LUKU 10
10
Gbɛ̃nɔn baaakɔ̃ akuri awɛɛplanɔ zĩnaa
(Mat 11:20-27; 13:16-17)
1Abire gbɛra Dikiri gbɛ̃nɔn baaakɔ̃ akuri awɛɛpla pãndenɔ dìtɛ, akũ à ń zĩ gbɛ̃nɔn plapla ò doárɛ arɛ wɛ̃tɛ kũ gu kũ á ye à gɛ́nnɔo pínki. 2À pìńnɛ: Pɔ́kɛ̃na zɔ̃kɔ̃, ama a zĩkɛrinɔn dasiro. À wɛ́ kɛ Buradea de à zĩkɛrinɔ gbarɛ ò a pɔ́ kɛkɛ. 3À da zɛ́n. Matɛni á zĩ lán sãnɛ bɔ̀rɔnɔ bà lɛwannanɔ tɛ́mɛ! 4Ásun ɔgɔsɔ̃nɔ sɛ́ro ke bɔ̀kɔlokona ke kyatenɔ. Ásun zɛ zɛ́n à fɔ kpá gbɛ̃kearo. 5Ɔn kũ a gɛ̃n pínki à pi gĩa Luda ɔn pì gba aafia. 6Tó aafiade kú gwe, á fɔɔ aafiade ni gɔ̃nɛ. Tó à kú gwe sɔ̃ro, ani ɛra à suáwamɛ. 7Àgɔ̃ kú ɔn pìi gũn, à pɔ́mina ke pɔ́ble kũ ò kpàáwa ble, zaakũ zĩkɛrii kà à a láada le. Ásungɔ̃ kipaki lilin kɛro. 8Wɛ̃tɛ kũ a gɛ̃n akũ ò á sí, à pɔ́ kũ ò sùoárɛ ble. 9À wɛ̃tɛ pì gyãrenɔ werekɔ̃a, à o gbɛ̃nɔnɛ kpata kũ à bò Luda kĩnaa kà kãni kũńwo. 10Tó a gɛ̃ wɛ̃tɛ gũn, tó odi á sí sɔ̃ro, à bɔtɛ gãnulɛa à pi: 11Bee á wɛ̃tɛ lukutɛ̃ kũ à kpà ó gbála se, o wàra á tona kũ Ludaoo sèeda ũ. Àgɔ̃ dɔ̃ sãnsãn kũ kpata kũ à bò Luda kĩnaa kà kãni. 12Matɛn oárɛ, yãkpatɛkɛgɔrɔ zĩ wɛ́tãmma kũ Sɔdɔmudenɔ ni le nigɔ̃ sã̀na de wɛ̃tɛpidenɔ pɔ́la.
13Waiyoo Kɔrazĩdenɔ! Waiyoo Bɛtɛsaidadenɔ! Tó ma daboyã kũ ma kɛ̀ á tɛ́nɔ kɛ̀ Taya kũ Sidɔ̃o yã, de wɛ̃tɛpidenɔ uta kasanɔ dàda, ò vùtɛ tuburaa à gìi kɛ̀ nɛ̀sɛlitɛnaa sèeda ũ. 14Yãkpatɛkɛ-gɔrɔ zĩ á wɛ́tãmma nigɔ̃ de Tayadenɔ kũ Sidɔ̃denɔ pɔ́la. 15Á Kapɛnamudenɔ sɔ̃, áni gbã à zɔ̃ Ludaan yá? Oni ɔ sɔ̃ái ari gyãwãn.
16Akũ Yesu pì a ìbanɔnɛ: Gbɛ̃ kũ à á yã mà ma yã màmɛ. Gbɛ̃ kũ à gìái gìmaimɛ. Gbɛ̃ kũ à gìmai sɔ̃, ade gì gbɛ̃ kũ à ma zĩimɛ.
17Gbɛ̃nɔn baaakɔ̃ akuri awɛɛpla pìnɔ gɛ̀ɛ, akũ ò ɛ̀ra ò sù kũ pɔnnao ò pì: Dikiri, bee tãnanɔ mìi nàtɛwɛrɛ n tɔ́ yãi. 18Yesu pìńnɛ: Ma Setan è à lɛ̀tɛ bona ludambɛ lán legũpinaa bà. 19Ma á gbá zɛ́ à táa o mlɛ̃̀nɔ kũ fínɔ kũ á ibɛrɛ gbãna pínkinɔa, pɔ́ke ni á kĩnnaro. 20Bee kũ abireo ásun pɔnna kɛ kũ mì kũ tãnanɔ dì natɛárɛoro. À pɔnna kɛ kũ á tɔ́ kú takadan ludambɛ yãi.
21Zĩ birea Luda Nini Yesu pɔ kɛ̀ nna manamana à pì: Baa, musu kũ zĩtɛo Dikiri, ma n sáabu kɛ̀, kũ n yã birenɔ ùtɛ yãdɔ̃rinɔnɛ kũ ɔ̃ndɔ̃rinɔ n boo kyódɔ̃risarinɔnɛ. Lɛmɛ, Baa, zaakũ n pɔyenyĩnaamɛ. 22Ma De pɔ́ sĩnda pínki nàmɛnɛ ma ɔĩ. Gbɛ̃ke Luda Nɛ́ dɔ̃ro, tó adi kɛ De Luda baasiro. Gbɛ̃ke De Luda dɔ̃ro, tó adi kɛ a Nɛ́ kũ gbɛ̃ kũ Nɛ́ pì yei à mɔńnɛnɔ baasiro.
23Akũ Yesu arɛ dɔ̀ a ìbanɔa ńtɛ̃nɛ, à pìńnɛ: Arubarikadenɔmɛ á ũ pɔ́ kũ átɛn e kũ wɛ́o yãi. 24Matɛn oárɛ, annabinɔ kũ kínanɔn kun yã dasi, ò ye ò pɔ́ kũ átɛn enɔ e, odi ero, ò ye ò yã kũ átɛn manɔ ma, odi maro.
Samaria bùsu gbɛ̃ mana
25Dokadɔ̃ri ke fùtɛ de à Yesu yɔ̃ à gwa à pì: Dannɛri, deran mani kɛ nà mà wɛ̃̀ndi kũ àdi lákaro lee? 26Yesu pìnɛ: Deran ò kɛ̃̀ doka takadan nàa? N a kyó kɛ̀ n mà deramɛɛ? 27Gbɛ̃ pìi wèa à pì: Ǹgɔ̃ ye Dikiri n Ludai kũ nɛ̀sɛɛo mɛ̀n do kũ n ninio pínki kũ n laasunnwo pínki n gbãna lɛ́n, n swɛ̃̀ gɔ̃ kúa, abire gbɛra ǹgɔ̃ ye n gbɛ̃dakei lán n zĩda wɛ̃̀ndii bà. 28Yesu pìnɛ: N we mana. Ǹgɔ̃ kɛ lɛ, ĩnigɔ̃ kun. 29Gbɛ̃ pì ye à yã nna kpá a zĩdaa, akũ à Yesu là à pì: Dín ma gbɛ̃dake ũu?
30Akũ Yesu pìnɛ: Gbɛ̃ke mɛ́ à bò Yurusalɛmu àtɛn gɛ́ Yɛriko, akũ kpãni kàsaranɔ zɛ́ zɔ̃̀nɛ. Ò a pɔ́kasanɔ sìa, ò a gbɛ̃̀ búgubugu ari à kà gana. Akũ ò a tòn ò gɛ̃̀ zɛ́la. 31À sù à lè sa'ori ke zɛ́ dokɔ̃nɔ pìi sɛ̀. Kũ à a è, akũ à pã̀nɛ à gɛ̃̀tɛ. 32Lɛmɛ dɔ kũ Levi buri ke kà gu pìn, à a è, akũ à pã̀nɛ à gɛ̃̀tɛ. 33Ama Samaria bùsu gbɛ̃ke tɛ́ zɛ́ pìn. Kũ à sù à a è, akũ à kɛ̀nɛ wɛ̃nda. 34À nài, à ɛzɛ màma gu kũ à kĩ̀nnanɔa kũ nísio kũ sèwɛ̃o, à pɔ́ yĩ̀yĩa. Akũ à a sɛ̀ à dì a zaaki kpɛ, à gɛ̀ɛ kãao nibɔnɔ kipakia, gu kũ à a gwàn. 35Kũ gu dɔ̀, akũ à andurufu ɔgɔ bò mɛ̀n pla à kpà kipakide pìia à pì: Ǹ a gwamɛnɛ. Tó n ɔgɔ dɛ̀ de adila a musu, mani fĩna bonnɛ, tó ma su.
36Tɔ̀! Gbɛ̃nɔn aakɔ̃ pìnɔ tɛ́ dín ntɛn da gbɛ̃ kũ kpãninɔ dàalɛ pì gbɛ̃dake ũu? 37Dokadɔ̃rii pìi wèa à pì: Gbɛ̃ kũ à a wɛ̃nda dɔ̃̀mɛ. Akũ Yesu pìnɛ: Ǹ gɛ́ ǹ kɛ lɛ se.
Yesu kunna Maata kũ Mariamao bɛa
38Gɔrɔ kũ Yesu kũ a ìbanɔn tɛ́ zɛ́n, ò kà wɛ̃tɛ gũn, akũ nɔgbɛ̃ kũ òdi pinɛ Maata Yesu sì a bɛa. 39À dakũna vĩ, òdi a sísi Mariama, à vùtɛ Dikiri gbá sarɛ, àtɛni a yã ma. 40Kĩni zĩ kɛ̀ Maataa dasi, akũ à sù Yesu kĩnaa à pì: Dikiri, kũ ma dakũna ma to zĩ gũn mado, adi kɛnnɛ yãke ũroo? Ǹ onɛ à kpámai. 41Akũ Dikiri wèa à pì: Maata, Maata, ntɛn damu kɛ dasi, ntɛn wari dɔ n zĩdaa kũ yãnɔo dasi. 42Yã mɛ̀n do mɛ́ à zɛ́ vĩ. Mariama baka mana sɛ̀, oni síaro.
Селектирано:
LUKU 10: BB2005
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Bisã Bible © SIM International, 2005.