KEJADIAN 10
10
Noh anan-nala tititi-nonosin
(1Taw. 1:5-23)
1Noh anan-nala tititi-nonosin nde ia, Sem, Ham ma Yafet. Basa faa tuak-ka boema, telus bongi anatouk.
2Yafet anan-nala nde Gomer, Magog, Madai, Yawan, Tubal, Mesekh ma Tiras. 3Gomer tititi-nonosin nde, laun manaleo nai Askenas, Rifat ma Togarma. 4Yawan tititi-nonosin nde, laun manaleo nai Elisa, Spanyol, Siprus ma Rodes. 5Leoina fo manaleo ndolo-ndolo tasi su'uk-kala, ma nai pulu-pulu-la, bei-ba'i kain-nala nde hataholi sila-la.
Fo Yafet tititi-nonosin nde basa hataholi sila-la. Leoina esa no leo anan-nala, ala leo nai esa-esak nusan-na, ma esa-esak dede'an.
6Ham anan-nala nde Kus, Masir, Libia ma Kanaan. 7Kus tititi-nonosin nde, laun manaleo nai Seba, Hawila, Sapta, Raema ma Sabtekha. Raema tititi-nonosin nde laun manaleo nai Syeba ma Dedan. 8Kus bongin-na ana touanak esa, na'de Nimrod, fo hataholi ao makadelek makasososak-ka, nai daebafak-ka. 9No Manetualain tutulu-fafalin, de ana da'di hataholi manasopu-manadanga malelaina. Hu ndia de, hataholi-a biasa nafa'da-nae, “Sa'di leo been-na, Manetualain tao o da'di manasopu-manadanga malelaina, sama leo Nimrod.” 10Nai makasososan-na, Nimrod nusan-na neni Babel, Erekh, ma Akad, fo telus lai Babilonia. 11Neme naa mai, de neu leo Asyur neu, boema napadedeik kota Niniwe, Rehobot-Ir, Kalah, 12ma Resen, fo nai Niniwe ma Kalah tala'da. Kota sila-la basa-basas, kota matuina mesa-mesan.
13Masir tititi-nonosin nde, laun manaleo nai Lidia, Anamim, Lehabim, Naftuhim, 14Patrusim, Kasluhim, ma Kaftorim. Fo leoina Filistin-na, bei-ba'i kain nde leoina Kasluhim ndia.
15Kanaan anan-nala nde Sidon, fo ana uluk-ka, ma Het. 16Kanaan boeo bei-ba'i kaik neme leoina Yebusi, Amori, Girgasi, 17hataholi Hewi-la, Arki, Sini, 18Arwadi, Semari, ma Hamati. Leoina Kanaan sila-la, leoanan-nala, ala tapasasala losa dook-ka, 19nalosa sila nusan-na dae toon-na, namaloa neme Sidon leo kona neu, fo nakandoo leo Gerar neu, losa ana deka no Gaza, boema ana leo dulu neu, fo leo Sodom, Gamora, Adma, ma Zeboim, losa ana deka no Lasa.
20Ham tititi-nonosin, nde basa sila-la. Leoina esa no leo anan-nala, ala leo nai esa-esak nusan-na, ma esa-esak dede'an.
21Basa leoina Ibrani-la, bei-ba'i kain nde Sem, fo Yafet ka'an-na. 22Sem anan-nala nde Elam, Asyur, Arpakhsad, Lud ma Aram. 23Aram tititi-nonosin nde, laun manaleo nai Us, Hul, Geter ma Mas. 24Sela aman nde Arpakhsad. Ma Eber aman nde Sela. 25Eber bongin-na anatouk dua; ana uluk-ka, na'de Peleg, nanahu nai tepo-lelen-na, leoina manai daebafak-ka, nanababa'ek; ana ka dua-na, na'de Yoktan. 26Fo Yoktan tititi-nonosin nde, laun manaleo nai Almodad, Selef, Hazar-Mawet ma Yerah, 27Hadoram, Uzal, Dikla, 28Obal, Abimael, Syeba, 29Ofir, Hawila ma Yobab. 30Sila nusan fo mamana leleon-na, namaloa neme Mesa leo Sefar neu, fo nde nusa letelepak manai boboak dulu.
31Sem tititi-nonosin nde, basa sila-la. Leoina esa no leo anan-nala, ala leo nai esa-esak nusan-na, ma esa-esak dede'an.
32Noh tititi-nonosin nde basa sila-la, fo neme leoina leo leoina neu, tunga sila esa-esak tititi-nonosin. Sila nde bongi basa leoina manai daebafak ia lala'en-na, nai lelek basa faa tuak matuaina ndia.
Селектирано:
KEJADIAN 10: twu
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се