Yele-za-pɛr-tib 8
8
1A Naaŋmɩn tɩ lɛb'a bãwnɩ a Nowe nɩ a dʋn za, a wɛ-dʋn nɩ a yir dʋn na tɩ lãw nɩ ʋ be a gbor-kpɛ̃ɛ pʋɔ a. Lɛ n'a ʋ tɩ ɩ sɛsɛb fu a tẽw zu, a kʋ̃ɔnɩ tĩ siwre. 2A tẽsɔw pʋ̃ɔmɩ kʋ̃ɔnɩ bul-nɛ́ɛ tɩ kpàr'a, ɛ́ a salom zu kʋ̃ɔnɩ tub-yib-ziir pàw. A saa tɩ ŋmãa na, 3ɛ́ a kʋ̃ɔnɩ sɩrɛ bɩɛlbɩɛl ɛ́ bɛrɛ a tẽw. A kʋ̃ɔnɩ na tɩ paalɩ pàw a tẽw maalɩ bibie lɩz'a ayopõi nɩ pie a (150) tɩ tĩ na siwre, 4ɛ́ a cuwr ayopõi sob, a bibie pie nɩ ayopõi sob daar, a gbor-kpɛ̃ɛ tɩ wa na wa zɩ̃ Araratɩ tan zu. 5A kʋ̃ɔnɩ tɩ cãà na siwre tɩ ta a cuwr pie sob. A tan nyɛɛ tɩ sãá nɩ a cuw ŋa bibi-dãw-niwn sob.
6A na wa maalɩ bibie lɩz'a ayi a, a Nowe tɩ yuo nɩ a gbor-kpɛ̃ɛ tokoro vʋɔr ʋ na tɩ ƴãw a. 7Ʋ tɩ bɛr'ɩ gbagba ʋ yi, mɩ́ cen ɛ́ lɛb wa, gùre nɩ k'aa kʋ̃ɔnɩ sɩr a tẽw zu. 8Al pùorí ʋ bɛr naŋmam ʋ yi, k'ʋʋ bɛl nyɛ̃ a kʋ̃ɔnɩ siwr'a bɩɩ. 9Ɛcɛ a naŋmam bɛ tɩ nyɛ̃ dɔmnʋ zie ɩ, a kʋ̃ɔnɩ na tɩ cãà paalɩ pàw a tẽw a ƴãw. Lɛ n'a ʋ tɩ lɛb wa a gbor-kpɛ̃ɛ pɛr a Nowe zie. A Nowe tɩ tur'ɩ nũu nyɔw a naŋmam ɩ k'ʋ kpɛ a gbor-kpɛ̃ɛ pʋɔ. 10A Nowe tɩ alɛ nɩ bibie ayopõi, ɛ́ lɛb bɛr a naŋmam ʋ yi a gbor-kpɛ̃ɛ pʋɔ. 11A na wa manɛ a zaanʋɔra a, a naŋmam tɩ lɛb'a wa a ʋ zie. Ʋ tɩ cab'ɩ olivʋ tɩ-va-ɓaar a nʋɔrɩ́. À ŋá n'a a Nowe tɩ bãw k'aa kʋ̃ɔ siwr'ɩ a tẽw zu. 12Ʋ tɩ lɛb'a alɛ bibie ayopõi, ɛ́ bɛr a naŋmam ʋ yi. Ɛcɛ ʋ bɛ tɩ lɛb wa a ʋ zie ɩ.
13A Nowe na wa páw yome kɔbr ayʋɔb dɔwlɩ yũon-been a (601), a cuw-dãw-niwn sob bibi-dãw-niwn sob a, a kʋ̃ɔnɩ tɩ sɩr'ɩ a tẽw zu. A Nowe tɩ ír'ɩ a gbor-kpɛ̃ɛ pàwra bɛr, ɛ́ jɩ́r a yẽw nyɛ̃ a tẽsɔw za ʋ ko. 14A cuwr ayi sob bibie pie nɩ ayopõi sob a, a tẽsɔw tɩ ko n welwel.
15Lɛ n'a a Naaŋmɩn tɩ yel a Nowe: 16«Yi a gbor-kpɛ̃ɛ pʋɔ, a fʋ̃ʋ, a fʋ pɔw, a fʋ bidɛbr nɩ a fʋ biir-pɔwbɛ. 17Mɩ̀ ɩ a dʋ̃-pɛ-bʋʋrɛ za na be a fʋ zie a, a yi: a lili za, a dʋ̃-bɛrɛ za nɩ a dʋ̃-pʋrmɛ za na vure a tẽw a. A paalɩ a tẽw ɛ́ dɔwr yɛ̀rɛ.» 18A Nowe tɩ yi n a gbor-kpɛ̃ɛ pʋɔ ʋlɛ nɩ a ʋ bidɛbr nɩ a ʋ pɔw nɩ a ʋ biir-pɔwbɛ. 19A dʋn za, a dʋ̃-pʋrpʋr za, a lili za nɩ bom za na vure a tẽw a tɩ yi n a gbor-kpɛ̃ɛ pʋɔ, tu taa bʋʋrɛ bʋʋrɛ.
20A Nowe tɩ mɛ n bàwr-maal-kuur a Sore ƴãw. A dʋ̃-vɩɛlɩ pʋɔ nɩ a lili-vɩɛlɩ pʋɔ a, ʋ tɩ ír'ɩ dʋ̃-beƴeni a dʋ̃-pɛ-bʋʋrɛ za pʋɔ maal'ɩ nyɩw-a-za-bàwr kʋ̀ a Sore. 21A Sore tɩ wõ n a nyũu na nyu vla a, ɛ́ tɩɛr ʋ pʋɔ: «Ɩ̃ bɛ be za na lɛb ŋmɛ ƴãw a tẽsɔw a nɩsaal ƴãw ɛ. Sɩza n'a, a nɩsaal pɔ̀lʋ daarɩ́ za n'a a ʋ socir mɩ́ tu a faa pùor, ɛcɛ ɩ̃ bɛ be za na lɛb dɔwrɩ bʋ̃-vʋʋra za mɛ̃ à à ŋá ɩ̃ na ɩ a ɩ.
22Lɛn daar za a tẽw na na be a,
bʋrʋ nɩ cɛb, ƴawr nɩ tʋlʋ,
ũon nɩ sɩ̃ɔ, mʋ̃tɔ̃w nɩ tɩ̃ɩsɔw
bɛ be za na ŋmãa ɩ.»
Селектирано:
Yele-za-pɛr-tib 8: DBDC
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
La Bible en Dagara © Alliance Biblique du Burkina Faso, 2013.