यूहन्ना 2
2
काना डेच सहराङ छान्च ब्याहा
1आपीह्रीन लेखो गालीलुङ काना डेच सहराङ काट ब्याहा लेया। येशूओ मोइ होला लेया। 2येशू र मेकुङ चेलाकोलाक र होसे ब्याहाङ आर्घामन्या।
3ब्याहाङ याछ अङ्गुरौ मद्य भ्याचबाटै येशूओ मोये होसकोकी डेया, “होखुरीकखाटा अङ्गुरौ मद्य भ्यालेसा!” 4येशूये डेया, “मोइ, ङै ही जाट्की पर्ले नाकै ङाकी डेकी मापर्ले। ङौ समय अझैसम्म माह्रामने।” 5येशूओ मोये नोकरकोलाक डेया, “होसकै डेच लेखा जाट्नी।”
6होला ल्हुङ्की खोप्डीयार खास्च छ वटा सय-सय लिटर डी सीन्छ ल्हुङौ घ्याम्पाको लेया। होसे यहूदीकुङ चोखडीस्च चलनौ लागि क्योट्की डामन्या। 7येशूये नोकरकोलाक डेया, “इसे घ्याम्पाको डीये न्हेपाक्नी।” होखुरीकै होसे घ्याम्पौ मेङ्गेरसम्म न डीये न्हेपाक्ङ याहा।
8होटै न्हुइङ येशूये होखुरीककी डेया, “इसे चेक्जा वाकार भोजुङ मुखियाकी म्याङ्की आल्न्ह यान्ही।” अनि होखुरीकै आल्हार याहा। 9भोजुङ मुखियै म्याङ्नाङ च होसे डी अङ्गुरौ मद्य छान्न भ्यामन्या। तर होसे अङ्गुरौ मद्य ही लकीङ छानन्या, होसे कुरा चहिँ होसकी थाहा मालेया। होसे मद्य राक्च नोकरकोलाक मट्टै थाहा लेया। भोजुङ मुखिया ब्याहुला लेठाङ राहा 10अनि डेया, “अरु भर्मीकै च पहिला महङ्गो खालुङ मद्य गाकी याल्हे अनि पाहुनाकै वास्टै मद्य गाम भ्यारखीङ मट्टै सस्तो खालुङ याल्हे, तर नाकै च चाहाँसम्म र पट्ट डेनाङ सेछ चहिँ टी जोगडीम डामेसा।”
11येशूये जाट्च अचम्मौ चिन्हको मध्याङ इसे पहिलो चिन्ह होसकै गालीलुङ काना सहराङ जाट्च हो। इटजाट्न होसकै लहो महिमा टान्हाका, र होसकुङ चेलाकै होसको मीटाक विश्वास जाटा। 12होटै न्हुइङ येशू, लहो मोइ, भाइको र चेलाकोखाटा म्हाका कफर्नहुम सहराङ नुङार कायाक नीस याक होला न ङुवा।
येशूये परमेश्वरौ मन्दिर शुद्ध खास्च
(मत्ती २१:१२-१३; मर्कूस ११:१५-१७; लूका १९:४५-४६)
13यहूदीकुङ छुटकारौ चाड खेरेप राम्हन्या। अनि येशू यरूशलेमाङ नुङा। 14होसकै भर्मीकोलाक परमेश्वरौ मन्दिरौ चोकाङ ठोर, भेडा र ढुकुर आर्लाम ङुच र पैसा योस्न ङुच डुपा। 15तब येशूये काट कोर्रा खासा, अनि होसे पट्ट न भेडा र ठोरकोलाक परमेश्वरौ मन्दिर लकीङ बाहिर लगारीया, पैसा योस्चकुङ टेबलको पल्टडीम याहा र सिक्काको भेरेट्न याहा। 16अनि होसकै ढुकुरको आर्लाच भर्मीकोलाक डेया, “इसे पट्ट ठोक इला माडानी! ङौ बोयो इमकी व्यापार जाट्च ठाउँ माखास्नी!”#भजनसंग्रह ६९:९
17तब होडीक बेला होसकुङ चेलाकै धर्मशास्त्राङ रीक्च इसे कुरा आर्मीटा, “ए परमेश्वर नाकुङ इमौ जोसै ङाकी भित्री म्हेयै लेखा न सीकाक्ले।”
18यहूदी अगुवाकै येशूकी डेया, “होचे चहिँ नाकोकी इसे काम जाट्च अधिकार ले डेम टान्हाक्ले, ही नाको कानकी होसे काट अचम्मौ चिन्ह टान्हाक्की ह्योक्ले?” 19येशूये होखुरीककी डेया, “इसे परमेश्वरौ मन्दिरकी भत्कडीनी, अनि ङा इसकी फेरि सोम याकाङ खास्न याल्हे।” 20यहूदी अगुवाकै डेया, “इसे परमेश्वरौ मन्दिर खास्की छयालीस वर्ष लग्डीस्नन्या, ही नाको इसकी फेरि सोम याकाङ न खास्की ह्योक्ले?”
21तर येशूये डेच परमेश्वरौ मन्दिर चहिँ होसकुङ मेखोल्हौ न शरीरौ बारेयाङ लेया। 22जब येशू सीच लकीङ जीवाम सोवा, तब होसकै डेच इसे कुरा चेलाकै आर्मीटा, र होखुरीकै धर्मशास्त्र मीटाक र येशूये ङाक्च वचन मीटाक विश्वास जाटा।
23छुटकारौ चाडौ बेला येशू यरूशलेमाङ लेनाङ होला होसकै अचम्मौ चिन्हको जाटा, याङ्च डाङार वास्टै भर्मीकै होसको मीटाक विश्वास जाटा। 24तर येशू होखुरीकुङ भरोसाङ मापर्या, हीजैडेनाङ होसकै पट्ट न भर्मीकुङ मीमन सेम्हजा वार्न्हन्या। 25होसकोकी भर्मीयो बारेयाङ सुयेर पाहाक्की मापर्नन्या, हीजैडेनाङ होसकोकी भर्मीयो भित्री मीमन थाहा लेया।
Селектирано:
यूहन्ना 2: EMGP
Нагласи
Сподели
Спореди
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2025 by Mother Tongue Translators Society and Wycliffe Bible Translators, Inc.