लूका 3
3
बतिस्मो देनाळै यूहना गो संदेस
(मत्ती 3:1-12; मरकुस 1:1-8; यूहना 1:19-28)
1आ बात बां दिनां गी है जद महाराजा तिबिरियुस नै रोम साम्राज में राज करतां पन्दरा साल हो'ग्या। बिं टेम पुन्तियुस पिलातुस यहुदिया राज गो राजपाल हो। हेरोदेस राजा गै राज गी च्यार पांती करी झिका में गलील परदेस में हेरोदेस, इतुरैया अर तरखोनीतिस में बिंगो भाई फिलिप्पुस अर अबिलेने राज में लिसानियास राज करतो हो। 2अर बिं टेम यरुसलेम में हना अर कैफा महा याजक हा, तो परमेसर आपगो बचन बन उजाड़ में रेण आळै जकरिया गै बेटै यूहना कनै पुगायो। 3बो यरदन नदी गै आसै पासै सगळै परदेस में जा'गे लोगां नै ओ परचार करण लागग्यो कै थे लोग परमेसर ऊं आपगै पापां गी माफी लेण खातर आपगै पापां गै खातर पसतावो कर'गे पाप करणो छोड़गे बतिस्मो ल्यो। 4जिंया यसयाह परमेसर गी बात बताण आळै गै बचनां गी किताब में यूहना गै बारै में आ परमेसर गी बात लिखेड़ी है:
“बन उजाड़ में एक जणो हेलो मारै कै प्रभु गो रा तैयार करो
अर बिंगी सड़कां सीदी बणाओ।
5जिंया एक बड़ै आदमी गै आवण पर रास्तै नै तैयार कर'गे सड़कां सीदी करै
अर ऊंची जिग्यां नै निची करै अर निची जिग्यां नै भर देवै
अर टेडै मेडै रास्तै नै सीधो करै अर उबड़ खाबड़ नै एकसो करै
इंयाई प्रभु गै आवण खातर लोगां गै मना नै तैयार करो।
6सगळा लोग परमेसर गै मुकतीदाता गा दरसण करसी।”
7यूहना ऊं लोगां गी मोटी भीड़ बतिस्मो लेण आंती जद बण केयो, “अरै सांप गा बच्चों, थानै कण बता दियो कै आण आळै न्याय गै दण्ड ऊं बचण खातर मेरै कनै आओ।#मत्ती 12:34; 23:33 8थे आपगो मन बदळगे दरखतां गी तरियां आच्छा फळ ल्याओ अर बानै झिड़क्या कै थे आपगै मन में घमण्ड ना करो, सागै थे इंया ना सोचो कै अबरहाम झिको धरमी आदमी हो बिंगै घराणै गै होण गै खातर म्हे बच जांवांगा, क्यूंकै मैं थानै साची केऊं कै परमेसर थानै नास कर'गे अबरहाम गै खातर तो आं पथरां ऊं बी उळाद पैदा कर सकै पण परमेसर गै न्याय ऊं कोई बच कोनी सकै। 9अब कुहाड़ो दरखतां गी जड़ां पर रखेड़ो है। ईंखातर झिका-झिका दरखत आच्छा फळ ना ल्यासी बानै बाडगे आग में बाळ देसी।”#मत्ती 7:19
10जद लोगां डरतां पूछयो, “तो म्हे के करां?” 11बण बानै जबाब दियो, “झिकै गै कनै दो कुड़ता है, बो एक कुड़तो बिनै देवै झिकै कनै कोनी अर झिकै गै कनै रोटी है बो आपसरी में बांटल्यै।”
12जद चुंगी लेण आळा बी बतिस्मो लेण आया अर पूछयो कै, “गुरूजी, म्हे के करां?” 13बण बानै केयो कै, “थे चुंगी हक ऊं जादा ना लेई करो,” 14अर सिपाईयां बी पूछयो, “म्हे के करां?” बण जबाब दियो कै “धकै ऊं थे रिपिआ ना ल्यो, अर ना कीं पर झूठो दोस लगाओ, आपगी तनखां में ई संतोस करो।”
15लोगां नै मसी गी आण गी बड़ी आस ही ईंखातर बे आपगै मन में यूहना गै बारै में सोचण लाग्या कै कठैई ओ मसी तो कोनी। 16तो यूहना बां सगळा नै केयो, “मैं तो थानै पाणी ऊं बतिस्मो देऊं, पण झिको आण आळो है बो मेरूं सकतीसाली है मैं बिंगै इतो लाइक कोनी कै बिंगै बुंटा गो फितो खोल सकूं। बो थानै पवितर आत्मा अर आग ऊं बतिस्मो देसी। 17बिंगो छालो बिंगै हात में है, बो आपगो खळो आच्छी तरियां साफ कर'गे अर कणक नै आपगी बखारी में भेळी करैगो पण फूसका नै बिं आग में गेरै गो झिकी कदी बुझण आळी कोनी अर बाळ देसी।” 18ईं तरियां यूहना ग्यान गी भोत बातां समझागे परमेसर गै बचन गो परचार करतो।
यीसू गो बतिस्मो
(मत्ती 3:13; मरकुस 1:9-11)
19जद सारा लोग बतिस्मो लेण लागरया तो बिं टेम यीसू बी बतिस्मो लेगे पराथना करण लागरयो हो, जद सुरग खुलग्यो। 20अर परमेसर गी पवितर आत्मा बिं पर कबूतर गी देह धार'गे उतरी अर आकासबाणी होई कै, “तूं मेरो लाडलो बेटो है, मैं तेरूं भोत ई खुस हूं।”
21जद यूहना चौथाई देस गै राजा हेरोदेस नै बिंगै भाई फिलिप्पुस गी घराळी हेरोदिआस ऊं ब्या करण खातर अर बिंगै माड़ा कामां गै खातर रोळा करया। 22जद हेरोदेस यूहना नै जेळ गै मा करवागे अर एक भोत बुरो काम करयो।
यीसू गी पीढी
(मत्ती 1:1-17)
23यीसू जद आपगी सेवा सरू करी तो बिं टेम बिंगी उंमर लगभग तीस साल गी ही। लोग एली गै बेटै युसुफ गै बेटै गै रूप में बिनै जाणता हा। 24एली मत्तात गो बेटो हो, अर मत्तात लेवी गो बेटो हो। लेवी मलकी गो बेटो हो, अर मलकी यन्ना गो बेटो हो। अर यन्ना योसेफ गो बेटो हो। 25योसेफ मत्तित्याह गो बेटो हो, अर मत्तित्याह आमोस गो बेटो हो। आमोस नहूम गो बेटो हो, अर नहूम असल्याह गो बेटो हो। असल्याह नोगह गो बेटो हो। 26नोगह मात गो बेटो हो, अर मात मत्तित्याह गो बेटो हो। मत्तित्याह सिमी गो बेटो हो, अर सिमी योसेख गो बेटो हो। अर योसेख योदाह गो बेटो हो।
27योदाह यूहना गो बेटो हो, अर यूहना रेसा गो बेटो हो। रेसा जरुबाबिल गो बेटो हो, अर जरुबाबिल सालतियेल गो बेटो हो। सालतियेल नेरी गो बेटो हो। 28नेरी मलकी गो बेटो हो, अर मलकी अद्धी गो बेटो हो। अद्धी कोसाम गो बेटो हो, अर कोसाम इलमोदाम गो बेटो हो। अर इलमोदाम एर गो बेटो हो। 29एर येसू गो बेटो हो, अर येसू इलाजार गो बेटो हो। इलाजार योरीम गो बेटो हो, अर योरीम मत्तात गो बेटो हो। मत्तात लेवी गो बेटो हो।
30लेवी समौन गो बेटो हो, अर समौन यहूदा गो बेटो हो। यहूदा योसेफ गो बेटो हो, अर योसेफ योनान गो बेटो हो। योनान इलयाकीम गो बेटो हो। 31इलयाकीम मलेआह गो बेटो हो, अर मलेआह मिन्नाह गो बेटो हो। मिन्नाह मत्तता गो बेटो हो, अर मत्तता नातान गो बेटो हो। नातान दाऊद गो बेटो हो। 32दाऊद यिसै गो बेटो हो, अर यिसै ओबेद गो बेटो हो। ओबेद बोअज गो बेटो हो, अर बोअज सलमोन गो बेटो हो। सलमोन नहसोन गो बेटो हो। 33नहसोन आम्मीनादाब गो बेटो हो, अर आम्मीनादाब अरनी गो बेटो हो। अरनी हिस्त्रोन गो बेटो हो, अर हिस्त्रोन फिरिस गो बेटो हो। फिरिस यहूदाह गो बेटो हो। 34यहूदाह याकोब बेटो हो, अर याकोब इसहाक बेटो हो। इसहाक अबरहाम गो बेटो हो, अर अबरहाम तिरह गो बेटो हो। तिरह नाहोर गो बेटो हो। 35नाहोर सरूग गो बेटो हो, अर सरूग रऊ गो बेटो हो। रऊ फिलिग गो बेटो हो, अर फिलिग एबिर गो बेटो हो। एबिर सिलह गो बेटो हो।
36सिलह केनान गो बेटो हो, अर केनान अरफसद गो बेटो हो। अरफसद सेम गो बेटो हो, अर सेम नूह गो बेटो हो। नूह लिमिक गो बेटो हो। 37लिमिक मथूसिलह गो बेटो हो, अर मथूसिलह हनोक गो बेटो हो। हनोक यिरिद गो बेटो हो, अर यिरिद महललेल गो बेटो हो। महललेल केनान गो बेटो हो। 38केनान इनोस गो बेटो हो, अर इनोस सेत गो बेटो हो। सेत आदम गो बेटो हो, अर आदम परमेसर गो बेटो हो।
Селектирано:
लूका 3: BGQ
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2023 (Active), Wycliffe Bible Translators, Inc. All rights reserved. © WIn Publishing Trust