Gênesis 15
15
Hoyakalu Himlujyawaklu Abrão Piranapni
1Wane pnute xyekaka Tsru Hixikatshriwa Hoyakalu tokanu hapyehitlu Abrão, satu rupnawleya waneya wane htshinru:
— Hi ppikanu, Abrão. Hita pixa hinokakaklu himaletyehitatshrino hiyrunu pixa tsru pumlujikolu yoptotatshripyi.
2Waneya ruhitlu Abrão:
— Tsru Hixikatshriwa Hoyakalu klunerhe wane pnuteko pumukata henekletno hi he mwuhenewakletno hita? Hiyáhoni Eliézer, Damasco hajeru yoptotanru npohirewaxinri?
3Hiyrunukotnaka wane htshina Abrão:
— Hi penekawhenetno hiyáhoni satu ntowrerucha, hitasko hwatshri yoptochatanru npohirewaxinri.
4Waneya Tsru Hixikatshriwa Hoyakalu tokanu hapyehitlu:
— Xye jeji hi yoptotanru ppohirewaxinri seyni pixa piwheneko jeji, pixa maneko hichpajikatshri yoptotanru ppohirewaxinri.
5Waneya maleka raniklu Tsru Hixikatshriwa Hoyakalu Abrão waneya wane htshinru:
— Teno pyihatanu, putakyahokanro katahirine, pumukata hitakyahoklexiniplo putakyahokanro. Waneya Hoyakalu wan-tshinru:
— Katahiri pejnuplu piklopichane.
6Waneya Abrão halixlu Tsru Hixikatshriwa Hoyakalu hiyáhoni ralixle tshinanni Tsru Hixikatshriwa Hoyakalu powratlu Abrão potukalu rixyawaka.
7Wane pnuteko htshina:
— Hita Tsru Hixikatshriwano Ur, Caldeu-nerune poktshi kochpajijerukno hita, nenejyawakapyi xye tshiji pumlujikolu.
8Waneya Abrão hepomhalu:
— Tsru Hixikatshriwa Hoyakalu, hanhe nixa himatletanru nyoptoxyawakaplu?
9Waneya ruhitlu:
— Panikanwakatanno sato waka, sato cabra, satu carneiro, satkaka mapa mhalerutu panikanwakatanno; satu kamowa, satu pombo koxa.
10Waneya nyi nikkalune ptowruka ranikatka Abrão rutshrajetna, ruhlepokjetlu, rutamakanru seyni kamejirune hi rutshrajeta.
11Waneya kamejirune nikalu herune hapokatka seyni Abrão hakakna.
12Rimxikpiraxinri tkatshi, hi rakota hixapneta Abrão waneya mapchahalu tsru hamlehtaklewatatshri hapyehitlu Abrão.
13Waneya Tsru Hixikatshriwa Hoyakalu wan-tshinru:
— Pimatanru pixa klopichane pa neru tshijne hyinipna hi rimathetkonna. Pa neru towutanunna, hsalewnanunna quatrocentos mhale pejnu.
14Seyni napnokatanunna hsaletjenepni waneya wane pnute ruchpajinrinna tsru pohirewnaleymana.
15Seyni pixa Abrão putsrukatenni yehi pyanu hike mixkatupyi. Pixa putsruknu kamakaxin-potukyi pkapnatko.
16Quatro hatjirtshine pnutpatka hewi hsatkapanna piklopichane klu tshinanu hi hektupotu wanna amorreu-nerune.
17Wane rixa hiphujewnaletatka rimxijinixka tkatshi, mapchahatkalu waneya rakanhatka satu hachhaji wale hitokote ruchpajya tshitshipha hiyrun-koxa hahaje katalu yanamta nikalutshraji hanikajite hyapamta.
18Wale hohneko Tsru Hixikatshriwa Hoyakalu hchinkapkaklu Abrão wane htshinru:
— Pixa klopichane nenekanru xye tshiji haté Egito wenne ruchpajya haté tsru wenu Eufrates tshinikowaka ruchinita.
19queneu-nerune tshijne, quenezeu-nerune, cadmoneu-nerune,
20heteu-nerune, ferezeu-nerune, refains-nerune,
21amorreu-nerune, cananeu-nerune, girgaseu-nerune, jebuseu-nerune.
Селектирано:
Gênesis 15: mpdBiblia
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil