iMbombo izya Vhatumwa 7
7
Imbila iya Siteefani
1Pe umupuuti umupiti ahamuvhuziilizya uSiteefani ahati, “Vhuli, zyonti zye vhayanga zya muumwo?” 2USiteefani ahaamula ahati, “Mwe vhamwitu na mwe vhataata vhaane, tejeelezyi! UMulungu uwa Vhushindamu ámulolesheeye utaata wiitu uAabulahamu, lwe áali mu nsi iya Vhamesopotaamiya, lwe ashiili kusaamila mu nkaaya iya Haalani. 3UMulungu ahamuvhuuzya ahati, ‘Uyeepe mu nsi yaaho, uvhaleshe avhajenzi vhaaho, uyinze mu nsi ye kwe nkulanje.’#7:3 uVhwandilo 12:1 4Pe uAabulahamu ahasaama mu nsi yaakwe iya Vhakalidaayo, ahasogola ahatendama mu Haalani. Lwe uyise aafwa kuukwo, uMulungu ahamusaamwa, ahamuleeta mu nsi ino ye niimwe mukutendama ahavhaliilizyo iha.
5“UMulungu atahaamupa uAabulahamu uvhupwano naapamo mu nsi ino, poosye inga pakuvhiiha ulwayo lwakwe. Ileelo uMulungu áfinzile kuuti, aliimupa insi ino yivhe yaakwe, pooka na vhantu avha luho lwakwe. Ahavhaliilizyo iho uAabulahamu atáamile nu mwana inga wooka. 6UMulungu ahamuvhuuzya ahati, ‘Avhantu avha luho lwaho vhaliivha vhajeni mu nsi iya vhantu avhanji. Ukwo vhalivhavhiiha vhavhe vhazya nu kuvhayimvwa nkaani ku havhaliilizyo aha maaha 400. 7Ileelo ine ndiyilonga insi yiila ye yilivhavhiiha kuvha vhazya, pisinda ndivhafumwa mu nsi iyo inga vhahinze kumpuuta ipa.’#7:7 uVhwandilo 15:13-14; Kufuma 3:12 8Pe uMulungu ahavhiiha ulufingwi#7:8 Ulufingwi: Vhaazya mu Ntantiho izya Mazwi aMajeni. nu Aabulahamu, lwe lwávhombesile kwi idala ilya kuvhatahiili#7:8 Kuvhatahiili: Vhaazya kutahiili mu Ntantiho izya Mazwi aMajeni. avhanaavuli vhonti. Pe uAabulahamu ahamupaapa uYisaaka, lwe aamala insiku 8 kufuma kupaapwa, ahamutahiili. UYisaaka ahamupaapa uYaakobu, ahamutahiili, uYaakobu woope ahapaapa avhaana avhanaavuli 12, ahavhatahiili, ivho vhe vhataata vhiitu.
9“Avhataata vhiitu ivho vhahamulolela umwone umunine uYoosefu, vhahamukazya, ahavha muzya mu nsi iya Miisili. Ileelo uMulungu áamile pooka nu Yoosefu. 10Ahamupoha mu mayimba gaakwe gonti. Havhili ahaamupa uvhushindamu uvhwa njeele pilongolela ilya Falaawo, umwene uwa ku Miisili. Kwi idala ilyo, ahamuvhiiha kuuti uFalaawo amusungwe. Pe uFalaawo ahamuvhiiha kuvha mupiti mu Miisili, na mu nyumba yaakwe yonti iya shimwene.
11“Pisinda, inzala yihagwa mu nsi yonti iya Miisili ni ya Kanaani. Ishaakulya shihavhasilila avhataata vhiitu. Pe kuhavha amayimba amapiti. 12UYaakobu ahiivwa kuuti ku Miisili kuli ishaakulya. Lwe ayiivwa, ahavhasonteelezya avhaana vhaakwe, avhataata vhiitu ivho, lwe lwámile lwa kwanda kusogola ku Miisili. 13Lwe vhasogola ulwa vhuvhili, uYoosefu ahayimanyisya kuuti munine waavho, woope umwene uFalaawo ahavhamanya. 14UYoosefu ahasonteelezya intumi kwa yise uYaakobu kuuti, ayinze ku Miisili pooka nu luho lwakwe lwonti. Ivho vhonti vháamile avhantu 75. 15Pe uYaakobu ahasogola ku Miisili, kwe ahafwila kuukwo pooka na vhataata vhiitu avhanji. 16Amafupa gaavho vhahagatwala ku kwavho, mu nkaaya iya Shekeemu, vhahagasyila mu mbiipa ye uAabulahamu ákazile ku vhaana avha Hamooli.
17“Lwe ahavhaliilizyo hapalamila he uMulungu kwe avhombe zye áfinzile kwa Aabulahamu, uvhwinji uvhwa vhataata vhiitu vhwónjeeye nu kuvha vhupiti nkaani mu nsi iya Miisili. 18Pisinda, mu nsi iyo, ahataliha kukonzya umwene uwunji we atámanyile naazimo izya Yoosefu. 19Umwene uyo ahavhayimvwa avhataata vhiitu, ahavhalajizya avhantu avha luho lwitu kuuti vhavhasumbaje avhaana vhaavho avhacheeche, inga vhafwanje.
20“Mu havhaliilizyo hanaaho uMoose ahapaapwa, áamile mwana umwinza nkaani pilongolela ilya Mulungu. Avhapaafi vhaakwe vhahamusunga ku havhaliilizyo aha meezi gatatu. 21Ileelo lwe vhapootwa kumuzyiha, vhahamuzyiha papiipi ni ijenje. Usamwene uwa Falaawo ahamulombola, ahataliha kumusunga ngati mwana waakwe. 22UMoose ahasambiilila uvhushindamu uvhwa njeele vhwonti uvhwa Vhamiisili, ahavha mudandamazu kuyanga ahinza, havhili ulujendo lwakwe luhavha lugolosu.
23“Lwe aafisya amaaha 40, ahaamula kusogola kuvheenya avhajenzi vhaakwe aVhaisilayeeli. 24Ukwo ahamulola uMumiisili wumo akumuhoma uMwisilayeeli, ahamwavwa umujenzi waakwe uMwisilayeeli, ahalanduzya, ahamugoga uMumiisili. 25UMoose ahasiivhaga kuuti avhajenzi vhaakwe kwe vhamanye kuuti uMulungu kwe avhaposhe kutuushila ku kwakwe, ileelo avhajenzi vhaakwe vhatahazimanyinsanya izyo.
26“Indaavhi yaakwe, ahavhalola aVhaisilayeeli vhavhili vhakulwa, ahanzaga kuuti avhakundanye, ahavhavhuuzya ahati, ‘Imwe, mwe vhaana luho! Shooni she mukwanza muvwalazanye?’ 27Ileelo ula we ahamuhomaga uwamwavho ahamubunshila uMoose, ahamuvhuuzya ahati, ‘Wu naanu we akuvhiisile kuuti uvhe we mupiti, nu kuvha we mulonzi kuli iswe? 28Ukwanza kungoga niine inza vwe waamugozile uMumiisili ula mawiila?’#7:28 Kufuma 2:14 29UMoose lwe ayiivwa amazwi igo, ahashimbila, ahasogola ku nsi iya ku Midiyaani, ahatendama nu kuvha mujeni, ahapaapa avhaana vhavhili kuukwo.
30“Amaaha 40 lwe gaafiha kufuma pe áfisile ku Midiyaani, uMoose áamile kwi ilaala papiipi ni igamba uSinaayi. Pe uhavhizya uwa MWENE uMulungu ahamuloleshela pa shipindi she shihaahaga umwoto. 31Lwe aalola, ahasukumila, ahapalamila papiipi inga ayeenye ahinza. Ahiivwa izwi ilya MWENE, likumuvhuuzya likuti, 32‘Ine ne Mulungu uwa vhataata vhaaho, avha Aabulahamu nu Yisaaka nu Yaakobu.’#7:32 Kufuma 3:6 UMoose ahatetema kwi lyoga, ahanyila nu kwenya.
33“Pe uMWENE uMulungu ahamuvhuuzya ahati, ‘Zuula ivilyatu vwaho, mwe pe ipo pe uyimiliiye pafinjile. 34Ngavhwenyi amayimba ge vhakuvhombelwa avhantu vhaane ku Miisili, nivuuye inkuuta yaavho, ninzile kuvhapoha. Ishi pe inkusonteelezye usogole ku Miisili.’#7:33-34 Kufuma 3:5, 7, 8, 10”
35USiteefani ahajendeelela kuyanga kuuti, “UMoose uno we aVhaisilayeeli vhámuhaanile, vhahamuvhuuzya kuuti, ‘Wu naanu we akuvhiisile kuuti uvhe we mupiti, nu kuvha we mulonzi?’ Ileelo uMoose uyo we uMulungu ámusonteleziizye kuuti avhe wu songo waavho havhili muposhi waavho, kufumililana na vwe uhavhizya ámulolesheeye pa shipindi paala. 36UMoose we ávhalongoziizye kufuma ku Miisili, kwi idala ilya kuvhomba izya kusukumizya ni vilolesyo ku Miisili na mwa sumbi uwa Shaamu na mu luugwa, ku havhaliilizyo aha maaha 40.
37“UMoose uyo we ávhavhuziizye aVhaisilayeeli kuuti, ‘Muli imwe, uMulungu alivhasevhela umukuvhwi we ali inza ine.’#7:37 iNkumbushizyo izya Ndajizyo 18:15; iMbombo izya Vhatumwa 3:22 38Uweene we áamile mu mpuga iya vhataata vhiitu, lwe vhávhungiine mu luugwa muula. Ukwo uhavhizya ahayangaga nawo mwi igamba uSinaayi, woope ahaposheela amazwi aga vhulanzi, inga aatupe iswe.
39“Ileelo avhataata vhiitu vhatahanzaga kumushindiha, vhahamuhaana, mu mooyo gaavho vhahagaluha ku Miisili. 40Lwe uMoose ahaavha mwi igamba, vhahamuvhuuzya uAaloni umukulu waakwe vhahati, ‘Tugombele iviholanyo ivwa vhalungu, vhe vhatulongozyaje mwi idala. Yeenya, uMoose we atulongolaga kufuma ku nsi iya ku Miisili, tutamanyile zye zimwazile ukwo.’#7:40 Kufuma 32:1 41Ahavhaliilizyo hanaaho, aVhaisilayeeli vhahagomba ishiholanyo she sháali ngati ngwada. Vhahashifumwizya impuutile, nu kushivhiishila ishikulukuulu, ishintu she vhágomvile ku nyoovhe zyavho vhuuvho! 42Pe uMulungu ahavhagunjila, ahavhaleha vhapuutaje izuvha nu mwezi ni nzota, inza vwe yisimviilwe mwi ikalaata ilya vhakuvhwi kuuti,
‘Mwe Vhaisilayeeli! Neene ne muhamfumwizyaga impuutile
ku havhaliilizyo aha maaha 40 kwi ilaala?
43Ndaali! Imwe muhavhusyaga iheema,
lye lyámile ni shiholanyo isha mulungu uMooleki,
ni shiholanyo isha nzota iya mulungu wiinyu uLefaani.
Iviholanyo ivwo, vwe mwávigomvile
kuuti muvipuutaje.
Kuli izyo, kuuti mbatwale muvhe mwe vhakungwa,
kusogola ku nsi iya kutali kushila ku Babeeli.’#7:42-43 uAamosi 5:25-27
44“Kwi ilaala kuula avhataata vhiitu vháamile ni Iheema ilya Vhwahoome.#7:44 Iheema ilya Vhwahoome: AVhayuuda lwe vhashiili kuzenga iNyumba iMfinjile, vhágomvile Iheema. Kwi Iheema ilyo kwe vhahaputilaga. Uvhushindamu uvhwa Mulungu vhwáli mwi Iheema ilyo, kulolesya kuuti áali pooka na vhantu vhaakwe lwe vhakushuula. Vhaazya iNyumba iMfinjile mu Ntantiho izya Mazwi aMajeni. Iheema ilyo lyágomviilwe inza vwe uMulungu ámulajiziizye uMoose, kulandatana ni shiholanyo she ámulolesiizye. 45Pe avhataata vhiitu vhahaposhelezanya ilyenelyo kufishila ahavhaliilizyo aha Yooshuwa, lwe vhayinyatula insi yiila kufuma mu nsi izinji zye uMulungu ázishimbiziizye pilongolela lyavho. Ipo lihasyala mu nsi mwemuula kufishila ahavhaliilizyo aha Daavhudi. 46UMulungu ámusungwilwe uDaavhudi, woope ahamulaavha ahati, ‘We Mulungu wa Yaakobu, unitishile inkuzenjele inyumba.’ 47Ileelo we ámuzenjeeye inyumba iyo, mwana waakwe umwene uSolomooni. 48Ileelo uMulungu uMupiti uwa ku Mwanya, atakutendama mu nyumba zye avhantu vhazenzile. Inza vwe umukuvhwi áyanzile kuuti,
49‘UMWENE uMulungu ahati,
“Ku mwanya lye litengo lyane ilya vhumwene,
pa nsi pe nkuvhiiha ivinama vwane.
Nyumba yooni ye munganzenjela?
Poosye pooshi pe ingatuuzya ine?
50Ivwo vwonti te neene návipezile?”’#7:49-50 uYisaayi 66:1-2”
51USiteefani ahajendeelela kuyanga kuuti, “Imwe mwe muli na mooyo amagomu! Amooyo giinyu na makutwi giinyu gali ngati ga vhantu vhe te Vhayuuda. Shiima imwe mukumudinda uMupepo uMufinjile inza vwe avhataata vhiinyu vhahavhombaga! 52Kuli umukuvhwi we avhataata vhiinyu vhatámuyimvwizye? Yeenyi, vhahavhagoga avhakuvhwi, poosye vhe vhahakuvhwaga uvhukuvhwi kuzya kwinza ukwa Chilisiti, we mugolosu! Uyo, imwe muhamutwala ku vhalugu, muhamugoga! 53Poosye she imwe mwáposheleeye indajizyo izya Mulungu kutuushila kwa havhizya waakwe, ileelo mwáhaanile kuzishindiha.”
Vhakumugoga uSiteefani
54Avhapiti avha Vhayuuda vhaala lwe vhiivwa amazwi aga Siteefani, vhahaviitwa nkaani, nu kuyiluma-luma ku mulaha. 55Ileelo uweene uSiteefani she ayizuuye uMupepo uMufinjile, ahatontomela ku mwanya, ahalola uvhushindamu uvhwa Mulungu, nu Yeesu ayimiliiye ku luvhazu ulwa kundiilo ulwa Mulungu pa vhushindamu uvhupiti nkaani. 56Pe ahayanga ahati, “Yeenyi, naalola ku mwanya kwigusile, uMwana wa Aadamu#7:56 UMwana wa Aadamu: Vhaazya mu Ntantiho izya Mazwi aMajeni. ayimiliiye ku luvhazu ulwa kundiilo ulwa Mulungu pa vhushindamu uvhupiti nkaani!”
57Pe avhapiti avha Vhayuuda vhaala vhahahaana kutejeelezya, vhahadinda amakutwi gaavho, uku vhakuzuma ahalanga, vhahamudomoshela pooka uSiteefani, 58vhahamufumwa panzi pa nkaaya, vhahataliha kumuhoma na mavhwe. Avhahoome vhaala vhoope vhahazuula amakooti gaavho kuyisengaanya kumuhoma, vhahagavhiiha pa vinama ivwa mujaaha wumo we vhahatinji uSaavhuli.
59Lwe vhakumuhoma uSiteefani na mavhwe, uweene ahalaavhaga ahatinji, “Mwene Yeesu, uvhuposheele uvhupuuma vhwane!” 60Pe ahasugamila pansi, ahahoola kwi izwi ahati, “We Mwene, utahavhalonje ku vhutalamalandu uvhu vhwe vhavhomba.” Lwe ayanga izyo, ahafwa. Woope uSaavhuli ahalola hinza kumugoga.
Селектирано:
iMbombo izya Vhatumwa 7: nih
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2021 Wycliffe Bible Translators, Inc.