मत्ती 9
9
येशूये काट पक्षाघात छान्च भर्मीकी गेपाक्च
(मर्कूस २:१-१२; लूका ५:१७-२६)
1येशू डुङ्गाङ काल्हार तालपारी लाहा ङुच सहर कफर्नहुमाङ ल्हेस्न राहा। 2भर्मीकै पक्षाघातै छाम ओछ्यानाङ पर्च काट भर्मीकी खाटखाटा न बुवार येशू लेठाङ राका। होसकै होखुरीकुङ विश्वास डाङार पक्षाघात छान्चकी डेया, “ए मीजा, साहस जाटो, नाकुङ पाप क्षमा छान्नने।” 3याङ्च डाङार धर्मगुरुको मध्याङ कुडीक जनै मेखुरीकुङ मीमनाङ डेया, “इचे च परमेश्वरौ निन्दा जाट्न न ले।” 4येशूये होखुरीकुङ विचार थाहा डीन्हार डेया, “नाखुरीकै मीमनाङ हीजै याङ्च दुष्ट विचार जाट्ले? 5इसे भर्मीकी ‘नाकुङ पाप क्षमा छाना’ डेकी र ‘सोवार ह्वानी’ डेकी कुसे चहिँ सजिलो ले? 6तर ङा नाखुरीककी टान्हाक्ले, भर्मीयो मीजाकी पृथ्वीयाङ पाप क्षमा जाट्च अधिकार ले।” होटै होसे पक्षाघाती भर्मीकी डेया, “सोनी, नाकुङ खाट बुवार इमाङ नुङ्नी।” 7होटै होसे भर्मी सोवार लहो इमाङ नुङा। 8जब भर्मीकुङ भीडै इसे डाङा, तब होखुरीक बीह्रीया र परमेश्वरै भर्मीकोलाक याङ्च अधिकार याछबाटै होसकुङ प्रशंसा जाटा।
येशूये मत्तीकी आर्घाच
(मर्कूस २:१३-१७; लूका ५:२७-३२)
9होटै येशू नुङ्चै जाट्नाङ मत्ती डेच काट जना भर्मीकी कर सोट्च अड्डाङ ङुम-ङुच डाङा र होसकी डेया, “ङाकी डुट्नी।” अनि होसे सोवा र होसकोकी डुटा।
10येशू मत्तीयो इमाङ ज्यामा ज्याकी ङुच बेलाङ वास्टै जना कर सोट्चको र अरु पापीको र राहार होसको र होसकुङ चेलाकोखाटा ज्याकी ङुवा। 11जब फरिसीकै होसे डाङा, अनि होखुरीकै येशूओ चेलाकोलाक गीना, “नाखुरीकुङ गुरु हीजै कर सोट्चको र पापीकोखाटा#९:११पापीको: यहूदी धर्मौ अगुवाकै येशूखाटा ज्याच पापीकोलाक अशुद्ध मन्डीमन्या। सुये होसे पापीकोखाटा ज्याले होसकी र अशुद्ध छान्च मन्डीमन्या। ङुवार ज्याले?” 12इसे कुरा सेयार होसकै डेया, “माछाचकोलाक वैद्यौ खाँचो मापर्ले, तर छाचकोलाक वैद्यौ खाँचो पर्ले। 13नुङार इसे धर्मशास्त्रओ अर्थ ही लेसा पान्ही, ‘ङाकी नाखुरीकै बलिदान याछ होइन तर ङा नाखुरीकै अरुकी दया जाट्च मीमन जाट्ले।’#होशे ६:६ हीजैडेनाङ ङा धर्मीकोलाक होइन, तर पापीकोलाक आर्घाकी राछ हो।”
उपवास ङुच बारेयाङ गीन्च
(मर्कूस २:१८-२२; लूका ५:३३-३९)
14होटै न्हुइङ बप्तिस्मा याछ यूहन्नौ चेलाको येशू लेठाङ राहार होसकोकी गीना, “कान र फरिसीको चहिँ उपवास ङुले, तर नाकुङ चेलाको चहिँ हीजै उपवास माङुले?” 15येशूये होखुरीककी जवाफ याहा, “जबसम्म ब्याहुला जन्तीकोखाटा छान्ने, ही होखुरीक शोक जाट्ले र? तर होसे दिन राल्हे जब ब्याहुला होखुरीक लकीङ भाकार आल्हे। अनि होडीक बेला होखुरीक उपवास ङुले।
16 “सुयेर ठोट्र्या बढीनाङ नयाँ बढीनौ टाल्हो माटाल्हीले। हीजैडेनाङ नयाँ टाल्होये बढीनकी खुम्चडीयार च्याट्ले, अनि झन् बढीन वास्टै च्याल्हे।
17 “होटजाट्न न नयाँ अङ्गुरौ मद्य पुरानो छालौ मशकाङ माकाले, नभा च मशक च्याट्ले र अङ्गुरौ मद्य आह्याट्ले। नयाँ अङ्गुरौ मद्य चहिँ नयाँ छालौ मशकाङ न डाकी पर्ले र नीस न जोगडीस्ले।”
याइरसौ मास्टो मीजा र छाच मास्टो
(मर्कूस ५:२१-४३; लूका ८:४०-५६)
18येशूये होखुरीककी इसे कुरा डेमन लेया, होडीक बेला होला काट जना यहूदी शासक राहा, र होसकुङ अगाडि घुँडा टुसार बिन्ती जाट्चै डेया, “हजुर, ङौ मास्टो मीजा चाहाँजा सीया। तर नाको राहार होसे मीटाक नाकुङ मीहुट डाम यान्ही र होसे जीवाले।” 19अनि येशू र होसकुङ चेलाको सोवार होसे शासकखाटा नुङा।
20होडीक न बेला बाह्र वर्षसम्म ह्यु जोक्च रोग लग्डीसार छाच काट जना मास्टोये न्हुङ्लकीङ राहार येशूओ बढीनौ छेउ छुवा। 21हीजैडेनाङ होचे लहे लाहाकी न इट डेया, “इडीक ङै होसकुङ बढीन मट्टै छुवा डेनाङ र ङा गेप्ले।” 22येशूये खार्लाप ल्हेसार न्हुङ्लाक ङोस्नाङ होसे मास्टोकी डाङा र होसकै डेया, “ए मास्टो मीजा, साहस जाट्नी, नाकुङ विश्वासै नाकोकी गेपाक्ङने।” होडीक न बेला होसे मास्टो गेप्की क्योटा।
23जब येशू शासकौ इमाङ टाह्रा, होसकै होला शोक जाटार बाँसुरी आर्म्हाट्चको र भर्मीयो भीडै खैलाबैला जाट्न ङुच डाङा। 24येशूये होखुरीककी डेया, “नाखुरीक बाहिर नुङ्नी, हीजैडेनाङ इसे मास्टो जजा मासीमने, तर मीस्नने।” तर होखुरीकै होसकुङ कुराकी मापट्डीयार रेटार भुरुक्ङ याहा। 25तर जब भीडकी बाहिर छ्युका तब होसको इम भित्री पर्या, र होसकै होसे मास्टो जजौ मीहुट घोवा अनि होसे जुरुक्क सोवा। 26इसे घटनौ बारेयाङ होसे इलाकाभरि न फैलडीसा।
येशूये नीस जना अन्धा र काट जना लाटाकी गेपाक्च
27येशू होटै नुङ्चै जाट्नाङ नीस जना मीमीक माडाङ्च भर्मीको इट डेम च्याक्चै होसको न्हुङ-न्हुङ राहा, “ए दाऊदौ मीजा, कान मीटाक दया जाट्न यान्ही!” 28जब येशू इमाङ टाहा, अनि होसे नीस जना अन्धा भर्मीको र होसको लेठाङ राहा। होसकै होखुरीककी गीना, “ही ङा नाखुरीककी गेपाक्की ह्योक्ले डेच विश्वास ले?” होखुरीकै डेया, “हो प्रभु, विश्वास ले।” 29तब येशूये होखुरीकुङ मीमीक छुचै डेया, “नाखुरीकै विश्वास जाट्च लेखा न नाखुरीककी छान्ख्यो।” 30होटै होखुरीकुङ मीमीक डाङ्की ह्योक्च छाना। येशूये इट डेयार होखुरीककी कडा आज्ञा याहा, “इसे कुरा सुकीर थाहा माछान्ख्यो!” 31तर होखुरीक नुङार होसे इलाकाभरि न होसकुङ बारेयाङ सेटाका।
32होखुरीक होटै ख्योहार नुङ्ङ न लेनाङ, काट जना भूत लग्डीसार लाटा छान्च भर्मीकी येशू लेठाङ राका। 33येशूये भूत छ्युक्च बित्तिकै होसे भर्मीये ङाक्की ह्योका। अनि भीड इट डेचै छक्क पर्या, “इस्राएलाङ सेन र याङ्च माडाङ्ङन्या!” 34तर फरिसीकै डेया, “भूतकुङ मालिकौ सहायता लकीङ इचे भूत छ्युक्ले।”
थोरै ह्यामीको
(मर्कूस ६:३४; लूका १०:२)
35येशूये होखुरीकुङ पट्ट न सहरको र लाङ्घुङ सभा ङुच इमकोवाङ नुङार शिक्षा पाहाक्चै स्वर्गौ राज्यौ सेछ समाचार सेटाक्चै र भर्मीकुङ खाल खालुङ रोगको गेपाक्चै ह्वा। 36भीडकी डाङार होसकुङ मीमन होखुरीकुङ लागि दयै न्हेपार राहा। हीजैडेनाङ होखुरीक गोठ्ला मालेच भेडाको लेखा न हैरान र दु:ख लाचको लेया। 37तब होसकै लहो चेलाकोलाक डेया, “म्हीन्च बाली च प्रशस्त ले, तर ह्यामीको चहिँ थोरै ले। 38होटबाटै फसलौ प्रभुकी प्रार्थना जाट्नी, अनि होसकोकी डेनी लहो फसलाङ ह्यामीको बीर्न्हकानी।”
Селектирано:
मत्ती 9: EMGP
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2025 by Mother Tongue Translators Society and Wycliffe Bible Translators, Inc.