Smnlean 3
3
Tbrinah Kari Utux Baro ka Seediq
1Kana smnlean Utux Baro Tmninun we wano quyu ka mgkala kana camac mkela ba tmraki. Rmengo mqedil ka quyu: “Utux Baro we yaa bale ba rmnengo mesa: Iya uqi ka pnhei qhuni ani maanu ckceka qnlangan nii?” 2Mquri quyu rmengo ka mqedil: “Pnhei qhuni ckceka qnlangan we ani nami uqun kana. 3Wano heyi qhuni gaga ckceka ba qnlangan gaga we, rmnengo ka Utux Baro: Yamu we iya ba uqi, iya tlengi uri. Maha namu mhuqil dhenu.” 4Rmengo mqedil ka quyu: “Uxe namu ka mphuqil. 5Ado mkela ka Utux Baro, ali mnekan namu ciida we mptraguh ka doriq namu, kiya de maha namu mntena Utux Baro mkela malu ma naqah.” 6So kiya de, mqedil we qmita qhuni kiya de knmalu ba ppuqun mesa ka mqedil, pqaras doriq seediq uri. Kuxul riyung seediq ka qhuni kiya ma mege knkela seediq de, ngalun na ka heyi qhuni ma uqun na da. Biqan na ka rseno na gaga msuupu theyaq heya, wada mekan ka heya uri. 7Mtraguh ka doriq daha di ma, nii hani mkela gisu ini plukus mbberas ka dheya de pllutuc tinun daha ka waso qhuni nunuh ma sqeerung daha heyi daha.
8Miyuk bgihur tletu ka karac da, seediq kiya ma mqedil na we, mbahang hrenang gisu mkkesa ckceka qnlangan ka Utux Baro Tmninun de asi tgleing ckceka qhuni qnlangan, qduriq dqeras Utux Baro Tmninun. 9Mlawa seediq kiya ka Utux Baro Tmninun, rmengo heya: “Gaga su inu?” 10Rmengo ka heya: “Mbahang ku hrenang su ckceka qnlangan de, miicu ku di. Ado gisu ku ini plukus ma mbberas, so kiya de tgleing ku da.” 11Rmengo ka Utux Baro Tmninun: “Ima rmnengo sunan, gisu su ini plukus ma mbberas peni? Wada su mekan heyi qhuni, kiya ka pndakar mu yamu iya ba uqi da ho?” 12Rmengo ka seediq kiya: “Mqedil bnege su kenan ma mnsuupu yaku we, heya ka bnege kenan heyi qhuni, kiya de wada ku mekan di.” 13Rmengo mqedil ka Utux Baro Tmninun: “Ma su meepah noda so nii?” Rmengo ka mqedil: “Pnkrkian ku quyu ga de, wada ku mekan di.”
Psgao ka Utux Baro
14Rmengo quyu ka Utux Baro Tmninun:
“Isu we wada su meepah noda so nii de, asi su ka mangal snyusan.
Maha mgkala kana tnbugan ma camac.
Maha su dmoi nbuyas mkkesa,
meekan su dxeral kana kndesan su.
15Pttrqilun maku isu ka mqedil,
ltlutuc lqlaqi su ma ltlutuc lqlaqi na mqedil we maha mpptraqil uri.
Mpluqah tunux su ka heya,
isu we mpluqah su kunu papak na ka isu.”
16Rmengo mqedil dungal:
“Malun misu knrnexan ka kkchedil su,
tmlaqi su ciida we maha su mangal egu knrnexan.
Mpskuxul su riyung rseno su,
heya we mpqlahang sunan.”
17Rmengo Adam dungal:
“Isu we wada su mbahang kari mqedil su,
mnekan su heyi qhuni kiya da,
kiya ka pndakar mu iya bale uqi.
Ririh isu maangal snyusan ka dxeral. Asi su ka mqhuqil meepah kndesan su we meekan su hnrean dxeral.
18Mpheru pako ma srkunux ka dxeral.
Isu we meekan su uuqun ma sama ckceka qnpahan uri.
19Asi su ka mtmmering kana ddqeras kiya ka niqan uuqun su,
betaq su wada mpdxeral.
Ado isu we pneyah su dxeral.
Bengux dxeral ka isu, kiya de mpbrinah su bengux dxeral dungal.”
20Seediq kiya we Eba kesun na tmngayan ka mqedil na. Ado heya we bubu kana seediq. 21Utux Baro Tmninun we ssmalu na lukus qraqil camac, plkusan na Adam ma mqedil na.
Lwaqun Peeyah Eden ka Adam ma Eba
22Rmengo ka Utux Baro Tmninun: “Tai, seediq kiya we mntena ckceka ta da, mkela malu ma naqah. Saya de kcungun ta mosa mangal heyi pnhei qhuni knuudus, mekan de mpkuudus betaq ani knuwan da.” 23Kiya de Utux Baro Tmninun we lwaqun na peeyah Eden qnlangan ka heya, pqpahun na dxeral ka heya. Heya we nangal peeyah ckceka dxeral nii. 24Utux Baro Tmninun ge lwaqan na nganguc ka seediq nii de, pniqun na quri nklaan hido Eden hiya ka kirubing ma hlmadac srana mtqgiya mtqiri, kiya ka sphetur mpqlahang elu qhuni knuudus.
Селектирано:
Smnlean 3: Stgdaya
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
The Bible Society in Taiwan, 2020
© 台灣聖經公會版權所有，2020