Yaubada kana,
‘Guna bei ikaiyako vata komi be tubumiyao be nakae kaga liliuna maa yawoidi yaimi go, ana kaba kinana avinimi. 13Aba kinanayana ame nakae: Guna kíyala gaota goi bogina ayato. Moe aba kinana komi be kaga liliuna maa yawoidi poyapoya goi bogina akanasiukoimi. 14Tuta tamo tamo gaota yábana goi akaiwoduwedi go, kiyalayana nakae gaota goi isowóduwo, 15e guna kanasíuna komi be nakae kaga liliuna maa yawoidi yaimi goi bei anuwokavate. Tauna geya tayaamo tuta tuwaina bei mluwa gagaina idau be nakae mluwa goi kaga liliuna maa yawoidi asamatedi. 16Tauna tutayana kíyala gaota goi isowóduwo, bei agite, e guna kanasíuna vaatayaina komi be kaga liliuna maa yawoidi yaimi goi anuwokavate.’
Tuwaina Yaubada kana,
17‘Ame aba kinanayana goi tayagoi komi be kaga liliuna maa yawoidi poyapoya ana madabokina goi yau taiyao bogina takanasíuna.’
Nowa ma paawakuna tetelina
18E Nowa natunao koroto dedeoga goi sisou moe Semi, Em, Diyepeta. Em natuna koroto yoina Kenani. 19Ame tauyadi adi taito moe Nowa natunaoyadi go, tauyadi yaidi nava tomota liliudi bei sisowóduwo, e poyapoya ana madabokina goi sisapa.
20E Nowa tobágula tayamo go, buyalina igimibaguli. Niga oine keuwoina sisina ikabi, oine bwaena iwodugu. 21E tuta tayamo oineyana inim ginagina, iyaluwo. Go ina yaluwoyana goi ana kwama ivalilivi, e ma paawakuna ina yoyou parai goi imasisi. 22Niga Kenani tamana Em ima yoyouyana goi isiu tamana igite#9:22 Tamana igite: Neta gómana tamana ma paawakuna igite, e tamana ona imayamaya gagaina. Tauna Em ina guinuwayana iguinuwe moe goyogoyoina toina. Ana kaigigita gomanayana tamana geya itaimamineyeta. ma paawakuna go, geya ivatanigoeta, go sem isowóduwo ina moetala goi senao ilatuwokoidi. 23Ago kidi Semi be Diyepeta tanigo sikabi, sina yoyouyana goi sisiu go, sidumasiyasiya, unana tamadi ma pawakuna. Geya vavagidi tamadiyana sigite. E tanigoyana valavadi goi siyoisi, e mlidi goi sivamnamnae tamadi sivatum.
24Tutayana Nowa itaoya natuna Em ina guinuwa inove, tuwo gamona igoyo. 25Tauna Em natuna Kenani ikatubolate, e Yaubada yaina ikawanoi idigo kana,
‘Kenani kuvayōko kina senao idi go,
paakonidi liliudi yaidi goi tauyana bei sobuyekoidi.’
26Aiyuwoina kana,
‘, kom Semi ina Yaubada yaim isakululu,
e kayapaliyem.
Kenani kuvayōko kina Semi ina pákwana.
27Diyepeta ina poyapoya kom Yaubada kukidedēde
bei ana dedevina ibabane.
Diyepetayana be Semi kutagonēdi
madi tuboina taiyao sikaaiyaka.
Go Kenani kuvayōko kina Diyepeta ina pákwana.’
28E mluwa mlina goi Nowa tala ana badabada teri andedi pipti (350) tuwaina ikaaiyaka. 29Tauna tauyana yawoina ana madabokina moe tala ana badabada nain andedi pipti (950), e ikámasa.
Селектирано:
Aba Vatowo 9: GVS
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2019, Wycliffe Bible Translators, Inc. All rights reserved.