iMbombo izya Vhatumwa 3
3
UPeeteli akumuponia untendya
1Isiku limo ahavhaliilizyo aha kulaavha, saala 9 iya musanya, avha Peeteli nu Yoohani vhahasogolaga ku Nyumba iMfinjile. 2Ipo páamile umuntu wumo we áamile wu ntendya kufuma kupaapwa. Avhantu vhahamuvhusyaga nu kumuvhiiha pa shikwilo isha Nyumba iMfinjile insiku zyonti. Ishikwilo isho avhantu vhahatinji, iShikwilo iShinza. Vhahamuvhiihaga inga alaavhaje impiiya ku vhantu vhe vhahinjilaga mu lupitu ulwa Nyumba iMfinjile.
3Umuntu uyo, lwe avhalola avha Peeteli nu Yoohani vhakwinjila mu Nyumba iMfinjile, ahavhalaavha vhaamupe impiiya. 4Pe uPeeteli nu Yoohani vhahamutontomela, uPeeteli ahamuvhuuzya ahati, “Twenye!” 5Woope umuntu uyo ahavheenya nu kusuuvhila kuuti kwe vhaamupe shimo.
6Ileelo uPeeteli ahamuvhuuzya ahati, “Ine ntali ni mpiiya, ileelo lye ingavhomba, kwe nkuvhombele. Ku maha aga izina ilya Yeesu Chilisiti uwa ku Naazaleeti, yimiliila ujendaje!” 7UPeeteli ahamulema umuntu uyo inyoovhe iya kundiilo nu kumwimiilisya. Panaapo vhweleele inyaayo ni vihankala ivwa mu vinama ivwa muntu ula vihagoma. 8Ahimiilila naluvhiilo, ahataliha kujenda weeka. Uweene pooka nu Peeteli nu Yoohani vhahinjila mu lupitu ulwa Nyumba iMfinjile. Ahajendaga kumo akudovha nu kumutiima uMulungu. 9Avhantu vhonti vhahamulola akujenda wuuyo weeka kumo akumutiima uMulungu. 10Pe vhahamumanya kuuti, we wula we ahatendamaga nu kulaavha impiiya pa shikwilo isha Nyumba iMfinjile she vhahatinji iShikwilo iShinza. Vhonti vhahasukumila nkaani ku zye zyávhombesile ku kwakwe.
UPeeteli akulumbiilila
11Umuntu ula we vhámuponiizye, lwe akuvhalandata avha Peeteli nu Yoohani, avhantu vhonti vhahasukumilaga nkaani. Pe vhahanda kuvhashimbiilila kufishila pe vhahatinji Idala iLyilishe ilya Solomooni.#3:11 Idala iLyilishe ilya Solomooni lyámile muhati mu lupitu ulwa Nyumba iMfinjile. 12UPeeteli lwe avhalola avhantu ivho, ahavhavhuuzya ahati, “Mwe vhantu vha mu Isilayeeli, shooni she mukusukumila kuli izi? Shooni she mukututontomela iswe? Mukuti umuntu uno twamuponia ku maha giitu, pamo mwe pe iswe tuli nu lujendo ulwinza pilongolela ilya Mulungu? 13UMulungu uwa vhataata vhiitu, avha Aabulahamu#3:13 UAabulahamu: Vhaazya mu Ntantiho izya Mazwi aMajeni. nu Yisaaka nu Yaakobu, amushindisile umuvhomvi waakwe uYeesu, we imwe mwámulonjeleeye ku vhapiti nu kumuhaana lwe uPilaato akuti amusatule. 14Imwe muhamuhaana uYeesu, we Mufinjile wa Mulungu havhili Mugolosu. Ileelo muhalaavha kuuti, umuntu we mugozi we asatulwe! 15Muhamugoga uweene we áali vhwandilo uvhwa vhulanzi, ileelo uMulungu ahamuzyusya. Iswe tuhomesheziizye izyo. 16Ishi umuntu uno we mukumulola, mumumanyile. Izina ilya Yeesu nu kulyitiha izina ilyo, vwe vwamupa amaha. Inza vwe mukumulola mwenti, aapona, mwe pe amwitiha uYeesu.
17“Ishi vhamwitu, imanyile kuuti imwe na vhapiti vhiinyu mwávhomvile izyo, mwe pe mutámanyile. 18Ileelo uMulungu kuli izyo zye zyávhombesile, ágalunjisiizye amazwi gaala ge áyanzile kutuushila mu vhakuvhwi vhaakwe vhonti, kuuti uChilisiti waakwe aliyimvilwa. 19Ishi pinduushi nu kuzileha imbiivhi zyinyu, mumulandate uMulungu inga avhaswile uvhutalamalandu vhwinyu. Pe haliyinza ahavhaliilizyo he mulisankaana, mwe pe muliivha nu MWENE uMulungu. 20Havhili, alivhaleetela uChilisiti we ávhasevheeye kufuma hali, we we wu Yeesu. 21UYeesu akwanzilwa kusyala ku mwanya, kufishila ahavhaliilizyo he uMulungu alivigalulanya ivintu vwonti kuvha vipwa, inza vwe uweene áyanzile kufuma hali, kutuushila ku vhakuvhwi vhaakwe avhafinjile.#3:21 Avhafinjile: Vhaazya mu Ntantiho izya Mazwi aMajeni. 22Mwe pe umukuvhwi uMoose#3:22 UMoose: Vhaazya mu Ntantiho izya Mazwi aMajeni. áyanzile átili, ‘Muli imwe, uMWENE wiinyu uMulungu alivhasevhela umukuvhwi we ali inza ine. Amazwi gonti ge umukuvhwi uyo alivhavhuuzya, muhagatejelezyaje ahinza. 23Umuntu wonti we alihaana kumutejeelezya umukuvhwi uyo, uMulungu alimwefwa mu vhantu vhaakwe nu kumulovwa.’#3:23 iNkumbushizyo izya Ndajizyo 18:15, 18, 19 24Poosye avhakuvhwi vhonti, kwandila umukuvhwi uSaamweli na vhanji vhe vhámulandasite, vhákuvile uvhukuvhwi ku zyonti zye zikuvhombeha insiku izi. 25Izyo zye uMulungu áyanzile kutuushila ku vhakuvhwi ivho, imwe mwe mukuziposheela. Havhili zye uMulungu áfinzile na vhataata vhiinyu, imwe mwe mukuziposheela. UMulungu áfinzile nu taata wiitu uAabulahamu kuuti, ‘Avhantu avha mu nkolo zyonti mu nsi yonti vhalilootwa kutuushila mu vhazukulu vhaaho.’#3:25 uVhwandilo 22:18; 26:4 26Pe lwe uMulungu amusevha umuvhomvi waakwe uYeesu,#3:26 UMulungu amusevha umuvhomvi waakwe uYeesu: Ku Shiyunaani lumo kwe kuuti, UMulungu amuzyusya umuvhomvi waakwe uYeesu. ahamusonteelezya kuli imwe suuti, inga avhaloote kwi idala ilya kuvheefwa mu mbiivhi zyinyu.”
Селектирано:
iMbombo izya Vhatumwa 3: nih
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2021 Wycliffe Bible Translators, Inc.