Matu 10
10
1Ti Yezu yi' a zahereba pia la bayi' la, bo' ba kpe'eŋo ti ba ta'na sɛfi'iha gee sa'aha ba nɛreba puan, gee tibera bã'ahi la teem woo. 2A tuntuneba pia la bayi' la yu'ura en ŋwana; Yia dela Simɔn, se'em ti ba Yi'ira Pita la, la a suuɔ Anduru, Yemesi en de Zebedii dayua, la a suuɔ Yɔn, 3Filipi la Batolomi, Tɔmasi la Matu kuba tɔ'ɔha la, Yemesi en de Alifeyusi dayua la, la Tadeyusi, 4Simɔn en de Keenan buuri la, la Yudasi Isikariyɔte se'em en wan koohe Yezu la.
Yezu zahereba la tuunɛ
(Maki 6.7-13; Luki 9.1-6)
5Yezu zahereba pia la bayi' wa, ti a tum gee kagɛ ba yeti, “Da kiŋɛ ya sɛba en dagi Yuuduma buuri la zi'an zi'an, da kɛ̃ ya Samariyaduma tinsɛka puan. 6Gee tugum kiŋɛ ya Izirale piihi wa en bɔregɛ wa zi'an. 7#Luk 10.4-12 Yan kini la, muuli ya faarɛ yelefum wa yeti, ‘Yinɛ sɔ'ɔlum la lɛm ya mɛ na.’ 8Tibɛ ya bã'duma, ihege ya kum, tibɛ ya kunkɔma, sa'ahɛ ya kulekpa'bɛ'ɛhi. Ya to'e la zaŋa, bala, bo' ya zaŋa. 9Da dikɛ ya salema bii salempɛɛlega bii salema a sɛ'a ti ba yi'ira kɔpa ya sɛgana puan, 10#1 Kor 9.14; 1 Tim 5.18 da dikɛ ya tapɔtɔ, futo tuyi' bii tagera pirefum buyi', bii doore, se'ere en sɔi la, ba wan bo' tuntuneba ba nuurɛ dia. 11Tinkãtɛ bii timbila sɛka woo puan ti ya kɛ̃, soke ya baŋɛ se'em en boi ka puan dɛna nɛresuŋɔ, la ya bɔna bilam ta paaɛ ya yɛhega. 12Ya han kɛ̃ yire puan, ni pu'uhɛ ya. 13Yire la duma han to'e ya, bahɛ ti ya suma'ahum la sige de puan, gee ba han ka to'e ya, luke ya suma'ahum ka'a la. 14#Tuum 13.51 Se'em se'em han ka to'e ya bii kelehe ya yelefum la, yan yeheri la, kpa'ahɛ ya nama puuhego bahɛ tinkaŋa bii yidinɛ puan. 15#Pi'il 19.24-28; Mat 11.24 N yeti ya la yelemɛŋerɛ ti, gakerɛ daarɛ la, la wan ta ana ma'ma' bo' Sodom la Gomora tihi gana tinkaŋa taaba.
Mɛlehegɔ kini na
(Maki 13.9-13; Luki 21.12-17)
16 #
Luk 10.3
“Bihɛ ya, mam tuni ya mɛ wuu piihi la sahi tiŋasuka. Wikɛ wuu kampiihi la, gee dɛna ya naana wuu dayɛma la. 17#Mak 13.9-11 Mina ya ba suŋa suŋa, se'ere en sɔi la, bamam en wan nyɔgɛ ya kiŋɛ tugum zi'ihi, gee ŋmɛ' ya ba zamehegɔ yiya la puan. 18Ba wan tari ya kiŋɛ timbihereba la naduma zi'ihen mam zuo, ti la dɛna sɛla n gã' bo' bamam la sɛba n dagi Yuda buuri la. 19#Luk 12.11-12 Ba han ta dikɛ tihɛ, da fabele ya, yan wan tɔgɛ se'em bii yan wan lebehe ba se'em. Yan wan yele se'ere la, wan dikɛ bo' ya hankaŋa puan. 20Se'ere en sɔi la, la dagi yamam mɛhi en tɔgeri, gee ya Sɔ Sia la en tɔgeri dɔla ya puan. 21#Mak 13.12; Luk 21.16 Suuɔ wan ta kɔɔha suuɔ ti ba ku, ti sɔ koohe a bia, ti kɔma me ihege la ba dɔgereba ku ba. 22#Mat 24.9, 13; Mak 13.13; Luk 21.17 Nɛra woo wan ta yaaɛ ya mam zuo, gee se'em n ŋmibe ze'ele ta paaɛ ba'ahegɔ n wan nyɛ faarɛ. 23Ba han mɛleha ya tiŋa kayima puan, zɔ ya loŋe tiŋa kayima. N yeti ya la yelemɛŋerɛ wa, ti ya kan ta'am lomehe Izirale tihi wa ba'ahɛ gee ti Asaala Dayua wa lebena.
24 #
Luk 6.40; Yɔn 13.16; 15.20 “Zahera ka gani a pa'ala, bii yameŋa gana ka kpɛ'ɛma. 25#Mat 9.34; 12.24; Mak 3.22; Luk 11.15 La ani suŋa ti zahera ani wuu a pa'ala, ti yameŋa ana wuu ka kpɛ'ɛma. Ba han yi' yidaana la Beelezebule, yu'yooro tuni taaba ti ba nyaa wan yi'ira a yire nɛreba la?
Se'em en de tu zɔta
(Luki 12.2-7)
26 #
Mak 4.22; Luk 8.17 “Bala zuo, da tara ya dabeem la ba. Se'ere en sɔi la, sɛla ka boi pi' kan pilege, sɛla me ka boi sugɛ kan niiɛ na. 27Mam yele ya sɛla la lika puan, muuli ya de peelumen. Ban waahum sɛla bo' fum la, zom gɔhegɔ muulɛ de. 28Da zoti ya sɛba n wan ta'am ku inganɛ la ma'a gee kan ta'am ku sia la. Gee tugum zoti ya se'em en wan ta'am sagum inganɛ la sia la bugum tiŋa la puan. 29Ba ka koohe amɔkiiha duma ba yi' la kɔbevuŋa ma'a? Gee amɔkiiha la ayima me ka luti tiŋa ti ya Sɔ wa ka mina. 30La ya zuo zonto za'a a kãalɛ ba mɛ. 31Bala zuo, da tara ya dabeem, se'ere en sɔi la, yamam tari tuulum gana amɔkiiha duma en zo'e.
32“Se'em woo en ze'ele nɛreba tiŋasuka purɛ mam yu'urɛ suŋa suŋa, mam me wan ta ze'ele en Sɔ en boi saazuo ha la nɛŋan me purɛ a yu'urɛ suŋa suŋa. 33#2 Tim 2.12 Gee Se'em woo en ze'ele nɛreba tiŋasuka zagehɛ mam, mam me wan ta ze'ele n Sɔ en boi saazuo ha nɛŋan zagehɛ en.
Dagi suma'ahum gee gakerɛ
(Luki 12.51-53; 14.26, 27)
34“Da ti'ihɛ ya ti mam wa'am na ti n tari la suma'ahum wa'am timpaberɛ wa zuo na, mam ka wa'am na ti n tari suma'ahum na, gee su'a.
35Se'ere en sɔi la, mam wa'am na ti n dikɛ la nɛra sa'ahɛ la sɔ,
dikɛ poyua sa'ahɛ la ka ma,
dikɛ poyua sa'ahɛ la ka danyaama.
36 #
Mik 7.6
Nɛra dima paaɛ paaɛ ze'eti la a mɛŋa yire puan na.
37Se'em woo en nɔŋɛ a sɔ bii a ma gana mam ka nari ma. Se'em woo me n nɔŋɛ a dayua bii poyua gana mam ka nari mam. 38#Mat 16.24; Mak 8.34; Luk 9.23 Se'em wuu n ka sakɛ dikɛ a pumpuuredɔɔ zi dɔla mam ka nari ma. 39#Mat 16.25; Mak 8.35; Luk 9.24; 17.33; Yɔn 12.25 Se'em woo n zigeri ti a gu' a vom wan bɔregɛ bu bahɛ. Gee se'em woo me n ka gagɛ a vom yele mam zuo wan nyɛ vom.
Yɔɔrɛ
(Maki 9.41)
40 #
Mak 9.37; Luk 9.48; 10.16; Yɔn 13.20 “Se'em woo en to'e ya, to'e la mam, ti se'em woo en to'e mam me to'e la se'em en tum mam na la. 41Se'em en to'e nɔtɔgeha, en de nɔtɔgeha la zuo, wan to'e nɔtɔgeha yɔɔrɛ. Ti se'em me en to'e nɛretuntɔɔ en de nɛretuntɔɔ la zuo wan to'e nɛretuntɔɔ yɔɔrɛ. 42Se'em woo en pun dikɛ ko'ma'ahega la wala bo' bumbibehi sina wa ayima ti ba de mam zahereba zuo, n yeti ya la Yelemɛŋerɛ ti, ba se'em kan koŋe ba yɔɔrɛ.”
Селектирано:
Matu 10: GBTP
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Gurenɛ New Testament © The Bible Society of Ghana, 2020.