Yoane 4
4
Ngat a Samaria
1Nter ayeb Yes ampe, bafarisai bumaok ya ikuweki baronki ba buiki batis amarek Yoane.
2Di ka Yes aukuwek batis bo, baronki bante baukuwek batis.
3Ya kukobu u sues a Yuda, ya kuwe ra Garirea.
4Mayemen itu samp u sina a Samaria.
5Ya kutor u kat a bora bumwetsh bua Samaria, rukompua ra bunta Sikar, u kor irak rawek Yakob muan’ante Yosef.
6Ipek ra mas ra bora Yakob rawara ona, arey Yes, yante kuwar asin u kor ipek rina, itankua rawar kora kor matankua masiampr.
7Ngat mwetsh ntshu a Samaria kuwiy tek mas, Yes kunor yampe : Pek minyi mas ranyo.
8Isin baronki bante bawe u bora bawasomp bisima.
9Ngat a Samaria kunor yampe : Wene u nsi Yuda, isin ye intomp wene minyi mas munyo, minyi ru ngat a Samaria ? Isina basi Yuda kubatak umwens i basi Samaria bo.
10Yes kunsaks yampe : Mpe wene wayeb mukuant mua Ntsampe nto ake nake ikutot awo ampe : Peke minyi mas munyo, wene wamet nak nomp mas, yante yare kiwek mas ma mony.
11Ngat kunor yampe : Kumu ! Wene rek iket bo rurab mas, nto ake ipek rungwar ntima u man, wene mas mas ma mony nak mamona kue ?
12Wene unek tat a bitu Yakob bunen, ntshu asatshuwek ipek rine ra mas, ya mun a rinta anyuk mas mene, nto ake bana bante nto ake basutu bante?
13Yes kunsaks yampe : Muot ntshu nyo mas mene puesa ikak ungwat ;
14Di muot inyo mas mungwek minyi, pues a mas yak kangwat bo, mas mungwek minyi mupiru kok a rues u kat ante, kakaka ukat a mony usir bo.
15Ngat kusakr : Kumu ! Pek minyi mas mene pues a mas ukapuat minyi bo, minyi ukawiy ane uwiy tek mas ane bo.
16Yes kunor yampe : Yaka ur nuem awo, keka uwiy ane.
17Ngat kunsaks yampe : Minyi rek nunk bo, Yes kunor yampe : Wene untot a barabara ampe : Minyi reke nunk bo ;
18Isin wene wamatomp barunka batan, di yona ntshu ngwar awo kekanko, ka nuem awo bo ; wene untot a barabara nkos.
19Ngat kunor yampe : Kumu ! Minyi rumatar wene u profete.
20Batata ba bitu barompok Ntsampe ruk ru nkuentsh mune, di binu biampe ; irak ruromp Ntsampe u Yerusarem.
21Yes kunor yampe : Ngat, ntshyes minyi, itankua ruwiy kuwiy, yeruromp binu Tata, mpe ruk ru nkuentshi mune bo, mpe u Yerusarem bo.
22Di binu bunomp ka rine rak yeb binu ; di bitu tshunomp ri rine rayeb bitu, isina ibants ratoa i basi Yuda.
23Iswenki yeruwiy kuwiy, rinta ramawiy, yeruromp baromp a barabara Ntsampe, yeburomp Tata ya Puinki a Ntsampe (kate mitem mia banta) a barabara, isin Tata ansotok baromp nkos.
24Ntsampe angwak mony, busek baromp ante, bunomp a Puinki a Ntsampe nto ake a barabara.
25Ngat kunsaks yampe : Minyi rumayeb Messia (mpar a rinta ampe Kristo) Ipawiy, mpe yante awiy, yante ipatshusuengs bitu meye makima.
26Yes kunor yampe : Minyi rikutot awo, minyi ru yante.
27Itank rina, baronki ba Yes kuwiy, banta kusisu, nter atar ba. Ya ikutoti i ngat a Samaria, rek a muot u kat a banta amanor ampe : Ukungor ye ? Nto ake ukutot ante isin ye ?
28Ngat kusabompr mpent ante, ya kuwe ra bora kuwasuengs bat u bora yampe :
29Wiy ana, buwimon muot mwetsh amantor mey makima maker minyi ; yante ka Kristo bo ?
30Ba kuto u bora, kuwiy ngwar yante.
Basi Samaria kuyes Yes
31Baronki bante kunor bampe : Kumu ! dja.
32Di Yes kubaror yampe : Minyi rungwa ibisima binu rek bubiyeb bo.
33Baronki kuwors ba banta bamet bampe : Muot mwetshi ngwiy ntshuasi bisima ?
34Yes kubaror yampe : Bisima biami bingwa kutoker ruwont ra yone ntshu amatom minyi, utukokos ngun muante,
35Ka binu bukutot ampe; nkont Sinsasar ine nter sent biket bia nkonto? Di minyi rik birori umun ana mis nkonto bisima bimanang isin kusent.
36Ntshu sente irab konko ante, ikwiny ntompa isin mony usir bo, nkos ntshu nguinya nto ake nsente, buniang irak rumwetsh.
37Mey mas nkos maror banta mawar barabara, yona mwetsh angwak nguinyi, yona ake nsente.
38Minyi ramabitom usente rine rawar binu rek uker bo ; beker baker binu bamakwiny u kate nguna mua banta.
39Basi Samaria ba buiki u bor buna bayesa Yes, isina rutot ru ngat yona aror ya ampe : Yante amantor mey makima maker minyi.
40Nter awiy basi Samaria ngwa yante ba kunor uwar nto a banta, yante amawar nto a banta matu mape.
41Bat ba buiki bekra bayesa isina rutot rante.
42Ba kuror ngat bampe : Bitu rek tshuayes isina ruey runor wene bo, isin bitu tshumangok bit amet, bitu tshumayeb yante angwar Mantis a bat ba man a barabara.
Nter aberes Yes muan a kum mayor
43Matu mape ampis muna, yante kukatu kuwe ra Garirea.
44Isin Yes yamet amatot ampe ; profete kuantonk u bora ante bo.
45Nter awitor yante u Garirea, basi Garirea kunyes, isina banta bamatar meye makima maker yante u Yerusarem rusu ru nianko ; isina banta ake bawar ona rusu rina.
46Yes kukawiy u bora Kana u Garirea irak raker yante mas mawiya mana ma vinyo. Kumu mayor awar ona, muan’ante aukutati u Kapernaum.
47Nter aok yante rusang ra Yes, rakatu yante u Yuda, rawiy yante u Garirea, ya kuwe kuwamon isin kubos nto ante, isina kuonab wibers muan’ante awa kor uwa.
48Yes kunor yampe : Mpe binu utotar mayemp nto bisana bo, binu bak yes bo.
49Kumu mayor kunor yampe : Kumu ! woroma buso ingwar muan ami rek utowa.
50Yes kunor yampe : Yaka, muan awo angwar a mony ; muot yona kuyes mey mamano Yes, ya kuwe.
51Nter awe yante, ya kumwens i baker ngun bante, ba kunor bampe : Muan awo amaberu.
52Ya kubawor itankua raberu yante, ba kutot : A bukoro itankua rasampuare tshiya kumompr.
53Isante a muan kuyeb rent itankua ramanor Yes ampe : Muan awo angwar a mony. Ya kuyes, nto ake basi mper a mpur ante bakima.
54Rine rawar isana ru mpe raker Yes, nter akatu yante u Yuda awiy yante u Garirea.
Селектирано:
Yoane 4: EJK2012
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Copyright © 2012, ASAREB, Suisse MiDi BIBLE