iMbombo izya Vhatumwa 2
2
Avhantu vhakumuposheela uMupepo uMufinjile
1Lwe isiku ilya Pentekoositi#2:1 IPentekoositi sháamile shikulukuulu she aVhayuuda vhahimbaga lwe vheefwa ivwakulya mu magunda, insiku 50 lwe iPasaaka yatuuha. Vhaazya iNkumbushizyo izya Ndajizyo 16:9-12. Vhaazya iPentekoositi mu Ntantiho izya Mazwi aMajeni. lyafiha, avhantu vhonti vhe vhámwitisile uYeesu, vhávhungiine pooka. 2Naluvhiilo izwi lihivwiha kufuma ku mwanya. Izwi ilyo lyáli ngati nkungu impiti ye yikuvugula, lihiizula mu nyumba yonti mwe vhátendiime. 3Vhahalola ivintu vwe vili ngati mwoto we wukulilimuha, vihatapunkana nu kumugwila wooka wooka. 4Avhantu vhonti vhahiizula uMupepo uMufinjile, vhahataliha kuyanga ku njango izinji, inza vwe uMupepo uMufinjile ávhaloosite.
5Mu Yelusaleemu umwo, vháliipo aVhayuuda vhe vhahamushindihaga uMulungu. Ivho vháfumile mu nsi zyonti.#2:5 Ahavhaliilizyo iho aVhayuuda avhinji vhásaasite mu nsi izinji. 6Lwe vhiivwa izwi ilyo, avhantu impuga impiti vhahavhungaana pooka, vhahasukumila, mwe pe ivho vhonti vhahivwaga vhakuyanga ku njango zyavho. 7Vhahahasamala nu kusukumila vhahati, “Vhuli, avhantu ivha vhe vhakuyanga isho, te vha mu Galilaaya? 8Vhulivhuli iswe swenti tukwivwa zye vhakuyanga mu njango zye twápafwilwe nazyo? 9Muli iswe, vhamo vhafumile mu nsi iya Vhapaliiti ni ya Vhameedi ni ya Vhayelaami ni ya Vhamesopotaamiya. Vhamo vhafumile mu shigavho isha nsi isha Yudeeya ni sha Kapadokiya ni sha Ponto ni sha Aasiya 10ni sha Fuligiya ni sha Pamufiiliya na mu nsi iya Miisili. Vhamo vhakufuma imbazu izya nsi iya Liibiya zye zipalamiine ni nkaaya iya Kileene, avhanji vhinzile kufuma mu nkaaya iya Luumi. Muli iswe, vhaliipo aVhayuuda na vhantu avhanji vhe vhinjiiye mu shipuuto isha Vhuyuuda. 11Vhamo vhafumile mu nsi inyuumu iya pahati pa sumbi ye vhakuti iKileete, na mu shigavho isha nsi isha Alaabiya. Swenti tukwivwa vwe vhakuyanga mu njango zyitu, vhakumutiima uMulungu ku mbombo zyakwe impiti!”
12Avhantu vhonti vhahasukumila nkaani nu kusaaga, vhahavhuzilizanya vhahati, “Ishi she shooni?” 13Ileelo vhamo munuumwo vhahataliha kuvhajevhula vhe vhámwitisile uYeesu, vhahayanga vhahati, “Ivha vhahoziilwe lipele.”
UPeeteli akuvhila
14Pe uPeeteli ahimiilila pooka na vhatumwa avhamwavho vhaala 11, ahataliha kuvhavhilila avhantu vhaala kwi izwi ipiti kuuti, “Mwe Vhayuuda vha mu Yelusaleemu, niimwe mwe Vhayuuda avha mu nsi izinji, tejeelezyi ahinza amazwi ge nkuvhavhuuzya. 15Avhantu ivha vhatahoziilwe inza vwe mukusiivha, mwe pe ahavhaliilizyo iha, saala taatu inzanshi! 16Izi zye uMulungu áyanzile kutuushila kwa mukuvhwi uYooweli kuuti,
17‘Ku manda aga kumpeleela,
ndiivhapa avhantu vhonti uMupepo waane ku vhwinji.
Avhaana vhiinyu avhanaavuli na vhalindu
vhalikuvhwaga uvhukuvhwi,
avhaana vhiinyu avhajaaha
vhalilolaga injozi izya pa minso amazelu,#2:17 Injozi izya pa minso amazelu kwe kuuti uMulungu akuvhalolesezya avhantu izya mu njozi, lwe vhatasupiliiye. Injozi izyo zikulegana na ziila lwe umuntu akuloota, lwe asupiliiye.
vhoope avhasongo vhalilootaga injozi.
18Mu manda igo ndiyiita uMupepo waane ku vhwinji
poosye ku vhavhomvi vhaane avhanaavuli na vhantanda,
vhoope vhalikuvhwaga uvhukuvhwi.
19Ndivhombaga izya kusukumizya
ni vilolesyo ku mwanya na pa nsi.
Ipo paliivha amavhanda nu mwoto
ni lyosi ilyinji nkaani.#2:19 Amavhanda nu mwoto ni lyosi ilyinji nkaani: Amazwi iga gakulolesya kuuti, kuliivha uvhulugu nu vhunanjisu mu nsi.
20Izuvha liligalunkana kuvha shiisi,
nu mwezi wuliivha mushemamu inza amavhanda.
Zyonti izyo zililoleha,
lwe uvhushindamu uvhwa Mwene vhushiili kuloleha
pi isiku liila ipiti ilya kwinza kwakwe.
21Ahavhaliilizyo iho, umuntu wonti we alivhilishila kumulaavha uMwene,
aliipokwa.’#2:17-21 uYooweli 2:28-32”
22UPeeteli ahajendeelela kuyanga kuuti, “Mwe vhanaavuli vha mu Isilayeeli, tejeelezyi amazwi iga! UMulungu avhalolesiizye imwe kuuti akuvhomba imbombo kutuushila kwa Yeesu uwa ku Naazaleeti. Mweneemwe mumanyile ahinza kuuti kwa Yeesu wunuuyo kwe avhomvile amafindango ni zya kusukumizya ni vilolesyo kuli imwe. 23Inza vwe uMulungu ámanyile nu kusivhiilila kuvhomba kufuma hali, ahamuleeta uYeesu kuli imwe. Niimwe muhamugoga kwi idala ilya kuvhasonzya avhatalamalandu kuuti vhamuhomeele pa shihovhenkanyo. 24Ileelo uMulungu ahamuzyusya, ahamusatula mu mayimba aga vhufwe, mwe pe vhutáali na maha aga kumumeneelezya. 25Utaata wiitu uDaavhudi áyanzile izya Yeesu átili,
‘Nkamulolaga uMWENE uMulungu
kwilongolela lyane insiku zyonti,
havhili ali pooka niine
ku luvhazu lwane ulwa kundiilo kunaavwa,
kuli izyo, ntangoogopa.
26Umwoyo waane wuhasansamuha,
pe nkadovhela ku luseshelo.
Havhili umuvhili waane wuliivha nu lusuuvhilo,
27mwe pe te uhandeshe ku vhuzimu,#2:27 Ku vhuzimu: Vhaazya mu Ntantiho izya Mazwi aMajeni.
poosye kwitishila kuuti umuvhili waane vhufishile kuvhola,
ine ne Mufinjile waaho.
28Undanzile amadala aga vhulanzi.
Ulimpa uluseshelo ulupiti nkaani, mwe pe indi pooka niiwe.’#2:25-28 iZabuuli 16:8-11
29“Vhamwitu, ntangavhazyiha kuuti utaata wiitu uDaavhudi áfuuye, avhataata vhiitu vhahamusyila, imbiipa yaakwe yili panaapa kufishila ileelo. 30Ileelo uDaavhudi ámanyile kuuti uMulungu álafile ku lufingwi kuuti alimupwaniha umuntu uwa luho lwakwe mu vhumwene vhwakwe. Havhili, mwe pe áali mukuvhwi, 31ávhwenyi zye zilifumila. Pe ahayanga izya kuzyuha kwa Chilisiti#2:31 UChilisiti: Vhaazya mu Ntantiho izya Mazwi aMajeni. kuuti, uMulungu te ahamuleshe ku vhuzimu, poosye kwitishila kuuti umuvhili waakwe vhufishile kuvhola.
32“UMulungu ahamuzyusya uYeesu uyo, swenti tuhomesheziizye inongwa izi. 33Lwe uMulungu amuzyusya, ahamuzuvwa nu kumuvhiiha ku luvhazu lwakwe ulwa kundiilo pa vhushindamu uvhupiti nkaani. Pe ahaposheela uMupepo uMufinjile kufuma kwa Taata, we áfinzile, ahatwitila wenewo ku vhwinji, izyo zye mukuzilola, nu kuzyivwa. 34UDaavhudi atahayitahaga wuuyo, mwe pe uweene atázuvile ku mwanya. Ileelo áyanzile átili,
‘UMWENE uMulungu ámuvhuziizye uMwene waane átili,
“Tendaama ku luvhazu lwane ulwa kundiilo
pa vhushindamu uvhupiti nkaani,
35kufishila pe navhavhiiha avhalugu vhaaho
pansi pa vinama vwaho.”’#2:34-35 iZabuuli 110:1”
36UPeeteli ahati, “Ishi, aVhaisilayeeli vhonti vhamanye kuuti uYeesu we imwe mwámugozile pa shihovhenkanyo, uMulungu amuvhiisile kuvha wu Mwene havhili wu Chilisiti.”
37AVhayuuda vhaala, lwe vhiivwa inongwa izyo zihaavhasya nkaani mu mooyo gaavho. Pe vhahavhavhuziilizya avha Peeteli pooka na vhatumwa avhamwavho vhahati, “Vhamwitu, ishi tuhonzye vhuli?” 38UPeeteli ahavhaamula ahati, “Mwenti mupindushe nu kwozelwa kwi izina ilya Yeesu Chilisiti, inga muswilwe uvhutalamalandu vhwinyu nu kuposheela ishikunjilwa, kwe kuuti uMupepo uMufinjile. 39Ulufingwi ulwo uMulungu áfinzile kuli imwe na ku vhaana vhiinyu na ku vhantu avha kutali, kwe kuuti ku vhaala vhonti vhe uMWENE uMulungu alivhiita.”
40UPeeteli ahajendeelela kuvhasoha nu kuvhahomeelezya avhantu vhaala ku mazwi aganji aminji, ahati, “Imwe muyiposhe, mutahinze musundwe pooka na vhantu avhavhiivhi avha havhaliilizyo iha!” 41Avhantu avhinji vhahagiitiha amazwi gaakwe isiku liila, vhahoozelwa, vhahonjela avhantu vhe vháfishiiye 3,000 ishi.
Uvhuliilani uvhwa vhantu vhe vhámwitisile uYeesu
42Avhatumwa avha Yeesu vhahasambilizyaga izwi ilya Mulungu ku vhaala vhe vhámwitisile. Vhonti vháamile nu vhuliilani, vhahamensulanaga ikaati nu kulya pooka,#2:42 Vhahamensulanaga ikaati nu kulya pooka: Izyo zihavhombehaga mu havhaliilizyo aha shaakulya isha Mwene. nu kumulaavha uMulungu pooka. 43Avhatumwa vhahavhombaga izya kusukumizya inyinji ni vilolesyo ivwinji, na vhantu vhonti vhahasukumilaga nkaani nu kumunyila uMulungu. 44Avhantu vhe vhámwitisile uYeesu, vhonti vháamile pooka, havhili ivintu vwavho vhahagavhanaga vhonti. 45Vhahakazyaga ivintu vwavho ni mpiiya zye vhaposheela, vhahazigavhanyaaga kulandatana na vwe vhásovheliilwe. 46Vhahavhungaanaga pa Nyumba iMfinjile#2:46 INyumba iMfinjile: Vhaazya mu Ntantiho izya Mazwi aMajeni. insiku zyonti. Havhili vhahavhungaanaga mu nyumba zyavho kumensulana ikaati nu kulya ishaakulya shaavho pooka ku mwoyo umwinza nu luseshelo. 47Vhahamutiimaga uMulungu, nu kuvhahondezya avhantu vhonti. Insiku zyonti, uMwene uYeesu ahonjezyaga avhantu avhanji vhe vhahapokwaga.
Селектирано:
iMbombo izya Vhatumwa 2: nih
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2021 Wycliffe Bible Translators, Inc.